यूहन्ना 5
5
अड़तीश साल कै बीमार कै ठीक कौरणा
1इनु बातौ कै बाद यहूदी लोगौ का ऐक तैयार हौआ, औरौ यीशु यरूशलेम शहर खै हौटा। 2ऐबै यरूशलेम शहर दै, भेड़-कोवाड़ कै धोरे ऐक कुण्ड थिया, जिथुकै इब्रानी भाषा दो बैतसैदा बौल़ौ, औरौ तिथकै चोऊ ढौबौ पाँच ओसारे औसौ। 3इनु मुंजी भौरिशै बीमार लोग तिथै पौड़ेयौंदे रौंव थिए। किछै आन्धै थिए, किछै लोंगड़े थिए, औरौ किछै ओधरंगी थिए। जू (पाणी कै हिजाल़णौ कै आश मुंजी) पौड़ेयौंदे रौंव थिए। 4जिथुकै सोही सौमय पांदी पौरमेशवर कै स्वर्गदूत कुण्डो उदे ओतरेयो पाणी खै हिंजाल़ौ थिए, औरौ पाणी हिजाल़णौ कै बाद जू कुणिए बै औगौड़ियौ कुण्डोऊंदा जांव थिया सै ठीक हौए जांव थिया, चाए तैसकै कैशणै बै बीमारै काए नी हौंव। 5तिथै ऐक आदमी थिया, जू अड़तीश सालो शै बीमार थिया। 6यीशुए तैसी हाल मुंजी पौड़ेयौंदा दैखैबा औरौ ऐजौ जाणैबा की बौहितै दूसौ दा उंडा, ऐसी हालत दा पौड़ै रौआ, तैसी कैईंदु पूछु, “का तू ठीक हौणौ चांए?” 7तैसी बीमार आदमीए यीशु खै जोवाब दिया, “ओए रै प्रभु मुंकैई कुणिए बै आदमी ना आथी, कै जोबै पाणी हिंजाल़ौ, तौ मुखै कुण्डो उदा उतरणो कारिए मैरी मौदद कौरौ, हांव कुण्डो उदा जाणौ कै कौचिश कौरु पौरौ कुणिए ना कुणिए हमैशा मुं दा औगौड़ियौ तिथै हौटै जांव।” 8यीशुए तैसीखै बौल़ौ, “ऊबा बिज़ औरौ आपणै कुटड़ै टिपयौ आपणै घोरो खै आगु जा।” 9सैजा आदमी तौलोंई ठीक हौए गौआ, औरौ आपणै कुटड़ै टेपेयो हांडदा फिरदा लागा।
10जैसी दूसै ऐजौ सौबै ठुँ हौ सैजौ दूसै विशांव कौ दूस थियु। इथकारिए यहूदी नेता तैसी ठीक हौएयौंदै आदमी कै बौलदै लागै, “मूसा कै कानून कै हिसाब शै ऐलो तौ विशांव कौ दूस औसौ, इथकारिए तैरौ कुटड़ौ टिपणौ ठीक ना आथी।” 11तैणै तिनुखै जोवाब दिया, “जैणै मुखै ठीक कौरे राए, तैणै मुखै बौल़ै राए, आपणै कुटड़ै टिपेबा आगु हांड।”
12तिनुऐ तैसी कैईंदु पूछु, “सैजा कुणजा आदमी औसौ जैणै ताखै बौल़ौ, ‘कुटड़ौ टीप औरौ आगु हांड?’” 13पौरौ जू बीमार आदमी ठीक हौए गौआ थिया, सै ना जाणौ थिया कै सैजा आदमी कुण औसौ; जिथुकै तैसी जौगैह दै बैजाए भीड़ हौणौ की बौजैह शै यीशु तिथैदा गायब हौए गौआ थिया। 14इनु बातौ कै बाद सै यीशु खै मन्दिरो कै आँगणो दा भैटा, तोबै तैणै तैसीखै बौल़ौ, “दैख, तू तौ ठीक हौए गौआ, औरौ हौजौ कौलोंई पाप नै कौरेया ऐशैखै नै हौंव कै तैरा हाल इथैदा बै जादा बुरा हौए जांव।” 15तैसी आदमीए जाऐबा यहूदी नेता कै बौल़ै दियु, की जैणै मुखै ठीक कौरे राए सैजा यीशु औसौ।
16इथकारिए यहूदी नेता यीशु खै सतांदै लागै, जिथुकै सै ऐशणै-ऐशणै काम विशांव कै दूसै कौरौ थिया। 17इथपांदी यीशुए तिनुखै बौल़ौ, “मैरा पौरमेशवर जू मैरा पिता औसौ हमैशा काम कौरौ, औरौ मुखै बै काम कौरणा चैंई।” 18यीशु कै ऐशै बौलणौ कै बौजैह शै यहूदी नेता यीशु खै मारणौ कै कौचिश कौरदै लागै, कै सै ना सिरफ विशांव कै दूसौ कै नियम खै तौड़ौ, पौरौ पौरमेशवर खै आपणा पिता बौलेबा, आपी खै पौरमेशवर जैशणा बौणौ।
बैटै का औधिकार
19इथपांदी यीशुए तिनुखै बौल़ौ, हांव तुऔं खै साचौ-साचौ बुलू, “हांव यानी पौरमेशवर का बैटा आपी किछै ना कौरे सौकु, सिरफ सैजौई जू पिता पौरमेशवर कै कौरदै बैई दैखु, जिथुकै जिनु-जिनु काम कै सै कौरौ, तिनुखै हांव बै तैशैखैई कौरु। 20इथकारिए कै पिता पौरमेशवर जू प्यार मुं आरी कौरौ, औरौ जू-जू काम सै आपी कौरौ, सै सौबै मुखै दिखांव, औरौ हांव इनु दै बै बौड़ै काम तिनु दिखांदा, ताकि तुऔं हैरानी हौंव। 21जिथुकै जैशै पिता पौरमेशवर मौरेयौंदे लोगौ कै औटेयौ जियुंदै कौरौ, तैशैखैई हांव बै जिनुखै चोऊं, तिनुखै जिन्दगी दियु। 22पिता पौरमेशवर कोसी का बै न्याय ना कौरौ, पौरौ न्याय कौरणौ का सौबै काम मुखै सौंपै राए। 23जिथुकै जैशैखै सौबै लोग पिता पौरमेशवर कै आदर दैंव, तैशैखैई मुखै बै आदर दैंव; जै कुणिए मुखै आदर ना दैंव तौ सै पिता पौरमेशवर कै बै आदर ना दैंव जैणै मुखै छाड़ै राए।
24हांव तुऔं खै साचौ-साचौ बुलू, जू मैरा वचन शौणैबा मैरै भैजणैवाल़ै पांदी बिशवाश कौरौ कै पिता पौरमेशवरे मुखै छाड़ै राए, सै सौदा कै जिन्दगी पांव, औरौ तिनुखै सौजा ना भैटदै, पौरौ सै सौदा कै मौत शै बौचै गौवै औरौ आगैई नौवें जिन्दगी दा प्रवेश कौरे पाए।”
25“हांव तुऔं कै साचौ-साचौ बुलू, सैजा सौमय आन्दा लागै रौआ, औरौ आए ही गौआ, जिथमुंजी मौरेयौंदे लोग मैरी यानी पौरमेशवर कै बैटै की आवाज़ शुणदै, औरौ जू शुणदै सैजै हमैशा कारिए जिन्दै। 26जिथुकै जैशैकै पिता पौरमेशवर आपणै आपी दा जीवन राखौ तैशैकैई तैणै मुखै बै जू तैसका बैटा औसौ ऐजा औधिकार दैय राए कै आपी दा जीवन राखु। 27जिथुकै हांव आदमी का बैटा औसौ, इथकारिए पिता पौरमेशवरे मुखै सौबी लोगौ का न्याय कौरणौ का औधिकार दैय राए।
28ऐजौ सौबै शौणैबा हैरान ना हौ, जिथुकै सैजा सौमय आन्दा लाग रौआ, जोबै सौबै मौरेयौंदे लोग मैरै आवाज़ शुणल़ै तोबै सैजै जियुंदी हौए जांदै। 29जिनुवै आपणै जीवन दै भोलाए कौरे राए सै सौदा कै जिन्दगी पाणौ कारिए मौरेयौंदे मुंजीदै जियुंदी हौंदै औरौ जिनुवै बुराई मुंजी जीवन बिताए राए, सै सौजा पाए जाणौ कारिए जियुंदी हौन्दै।”
यीशु कै बारै दै गवाही
30“हांव आपी शै किछै ना कौरे सौकु; हांव लोगौ का न्याय तैशैकैई कौरु जैशैखै पिता पौरमेशवर मुखै तिनका न्याय कौरणौ कै बौल़ौ। औरौ मैरा न्याय सोही औसौ; जिथुकै हांव आपणै इछा नी, पौरौ आपणै भैजणैवाल़ै कै इछा चोऊं। 31जै हांव आपी ही आपणै गवाही दियु; तौ मैरी गवाही साची नै आथी। 32ऐक ओका औसौ जू मैरा पिता पौरमेशवर औसौ, सै बै मैरै बारै मुंजी गवाही दैंव, औरौ हांव जाणुए कै जू मैरै बारै मुंजी सै गवाही दैंव, सैजै साची औसौ। 33तुऐं यूहन्ना बपतिस्मा दाता कै धोरे सौंदेश दैणैवाल़ै छाड़ै औरौ तुऐं यूहन्ना शै पूछौऊ औरौ तैणै सौचाई कै गवाही दी। 34पौरौ हांव आपणै बारै मुंजी आदमी खै गवाही ना चोऊं, हौजौ बै मोऐं तुऔं तियौं गवाही कै बारै मुंजी बौताए राए जू यूहन्नाए दैय राए थै ताकि तुऐं उध्दार पाए सौकौ। 35यूहन्ना तौ जोल़दै औरौ चोमकैयौंदे दिवे कै साए थिया, औरौ तुऔं कै किछै सौमय तौड़ी तैसकै पेयाशै दो मगन हौणौ आछौ लागौ। 36मुंआगै यूहन्ना दै बौड़ी गवाही औसौ। सैजी टोल जू पिता पौरमेशवरे मुखै पूरै कौरणौ खै दैय राए, सैजी टोल मैरै बारै मुंजी गवाही दैंव जू टोल मोऐं कौरे लोए, सैजी टोल गवाही दैंव कै पिता पौरमेशवरे मुखै भैज राए। 37औरौ पिता पौरमेशवर जैणै मुखै भैज राए, तैणै मैरी गवाही दैय तुऐं ना कौलोंई तैसकी धाव शुणी औरौ ना तैसी आमणै-सामणै दैखी। 38औरौ तैसकै उपदैश खै आपणै मन दै बौठणौ ना दैंव, जिथुकै तुऐं मुं पांदी बिशवाश ना कौरौ, जैसी पौरमेशवरे भैजै राए।
39तुऐं पवित्र शास्त्र कै ध्यान शै पोढ़ो, जिथुकै तुऐं सुंचौ कै तिंदी तुऔं कै सौदा कै जिन्दगी भैटौए, औरौ ऐजा सैजाई औसौ, जू मैरी गवाही दैंव। 40तोबै बै तुऐं सौदा कै जिन्दगी पाणौ कारिए मैरै धोरे आणौ ना चांव।
41हांव आदमी कै तारीफ कै आश ना राखु। 42पौरौ तुऐं आपणै दिल शै पौरमेशवर आरी प्यार ना कौरौ। 43हांव आपणै पिता पौरमेशवर कै औधिकार शै आए रौआ, औरौ तुऐं मुखै ना अपनांव, जै कुणिए ओका आपणै औधिकार शै आंव, तौ तुऐं तैसी अपनाए पांव। 44तुऐं मुं पांदी बिशवाश ना कौरे सौकौ, जिथुकै तुऐं ऐकी दूजै शै तारीफ पाणै चांव, औरौ तुऐं तियौं तारीफ कै पाणौ कै कौचिश ना कौरौ जू सिरफ ऐकैई पौरमेशवर दैंव। 45ऐजौ नै सौमझौ कै हांव पिता पौरमेशवर खै सामणै तुऔं पांदी दोष लान्दा, मूसा जैसी पांदी तुऐं आपणी आश राखी राए, सैजाई तुऔं पांदी दोष लान्दा। 46जिथुकै जै तुऐं मूसा कै कानून पांदी बिशवाश कौरदै, तौ मुं पांदी बै बिशवाश कौरदै, इथकारिए कै तैणै मैरै बारै मुंजी लैख राए। 47पौरौ तुऐं तैसकी लिखयोंदी बातौ पांदी बिशवाश नै कौरदै, तौ तुऐं जौरुर इनु बातौ पांदी बै बिशवाश ना कौरदै कै हांव का बुलू।”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
यूहन्ना 5: SRXNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
