Yohana 16
16
1Yaga mmboleye, mu tikigitalidzwa. 2Va la mu kunga mu mavugana: kandi isaa yidza ya vosi ava mwiita va levolera va kolera Nyasaye ubutumwa. 3Kandi yaga va la kola kigira si va manya Dada, kandi inze. 4Navutswa yaga mmali kumuvolera, lwa isaa yago i mali kuduka, mu gidzulitse, kuli wa nda mu volera. Na yaga si nda mu volera kutwula mu litanga, kigira nda li na mwinye halala. 5Navutswa kalunu ntsitsa kuye wa ntuma; kandi si ha veye nomulala ku mwinye u nteva, U tsia ha li ha? 6Navutswa kigira mmu volera yaga, ubuvereri bwizuye mu myoyo gyenyu. 7Nawtswa mmu volera ageligali: Nu bulahi ku mwinye inze ntsie; kigira ni nta tsia, Mukonyi si a lidza ku mwinye; navutswa ni ntsia, nda mu tuma ku mwinye. 8Naye lwa a li duka, a la lungika avomkivala ku bwoni, noku bulungi, noku likalaga: 9ku bwoni, kigira va vula kusuuvira ku inze; 10ku bulungi, kigira ntsia ku Dada na mwinye si mu ndola kandi; 11ku likalaga, kigira munene womkivala yiki, u mali kukalagirwa. 12Nkikiri namakuva manyingi gokumuvolera, navutswa si mu nyala kugagumira kalunu. 13Navutswa lwa a li duka Roho wa geligali, a la mwimirira na a mu hile mu ageligali gosi: kigira si a li vola ku vyomwene; navutswa aga a li hulira a la vola: kandi vindu vi lidza a la mu vuulira. 14Kandi u li mbuminya inze: kigira a la vugula ku vyange yilwadze ku mwinye. 15Vindu vyosi vya Dada a veye navyo vi veye vyange: yiki ni kigira nda vola a vugula ku vyange yilwadze ku mwinye. 16Ha tigaye hakekeke si mu la ndola kandi; na kandi ha tigaye hakekeke kandi, na mwinye mu la ndola. 17Avalala ku vegidzwi veve va volerana, Ni likuva ki lya a ku volera? Ha tigaye hakekeke si mu la ndola; kandi Ha tigaye hakekeke mu la ndola: na kandi, Kigira ntsitsa wa Dada. 18Ku, va vola, Ni likuva ki lya a vola, Inyinga inkekeke? Si ku manya aga a vola. 19Yesu ya manya venya kumuteva, naye ya va volera, Mu tevana mwinye ku yilyo lya mmu volera, Ha tigaye hakekeke, si mu la ndola, kandi ha tigaye hakekeke, mu la ndola? 20Ligali, ligali, mmu volera, mwinye mu la lira ni mu syoma, navutswa avomkivala va la sangala: mwinye mu la verera, navutswa ubuvereri bwenyu bu la girunkanywa bu ve ubuyanzi. 21Mukali lwa a lumangwa a vedza neliverera, kigira isaa yeye i duki: navutswa ni ya ka mala kwivula mwana, si yidzulitsa kandi ubusaliri, kigira a yanza mundu wivuywi mu kivala. 22Kandi mwinye kalunu mu veye nobuvereri: navutswa nda mu lola kandi, ne myoyo gyenyu gyi la yanza, nobuyanzi bwenyu mundu si a nyala kumunyaga. 23Kandi ku lidiku yilyo si mu li teva inze likuva. Ligali, ligali, mmu volera, ni mu saala kindu ku Dada, a la mu ha ku lieta lyange. 24Kuduka kalunu mu kikiri kusaala kindu ku lieta lyange: mu saale, mu la hebwa, ubuyanzi bwenyu bu duke kudukidzwa.
25Mmali kumuvolera vindu yivi mu tsing'ano: isaa yidza ya nta mu volera kandi mu tsing'ano, navutswa nda mu volera habulavu arnakuva ga Dada. 26Ku lidiku yilyo mu li saala ku lieta lyange: kandi si mmu volera, nda teva Dada kigira mwinye; 27kigira Dada mwene a mu yanza, kigira mu nyanzi, kandi mu suuviye inze nda twula ku Dada. 28Nda twula ku Dada ntsitsa mu kivala: kandi, nda leka kivala, ntsia wa Dada. 29Avegidzwi veve va vola, Nkani kalunu u vola habulavu si u kupa tsing'ano. 30Kalunu ku manya ive u manya vindu vyosi, si u veye nobudaka bwomundu u ku teva: ku yaga ku suuvira ive wa twula ku Nyasaye. 31Yesu ya va tivulira, Kalunu mu suuviye? 32Henza, isaa yidza, yee, i mali kuduka, ya mwinye mu lavukanira avandu sa mulala ku vindu vivye, mu leke inze tsyeng'ine: navutswa inze si mbeye tsyeng'ine, kigira Dada a veye halala ninze. 33Yaga mmali kumuvolera, mu duke kuva nemirembe ku inze. Mu lirova mu la va nekivi: navutswa mwidinyiridze; inze mmali kuguuta avomkivala.
©Bible Society of Kenya, 1967
