Yohana 12

UMaliya ikimududumisisa uYeesu amafuta

(Mataayo 26:6-13; Maluko 14:3-9; Luuka 7:36-50)

1Lino, saganaga kisigala nsiku mutanda kifikha ishiwungo sha Pasaakha, uYeesu wáaluta khanji ku lujinji lwa Betaniya, kuna akhandi iikhala uLaasalo, yuna uYeesu wámufyusaaga. 2Avaanu vamonga ava kula, vamuteleshela ishakiilya isha pashaamihe, uMalita wámugawulila. ULaasalo akhandi munyaayumo wa vahensa vina vakhandi lumo nu Yeesu pa meesa. 3Ino uMaliya wátoola insupa ya mafuta aga lifungu likhome, gina ginunshilila mandu, wámududumisisa uYeesu mu magulu, wamufyangula ni nyele saakwe. Inanda yoona yanunshilila umununsi umunofu gwa mafuta ago.

4Leelo umumanyisiwa waakwe yumonga, ilitaawa lyakwe akhandi itambulwa Yuuda Isikaliyoote, yuna wámudolelaga uYeesu wáaja, 5“Kwashi amafuta ago, gasagusiwa kwa hela nyinshi mandu,#12:5 Hela nyinshi mandu: Kwa Shiyunaani yiyandiikhwe, dinaali magana gatatu (300). Ihela isi silingeene na mahombo ga nsiku magana gatatu (300). na kivapeela avapiina.” 6UYuuda asikhalogwele ndeeno kwa kiiva ya kivasungupila avapiina, leelo kwa kiiva akhandi muhiiji. Uyo yumwene yuna akhandi iviikha umufukho gwa hela. Akhandi ihiija ihela sina akhandi ikisiviikha na kisitumila mwene duguli. 7Lino uYeesu wámugomosesa uYuuda wáaja, “Muleshi, wágulaga amafuta ago, kiija agaviishe kwa kiiva ya lijuva lina vakhanisiila. 8Avapiina muli lumo nsiku soona, leelo one nisiiva lumo noomwe nsiku soona.”

AVayahuudi vilogosania ulwa kimubuda uLaasalo

9Lino avaanu vinshi vapulikha kiija uYeesu akwali uluvala lula, vaaluta, yisili kimwaga umwene hela, leelo kimuloleela nayu Laasalo, yuna uYeesu wámufyusaaga. 10Lino avatambule avakhome valamula kimubuda woope uLaasalo. 11Valamulaga ndeeno, kwa kiiva aVayahuudi vinshi vavalekhaga avakhome vaanave, vamuhuviilila uYeesu, kwa kiiva ya kifyukha uLaasalo.

UYeesu iyinjila ku Yelusalemu kwa filuulu

(Mataayo 21:1-11; Maluko 11:1-11; Luuka 19:28-40)

12Pamulaawu njine, ishipuga ishikhome sha vaanu vina vakhandi vayinsile ku shiwungo sha Pasaakha, vapulikha kiija uYeesu ali mu nsila, iyinsa ku Yelusalemu. 13Lino vatoola amansambala ga matende, vaaluta kimuposheela uYeesu. Vakhoosa ishawuti vaajova,

“Hosana!#12:13 Hosana: Uluganulo lwakwe, Atunwajwe uNguluvi.

Ayimililwajwe yuna iyinsa kwa litaawa lya Mutwa uNguluvi!

Ayimiliilwe uMutwa wa Vaisilaheli.”#12:13 Yimba mu litaafili lya Sabuli 118:25-26.

14Lino uYeesu wáyaaga inyana dogovi,#12:14 Dogovi: UYeesu pina wáyangeele idogovi badala ya falaasi, wáwonensaaga avaanu kiija, umwene iyinsa ngaja mutwa wa wulindamafu, asili ngaja mutwa wa kileeta uwulugu. wáyangala. Ngaja shina yiyandiikhwe mu Mayandikhwa aManofu kiija,

15“Omwe vaanu va mu lijumbi lya Sayuni#12:15 Sayuni: Litaawa ilinji lya lijumbi lya Yelusalemu. musikhatiilaji!

Loleeli, uMutwa weenyu iyinsa,

ayangeele inyana dogovi!”#12:15 Yimba mu litaafili lya Sekhaliya 9:9.

16Uluhaavi ulo, avamanyisiwa va Yeesu vasikhamanyile ago. Leelo uYeesu wáganaga kifyukha, baheene vakumbukha kiija, ago gakhayandiikhwe ulwa mwene na shina vamugahilaga ngaja shina yiyandiikhwe.

17Lino avaanu vina vakhandi nu Yeesu, uluhaavi luna ikimushemeela uLaasalo mu lijooja na kimufyusa, vaveene vina vayalalisaaga imola iso. 18Ndeeno avaanu vinshi vapulikhaga imola sa mabikha gina wágahaga, lulwene luna vahumaga ku Yelusalemu kiluta kimuposheela uYeesu. 19Leelo aVafalisaayo vaposania vaajova, “Mukilwaga? Tisikwiliile kigaha shoshoona! Loleeli, avaanu woona vikimufwata umwene.”

UYeesu ilogola ulwa mfwa yaakwe

20Avaanu vamonga vina vakhalutile ku Yelusalemu kimufuunya uNguluvi mu shiwungo sha Pasaakha, vasikhandi Vayahuudi. 21Lino avaanu awo vaaluta kwa Filipo yuna wáhumaga ku Betisayida inyi ya Galilaya, vamulomba vaajova, “Mutwa, tilomba tilogole nu Yeesu.” 22UFilipo wáaluta kimujovela uAndeleya imola iso, baheene woona uFilipo nu Andeleya vaaluta kimujovela Yeesu.

23UYeesu wávagomosesa wáaja, “Uluhaavi lwafikha ulwa kitupikhwa uLusawo lwa Muunu kiwonekha bahawuvalafu. 24Shiyooli nikivajovela, imbeyu nda yisisiliilwe mu lilongo yisikwiliile kimela, leelo nda yisiilwe mu lilongo, yiimela na kikhoma amakhomo minshi. 25Umuunu yoyoona yuna isakula kiwusaajila uwuumi waakwe, uyo asiwuyase, leelo umuunu yoyoona yuna ikiwuyasa uwuumi waakwe kwa kiiva ya one, uyo asiwupate uwuumi wa shiluta. 26Umuunu yoyoona yuna ikinisenjela one, isakulwa anifwate. Khanji, popoona pala pina nikwali, papeene pina umuvanda wangu akhava akwali. UDaada akhamutuna umuunu yoyoona yuna ikinisenjela one.

27“Lino nayansa kisugumilwa mandu mu numbula yangu. Nilogole shishi? Wuli nijove, ‘Wee Daada, nikikulomba unikuluse mu luhaavi ulu ulwa malava’? Ndaali, nisikwiliile kilomba ngaja ndeeno, kwa kiiva niyinsile kilava mu nyi muno. 28Wee Daada Nguluvi, ulitupishe ilitaawa lyakho.”

Baheene uNguluvi wálogola kihuma kushaanya wáaja, “Wee Lusawo lwangu, nalitupikha, khanji nisiyiteneshe kilitupikha.” 29Ishipuga sha vaanu vina vakhandi pala vaganaga kipulikha ishawuti kihuma kushaanya, vamonga vaajova, “Lugulumo lwa noonya,” avanji vaajova, “Umalayikha wa Nguluvi, wáava ilogola nawo.” 30Leelo uYeesu wávajovela avaanu vala wáaja, “Iliswi lina mukhandi mupulikha, lisikhandi lya kinitanga one, leelo likhandi lya kivatanga omwe. 31Lino lwafikha uluhaavi lwa Nguluvi ulwa kivahiga avaanu ava mu nyi iyi. Lino lwafikha uluhaavi lwa Nguluvi ulwa kimudaga uShetaani, umutemi wa nyi iyi. 32One pina nanyenyulwa kihuma mu nyi, nikhavakweha woona, kiija vayinse kunyangu.” 33UYeesu wájovaga ndeeno, kiwonensa shina hambi iifwa.

34Lino ishipuga sha vaanu vamugomosesa uYeesu vaajova, “Tiyimbile mu Mayandikhwa aManofu kiija, uMukulusaaji yuna uNguluvi wátahisaaga kimufilikha,#12:34 UMukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. akhava muumi shiluta.#12:34 Yimba mu litaafili lya Sabuli 110:4. Lino kwashi wiijova avaanu vakhamunyenyula pashaanya uLusawo lwa Muunu? Wuli, uLusawo lwa Muunu yu naani?” 35UYeesu wávajovela wáaja, “Uwuvalafu wiiva lumo noomwe kwa luhaavi lufupi hela. Muyitenekhaje kijenda mu wuvalafu uwu, pina inshiisi yisinaakhome, kwa kiiva umuunu yuna ijenda mu nshiisi asikumeenye kuna iiluta. 36Huvililaji uwuvalafu uwu pina wushaanali wukwali, baheene muveesaje vana va wuvalafu.” UYeesu wáganaga kilogola ago, wáshilekha ishipuga shila, wáaluta kityega.

AVayahuudi vinshi vikhaana kimuhuviilila uYeesu

37Hata nda uYeesu wágahaga amabikha minshi paveene, hata ndeeno avaanu vinshi vasikhamuhuviliile. 38Gakhandi ngaja ndeeno, baheene gakwilane amaswi gina umukuwamalago uIsaaya wájovile kiija,

“Wee Mutwa, yu naani yuna ahuviliile imola seesu?

Khanji, yu naani yuna uMutwa amusoneele ingufu saakwe?”#12:38 Yimba mu litaafili lya Isaaya 53:1.

39Vasikhamuhuviliile kwa kiiva uNguluvi wájovaga kishilila kwa Isaaya kiija,

40“Avapofwese ameeho gaanave

na kisigaha nyuumu inumbula saanave,

kiija vasikhaloleelaga, vasikhamanyaga,

baheene vasikhatinaga kunyangu,

kiija vasikhakulukhaga.”#12:40 Yimba mu litaafili lya Isaaya 6:10.

41UIsaaya wálogwele ago kwa kiiva wáwaagaga uwutupikho wa Yeesu na kilogola imola sa Yeesu.

42Hata ndeeno, avaanu vinshi vamuhuvililaga uYeesu, avamonga mu awo vakhandi vakhome va Vayahuudi. Leelo vasikhalogwele bahawuvalafu kiija vamuhuviliile, kwa kiiva vavatiilaga aVafalisaayo, kiija hambi vikivadaga mu nanda iya kifuunyila. 43Avakhome awo vadobokhaga mandu kisufisiwa na vaanu, kulikho kisufisiwa nu Nguluvi.

Avaanu vakhahigwa kwa maswi gina ilogola uYeesu

44Lino uYeesu wálogola bahawuvalafu wáaja, “Umuunu yuna ikinihuviilila one, asikinihuviilila yuune duguli, leelo ikimuhuviilila na yuna anifiliishe. 45Umuunu yoyoona yuna wányaaga one, wámwaga na yuna wánifilikha. 46One nayinsa mu nyi iyi ngaja wuvalafu, baheene shila muunu yuna ikinihuviilila asikhakhalaga mu nshiisi.

47“Umuunu yoyoona yuna ipuliisa amaswi gangu, leelo asikigayinatila, one nisikhayinsa kimuhiga, kwa kiiva nisikhayinsile mu nyi iyi kivahiga avaanu, leelo nayinsaga kivakulusa. 48Shiisho ndeeno, umuunu yoyoona yuna ikinikhaana one lumo na maswi gangu, akhahigwa. Amaswi gina nagalogola gageene gina gakhamuhiga mu lisiku ilya kihigwa inyi. 49Kiiva nisalogola kwa wutawulilwa wangu, leelo yu Daada yuna wánifilikha, yumwene yuna wánilajisa aga kilogola, na shina hambi nilogola. 50Nimeenye kiija indaji yaakwe yikivapeela avaanu uwuumi wa shiluta. Khanji one nilogola gala hela, gina uDaada anilajiise nigalogole.”

선택된 구절:

Yohana 12: Shisangu

하이라이트

복사