Yohana 17
17
1Yesu ya vola yaga, na a digulukidza tsimoni tsitsye igulu, na a vola, Dada, isaa i mali kuduka u kuminye Mwana wowo, Mwana a duke kukuminya ive: 2kuli ive wa mu ha tsingulu ku inyama yemibiri gyosi, vosi va wa mu ha a va he livamwoyo li ta hera mba. 3Kandi livamwoyo li ta hera mba ni yili va duke kumanya ive, Nyasaye weligali weng'ine, na uyu wa wa tuma, Yesu Kristo. 4Mmali kukukuminya mu lirova; kandi mmali miyinzi gya wa mpa kukola. 5Nive kalunu u mbuminye, Dada, halala nive mwene nobukumi bwa nda li nabwo halala nive, lirova li kikiri kuva. 6Lieta lilyo mmali kuvuulira avandu va wa mpa ku avomkivala: va li avovo, nive wa mpa; kandi va gumiye likuva lilyo. 7Kalunu va manya vyosi vya wa mpa vya twula ku ive: 8kigira amakuva ga wa mpa, inze mali kuvaha; navo va ga vugula, kandi va manya ligali nda twula ku ive, kandi va suuvira ni ive wa ntuma. 9Inze mba saavira: si nsaavira avomkivala, navutswa nsaa vira yavo va wa mpa; kigira va veye avovo: 10vyosi vi veye vyange ni vivyo, kandi vivyo ni vyange: na inze mbuminyeywi kuvo. 11Inze si mbeye mu lirova kandi, navutswa yava va veye mu lirova, na inze ntsitsa ku ive. Dada Mutakatifu, u va linde ku lieta lilyo va wa mpa, va duke kuva kindu kilala kuli kwinye. 12Lwa nda li navo halala, nda va denda ku lieta lilyo va wa mpa: kandi nda va linda, kandi si ha veye nomulala kuvo wa gota, navutswa mwana wobudivi; amang'oda ga duke kudukidzwa. 13Navutswa kalunu ndadza ku ive; na yaga mbolera mu lirova, va duke kuva nobuyanzi bwange bwizule muvo. 14Mmali kuvaha likuva lilyo; kandi avomki vala va va dunyira, kigira si va veye ku vomkivala, kuli inze si mbeye ku vomkivala. 15Si nku saava u va twulidze mu lirova, navutswa u va linde ku mudamano. 16Si va veye ku vomkivala, kuli inze si mbeye ku vomkivala. 17U va takase mu ageligali: likuva lilyo ni ageligali. 18Kuli wa ntuma kutsia mu lirova, kandi ndiyo inze nda va tuma kutsia mu lirova. 19Na inze nzetakase kigira kuvo, avene va duke kutakaswa mu ageligali. 20Kandi si nsaavira yava veng'ine navutswa nsaavira kandi yavo ava suuvira ku inze kigira likuva lyavo; 21vosi va duke kuva kindu kilala; kuli ive, Dada, u veye mu inze, na inze mu ive, kandi navo va duke kuva mu kwinye: avomkivala va duke kusuuvira ive wa ntuma. 22Kandi ubukumi bwa wa mpa, inze mmali kuvaha; va duke kuva kindu kilala, kuli kwinye ku veye kindu kilala; 23inze muvo, na ive mu inze, va dukidzwe kuva kindu kilala; avomkivala va manye ive wa ntuma, kandi ive u va yanza kuli u nyanza. 24Yava ava wa mpa, Dada, ha mbeye inze nyenya yava va ve ho, va duke kulola ubukumi bwange, bwa wa mpa: kigira wa nyanza, lirova li kikiri kutemwa muse. 25Dada mulungi, avomkivala si va ku manya, navutswa inze nda ku manya; kandi yava va manya ive wa ntuma; 26na inze mmali kuvamannya lieta lilyo, kandi nda va mannya; ubuyanzi bwa wa nyanza nabwo bu duke kuva muvo, na inze muvo.
©Bible Society of Kenya, 1967
