Yohana 19
19
1Ku, Pilatu ya vugula Yesu na a mu kuya nolukova. 2Kandi avasikari va luka itaji yamafwa, ni va gi vika ku mutwe gwigwe, ni va mu vika ingubo yekiforosadi; 3ni va tsia kuye, ni va mu volera Mirembe, Mwami wa Vayuda ni va mwala tsimpi. 4Pilatu ya tsia kyova kandi, na a va volera, Henzi, uyu iye mmu letera kyova, mu duke kumanya si ndola kindu kuye. 5Ku, Yesu ya twula na a vikeywi itaji vamafwa nengubo yekiforosadi. Kandi Pilatu ya va volera, Henzi mundu uyu 6Maku avasalisi vanene navanyampara lwa va mu lola, va kola liyoga, ni va vola, Mbambe, mbambe Pilatu ya va volera, Mu mbugule mwinye avene, mu mbambe: kigira inze si ndola kindu kuye. 7Avayuda va mu tivulira, Kwinye ku veye nelilaga, kandi ku lilaga zana nu bulahi a kudze, kigira yekola Mwana wa Nyasaye. 8Ku, Pilatu lwa ya hulira makuva yaga ya kira ubutii; 9yingira kandi mu Pretorio na a volera Yesu, Wa twula ha li ha? Navutswa Yesu si ya mu tivulira mba. 10Ku, Pilatu ya mu volera Si u volerana ninze? Ive si u manya mbeye netsingulu kukuboholola, kandi mbeye netsingulu kukubamba? 11Yesu ya mu tivulira, Ive si u nyala kuva netsingulu ku inze kali hakuzu, nu u ta hebwa tsi twula migulu: kigira yaga u veye nobwoni bunene nu uyo wa mbika mu makono gogo. 12Kigira yaga Pilatu ya geridza kumuboholola: navutswa Avayuda va kola liyoga, ni va vola, Nu u boholola mundu uyu si u veye mulina wa Kaisari: mundu yekola mwami a lega Kaisari. 13Pilatu lwa ya hulira amakuva yaga ya twulidza Yesu, ni yikala ku kisako kyokuyala, ha zana ha langwa Ha vaala magina, navutswa mu Luhe braina Gabatha. 14Nalyo lya li lidiku Lyokulomba lilia lyelipasaka: kuli tsisaa tsitanu na ndala. Kandi ya volera Avayuda, Henzi Mwami wenyu 15Maku, va kola liyoga, Mhile, mhile, mbambe Pilatu ya va volera, Mbambe Mwami wenyu? Avasalisi vanene va tivula, Kwinye si ku veye nomwami navutswa Kaisari. 16Kunangwa ya va mu ha a duke kubambwa.
17Ku, va gumira Yesu: mwene ya ginga musalaba gwigwe na a twula, na a tsia ha langwa kihanga, ha zana mu Luhebraina, ha langwa Golgota. 18Va mu bambira ho, kandi halala naye avandi vaviri, mulala ha luvega yilu no wundi ha luvega yilu, na Yesu hagati. 19Kandi Pilatu ya ng'oda ibaruwa na a gi vika ku musalaba igulu. Ga ng'odwa, YESU MUNAZARETI, MWAMI WA VAYUDA. 20Kunangwa ibaruwa yiyi avanyingi ku Vayuda va soma kigira ha Yesu ya bambirwa ha li ahimbi nelidala; nayo ya ng'odwa mu Luhebraina na Lurumi, na Lugreki. 21Ku avasalisi vanene va Vayuda va volera Pilatu, U ta n'goda, Mwami wa Vayuda; navutswa ng'oda, Ya vola, Inze mbeye Mwami wa Vayuda. 22Pilatu ya tivula, Aga ng'odi mali kung'oda.
23Maku avasikari lwa va mala kubamba Yesu va vugula tsingubo tsitsye ni va tsyavukannya tsi twula mu tsine, musikari sa mulala indala; nekanzu yeye: nayo ikanzu si ya li nobunaviru, ya lukwa yosi kutwula halugulu. 24Ku, va volerana, Ku ta gi tandula, navutswa ku kole ikura ku lole i la va ya bwaha.
Ga duke kuduka mang'oda ga vola, Va gavana tsingubo tsyange,
Ni va kola ikura ku ingubo yange.
25Kunangwa vindu yivi avasikari va kola. Navutswa yaho ha musalaba gwa Yesu, va singira mama wewe namwavo wewe na, Maria mka Kileopa, na Maria Magdalene 26Ku, Yesu lwa ya lola mama wewe, nomwegidzwi wa ya yanza va singira himbi, ya volera mama wewe, Mkali, ive u henze mwana wowo 27Kandi ya volera mwegidzwi U henze mama wowo Kandi kutwuia inyinga yeyo mwegidzw uyu ya mu vugula na a mu hila mu inyumba yeye.
28Inyima wa yaga, Yesu ya li na a manya vindu vyosi vi fweye ga duke kuduka mang'oda, ya vola Mbeye nobuluhu. 29Ha li ho nenyingu yizula isiki: ku, va vugula kikaminyo ni kizuye isiki ni va vika ku kidundu ni va mu sundira ha munwa. 30Ma Yesu lwa ya mala kuvugula isiki, ya vola, Ga fweye ni yinaminya mutwe gwigwe na Iakula mwoyo.
31Kunangwa Avayuda, kigira lya li lidiku Lyokulomba, avakudzu va ta va ku misalaba ku lisabato (kigira lidiku lyelisabato yilyo lya li linene) va saava Pilatu virenge vyayo vi vunanywe, va twulidzwe. 32Ku, avasikari va tsia kuvunannyz virenge vyo wa hambiri, kandi vyowundi wa bambwa naye: 33navutswa lwa va duka ku Yesu ni va lola u mali kukudza, si va mu vunannya virenge vivye mba. 34Navutswa mulala ku vasikari ya mu tumita mu tsi mbalu tsitsye nelitimu, nonoho masahi ga twula na madzi. 35Naye wa lola u mali kulolekidza, kandi lilolekidza lilye li veye lyeligali: naye a manya aga a vola ga veye geligali, mwinye mu duke kusuuvira. 36Kigira vindu yivi vya kolwa ndi, mang'oda ga duke kuduka, Kigumba kikye si ki li vunika. 37Kandi mang'oda gandi ga vola, Va la mu henza uyo wa va tumita.
38Inyima ya yaga Yosefa wa Arimathia, wa li na a veye mwegidzwi wa Yesu, navutswa yevisa, kigira ya tia Vayuda, ya saava Pilatu munwa kuhila mubiri gwa Yesu: Pilatu ya mu ha munwa. Kunangwa yadza na a hila mubiri gwigwe. 39Nikodemo wadza kuye ubudiku lwambiri, yadza halala naye na a leta vindu vya tsukanywa manemane na subiri, vya duka himbi tsiratili mia. 40Ku, va vugula mubiri gwa Yesu ni va gu boha mu tsingubo tsyakatani halala nevindu vya funya mwayu, kuli miima gya Vayuda gyokuta. 41Ha ya bambwa ha li nomulimi; na hagati homulimi kya li ho kilindwa kihya kyomundu ya li na a kikiri kuvikwa mu. 42Kunangwa va ta Yesu mu, (kigira kilindwa kya li himbi) kigira lidiku Lyelilomba lya Vayuda.
©Bible Society of Kenya, 1967
