Yohana 15
15
UYeesu musabiibu gwa shiyooli
1UYeesu wáyitenekhaga kivamanyisa avamanyisiwa vaakwe wáaja, “One nili ngaja mupishi gwa musabiibu gwa shiyooli, uDaada ali ngaja mulimaaji. 2Shila linsamba lyangu lina lisiikhoma amakhomo, uDaada ikiliwuusa. Leelo shila linsamba lina liikhoma amakhomo, uDaada ikilipanyulila, baheene likhome mandu. 3Omwe mupalaganyiilwe kiiva vavalafu, kwa kiiva muhuviliile amamanyiso gangu. 4Muyitenekhaje kikhala kunyangu, na one nisiyiteneshe kikhala mukhati yeenyu, ngaja linsamba shina lisikwiliile kikhoma amakhomo lyene duguli, bila kilembelela mu musabiibu, shiisho ndeeno musikwiliile kisenga gina iigana uNguluvi, bila kikhala mukhati yangu.
5“One nili ngaja mupishi gwa musabiibu, omwe muli mansamba. Umuunu yula yuna iikhala mukhati yangu, na yuune niikhala mukhati yaakwe, uyo akhava iikhoma amakhomo minshi, kwa kiiva bila one musikwiliile kisenga lyolyona. 6Umuunu yoyoona yuna asili lumo noone, ahwaneene ni linsamba lina lidumulwa na kiyuuma. Ndeeno, avaanu viihola na kitoosa mu mooto, liipya. 7Omwe nda muyiteneshe kiiva lumo noone na maswi gangu gakhale mukhati yeenyu, mumulombaje uDaada shoshoona shina mwisakula, asivapeele. 8Nda mwikhoma amakhomo minshi, na kiiva vamanyisiwa vangu va shiyooli, musiive mwiwonensa uwutupikho wa Daada, bahawuvalafu. 9Ngaja ndenela uDaada shina aniganile one, na yuune shina nivageene omwe, muyitenekhaje kikhala mu lugano lwangu. 10Nda mwisenga gina nikivalajisa, lino muyitenekhaje kikhala mu lugano lwangu, ngaja shina one nagasenga gina uDaada wánilajisaaga na kikhala mu lugano lwakwe.
11“Navajovela aga, kiija mushendeeve ngaja one, khanji muveesaje mwishendeeva mandu. 12Gina nikivalajisa gageene aga, muveesaje mwiganana, ngaja shina one nivageene omwe uluhaavi ulu pina nili lumo noomwe. 13Kusiina umuunu umunya lugano kishila umuunu yuna ikiwuyasa uwuumi waakwe, kwa kiiva ya vamanyi vaakwe. 14Omwe muli vamanyi vangu, nda mwisenga gina nivalajiise. 15Kiyansisa lino nisiiva nikivashemeela khanji kiija vavanda vangu, kwa kiiva umuvanda asiimanya ulugulumilo lwa mutwa waakwe. Leelo omwe nivagubutuliile goona gina nagapulikhaga kihuma kwa Daada, lino ndeeno nisiive nikivashemeela vamanyi vangu. 16Musili yuumwe mwanihagulaga one, leelo yuune navahagulaga omwe kiiva vamanyisiwa vangu. Navabagulaga baheene mukhome amakhomo gina gasiisila kaa. Lino goona gina mwilomba mu litaawa lyangu, uDaada akhavapeela. 17Lino nikivalajisa omwe kiija, mugananaje.”
Avahuvililaaji va Yeesu vakhakhalalilwa
18UYeesu wáyitenekha kivamanyisa kiija, “Nda avaanu va mu nyi iyi vikivakhalalila omwe muveesaje muna luuju kiija, vatalaga kinikhalalila one. 19Nda mwali muve vaanu va mu nyi iyi, ino awo ndi vaava vavageene ngaja shina vavageene avaanu vaanave. Leelo omwe musili vaanu va mu nyi iyi, kwa kiiva nivabagwile kihuma mu nyi iyi, lulwene avaanu va mu nyi iyi vikivakhalalila. 20Musikhasamwaji gina navajovelaga kiija, ‘Umuvanda asili mukhome kishila umutwa waakwe.’ Ino nda vanilafyaga one, na yuumwe vakhavalafya shiisho ndeeno, nda vihuviilila amamanyiso gangu, vakhahuviilila na mamanyiso geenyu. 21Leelo vikivagahila goona ago kwa kiiva omwe muli vamanyisiwa vangu, khanji kwa kiiva vasimumeenye yuna anifiliishe. 22Nda, naali nive nisikhayinsile kunyaanave na kilogola nawo, lino yaali yiiva vangaya wunansi. Leelo lino nayinsa, ndeeno, vasikwiliile kiyisaajila kiija, vangaya wunansi. 23Umuunu yoyoona yuna ikinikhalalila one, ikimukhalalila nayu Daada wangu. 24Nagasenga amabikha makhome gina asinajelaje kisenga hata muunu yumo. Nda vasikhagaajile, yaali yiiva vangaya wunansi. Leelo lino vagaagaga goona gina nagahaga, hata ndeeno vashaanali vapikinikhalalila, woope uDaada vikimukhalalila. 25Aga gasenjekha kiija, amaswi gakwilane gina gayandiikhwe mu Mayandikhwa aManofu kiija, ‘Vamukhalalilaga hela.’#15:25 Yimba mu litaafili lya Sabuli 35:19; 69:4.
26“Nikimufilikha kunyeenyu uMutanjilisaaji, yuna yu Numbula uMunofu. Umwene akhavagubutulila avaanu woona ishiyooli ulwa one. Iihuma kwa Daada na pina iifikha kunyeenyu asivabedele ishiyooli shangu. 27Khanji na yuumwe musibedele imola sangu, kwa kiiva mukhandi lumo noone kihuma pashiyanso.”
© 2020, Wycliffe Bible Translators, Inc. All rights reserved.
