यूहन्ना 6
6
पाँची हज़ारो लोगौ कै खाणौ खियाणौ
(मत्ती 14:13-21; मर 6:30-44; लूका 9:10-17)
1इनु बातौ खै बाद यीशु गलील झीलो यानी तिबिरियास झील कै पार हौटा। 2औरौ ऐक बौड़ै भीड़ तैसकै पाछैदै चालै रौए थी, जिथुकै जू चौमत्कार कै काम सै बीमारों पांदी दिखांव थिया सै तिनुकै दैखौ थिए। 3तोबै यीशु धारो पांदी हौटै गौआ औरौ आपणै चैलै कै साथै तिथै बौठै गौआ। 4यहूदी लोगौ का फसह का तैयार नेड़िक थिया।
5जोबै यीशुए ऐक बौड़ी भीड़ खै आपणै धोरे आन्दै बैई दैखै, औरौ तोबै फिलिप्पुस कैंईदौ पूछु, “आमु इनुखै खाणौ कारिए रोटी कुकै दी मोलै लान्दै?” 6पौरौ यीशुए ऐजी बात तैसीखै पोरखणौ कारिए बौल़ै; जिथुखै सै आपी जाणौ थिया कै सै का कौरणौवाल़ा औसौ। 7फिलिप्पुसे तैसीकै जवाब दिया, “दो सौ दूसौ कै धियाड़ै कै बोराबर कै रोटी बै इनु कारिए पूरी ना हौंदी कै तिनुमुंजी दै सौबी कै दैणी-दैणी भैटी जांव।” 8तैसकै चैलै मुंजीदा शमौन पतरस का भाई अन्द्रियासे तैसीखै बौल़ौ, 9“इथै ऐक भेइया औसौ जैसकैंई जौ की पाँच रोटी औरौ दो माछी औसौ, पौरौ इशैक रोटी सौबी लोगौ कै सौन्टदी ना।” 10यीशुए बौल़ौ, “लोगौ खै बौठाल़े दैव।” तैसी जौगैह दै बौहिती घास थै, तोबै लोग जिनुमुंजी मर्द कै गिनतै लमसम पाँच हज़ारो कै थी, बौठै गौवै। 11तोबै यीशुए रोटी कौरी औरौ पौरमेशवर का धन्यवाद कौरेयौ खै बोठणोवाल़ै खै बांडै दी, औरौ ऐशैखैई माछी बै जिशै सै चांव थिए बांडै दी। 12जोबै सै खाएयो खै छौकै गौवै तोबै तैणै आपणै चैलै खै बौल़ौ, “बौचेयौंदे रोटी कै टुकड़ै खै कौठै-कौरो, कै किछै बर्बाद नी हौए जांव।” 13इथकारिए तिनुऐ बौचेयौंदी रोटी कौठी कौरी औरौ जौ कै पाँच रोटी कै टुकड़ै जू खाणौवाल़ै कै बौचै रौई थी, तिथकी बारौ शैकड़ी भोरी। 14तोबै जू चौमत्कार कै काम तैणै कौरेयौ दिखोऊवा तियौं बात दैखैयो लोग बौलदै लागै की, “सैजा तौ पौरमेशवर कै बातौ बौताणौवाल़ा जू दुनिया पांदी आणौवाल़ा थिया। पाका ऐजाई औसौ।”
15यीशु ऐजौ जाणियौ कै सैजै मुखै राजा बाणणौ कारिए थोम्वाणा चांव, तोबै धारो पांदी इकली हौटै गौआ।
यीशु कौ पाणी पांदी हांडणौ
(मत्ती 14:22-27; मर 6:45-52)
16औरौ जोबै बेल़खो हौ, तोबै तैसकै चैलै, झीलो कै किनारे हौटै। 17औरौ किश्ती पांदी बोठेयो खै झीलो खै पाईलै ढौबौ कफरनहूम नगर कै जांदै लागै। तैसी सौमय इनारौ पौड़ै गौ थियु, औरौ यीशु इबी तौड़ी तिनकै धोरे ना आए रैई थी। 18औरौ आडल़ कै बौजैह शै, झीलो दी फालो उठदी लागी। 19जोबै सै किश्ती चोलांदै-चोलांदै पाँच-छौ किलोमीटर कै लमसम निकल़ै गौवै, तोबै तिनुऐ यीशु खै झीलो पांदी चालदै औरौ नांव कै नेड़िक आन्दै दैखा औरौ डौरे गौवै। 20पौरौ तैणै तिनुखै बौल़ौ, “हांव औसौ, डौरेया नै।” 21तोबै सै तैसी किश्ती पांदी चौढ़ाणौ कारिए तैयार हौवे, औरौ तावल़ै सैजी किश्ती तैसी जौगैह पांदी पौऊंचै जिथै सै चालै रौवै थिए।
लोगौ का यीशु खै जौणा
22दूजै दूसै तियौं भीड़ै जू झीलो कै पाईलै ढौबौ खोड़ी थी ऐशैखै दैखौ कै इथै ऐक किश्ती खै छोड़ेयौ ओकी कुणजी बै ठिकड़ी किश्ती नी आथी, औरौ यीशु आपणै चैलै कै साथै तियौं किश्ती पांदी नै बुठी, पौरौ सिरफ तैसकै चैलै ही हौटै गौवै थिए। 23तौ हौजौ बै ठिकड़ी किश्तीया तिबिरियास शहर शै तैसी जौगैह कै नेड़िक आई, जिथै तिनुऐ प्रभु खै धन्यवाद कौरणौ कै बाद रोटी खैई थी। 24इथकारिए जोबै भीड़ै दैखौ कै इथै ना यीशु आथी, औरौ ना तैसकै चैलै आथी तोबै सै बै ठिकड़ी-ठिकड़ी किश्ती पांदी निकल़ैयो यीशु खै जूंदै-जूंदै कफरनहूम नगर दै पौऊंचै।
यीशु जिन्दगी कै रोटी
25औरौ झीलो कै पाईलै ढौबौ जोबै सै तैसीआरी भैटियै तौ बौल़ौ, “ओए रै गुरुजी तू इथै कोलो आए रौआ।” 26यीशुए तिनुखै जवाब दिया, “हांव तुऔं खै साचौ-साचौ बुलू, तुऐं मुखै इथकारिए ना जूओं कै तुऐं निशान दैखै, पौरौ इथकारिए कै तुऐं रोटी खायौ खै छौकै गौवै। 27तिथु खाणौ कारिए मैहनत ना कौरौ जू शोड़े जांव। पौरौ ऐसी खाणौ कारिए मैहनत कौरौ जू सौदा कै जिन्दगी दैंव जिथु हांव आदमी का बैटा तुऔं खै दियुंबा जिथुखै पिता पौरमेशवर मुखै ऐशै कौरणौ कारिए आपणै औधिकार कै छाप मुं पांदी लाए राए।” 28तिनुऐ तैसीखै बौल़ौ, “पौरमेशवर कै काम कौरणौ कारिए आमै का कौरु।” 29यीशुए तिनुखै जवाब दिया, “पौरमेशवर चांव कै तुऐं मुं पांदी बिशवाश कौरौ जैणै तैसी छाड़ै राए।”
30तोबै तिनुऐ तैसीखै बौल़ौ, “तोबै तू कुणजा निशान आमु दिखाणौ वाल़ा औसौ कै तिथु दैखैयो आमै तांव पांदी बिशवाश कौरु? तू आमु का दिखाणौ चांए? 31अमारै पुराणियाए शुनशान जौगैह दो स्वर्ग शै देएयौंदौ मन्ना नांव कौ खाणौ खोऊ; जैशै पवित्र शास्त्र दो लिखै राए, ‘मूसाए तिनु खाणौ कारिए स्वर्ग शै रोटै दै।’”
32यीशुए तिनुखै बौल़ौ, “हांव तुऔं खै साचौ-साचौ बुलू कै मूसाए तुऔं सैजी रोटी स्वर्ग शै ना दी पौरौ मैरा पिता पौरमेशवर तुऔं खै साची रोटै स्वर्ग शै दैंव। 33जिथुकै पौरमेशवर कै रोटै सैजै औसौ, जू स्वर्ग शै ओतरेयो दुनिया कै लोगौ कै जिन्दगी दैंव।” 34तोबै तिनुऐ तैसीखै बौल़ौ, “ओए रै प्रभु ऐजी रोटी आमुखै हमैशा दैया कौर।”
35यीशुए तिनुखै बौल़ौ, “जीवन कै रोटै#6:35 जू सौदा कै जिन्दगी दैंव। हांव औसौ, जू मैरै धोरे आला सै कौलोंई भूखा ना हौंदा औरौ जू मुं पांदी बिशवाश कौरला सै कौलोंई तिशा ना हौंदा। 36पौरौ मोऐं तुऔं औगौड़ियौ बौल़ै राए थियु, कै भले ही तुऐं मुखै दैखौ, तोबै बै मुं पांदी बिशवाश ना कौरौ। 37जैतरै बै लोग पिता पौरमेशवरे मुखै दैय राए, सै सौबै मैरै धोरे आन्दै, औरौ जू कुणिए मैरै धोरे आला तैसी हांव कौलोंई बै आपी दै दूर ना जाणौ दैंदा। 38जिथुखै हांव स्वर्ग शै आपणै इछा कै पूरै कौरणौ कारिए धैनै ना आए रैई पौरौ मुखै भैजणौवाल़ै पौरमेशवर कै इछा पूरै कौरणौ कारिए स्वर्ग शै भैजै राए। 39औरौ मैरै भैजणौवाल़ै खै इछा ऐजी औसौ कै जू किछै तैणै मुखै दैय राए तिथमुंजी दौ हांव किछै ना खोऊं, पौरौ तैसी आखरी दूसै हौजौ मौरेयौंदे मुंजीदै जियुंदै कौरे दियु। 40जिथुखै मैरै पिता पौरमेशवर कै ऐजी इछा औसौ, कै जू कुणिए मुखै जू पौरमेशवर का बैटा औसौ दैखौ, औरौ मुं पांदी बिशवाश कौरौ, सै सौदा कै जिन्दगी पांदा औरौ हांव तैसीखै आखरी दूसै हौजौ मौरेयौंदे मुंजीदै जियुंदी कौरे दैंदा।”
41तोबै यहूदी नेता तैसी पांदी कुड़कुड़ांदै लागै, इथकारिए कै तैणै बौल़ै राए थियु, “जू रोटी स्वर्ग शै उतरी, सै हांव औसौ।” 42औरौ तिनुऐ बौल़ौ, “का ऐजा यूसुफ का बैटा यीशु ना आथी जैसखै माँ-बापू आमै जाणुए? तौ सै कैशैखै बौल़ै सौकौ कै हांव स्वर्ग शै आए रौआ?” 43यीशुए तिनुखै जवाब दिया, “आपी मुंजी ना कुड़कुड़ाव। 44कुणिए बै मैरै धोरे तांव तौड़ी ना आए सौकौ जांव तौड़ी मैरै भैजणौवाल़ा पिता पौरमेशवर, तैसी आपणै ढौबौ खैची ना दैंव; औरौ हांव तिनुकै आखरी दूसै हौजौ जियुंदी कौरु। 45पौरमेशवर कै बातौ बौताणौवाल़ै पवित्र शास्त्र दो ऐजौ लैखै राए, ‘सै सौबै पौरमेशवर कै ढौबौशै शिखाएयौंदे हौन्दै।’ जैसी कोसीए पिता पौरमेशवर कै शुणा औरौ तैसीयांदो शिखै राए, सैजाई मैरै धोरे आन्दा।
46पिता पौरमेशवर कै कौलोंई कुणिए ना दैख रैई। सिरफ जैणै पिता कै दैखै राए सै हांव औसौ, जू तैसकै ढौबौशा आए रौआ। 47हांव तुऔं खै साचौ-साचौ बुलू, कै जू कुणिए बिशवाश कौरौ, सौदा कै जिन्दगी तैसकै औसौ। 48जू जीवन दैंव सैजै रोटै हांव औसौ। 49तोंवारै पुराणियाए शुनशान जौगैह दो स्वर्ग शै देएयौंदौ मन्ना नांव कौ खाणौ खोऊं; पौरौ मौरे गौवै। 50ऐजै सैजै रोटै औसौ जू स्वर्ग शै उतरो, ताकि आदमी तिथ पौरैशौ खांव औरौ ना मोरो। 51जीवन कै रोटै जू स्वर्ग शै उतरी रौए सै हांव औसौ जै कुणिए इयौं रोटी पौरैशौ खांव तौ हमैशा जियुंदा रौंदा औरौ जू रोटै हांव दुनिया कै लोगौ खै जीवन कारिए दियुंबा, सै मैरा शोरीर औसौ।”
52इयौं बातौ पांदी यहूदी नेता ऐशै बौलेयौ आपी मुंजी झोगड़िंदै लागै, “ऐजा आदमी कैशैकै आमुखै आपणा शोरीर खाणौ कै दैय सौकौ?” 53यीशुए तिनुकै बौल़ौ, “हांव तुऔं खै साचौ-साचौ बुलू जौल़ौ तौड़ी तुऐं मुं आदमी कै बैटै का शोरीर ना खांव, औरौ लोऊ ना पियौं, तुऔं दा जीवन ना आथी। 54जू मैरा शोरीर खांव, औरौ मैरा लोऊ पियौं, सौदा कै जिन्दगी तैसकै औसौ, औरौ हांव न्याय कै दूसै हौजौ तैसी मौरेयौंदे मुंजीदा जियुंदी कौरे दियुंबा। 55जिथुखै मैरा शोरीर सौथी कै ही खाणै कै चीज़ औसौ, औरौ मैरा लोऊ सौथी कै पिणौ कै चीज़ औसौ। 56जू मैरा शोरीर खांव औरौ मैरा लोऊ पियौं सै मुंआरी जियुंदा बौणेयौंदा रौंव। औरौ हांव तैसीआरी जियुंदा बौणेयौंदा रोऊं। 57मैरा पिता पौरमेशवर जैणै मुखै भैज राए सै जीवन दैंव। जैशैकै तैणै मुखै जीवन दैय राए तैशैकैई हांव बै तैसी आदमी कै जीवन दियुंबा जू मैरै शोरीर कै खांव। 58ऐजै रोटै सैजै औसौ, जू स्वर्ग शै आए रौए। ना कि सैजी जू तोंवारै पुराणियाए खाए औरौ सै मौरे गौवै, ऐजै रोटै जू कुणिए आदमी खाला, सै सौदा जियुंदी रोल़ा।” 59ऐजी बातौ यीशुए कफरनहूम नगर कै ऐकी यहूदी सभा-घोरो दी उपदैश दैन्दै बैई बुली।
हमैशा की जिन्दगी कै वचन
60ऐजी सौबै बातौ शुणैबा यीशु कै चैलै मुंजीदै ओकी चैलै बौल़ौ, “ऐजी शिक्षा सौमझणौ कारिए बैजाए चैईथी औसौ, इनु कुण मानै सौकौ?” 61यीशुए आपणै मन दो ऐजौ जाणै पोऊँ कै मैरै चैलै आपी मुंजी इयौं बातौ पांदी कुड़कुड़ाए रौवै, तौ तिनुआदो पूछु, “का ऐजी बातौ तुऔं मुं पांदी बिशवाश कौरणौ शै रौकौ? 62जै तुऐं मुं आदमी कै बैटै खै जिथै सै आगै स्वर्ग दा थिया, तिथै दुजाल़ियो ऊबै जांदै बैई दैखलै, तौ का हौंदौ? 63पौरमेशवर कै आत्मा तौ जिन्दगी दैणौ वाल़ी औसौ, शोरीर शै किछै बै ना हौए सौकौ। मोऐं तुऔं कैंई जू बौल़ै राए, सै पवित्र आत्मा कै ढौबौशौ औसौ, औरौ सैजी बातौ आदमी कै सौदा कै जिन्दगी दैंव। 64पौरौ तुऔं मुंजी कैतरै ऐशणै औसौ कुणिए ऐशणै बै औसौ जू मुं पांदी बिशवाश ना कौरौ।” जिथुखै यीशु आगै दो उंडु जाणौ थिया, कै जू बिशवाश ना कौरौ सैजै कुण औसौ, औरौ कुण मुखै थोम्बादा। 65औरौ तैणै बौल़ौ, “इथकारिए मोऐं तुऔं सै बुलू थियु कै मैरै धोरे तांव तौड़ी कुणिए ना आए सौकौ जौल़ौ तौड़ी पिता पौरमेशवर तैसी मैरै धोरे ना आणौ दैंव।”
66ऐजी बातौ शोणेयो, यीशु कै चैलै मुंजीदै बौहितै जोणे तैसकै खिलाफ हौए गौवै, औरौ तैसी छोड़ेयौ पाछु हौटै गौवै। 67तोबै यीशुए तिनु बारौ चोणेयौंदे चैलै खै बौल़ौ, “का तुऐं बै मुखै छोड़ेयौ जाणौ चांव?” 68शमौन पतरसे यीशु खै जवाब दिया, “ओए रै प्रभु आमै कोसके धोरे जोऊं? सौदा कै जिन्दगी कै बातौ तौ तैरै ही धोरे औसौ। 69औरौ आमै तांव पांदी बिशवाश कौरे राए औरौ जाणै गौवै, कै पौरमेशवर का पवित्र जन तू ही औसौ, औरौ सै मसीहा औसौ जैसीकै पौरमेशवरे भैजै राए।” 70यीशुए तिनुखै जवाब दिया, “मोऐं ही तुऔं बारौ चैलै खै ना चोणे रैई। तोबै बै तुऔं मुंजीदा ऐक आदमी शैतान कै कब्जे दा औसौ।” 71ऐजौ यीशुए शमौन इस्करियोती कै बैटै यहूदा इस्करियोती कै बारै दो बौल़ौ, जिथुखै सैजाई बारौ चैलै मुंजीदा ऐक थिया, जू तैसी थोम्बाणो वाल़ा थिया।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
यूहन्ना 6: SRXNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
