Vikolwa 3
3
1Petro na Yohana va li ni vanegira kutsia mu litempeli inyinga yokusaala, isaa i kola tsitanu na tsine. 2Ha li nomundu mulala muleema kutwula munda mwa mama, ya gingwa, wa va vika kazozo ha kili ango kya litempeli kya langwa Kilahi, a saave isadaka ku avingira mu litempeli. 3Lwa ya lola Petro na Yohana venya kwingira mu litempeli, ya saava a hebwe isadaka. 4Petro ya mwumika, halala na Yohana, na a vola, U ku henze. 5Na a va hulira, na a suuvira a la nyola isadaka kuvo. 6Navutswa Petro ya mu volera, Inze si mbeye nefetha kandi thahabu; navutswa kya mbeye nakyo, yikyo nda ku ha. Ku lieta lya Yesu Kristo wa Nazareti, genda. 7Ya mu gumira mukono mulungi, na a mu singeridza: nonoho tsinduvatiru tsitsye nevigumba vye milugu vya nyola tsingulu. 8Kandi ya vuka bwangu na a singira na a genda; ni yingira halala navo mu litempeli na a genda na a tuumatuuma ni yidzominya Nyasaye. 9Kandi avandu vosi va mu lola na a genda ni yidzominya Nyasaye: 10ni va manya uyu niye wikala na a saava isadaka ha kiliango kya langwa Kilahi kyelitempeli; kandi vizula ubutii neligenya kigira aga mu gwira.
11Lwa ya gumira Petro na Yohana, avandu vosi va va vuganira tsimbiru mu lusimbu lwa langwa lwa Solomoni, ni va genya ligali. 12Petro lwa ya lola ya tivulira avandu, Mwinye avandu va Israeli, kigira ki mu genyira ku mundu uyu? Kandi kigira ki mu kwumika, kuli kwinye, netsingulu tsyetu naho nobutakatifu bwetu kwa mu kola a gende? 13Nyasaye wa Abrahamu, nowa Isaka, nowa Yakobo, Nyasaye wavaguga vetu, u kuminyi Mutumekiri wewe Yesu; wa mwa zama nowa mwambakana imbiri wa Pilatu, lwa ya saavira kumuboholola. 14Navutswa mwinye mwambakana uyu Mutakatifu no Mulungi, kandi mwinye mwenya mu hebwe mulumindi, 15kandi mwiita Munene welivamwoyo; wa Nyasaye ya simugukidza mu vakudzi; kwinye ku veye avaloli ku yaga. 16Kandi lieta lilye, ku lisuuvira ku lieta lilye, li mali kuha mundu uyu tsingulu, wa misuuvira lola nowa mu manya: ligali, lsuuvira li veye ku lieta lilye li mali kumuha ubulamu yibu ubwere imbiri wenyu mwosi. 17Kalunu, Avamitu, inze mmanya mwa kola ni mu ta manya, na vanene venyu kandi ndiyo. 18Navutswa vindu vya Nyasaye ya tanga kumannya mu minwa gyavaprofeti vosi, Kristo wewe a la saliridzwa, u mali kuviduliidza ndi. 19Kigira yiki Mwe ganire, mwirane, ubwoni bwenyu bu twu'idzwe, tsi nyole kudza tsinyinga tsyokusosidza tsi twula imbiri wo Mwami; 20kandi a duke kutuma Kristo uyu wa vikwa kigira mwinye, naye niye Yesu: 21wa ga dukira ligulu kumuvugula kuduka ku tsinyinga tsyokwirannya vindu vyosi, vya Nyasaye ya volera mu minwa gyavaprofeti veve vatakatifu kutwula kale. 22Musa ligali ya vola, Mwami Nyasaye a la mu twulidzira muprofeti mulala ku vamwavo venyu u fwanana inze; mu la mu hulira uyu ku makuva gosi ga a li mu volera. 23Kandi ga la va, ku vandu vosi u li vula kuhulira muprofeti uyo a lononywa ligali a twulidzwe mu vandu. 24Ligali, avaprofeti vosi kutwula ku Samweli, navo vosi ava mu londa, vosi va mali kuvola, yava kandi va profeta ku madiku yaga. 25Mwinye mu veye avana vavaprofeti, navuna vamalagano ga Nyasaye ya lagana navaguga venyu, na a volera Abrahamu, Ku visukululwe vivyo tsihiri tsyosi tsyelirova tsi la nyola ku ubugasu. 26Ku mwinye Nyasaye ya tanga kusingeridza Mutumekiri wewe na a mu tuma kumuha ubugasu, kuhunzula mwinye vosi mu twule mu budamano bwenyu.
©Bible Society of Kenya, 1967
