Vikolwa 2
2
1Lwa lya duka lidiku lya Pente kote, va li halala vosi nomwoyo mulala. 2Kandi nonoho muhuma gwa twula migulu kuli muhuma gwembuudza inene, i genda ni yizula inyumba yosi ha va li ni vikaye. 3Kandi tsya loleka kuvo tsinimi tsyavukani kuli muliru; tsikala kuvo sa mulala sa mulala. 4Kandi vizula vosi Roho Mutakatifu ni va tanga kuvola netsinimi lugano lugano, kuli Roho ya va ha livola.
5Ha li ho Vayuda ava tia Nyasaye, va menya mu Yerusalemi, va twula mu tsihiri tsyosi isi weligulu. 6Ku, mwoyo yigwo lwa gwa hulirwa, kiduma kya vugana, ni va gumirwa nelihuga, kigira mundu sa mulala ya hulira ni va vola ululimi lwilwe. 7Kandi va huga nokugenya vosi, ni va vola, Henzi, yava vosi ava vola si va veye Vagalilaya? 8Ga li ndi kwinye sa mulala a hulira ululimi lwa yivulwa mulwo? 9Avaparthi, na Vamedi, na Vaelam, navo va menya Mesopotamia, na Buyuda, na Kapadokia, Ponto, na Asia, 10na Frigia, na Pamfulia, na Egepeti, ne tsimbega tsya Libua himbi Kurene, navageni va twula Romi, Avayuda navizamiri, 11kandi Vakirete, na Vaarabu, ku va hulira va vola mu lulimi lwetu vikolwa vinene gya Nyasaye. 12Kandi va genya ni va huga, ni va volerana, Ni kindu ki yiki? 13Navutswa avandi va kola kihenyahenye, ni va vola, Va hambiki namalwa mahya.
14Navutswa Petro ya singira halala nava li likumi na mulala, na a gamba, na a vola, Mwinye avandu ve Buyuda, na mwinye ava menya mu Yerusalemi, yaga ga manyekane ku mwinye, kandi mu huliridze amakuva gange. 15Kigira yava si va ha mbiki kuli mu vola; kigira ni isaa yetsivaka vutswa yombasu; 16navutswa yaga na ga volwa nomprofeti Joeli:
17Nyasaye a vola, ku madiku gekiheri, Nda tsuka Roho wange ku vandu vosi:
Navayai navakana venyu va la profeta
Navasoleii venyu va la lola malola Navasakulu venyu va la lota maloto:
18Yee, ku vatugwa vange avayai navakana mu madiku yago
Nda tsuka ku Roho wange; kandi va la profeta.
19Nda leta vyokugenya igulu migulu,
Nevilolekidzu mu lirova hasi;
Amasahi, nomuliru, nelilumbe lyomwoki:
20Liuva li la girunkanywa li gwe kisundi,
Kandi mweli gu la girunkanywa gu gwe masahi
Li kikiri kuduka lidiku lyo Mwami, Li veye linene nokumanyekana:
21Kandi ga la va, ku vandu vosi u
lyanira ku lieta lyo Mwami a la honnywa.
22Mwinye avasatsa va Israeli, mu huliridze amakuva yaga: Yesu wa Nazareti, mundu wa Nyasaye a langaminyi ku mwinye ku vikolwa vyetsingulu nevyokugenya nevilolekidzu, vya Nyasaye ya kola hagati henyu naye, kuli mwinye avene mu manya; 23uyu wa hebwa nelitovola nelisaavira lya Nyasaye lya ya manya imbiri, mwinye mwa mbamba ni mu mwiita namakono gavandu vekirage: 24wa Nyasaye ya simugukidza, na a mu boholola mu busaliri bwelikudza: kigira si lya nyalika likudza kudinya kuye. 25Kigira Daudi ya vola kuye,
Nda lola Mwami imbiri wange kazozo;
Kigira a veye ku mukono mulungi, mbule kutengidzwa:
26Ku yaga mwoyo gwange gwa yanza, nolulimi lwange lwa sangala;
Kandi inyama yomubiri gwange i la menya mu lisuuvira.
27Si u li leka mwoyo gwange mu kihadisi,
Kandi si u li bugirira Mutakatifu wowo a lole ligunda.
28Wa mmannya tsinzira tsyelivamwoyo;
U la nzizulitsa ubuyanzi nomumoni mumwo.
29Avamitu vange, nyala kumuvolera habulavu ga guga wetu Daudi, ya kudza na a tebwa, kandi kilindwa kikye ki veye mu kwinye kali kalunu. 30Kigira ya li muprofeti, na a manya Nyasaye u mali kumwisuhira lisuha, ku lwivulo lwilwe lwomubiri gwigwe, a la mwikalidza mulala ku kisako kikye kyobwami. 31Naye, kigira ya tanga kulola yaga imbiri, ya vola ku lisimuguka lya Kristo, si ya lekwa mu kihadisi, kandi inyama yomubiri gwigwe si ya gunda mba. 32Yesu uyu, Nyasaye ya mu simugukidza, kandi, ku yili kwinye kwosi ku veye avalolekidzi. 33Kunangwa naye u mali kunenehidzwa kuduka ha mukono mulungi gwa Nyasaye, kandi u vuguye ku Dada lisuuviridza lya Roho Mutakatifu, u tsuki yiki kya mu lola nekya mu hulira. 34Kigira Daudi si yanegira migulu: navutswa mwene a vola
Mwami ya volera Mwami wange,
Wikala ha mukono gwange mulungi,
35Nduke kukola avasigu vovo va ve kisako kyevirenge vivyo.
36Kigira yaga avenyumba yosi ya Israeli va manye ligali, Nyasaye u mali kukola Yesu uyu wa mwa bamba, a ve Mwami kandi a ve Kristo.
37Lwa va hulira yaga, va tumitwa mu myoyo gyavo, ni va volera Petro navatumwa avandi, Avamitu, ku kola ndi? 38Petro ya va rolera, Mweganire, mu batdziwe mwosi mu lieta lya Yesu Kristo, mu nyole ubusamehi bwobwoni bwenyu; kandi mu la vugula kihaanwa kya Roho Mutakatifu. 39Kigira lisuuviridza yili li veye ku mwinye, noku vana venyu, noku vosi ava veye hale, ku vosi vo Mwami Nyasaye wetu a la langa vadze kuye. 40Na a va mannya amakuva gandi manyingi, na a veganehidza, na a vola, Mwehonnye ku likula yili likyamu. 41Yavo ava vugula likuva lilye, va batidzwa: kandi lidiku yilyo va daswa avandu kuduka himbi tsielfu tsivaka. 42Ni va hongera mu megidzo gavatumwa nomu lisanga, nomu limegannya ubukima, nomu lisaala.
43Ubutii bwa gumira myoyo gya vosi: kandi vyokugenya vinyingi nevilolekidzu vinyingi vya kolwa navatumwa. 44Kandi vosi ava suuvira va li halala ni va sannya vindu vyavo vyosi; 45ni va gula ubu tugi bwavo nevindu vyavo ni va gavulira vosi, vandu vosi sa mulala kuli wa a daka. 46Kandi madiku gosi va hongera mu litempeli, nomwoyo mulala nokumegannya ubukima hango, ni va vugula vyokulia vyavo nobuyanzi kandi nemyoyo gyi ta li nobugadi, 47vidzominya Nyasaye, ni va yanzeka ku vandu vosi. Kandi Mwami ya va dasira madiku na madiku ava li ni va honnywa.
©Bible Society of Kenya, 1967
