Luka 9
9
1Langa ava li likumi na vaviri, na a va ha amaha netsingulu ku mademone gosi, nokuhonnya tsinkudzo. 2Kandi ya va tuma kwilwadza ubwami bwa Nyasaye, nokuhonnya avalwaye. 3Na a va volera, Mu ta vugula kindu kyokugendera, kinga impimbo, kinga imuya, kinga ubukima, kinga ifetha; kandi mu ta va namakoti gaviri. 4Kandi ku tsinyumba tsyosi ya mwingira mu, mu menye mu, kandi mu twule mu kutsia. 5Vosi ava ta mwingiridza, lwa mu twula mu lidala yilyo, mweye ulugukyi ku virenge vyenyu, lu ve kilolekidzu kuvo. 6Navo va twula ni va tsia mu tudala twosi, ni vilwadza ivangeli, ni va honnya hosi.
7Herodi mwami ya hulira vyosi vya kolwa: kandi ya genya ligali, kigira avalala va vola Yohana u simuguki mu vakudzi; 8navandi va vola, Elija u loleki; navandi va vola mulala ku vaprofeti va kale u simuguki. 9Navutswa Herodi ya vola, Nda kalaga Yohana mutwe: navutswa ni bwaha uyu wa mbulira vindu kuli yivi? Ma yenya kumulola.
10Kandi avatumwa lwa virana va mu volera vindu vyosi vya va kola. Naye ya va hila na a tsia navo kuduka mu kyangalangwi kya li kye lidala lya langwa Betsaida. 11Navutswa viduma vya manya ni vi mu londa: kandi ya va bugirira, na a va volera gobwami bwa Nyasaye, na a honnya ava li nobudaka bwelihonnywa. 12Liuva lwa lya mala kweveta, ava li likumi na vaviri vadza ni va mu volera, U sendukidze kiduma va tsie mu tudala twa himbi nomu milimi, va nyole hokugona nevyokulia: kigira ku veye hano mwigendanyama. 13Navutswa ya va volera, Mu va he vyokulia. Navo va vola, Si ku veye nekindu, navutswa milango gyitano netsisudzi tsiviri; ni ga ta li kwinye ni ku tsie kugulira avandu yava vosi vyokulia. 14Kigira va li avandu avasatsa tsielfu tsitano. Na a volera avegidzwi veve, Mu va lohidze vikale, kiduma sa kilala amakumi gatano. 15Ni va kola ndiyo, ni va vikalidza vosi. 16Kandi ya vugula milango gyitanu netsisudzi tsiviri, na a henza migulu, na a vi gasidza, na a megannya; na a ha avegidzwi va hilire kiduma. 17Navo va lagira ni viguta vosi: kandi va vungidza amadonye aga tigala, vihinda likumi na viviri.
18Lwa ya saala yeng'ine, navegidzwi halala naye; ya va teva, na a vola, Viduma vi vola inze mbeve ibwaha? 19Ni va tivula ni va vola, Yohana Mubatidzi; navutsw a avandi aa vola, Ni Elija; navandi, mulala ku vaprofeti va kale u simuguki. 20Naye ya va volera, Navutswa mwinye mu vola mbeye ibwaha? Petro ya tivula na a vola, U veye Kristo wa Nyasaye. 21Navutswa ya veganehidza na a va ha munwa va ta volera mundu kali mulala yaga; 22na a vola, Mwana wa Adamu ga mu dukira a saliridzwe vindu vinyingi, kandi avakulundu, navasalisi vanene, navang'odi va mwambakana, kandi yiitwe, nelidiku lya gavaka a simugukidzwe. 23Kandi ya volera vosi, Uyu wenyanga kunonda, yigaye, a ginge musalaba gwigwe kazozo, a nonde. 24Kigira ku vosi wenyanga kuhonnya liva mwoyo lilye a la li gotidza; navutswa ku vosi u gotidza liva mwoyo lilye kigira inze, a la li honnya. 25Kigira mundu a la nyola ubulahi ki, na a nyola lirova lyosi, navutswa yedividza kinga yegotidza? 26Kigira ku vosi u li mbera tsisoni na makuva gange, naye Mwana wa Adamu a la mu vera tsisoni lwa a lidza mu bukumi bwibwe mwene, nobwa Dada wewe, nobwe tsingelosi avatakatifu. 27Navutswa mmu volera ligali, Ku yava ava singiye hano avalala si va li lola likudza bugira kutanga kulola ubwami bwa Nyasaye.
28Inyima ya makuva yaga ga duka kuli madiku gatanu na gavaka, ya hila Petro na Yohana na Yakobo, ni yanegira mu kigulu kusaala. 29Lwa ya saala, ligondo lyomumoni lya galula, netsingubo tsitsye tsya gwa tsindavu ni tsi ng'ereng'ana. 30Henza avandu vaviri va volerana naye, navo ni Musa na Elija; 31ava loleka mu bukumi, ni va vola agelikudza lilye lya yenya kumalilidza mu Yerusalemi. 32Petro navo va li halala naye, tsindolo tsya va vuha: navutswa lwa va vuka ligali, va lola ubukumi bwibwe, navandu vaviri va li ni va singiye naye. 33Lwa venya kwavukana naye, Petro ya volera Yesu, Mwegidzi, nu bulahi kwinye ku ve hano: leka kwombake vidioli vivaka; kilala ki ve kiliyo, nekindi kya Musa, nekindi kya Elija: ya vula kumanya ga ya vola. 34Lwa ya li na a vola vindu yivi amalesi gadza ni ga va kinga: ni va tia inyinga ya vingira mu malesi. 35Mwoyo gwa twula mu malesi ni gu vola, Uyu nu Mwana wange, mutovole wange: mu mu hulire. 36Kandi lwa mwoyo gwadza, Yesu ya loleka yeng'ine. Navo va kiring'ana, kandi si va volera mundu mu madiku yago vindu vya va lola.
37Mugamba lwa va sulunguta kutwula mu kigulu, kiduma kinene kya mu vuganira. 38Kandi henza, mundu mulala ku kiduma ya hanzuka, na a vola, Mwegidzi, nku saala u henze mwana wange; kigira a veye mwana wange muderwa: 39kandi henza, lidemone li mu gumira, na nonoho a kupa tsikwili; kandi li mu tandula na a tula lifwulu kandi si lyenya kutwula kuye, li mu kindukidza ligali. 40Nda saala avegidzwi vovo va li twulidze; navutswa si va nyala mba. 41Yesu ya tivula na a vola, Mwinye likula li ta suuvira nelihingi, nda va nemwinye kuduka inyinga ki? Kandi nda mu vererera kuduka inyinga ki? Leta mwana wowo hano. 42Na a ki tsia, lya mu tula hasi, lidemone, ni li mu tandula ligali. Navutswa Yesu ya gaya roho mudamano, na a honnya muyai, na a mu ha ise. 43Kandi vosi va genya ubunene bwa Nyasaye.
Navutswa avandu vosi lwa va genya vindu vyosi vya ya kola, ya volera avegidzwi veve, 44Amakuva yaga gingire mu matu genyu: kigira Mwana wa Adamu a la zamirwa makono gavandu. 45Navutswa si va hulira livola yili, kandi lya viswa va ta duka kulimanya; ni va tia kumuteva ku livola yili.
46Lya duka kuvo lihangala, ni va tevana, U li ha kuvo a veye munene. 47Navutswa Yesu lwa ya lola litevana lyemyoyo gyavo, ya vugula mwana mukekeke na a mu vika himbi naye, 48na a va volera, Ku vosi u li bugirira mwana mukekeke uyu kigira lieta lyange, a bugirira inze; kandi ku vosi u li bugirira inze, a bugirira wa ntuma: kigira u veye mukekeke ku mwinye vosi, uyu niye munene.
49Kandi Yohana ya tivula na a vola, Mwegidzi, kwa lola mulala u twulidza amademone ku lieta lilyo; kandi kwa mu gaya kigira si ya londekana nekwinye. 50Navutswa Yesu ya mu volera, Mu ta mu gaya: kigira u ta mu hangalidza, a veye ku luvega lwenyu.
51Amadiku gokwirana igulu lwa genya kuduka, mwene ya saavira kutsia Yerusalemi. Kandi ya tuma avatumwa imbiri wewe: 52ni va tsia ni vingira mu kadala ka Vasamaria, kumulombera. 53Navo si va mwingiridza, kigira mumoni ya fwana u tsia Yerusalemi. 54Kandi avegidzwi veve Yakobo na Yohana lwa va lola ndi va vola, Mwami, wenya ku volere muliru kutwula migulu gu va sambe? 55Navutswa ya girunkana na a va gaya. 56Ni va tsia mu kadala kandi.
57Lwa va genda ku inzira, mundu mulala ya mu volera, Nda ku londa ha u tsia hosi. 58Yesu ya mu volera, Vinywere vi veye nemianka, namanyonyi gegulu ga veye netsinyumba; navutswa Mwana wa Adamu si a veye na ha a vika mutwe gwigwe. 59Naye ya volera wundi, U nonde. Navutswa ya vola, Mwami, mbe munwa ntange kutsia kuta dada wange. 60Navutswa ya mu volera, Leka avakudzu va te avakudzu vavo; navutswa ive u tsie kwilwadza ubwami bwa Nyasaye. 61Kandi wundi ya vola, Nda ku londa, Mwami; navutswa mbe munwa ntange kutsia kusiivula avenyumba yange. 62Navutswa Yesu ya mu volera, Si ha li nomundu u vika mukono ku ligembe, na a henza inyima, a dukana nobwami bwa Nyasaye.
©Bible Society of Kenya, 1967
