Yohana 14

Insila ya kiluta kwa Nguluvi

1UYeesu wáyitenekha kivajovela avaanu wáaja, “Musikhasugumilwaji mu numbula seenyu, muhuvililaji uNguluvi, khanji nihuvililaji na yuune. 2Imwenshe yikwali nkhome mu nanda ya Daada. Nda yaali yive yisili ndeeno, ndi navajovela. Lino, niiluta kivanosesa uluvala.#14:2 Nda yaali yive yisili ndeeno, ndi navajovela. Lino, niiluta kivanosesa uluvala. Mu mayandikhwa agamonga amakuulu yiyandiikhwe, Nda yaali yive yisili ngaja ndeeno, wuli, yaali yiiva nivajoveele kiija niiluta kivayandaalila uluvala? 3Pina naaluta kivanosesa uluvala, nikhayinsa khanji kivatoola, baheene uluvala pina nikhava nikwali na yuumwe mukhava baaho lumo noone. 4Omwe muyimeenye insila yina yikivalongosa uluvala luna niiluta.”

5Lino uTomasi wámuposa uYeesu wáaja, “Wee Mutwa, ose tisimeenye kuna wiiluta. Wuli, lino tikwiliile kiyimanya insila shihwana wuli?” 6UYeesu wámugomosesa wáaja, “One nili nsila, na shiyooli, khanji nili wuumi. Kusiina umuunu yoyoona yuna akwiliile kiyinsa kwa Daada nda asishiliile kunyangu. 7Nda mwali munimanye, lino yaali yiiva mumumeenye woope uDaada. Kiyansa lino, mumumeenye, khanji mwamwaga.”

8Lino uFilipo wámujovela wáaja, “Wee Mutwa, tilomba utusoonele uDaada. Nda utusoonele yiiva yakwila.” 9UYeesu wámugomosesa wáaja, “Filipo, nikheele noomwe luhaavi lutali loona ulu, hata ndeeno ushaanali usinimeenye one? Umuunu yoyoona yuna wányaaga one, wámwaga nayu Daada. Lino kwashi ukiniposa kiija, ‘Tusoonela uDaada’? 10Wuli, usihuviilila kiija one nili mwa Daada, nayu Daada ali munyangu? Amaswi aga nikivajovela gasiihuma mu mahiiva gangu, leelo uDaada wangu yuna iikhala mukhati yangu isenga insengo yaakwe kishilila one. 11Muyiitishe gina nilogola kiija nili mukhati ya Daada, na kiija ali mukhati yangu. Leelo nda omwe musihuviilila gina nilogola, lino huviilili kwa kiiva ya nsengo sina nisenga. 12Shiyooli nikivajovela, umuunu yoyoona yuna ikinihuviilila, asisenje insengo sisila sina one nisenga. Khanji asisenje nkhome kishila sina nisenga, kwa kiiva niiluta kwa Daada. 13Nda mwilomba shiinu shoshoona mu litaawa lyangu, one nisiigahe ngaja shina mwilomba. Kwa nsila iyo, niwonensa uwutupikho wa Daada shina wushwali. 14Nda mukinilomba shiinu shoshoona mu litaawa lyangu, nisiigahe ngaja shina mwilomba.

UYeesu ilogola aga kiyinsa kwa Numbula uMunofu

15“Nda munigeene musiigahe insengo soona sina navalajisaaga. 16Ino na yuune nisimulombe uDaada, baheene avapeele uMutanjilisaaji uyunji,#14:16 UMutanjilisaaji uyunji: Uluganulo lwakwe, uNumbula uMunofu. Yimba mu litaafili ili, 14:26. Yimba iliswi Numbula uMunofu mu Maswi aMahensa. baheene ave lumo noomwe, khanji asivalekha kaa. 17Umutanjilisaaji uyo yu Numbula uMunofu, uyo yumwene asivagubutulile avaanu ishiyooli. Avaanu vina vikimukhaana uNguluvi vasikwiliile kimuposheela uNumbula uyo, kwa kiiva vasikimwaga, khanji vasimumeenye. Leelo omwe mumumeenye uNumbula wa Nguluvi kwa kiiva iikhala lumo noomwe, khanji akhava mukhati yeenyu.

18“Nisivalekha omwe ngaja vapiina, leelo nikhayinsa khanji kunyeenyu. 19Nishaanali padoodo nisiwonekha khanji mu nyi iyi. Leelo omwe musinyaaje. Kwa kiiva one nikhava muumi, na omwe mukhava wuumi. 20Mu lisiku lila, mukhamanya kiija one nili mukhati ya Daada, na omwe muli mukhati yangu, na one nili mukhati yeenyu. 21Umuunu yoyoona yuna agameenye na kisenga gina nilajisa, uyo yumwene yuna ikinigana. Woope umuunu yuna ikinigana, uDaada asimugane. Na yuune nimugeene na kiyiwonensa kunyaakwe.”

22Lino umumanyisiwa yumonga ilitaawa lyakwe Yuuda, yuna asili yu Yuuda uIsikaliyoote, wámuposa uYeesu wáaja, “Wee Mutwa, wuli, ukwiliile shihwana wuli kiyiwonensa kunyeesu, leelo usikiyiwonensa kwa vaanu avanji woona?” 23UYeesu wámugomosesa wáaja, “Umuunu yoyoona yuna ikinigana, asigasenje gina nikimulajisa. Shiisho ndeeno uDaada asimugane, khanji one nu Daada tikhayinsa kunyaakwe, na kikhala lumo nawo. 24Leelo umuunu yoyoona yuna asinigeene, asikigasenga gina nikimulajisa. Khanji, gina nikivalajisa gasili gangu, leelo giihuma kwa yuna anifiliishe kunyeenyu.

25“Navajovela goona ago uluhaavi nishaanali niikhala lumo noomwe. 26Leelo uMutanjilisaaji uyo, uluganulo lwakwe uNumbula uMunofu, yuna uDaada ikimufilikha kunyeenyu mu litaawa lyangu, yumwene yuna akhavamanyisa na kivakumbusa goona gina nikhandi nivajoveele. 27Nikivaleshela uwulindamafu. Nikivapeela uwulindamafu wangu wuna wusili ngaja wuna wiihuma kwa vaanu vina vikimukhaana uNguluvi. Musikhasugumilwaji mu numbula seenyu, khanji musikhatiilaji shoshoona. 28Mupuliishe gina nikivajova kiija, ‘Niiluta, leelo nikhayinsa khanji kunyeenyu.’ Nda shiyooli munigeene, yaali yiiva mushendeeva kipulikha kiija niiluta kwa Daada, kwa kiiva uDaada mukhome kishila one.

29“Navajovela goona ago uluhaavi ulu, pina imola iso sisinawoneshe, baheene uluhaavi pina sikhawonekha mukhanihuviilila. 30Nisikwiliile kilogola noomwe mandu, kwa kiiva umutemi wa nyi iyi uShetaani iyinsa. Leelo asikwiliile kinimena one. 31Gina niigaha gageene gina uDaada wánilajisaaga nigahaje, baheene avaanu woona vamanye kiija nimugeene. Lino, yiimi tilutaje.”

선택된 구절:

Yohana 14: Shisangu

하이라이트

복사