Luka 7
7
1Lwa ya mala kudukidza amakuva gege gosi mu matu gavandu, yingira mu Kapernaume. 2Mutugwa womunyampara mulala, wa ya mu yanza, ya li na a lwala ni yenya kukinda. 3Lwa ya hulira makuva ga Yesu, ya tuma avakulundu va Vayuda va tsie kuye, va mu saave yadze kuhonnya mutugwa wewe. 4Na yava lwa va duka ku Yesu va mu saala ligali, ni va vola, A veye mulahi kuduka u mu kolere kindu yiki; 5kigira a yanza ihiri yetu, na mwene ya kwombakira lisomero lyetu. 6Ma Yesu ya tsia navo. Kandi lwa ya duka ha inyumba yeye himbi, munyampara ya tuma avalina veve na a mu volera, Mwami u ta nyankana; kigira si mbeye mundu u dukana na ive udze kwingira mu inyumba yange: 7kunangwa si nzelola bulahi kuduka ku ive. Navutswa u vole likuva vutswa na mutugwa wange a la honnywa. 8Kigira inze mbeye mundu mukekeke ku vamehi, kandi mbeye navasikari avakekeke ku inze: kandi mbolera mulala uyu, Tsia, ma a tsia; kandi wundi, Hamba, ma yadza; kandi mutugwa wange, Kola ndi, ma a kola ndiyo. 9Yesu lwa ya hulira vindu yivi ya genya, na a girunkana na a volera kiduma kya mu londa, Mmu volera, Nkikiri kulola lisuuvira linene kuli yili, kali mu Israeli. 10Navo va tumwa virana yengo ni va nyola mutugwa na a honi.
11Lwa inyima hakekeke ya tsia mu lidala lya langwa Naini; navegidzwi va mu londa, nekiduma kinene. 12Lwa ya duka himbi ha kiribwa kyelidala, henza, mukudzu ya letwa kyova, a veye muderwa ku mama wewe, naye nu mukunzakali, navandu vanyingi velidala va li halala naye. 13Mwami, lwa ya mu lola ya mu vererera, na a mu volera, U ta lira mba. 14Yisunda himbi na a dira ku ludigi: navo ava lu ginga va singira. Naye ya mu volera, Muyai, nku volera, Vuka. 15Uyu mukudzu ya vuka ni yikala, na a tanga kuvola. Yesu ya mu ha mama wewe. 16Nobutii bwa gumira vosi, ni vidzominya Nyasaye, ni va vola, Muprofeti munene u vuki mu kwinye: Nyasaye u henzi avandu veve. 17Amakuva gege yaga ga landa mu kivala kyosi kye Buyuda nomu vivala vyosi vya himbi.
18Avegidzwi va Yohana va mu volera vindu yivi vyosi. 19Na Yohana ya langa avegidzwi veve vaviri, na a va tuma ku Mwami, na a vola, Ive niye udzanga, naho ku linde wundi? 20Avasatsa yava lwa va duka kuye, va vola, Yohana Mubatidzi u ku tumi ku ive, a ku teve Ive niye udzanga, naho ku linde wundi? 21Ku isaa yeyo ya honnya vanyingi ubulwaye nobusaliri na roho midamano; navaboku vanyingi ya va ha lilola. 22Ma ya tivula na a va volera, Mu tsie kuvolera Y ohana amakuva yaga ga mu loli na ga mu huliye; avaboku va hebwa lilola, navaleema va gendanga, navagere va takaswa, navahana amatu va huliranga, navakudzu va sirnuguki dzangwa, navadaka vilwadzirangwa amakuva malahi. 23Kandi uyu a veye nobugasu u li vula kulala ku inze kyokwikigitala.
24Navo avatumwa va Yohana, lwa va mala kutsia ya tanga kuvolera viduma amakuva ga Yohana. Mwa tsia kulola ki mwigendanyama? Kidundu kyembuudza ya sung'usa? 25Navutswa mwa tsia kulola ki? Mundu wevika tsingubo tsinzeserelu? Henza, yava vevika tsingubo tsing'e reng'anu ni va lia ivilahi, va menya mu tsinyumba tsyavami. 26Navutswa mwa tsia kulola ki? Muprofeti? Yee, mmu volera, kandi a vita muprofeti. 27Uyu niye wa ng'odirwa yaga,
Henza, ntuma mutumwa wange kwimira imbiri wowo,
U li lomba inzira yoyo imbiri wowo
28Mmu volera, Kuvo vavakali vivula si ha li no u vita Yohana: navutswa u veye mukekeke vutswa mu bwami bwa Nyasaye a veye munene kuvita uyu. 29Na vandu vosi lwa va hulira, navasololi vobushutu, va ha Nyasaye ubulungi, va mali kubatidzwa nelibatidza lya Yohana. 30Navutswa Avafarisayo navegidzi velilaga va hangala amakuva ga Nyasaye avene, va vula kubatidzwa nelibatidza lilye. 31Yesu ya vola, Nda fwanannya na ki, avandu velikula yili? Navo va fwana na ki? 32Va fwanana navana vikalanga mu kitu, ni va langana, ni va vola, Kwa mu kupira lilere, si mwa kina; kwa leterera lwikuulu na mwinye si mwa lira. 33Kigira Yohana Mubatidzi yadza si ya lagira ubukima kandi si ya nwa iwaini; na mwinye mu vola A veye nelidemone. 34Mwana wa Adamu yadza a litsanga na a nwa; na mwinye mu vola, Henza, na muhuvali no hongera kunwa iwaini, nomulina wavasololi vobushutu na voni 35Ubugeeri bu hebeywi ubulungi navana vabwo.
36Mulala ku Vafarisayo ya mwenya a tsie kulia naye. Yingira mu inyumba yo Mufarisayo uyu, ni yikala ku vyokulia. 37Henza, mukali wa li mu lidala, mwoni; kandi lwa ya manya yikalanga ku vyokulia mu inyumba yo Mufarisayo, ya leta ichupa ya maguta go buguli budinyu ga funya mwayu, 38na a singira inyima ha virenge vivye, na a lira, na a tanga kusavidza virenge vivye namaliga gege, na a vyeya netisu Iyoku mutwe gwigwe, kandi ya busa busa virenge vivye na a vi vaka namaguta ga funya mwayu. 39Kunangwa Mufarisayo wa mu langa, lwa ya lola ndi, ya ganagana, Mundu uyu na a va muprofeti, nkano u manyi ya li bwaha, kandi kuli a veye mukali wa liva ki u mu diranga, kigira a veye mwoni. 40Yesu ya tivula na a mu volera, Simoni, mbeye nelikuva lya nyenya kukuvolera. Naye ya mu volera, Mwegidzi, vola. 41Mwekopidzi mulala ya li nava magovi veve vaviri: mulala ya li neligovi lyetsishilling tsimia tsitanu, nowundi amakumi gatanu. 42Lwa va daka kya va mu tunga, ya va sameha vombi. Ku yava u li ha u li mu yanza kuvita? 43Simoni ya tivula na a mu volera, Nganagana uyu wa samefwa tsinyingi. Kandi ya mu volera, U voye bulahi. 44Ya girunkana na a henza mukali na a volera Simoni, U lola mukali uyu? Ndingira mu inyumba yoyo, si wa mba amadzi gokwisavidza virenge vyange: navutswa uyu u nzisavidzi virenge vyange namaliga gege, kandi u veyi nelisu lyoku mutwe gwigwe. 45Ive si wa li mbusa: navutswa uyu kutwula inyinga ndingira, si ya lekera kubusa virenge vyange. 46Ive si wa mbaka mutwe gwange amaguta: navutswa uyu u mbaki virenge vyange namaguta ga funya mwayu. 47Kigira yaga, nku volera, U sameheywi ubwoni bwibwe bu li bunyingi, kigira ya yanza ligali: navutswa u samehangwa hakekeke a yanzanga hakekeke. 48Kandi ya mu volera, Ubwoni bubwo bu sameheywi. 49Navo avikala naye ku v yokulia, va tanga kuganagana mu myoyo gyavo, Ibwaha uyu u samehanga ubwoni? 50Ya volera mukali, Lisuuvira lilyo li ku honnyi; u tsie nemirembe.
©Bible Society of Kenya, 1967
