Yohana 18
18
1Yesu lwa ya mala kuvola yaga ya twula halala navegidzwi veve na a tsia engereka womugera gwa Kidiron, ha li nomulimi, yingira mu mwene navegidzwi veve. 2Kandi Yuda, wa mu zama, naye ya manya ha zana: kigira Yesu ya tsia yo kanyingi navegidzwi veve. 3Maku, Yuda lwa ya mala kuvugula mugaanda gwavasikari navanyampara, ava twula ku vasalisi vanene na Vafarisayo, ya tsia yo netsitaya netsimuli nevyuma. 4Yesu ya li na a manya vindu vyosi vyenya kumugwira, ya singira hambiri, na a va teva, Mwenya bwaha? 5Va mu tivulira, Yesu Munazareti. Yesu ya va volera, Ni inze. Na kandi Yuda, wa mu zama, ya singira halala navo. 6Ku, lwa ya va volera, Ni inze, virana inyima ni va gwa hasi. 7Ku, ya va teva kandi, Mwenya bwaha? Va vola, Yesu Munazareti. 8Yesu ya tivula, Mmali kumuvolera, Ni inze; kunangwa na a va ninze wa mwenya, mu leke yava va tsie. 9Li duke kudukidzwa likuva lya ya vola, Kuvo va wa mpa si ha li nomulala u goti. 10Simoni Petro, ya li nekivavi, ya ki somola na a tema mutugwa womusalisi munene, na a mu kalaga gutu gwigwe gwomukono mulungi. Mutugwa uyu ya langwa Maliku. 11Yesu ya volera Petro, U vike kivavi mu Iwula: kikombe kya Dada ya mpa mbule kunwa naho?
12Maku, mugaanda gwavasikari nomunyampara munene navanyampara va Vayuda, va gumira Yesu ni va mu boha. 13Ni va tanga kumuhila imbiri wa Annas; kigira ya li nazivala wa Kaiafa, ya li na a veye musalisi munene muhiga yigwo. 14Kaiafa niye wa volera Vayuda, Nu bulahi mundu mulala a kudzere avandu.
15Simoni Petro ya londa Yesu, kandi mwegidzwi wundi. Mwegidzwi uyu ya manyekana ku musalisi munene, naye yingira na Yesu hamgidzi homusalisi munene; 16navutswa Petro ya li na a singiye ha kiliango, kyova. Ku, mwegidzwi uyu wa manyekana ku musalisi munene, ya volerana no mukana wa linda kiliango, na a tsia kuleta Petro. 17Maku, mukana wa linda kiliango ya volera Petro, Kandi ive si u veye mulala ku vegidzwi vormundu uyu? Ya vola, Inze si mbeye ku. 18Avatugwa navanyampara va li ni va singira ho, va fwana muliru gwamanda; kigira ubukindu bwa li ho; ni vota muliru: kandi Petro ya li na a singira halala navo ni yota muliru.
19Ku, musalisi munene ya teva Yesu ku vegidzwi veve noku megidzo gege. 20Yesu ya mu tivulira, Inze mmali kuvolera avomkivala amakuva gange habulavu; inze madiku gosi nzegidza mu masomero nomu litempeli, ha Vayuda vosi va vugana; si nda vola kindu makiriri. 21Kigira ki u teva inze? Yaga ga nda volera avandu u va teve aga va hulira: henza, yava va manya vya nda vola. 22Lwa ya vola yaga, mulala ku vanyampara ya singira himbi yala Yesu uluhi, na a mu teva Ni ndiyo u tivulira musalisi munenei 23Yesu ya mu tivulira, Inze ni mba ni mbola ubudamano, u lolekidze ubudamano yibu: navutswa ni mba ni mbola ubulahi, u nduyira ki? 24Ku, Annas ya mu hila wa Kaiafa musalisi munene, na a boheywi.
25Simoni Petro ya singira ni yota muliru. Ku, va mu teva, Ive kandi si u veye mulala ku vegidzwi veve? Yambakana, na a vola, Inze si mbeye ku. 26Mulala ku vatugwa vomusalisi rnunene, mwiko womundu wa Petro ya kalaga gutu gwigwe, ya vola, Inze si nda ku lola halala naye mu mulimi? 27Ku, Petro yambakana kandi: nonoho idaywa ya lagula.
28Kunangwa va twulidza Yesu wa Kaiafa ni va mu hila mu inyumba ya Pretorio: gwa li mugamba tsuri. Navene si vingira mu Pretorio, va ta vikwa mu budamano, navutswa va duke kulia lipasaka. 29Ku, Pilatu, ya tsia kuvo kyova, kandi ya vola, Mu veye naki kya mu yalira mundu uyu? 30Va tivula, ni va mu volera, Mundu uyu a vula kuva mudamano, nkano si ku mu leti imbiri wowo. 31Pilatu ya va volera, Mu mu vugule mwinye avene mu mu yale kuli malaga genyu. Avayuda va mu volera, Kwinye si ku veye nomunwa gokwiita mundu. 32Li duke kuduka likuva lya Yesu ya vola, na a mannya ni likudza ki lya a li kudza.
33Kunangwa Pilatu yingira kandi mu Pretorio na a langa Yesu, na a mu volera, Hene ive niye Mwami wa Vayuda? 34Yesu ya tivula, U vola yaga ive mwene, naho avandi va ku volera amakuva ku inze? 35Pilatu ya tivula, Inze mbeye Muyuda? Ihiri yoyo navasalisi vanene va ku leti imbiri wange: u koli ki? 36Yesu ya tivula, Ubwami bwange si bu veye bwomkivala yiki: ubwami bwange ni bu veye bwomkivala yiki, avatumekiri vange nkano va ka lwana kalunu, inze nda vula kuvikwa mu makono ga Vayuda: navutswa ubwami bwange si bu veye bwokutwula kalunu. 37Kunangwa Pilatu ya mu volera, Nkani u veye mwami? Yesu ya tivula, Ive mwene u voye mbeye mwami. Yiki ni kigira ndivulwa, kandi yiki ni kigira nda duka mu lirova, nduke kulolekidza ageligali. Ku vosi u veye ku luvega lwa geligali a hulira mwoyo gwange. 38Pilatu ya mu volera, Ageligali ni kindu ki?
Kandi lwa ya mala kuvola yaga, ya tsia ku Vayuda kandi, na a va volera Inze si ndola kindu kuye. 39Navutswa mu veye nomwima gwa inze mmu bohololera mulala inyinga yelipasaka: mwenya mmu bohololera Mwami wa Vayuda? 40Kunangwa va kola liyoga kandi, ni va vola, U ta boholola mundu uyu, navutswa Baraba. Baraba ya li munuuli.
©Bible Society of Kenya, 1967
