Luka 6
6
1Ku lidiku lilala lyelisabato ya li na a vita mu milimi gyengano; navegidzwi veve va tavula vyangala, va vivunga mu makono gavo ni va lia. 2Navutswa avalala ku Vafarisayo va vola, Kigira ki mu kola agomugyiru mu lidiku lyelisabato? 3Yesu ya va tivulira na a vola, Si mwa soma kali yaga aga Daudi ya kola lwa ya li nenzala, navo ava ya li naye, 4kuli wa yingira mu inyumba ya Nyasaye, na a vugula milango gyokumannyira na a lia, kandi na a ha ku ava ya li navo; nagyo nu mugyiru kulia, navutswa avasalisi veng'ine? 5Kandi ya va volera, Mwana wa Adamu a veye mwami welisabato.
6Kandi ku lisabato lindi, yingira mu lisomero ni yegidza: ya li mu mundu wa ng'era mukono mulungi. 7Avang'odi na Vafarisayo va mu henza kulola na a va na a mu honnya ku lisabato, va nyole inzira yokumuyala. 8Navutswa ya manya tsiganagani tsyavo; na a volera mundu wa ng era mukono, Singira, udze hagati. Yadza na a singira. 9Yesu ya va volera, Mmu teva, Nu bulahi ku lisabato kukola bulahi, naho kukola budamano? Kuhonnya mwoyo naho kugudividza. 10Ya va henza vosi, na a mu volera, Nyira mukono gugwo. Na a kola: na mukono gwigwe gwa lungikidzwa. 11Navutswa vizula ubutima; ni va volerana avene aga va nyala kukola ku Yesu.
12Mu madiku yago ya twula na a tsia mu kigulu kusaala; ya hongera kusaala Nyasaye ubudiku bwosi. 13Lwa bwa kya, ya langa avegidzwi veve; na a tovola kuvo likumi na vaviri, ava ya langa avatumwa: 14Simoni, wa ya langa kandi Petro, na Andreya amwavo wewe, na Yakobo na Yohana, na Filipu na Bartlomeyo, 15na Matayo, na Tomasi, na Yakobo wa Alfayo, na Simoni wa langwa Zelote, 16na Yuda wa Yakobo, na Yuda Iskarioti, wa gwa muzami. 17Ya sulunguta navo, na a singira mu kiguti, nekiduma kinene kyavegidzwi veve, navandu vanyingi va twula Buyuda bwosi ne Yerusalemi nomu kivala kya Turo na Sidon ku luginga lwenyanza, vadza kumuhulira nokuhonnywa tsinkudzo tsyavo; 18navo va nyangidzwa na roho midamano va honnywa. 19Na kiduma kyosi kyenya kumudira; kigira tsingulu tsya twula kuye ni tsi va honnya vosi.
20Ya henza avegidzwi veve, na a vola, Mu veye nobugasu, mwinye avadaka: kigira ubwami bwa Nyasaye nu bwenyu. 21Mu veye nobugasu mwinye ava veye nenzala kalunu: kigira mu liguta. Mu veye nobugasu ava liranga kalunu; kigira mu la seka. 22Mu veye nobugasu, mwinye, avandu lwa va li mu dunyira, kandi lwa va li mwesigana, nokumunyega, nokuta lieta lyenyu kuli li veye lidamano, kigira Mwana wa Adamu. 23Ku lidiku yilyo mu sangale, mu kine nobuyanzi: kigira henzi, madanyi genyu ga veye ma nene migulu; kigira avaguga vavo va kola ndiyo ku vaprofeti. 24Navutswa mu la lola ubudamano, mwinye avatugi kigira mu mali kunyola lihodzeridza lyenyu. 25Mu la lola ubudamano mwinye, avahinda kalunu kigira mu la va nenzala. Mu la lola ubudamano, mwinye avaseka kalunu kigira mu la verera nokulira. 26Mu la lola ubudamano mwinye, avandu vosi lwa va mu laha bulahi kigira avaguga vavo va kola ndiyo ku vaprofeti vobubehi.
27Navutswa mmu volera, mwinye avahulira, Mu yanze avasigu venyu, mu kolere bulahi ava mu dunyira, 28mu saavire ubugasu ava mu nyega, kandi mu saalire ava mu kolera ubudamano. 29U ku duya ku lusaya lulala, u mu girunkanyire lundi; kandi u ku nyaga ijoho yoyo u leke a hile kandi likoti lilyo. 30U he vosi ava ku saala; kandi u ku nyaga vindu vivyo, u ta mu teva kandi mba. 31Kuli mwinye mwe nya avandu va mu kolere, kandi mu va kolere ndiyo. 32Mwinye ni mu yanza ava mu yanza, mu nyoye lidzominywa ki? Kigira kali avoni va yanza ava va yanza. 33Ni mu kolera bulahi ava mu kolera bulahi, mu nyoye lidzominywa ki? Kigira kali avoni va kola ndiyo. 34Ni mu ha mundu kivete ha mu suuvira mu la nyola kindu mu nyoye lidzominywa ki? Kigira kali avoni va hedza avoni avandi ki vete, ma viranyirwa kuli vya zana. 35Navutswa mu yanze avasigu venyu, mu kole bulahi, mu hambidzane kivete mu ta suuvira mu liranyirwa; na madanyi genyu ga la va manene, kandi mu la va avana va Uveye Igulu Ligali: kigira a veye mulahi ku ava ta santidza navadamano. 36Mu ve netsimbabasi, kuli Dada uenyu a veye netsimbabasi. 37Mu ta kalagira, na mwinye si mu li kalagirwa mba: kandi mu ta kyaya, na mwinye si mu la kyaywa mba: mu sameha na mwinye mu la samefwa. 38Mu haane na mwinye mu la hebwa; kigero kilahi kigatirangwa kandi ki sung'usangwa vi duka kusalika, ndiyo va la mu ha mu viritu vyenyu. Kigira ligera lya mu gera, lilyo lya mu li gererwa.
39Kandi ya va kupa lugano, Mboku a nyala kwimirira mboku wakye? Si va la gwa vombi mbogo? 40Mwegidzwi si a vita mwegidzi wewe: navutswa ku vosi u mali kwega ligali a la va kuli mwegidzi wewe. 41Kandi kigira ki ive u lola lindu li veye mu imoni yamwavo wowo, navutswa musala gu veye mu imoni yoyo gwa u ta ganagana? 42Kinga u la nyala ndi kuvolera amwavo wowo, Amitu, u leke, nku twulidze lindu mu imoni yoyo, na ive mwene si u lola musala gu veye mu imoni yoyo? Mugadi ive, u tange kutwulidza musala gu veye mu imoni yoyo, kunangwa u la lola bulahi kutwulidza lindu li veye mu imoni yamwavo wowo. 43Kigira si ha li nomusala mulahi gwamanga makuyu madamano; kandi si ha li nomusala mudamano gwamanga makuyu malahi. 44Kigira misala gyosi gyi manyekana ku makuyu gagyo. Kigira ku amafwa avandu si vagula makuyu, kandi ku matagalu si vagula mazabibu. 45Mundu mulahi ku vindu vyomwoyo gwigwe, a twulidza vindu vilahi; nomundu mudamano, ku vindu vidamano vyomwoyo gwigwe, a twulidza vindu vidamano: kigira ku vindu vya kira mu mwoyo, munwa gwigwe gu vola.
46Kandi kigira ki mu nanga, Mwami, Mwami, navutswa si mu kola ga mbola? 47Ku vandu vosi udza ku inze na a hulira amakuva gange na a ga kola, nda mu mannya kuli a fwana. 48A veye kuli mundu wombaka inyumba yeye, na a yava, ni yikidza hasi, na a vika muse ku lwanda. Kandi amadzi lwa gazula nomugera gwa kupa induta ku inyumba yeyo, si ya nyala kugidengeyidza: kigira ya li ni yombakwa bulahi. 49Navutswa uyu u hulira na a ta kola a veye kuli mundu wombaka inyumba yeye ku marova bugira muse; yomugera gwa kupa ku induta, kandi nonoho ya gwa; kandi ligwa lyayo lya li linene.
©Bible Society of Kenya, 1967
