Vikolwa 4
4
1Kandi lwa va volera avandu avasalisi nomunene welitempeli na Vasadukayo va va twulira, 2ni va henda mwoyo ligali kigira vegidza avandu, ni vilwadza ku Yesu amakuva gokusimuguka kutwula mu vakudzi. 3Ni va va gumira nemikono gyavo, ni va va boha mu inyumba kuduka mugamba: kigira gwa li mgolova. 4Navutswa vanyingi kuvo ava hulira likuva va suuvira; kandi livalidza lyavo lya li himbi kuduka tsielfu tsitanu.
5Mugamba avanene vavo, navakulundu, navang'odi va vugana mu Yerusalemi; 6kandi Annas musalisi munene, na Kaiafa, na Yohana, na Alekisandero, navo vosi avenyumba yomusalisi munene. 7Kandi lwa va mala kuvavika mmuse, va va teva, Mu kola yaga netsingulu ki, naho ku lieta ki? 8Ma Petro, yizula Roho Mutakatifu, ya va volera, Mwinye avanene vavandu, navakulundu, 9kwinye ni ku tevwa ndi lero ku muyinzi mulahi gwa kolwa ku mundu wa dekerana, kuli wa ya honnywa mundu uyu; 10ga manyekane ku mwinye mwosi, kandi ku vandu vosi va Israeli, ga veye ku lieta lya Yesu Kristo wa Nazareti, wa mwinye mwa bamba, kandi wa Nyasaye ya simugukidza mu vakudzi, ku lieta lilye mundu uyu a singira hano imbiri wenyu mulamu. 11A veye ligina lya mwinye avombaki mwa lega, kandi lya lombwa li ve mutwe gwo lwiga. 12Kandi si ha li nobuhonnyi ku wundi: kigira si ha li nelieta lindi muse mweligulu, lya hebwa mu vandu, li ku niga ku honnywe nalyo.
13Lwa va lola ubuluviriri bwa Petro na Yohana, ni va va manya va veye avandu vatamanyi kandi va ta li avegidzwa, va genya; ni va va manya va li halala na Yesu. 14Kandi va lola mundu uyu wa honnywa a singira halala navo, si va li nelikuva lyokutivula. 15Navutswa lwa va va ha munwa kutwula mu kyina, va volerana avene, 16ni va vola Ku kola ndi avandu yava? Kigira iigali lilolekidza linene li mali kukolwa navo, li loleki ku vosi ava menya mu Yerusalemi; kandi kwinye si ku nyala kwambakana. 17Navutswa ga ta landa kandi mu vandu, ku va gaye va ta volerana kandi nomundu ku lieta yili. 18Ma va va langa ni va veganehidza va ta vola ligali, kandi va tegidza ku lieta lya Yesu. 19Na vutswa Petro na Yohana va tivula ni va va volera, Ni bu va ubulungi imbiri wa Nyasaye kuhulira mwinye kusira Nyasaye, mu manyiridze: 20kigira kwinye si ku nyala kuleka kuvola vindu vya kwa lola nevya kwa hulira. 21Navo lwa va mala kuvatihidza va va lakuula, va vula kulola kindu kuvaha mageli, kigira avandu; kigira avandu vosi vidzominya Nyasaye ku aga kolwa. 22Kigira mundu uyu wa kolerwa lilolekidza yili lyokuhonnywa, ya li na a duka imihiga kuvita amakumi gane.
23Kandi lwa va lakuulwa, va duka ku avavo, ni va vuula gosi ga vasalisi vanene navakulundu va va volera. 24Navo lwa va mala kuhulira yaga, va gingira Nyasaye myoyo gyavo halala, ni va vola, O Mwami, wa lomba ligulu, nelirova, nenyanza, nevindu vyosi vi veye mu: 25wa vola na Roho Mutakatifu, mu munwa gwaguga wetu Daudi mutumikiri wowo,
Kigira ki Tsihiri tsya kola kizalo,
Navandu va ganagana vindu vya vutswa?
26Avami velirova vetegeki, Navanene va vugana halala,
Kuhing'ana no Mwami kandi na Kristo wewe.
27Kigira ligali Herodi na Pontio Pilatu, halala ne Tsihiri navandu va Israeli, va vugana halala mu lidala yili kuhing'ana na Yesu Mutumekiri wowo mutakatifu, wa wa vaka maguta. 28Ku vyosi va kole vyosi vyomukono gugwo nobulaliri bubwo bwa saavira vi kolwe. 29Kandi kalunu, Mwami, henza litihidza lyavo: u he avatugwa vovo va vole likuva lilyo nobuluviriri bwosi, 30nive kandi u nyire mukono gugwo kuhonnya; kandi vilolekidzu nevyokugenya vi kolwe ku lieta lya Yesu Mutumekiri wowo mutakatifu. 31Lwa va mala kusaala, ha va vuganira ha degeridzwa; navo vizula Roho Mutakatifu vosi, ni va vola likuva lya Nyasaye nobuluviriri.
32Kandi kiduma kya yava va suuvira va li nomwoyo mulala na roho mulala: si ha li nomulala kuvo wa vola kindu kya ya li nakyo, ni kyange; navutswa va sanga vindu vyosi. 33Navatumwa va twulidza netsingulu tsinene lilolekidza lyavo lyelisimuguka lyo Mwami Yesu: kandi tsimbabasi tsinene tsya li kuvo vosi. 34Kigira si ha li nomulala wa daka: kigira vosi va li ni va veye nemilimi kinga tsinyumba va tsi gula, ni va leta tsishilling tsyevindu vya gulwa, 35ni va tsi vika ha virenge vyavatumwa: ni va gavulira vosi sa mulala kuli wa a daka.
36Kandi Yosefa wa vatumwa va langa lieta lindi Baranaba (lya girunkanywa li vola, Mwana wobuleminyi), Mlevi, navutswa mundu wa Kuporo, 37ya li nomulimi na a gula na a leta tsishilling na a vika ha virenge vyavatumwa.
©Bible Society of Kenya, 1967
