Yohana 13

UYeesu ikivayoosa amagulu avamanyisiwa vaakwe

1Lino, pina shisinaafishe ishiwungo sha Pasaakha, uYeesu wáamanya kiija, uluhaavi lwakwe lwafikha ulwa kiwuukha mu nyi iyi kiluta kwa Daada. Uluhaavi loona pina ali mu nyi iyi, wávaganaga avaanu vaakwe, khanji wávaganaga mbakha kuwudugo.

2UYeesu na vamanyisiwa vaakwe vaakhala kiilya ishakiilya isha pashaamihe. Uluhaavi ulo uShetaani akhandi ayinjiile mu numbula ya Yuuda umwana wa Simoni uIsikaliyoote, baheene amudoolele uYeesu. 3UYeesu wámanyaga kiija, uwiihe wámupeelaga uwutawulilwa uwa kifilongosa ifiinu fyona, khanji kiija wáhumile kwa Nguluvi, na asiitine khanji kwa Nguluvi. 4Lino uYeesu wáalekha kiilya, wáyiima wáviikha umutote gwakwe palubali, wátoola ilitaawulo wáyipinya mu shigudi. 5Wáaponya amalenga mu sebeti. Ino wáyansa kivayoosa amagulu#13:5 Kivayoosa amagulu: UYeesu akhandi isenga insengo iyo yina avavanda vasengaga kwa vatwa vaanave. avamanyisiwa vaakwe na kivafyangula ni litaawulo lina wáyipinyaga.

6UYeesu wáganile kifikha pina akhandi akwali uSimoni Petulo, uPetulo wámuposa wáaja, “Wee Mutwa, wuli, wisakula owe kiniyoosa amagulu gangu?” 7UYeesu wámugomosesa wáaja, “Owe usigameenye gina nisenga uluhaavi ulu, leelo usigamanye paanyuma.” 8UPetulo wámugomosesa wáaja, “Usikwiliile kaa kiniyoosa amagulu gangu!” Lino uYeesu wámugomosesa wáaja, “Nda nisikuyosiise owe, usikwiliile kiiva lumo noone khanji.” 9Lino uSimoni Petulo wámugomosesa wáaja, “Wee Mutwa, nda gali ndeeno, usikhaniyosaaga amagulu geene duguli, leelo naga mawokho gangu lumo nu mutwe gwangu.” 10UYeesu wámugomosesa wáaja, “Umuunu yuna ayiyoojile, asisakulwa kiyiyooga khanji, ila kiyiyoosa amagulu geene duguli. Umuunu uyo, iiva avaleele. Omwe muvaleele, leelo yumonga mu omwe asivaleele.” 11UYeesu akhandi ameenye yuna asimudoolele, lulwene wájovile kiija, “Yumonga mu omwe asivaleele.”

12UYeesu pina wáamala kivayoosa amagulu avamanyisiwa vaakwe, wátoola umutote gwakwe, wáakhala khanji pina vakhandi viilya ishakiilya, wávajovela wáaja, “Wuli, mwamanya gina navagahila omwe? 13Omwe mukinijova one mwija, ‘Mumanyisaaji,’ khanji mwijova, ‘Mutwa.’ Mwijova ga shiyooli, kwa kiiva one nili Mumanyisaaji, khanji nili Mutwa. 14One yuna nili Mumanyisaaji, khanji yuna nili Mutwa navayoosa amagulu geenyu. Shiisho ndeeno na yuumwe muveesaje muyoosania amagulu geenyu. 15Navasoonela ishihwano, baheene na yuumwe mugahilanaje ngaja shina one navagahila omwe. 16Shiyooli nikivajovela, umuvanda asili mukhome kishila umutwa waakwe, khanji yuna ifilikhwa asili mukhome kishila yuna ikimufilikha. 17Nda mwamanya ago na nda mwifwata ishihwano ishi, lino uNguluvi asivayimiilile.

18“Nisiijova aga, kwa omwe woona. Nivameenye kihuma pashiyanso avaanu vina nivabagwile kiiva, vamanyisiwa vangu. Leelo naajova aga baheene gakwilane gina gayandiikhwe mu Mayandikhwa aManofu kiija, ‘Umumanyi wangu yuna akhandi iilya ishakiilya lumo noone, wáseetukha kiiva mulugu wangu.’#13:18 Yimba mu litaafili lya Sabuli 41:9. 19Nikivajovela goona aga pina gasinawoneshe, baheene pina gakhava giwonekha, mukhahuviilila kiija, ‘One Yuune.’#13:19 One Yuune: Apa uYeesu ikiyijova ngaja shina uNguluvi ikiyijova mu Lufingo uLukuulu. Yimba mu litaafili lya Kihuma 3:14; Isaaya 43:10. 20Shiyooli nikivajovela, umuunu yoyoona yuna ikimuposheela yuna namufilikha, ikiniposheela one. Shiisho ndeeno, yuna ikiniposheela one, ikimuposheela yuna wánifilikha one.”

UYeesu ilogola ulwa yuna asimudoolele

(Mataayo 26:20-25; Maluko 14:17-21; Luuka 22:21-23)

21UYeesu wáganaga kilogola ago, wásugumilwa mandu mu numbula yaakwe, wáajova bahawuvalafu wáaja, “Shiyooli nikivajovela kiija, umunyaayumo weenyu, asinidoolele.” 22Lino avamanyisiwa vaakwe vayansa kiloleelana, kwa kiiva vasikhameenye kiija ikimulogola yu naani. 23Akhandi akwali umumanyisiwa yumonga yuna uYeesu akhandi amugeene mandu. Umwene wákhalaga nkholeela nu Yeesu pina viilya. 24Lino uSimoni Petulo wámusinisa umumanyisiwa uyo, wámujovela wáaja, “Muposa uYeesu, wuli, ikimulogola yu naani paakhati yeesu.” 25Lino umumanyisiwa yula wámuyegamila uYeesu, wámuposa wáaja, “Wee Mutwa, yu naani yuna asikudoolele?”

26UYeesu wámugomosesa wáaja, “Yula yuna nisimupeele ishipilije sha mukhaate shina nadabisa.” Lino wátoola ishipilije sha mukhaate wádabisa, wámupeela uYuuda, umwana wa Simoni uIsikaliyoote. 27UYuuda pina wáyanushila ishipilije shila sha mukhaate, baaho uShetaani wámuyinjila. Lino uYeesu wámujovela wáaja, “Gina ugulumiile kigagaha, gagaha nyangu!” 28Leelo avaanu woona vina vakhandi viilya, vasikhamanyile kiija kwashi uYeesu wálogola ngaja ndeeno.

29Avanji vahiivaga kiija uYeesu wámujovela kiija, alute agule ifiinu fina fisakulwa pa shiwungo, awu avapeele avapiina ihela simonga, kwa kiiva uYuuda yumwene akhandi iikhata umufukho gwa hela. 30Lino uYuuda pina wáyanushila ishipilije shila, baaho wáahuma panja. Uluhaavi ulo yikhandi shilo.

UYeesu ikivapeela avamanyisiwa vaakwe indaji imya

31Lino uYuuda pina ahumile panja, uYeesu wávajovela avamanyisiwa vaakwe wáaja, “Lino uwutupikho wangu one Lusawo lwa Muunu wuhejeelile kiwonekha bahawuvalafu. Khanji, uwutupikho wa Nguluvi wukhawonekha bahawuvalafu kishilila mu nsengo yangu. 32Nda wiwonekha uwutupikho waakwe kishilila mu nsengo yangu, lino woope uNguluvi ikivawonensa avaanu uwutupikho wangu one Lusawo lwa Muunu, khanji iigaha ndeeno, lilino ndeeni.

33“Omwe vanangu, nisiive noomwe kwa luhaavi lufupi hela. Ngaja shina nikhandi nivajoveele avakhome va Vayahuudi, shiisho ndeeno nikivajovela na yuumwe lino kiija, mukhanisakula leelo musikwiliile kiyinsa kuna nikhava. 34Leelo lino nikivapeela indaji imya, nikivalajisa kiija, ‘Mugananaje. Ngaja shina one nivageene omwe, shiisho ndeeno na yuumwe mugananaje.’ 35Nda mwiganana, lino avaanu woona vasiimanye kiija, omwe muli vamanyisiwa vangu.”

UYeesu ikimujova uPetulo kiija akhamukhaana

(Mataayo 26:31-35; Maluko 14:27-31; Luuka 22:31-34)

36Lino uSimoni Petulo wámuposa uYeesu wáaja, “Owe Mutwa, wiiluta kwi?” UYeesu wámugomosesa wáaja, “Niiluta kuna owe usikwiliile kinifwata uluhaavi ulu, leelo usinifwate paanyuma.” 37UPetulo wámuposa wáaja, “Owe Mutwa, wuli, kwashi nisikwiliile kikufwata lino? One niyipinyile kiwuyasa uwuumi wangu kwa kiiva yaakho!” 38UYeesu wámugomosesa wáaja, “Petulo, wuli, ukwiliile kiwuyasa uwuumi waakho kwa kiiva ya one? Shiyooli nikikujovela, pina injogolo yisinaavishe, usiive wanikhaana mala khatatu kiija, usinimeenye.”

선택된 구절:

Yohana 13: Shisangu

하이라이트

복사