यूहन्ना 7
7
यीशु औरौ तैसकै भाई
1इनु बातौ कै बाद यीशु गलील जिले दा जांदा रौआ जिथुखै यहूदी नेता तैसीखै मार दैणौ कै कौचिश कौरे लोए थी, इथकारिए सै यहूदिया प्रदेश दो जाणौ नी चांव थिया।
2औरौ यहूदी लोगौ का झोपड़ियों कौ तैयार#7:2 जू कै फसह कै तैयारो कै छोई मीनै कै बाद मोनाया जांव थिया, जू आठ दूसौ तौड़ी चालौ थिया। नेड़िक थियु। ऐजौ तैयार तिनु याद दिलांव थियु कै तिनकै पुराणिया चाल़ीश सालो तौड़ी तोम्बू दै रौंव थिए। 3यीशु कै भाईए तैसीखै बौल़ौ, “इथैदा यहूदिया प्रदेश कै आगु जा कै जू काम तू कौरे, सैजै तैरै चैलै बै दैखौ। 4जिथुखै जू कुणिए बै मोशुर हौणौ चांव सै छिपीयो काम ना कौरौ, जै तू चौमत्कार कै काम कौरे, तौ आपी खै दुनिया पांदी प्रगट कौर।” 5जिथुखै यीशु कै भाई बै यीशु पांदी बिशवाश ना कौरौ थिए। 6तोबै यीशुए तिनुखै बौल़ौ, “मैरै जाणौ का सोही सौमय इबी ना आए रैई; पौरौ तुऔं कारिए सौबै सौमय औसौ। 7दुनिया कै लोग तुऔं शै बैर ना कौरे सौकौ पौरौ सै मुं आरी बैर कौरौ, जिथुखै हांव तिनकै खिलाफ दो ऐजौ बुलू, कै तिनकै काम बुरै औसौ। 8तुऐं तैयारो मुंजी जाव, हांव इबी ऐसी तैयारो मुंजी ना जांदा, जिथुखै इबी तौड़ी मैरा सोही सौमय ना आए रैई।” 9यीशु तिनुआरी ऐजी बातौ बौलियो कै गलील जिले दा रौए गौआ।
झोपड़ी कै तैयार दा यीशु
10पौरौ जोबै यीशु कै भाई झोपड़ी कै तैयारो मुंजी हौटै गौवै, तोबै यीशु बै लोगौ शै मेसो तिथै हौटै गौआ।
11यहूदी नेता तैयारो मुंजी लोगौ शै पुछयो यीशु कै जौंदै लागै कै सै “कुकै औसौ?” 12औरौ तिथै भीड़ौ कै लोग तैसकै बारै मुंजी चुपी-चुपी बौरिशी बातौ बौल़ै लोई थी। किछै लोग बौल़ौ थिए कै, “सै भला आदमी औसौ।” औरौ किछै लोगै बौल़ै लो थियु, “ना, सै लोगौ खै भरमांव।” 13तोबै यहूदी नेताओं कै डौरौ कै मारै कुणजैई आदमी बै यीशु कै बारै मुंजी खौलेयौ बातौ नै बौल़ौ थिए।
तैयार दा यीशु का उपदैश
14औरौ जोबै तैयारो कै आधै दूस बितै गौवै; तोबै यीशु मन्दिरो दै जायौ खै उपदैश दैन्दा लागा। 15तोबै यहूदी नेताए हैरान हौयौ खै बौल़ौ, “ऐसी बिना पवित्र शास्त्र कै पौढ़ै ऐजी शिक्षा कैशैखै आए गोई?” 16यीशुए तिनु जवाब दिया, “मैरा उपदैश मैरा आपणा ना आथी, पौरौ ऐजौ पौरमेशवर कै ढौबौशौ औसौ जैणै मुखै छाड़ै राए। 17जै कुणिए पौरमेशवर कै इछा पूरी कौरणौ का प्रण लोंव, तौ सै जाणै पांदा कै मैरै शिक्षा पौरमेशवर कै ढौबौशै आंव या हांव आपणै औरौ शी बुलू। 18जू आपणै ढौबौ शो किछै बौल़ौ, सै आपणै तारीफ चांव, पौरौ जू आपणै भैजणौवाल़ै खै तारीफ चांव सैजाई भोरोशे कै लायक औसौ। औरौ तैसदी कुणजी बैईमानी ना आथी।
19मूसा पौरमेशवर कै बातौ बौताणौवाल़ै तुऔं खै कानून दैय राए, तौ बै तुऔं मुंजीदा कुणिए कानून पांदी ना हांडो। तुऐं किथु मुखै मारणा चांव?” 20भीड़ौ मुंजीदा ऐकीए जवाब दिया; “तांव दै दुष्टआत्मा औसौ! ताखै कुण मारणा चांव?” 21यीशुए जवाब दिया, “मोऐं विशांव कै दूसै चौमत्कार का काम कौरा, पौरौ तुऐं सौबै हैरान हौए गौवै। 22मूसाए तुऔं खै खतना कौरणौ कै आज्ञा दै, ऐशै नै कै सै मूसा कै औरौ शै औसौ, पौरौ पुराणियो शै हौंदै आए रौवै, औरौ तुऐं विशांव कै दूसै आदमी का खतना कौरौ। 23तुऐं विशांव कै दूसै आदमी का खतना कौरौ, ताकि मूसा कै कानून कै आज्ञा टोल़े नै जांव, तौ तुऐं मुं पांदी किथु गुस्सा कौरौ कै मोऐं विशांव कै दूसै ऐक आदमी कै पूरी तरह शै ठीक कौरा। 24मुँह दैखा न्याय नी कौरौ, पौरौ सौचाई शै न्याय कौरौ।”
का यीशु ही मसीह औसौ?
25यरूशलेम शहर दै रौणौवाल़ै किछै लोग बौलदै लागै, “का ऐजा सैजाई ना आथी, जैसीखै अमारै नेताए मारणौ कै कौचिश कौरे लोए? 26पौरौ दैखौ, सै तौ खुलैआम बातौ कौरौ औरौ कुणिए तैसीखै किछै ना बौल़ौ; कोदी ऐशै तौ नी कै तिनुऐ साचौ जाणै पोऊ; कै ऐजाई मसीह औसौ? 27ऐसीखै तौ आमुए जाणुए, कै ऐजा कुकै का औसौ; पौरौ मसीह जौल़ौ आला तौलौ कुणिए ना जांदै कै सै कुकै का औसौ।”
28तोबै यीशुए मन्दिरो दै उपदैश दैयौ जोर शै बौल़ौ, “तुऐं मुखै जाणौए औरौ ऐजौ बै जाणौए कै हांव कुकै का औसौ। हांव तौ आपी शा ना ऐई पौरौ मैरा भैजणौवाल़ा पौरमेशवर भोरोशे लायक औसौ, तैसीखै तुऐं ना जाणौ। 29पौरौ हांव तैसीखै जाणुए; जिथुखै हांव तैसकै औरौ शा औसौ औरौ तैणै मुखै भैज राए।” 30इथपांदी नेताए तैसीखै थामणा चोऊवा तौ बै कोसीए तैसी गिरफ्तार ना कौरी, जिथु तैसखै मौरणौ का सोही सौमय इबी तौड़ी ना आए रैई थी। 31औरौ भीड़ौ मुंजीदै बौहितै लोगै तैसी पांदी बिशवाश कौरा, औरौ बौलदै लागै, “मसीह जौल़ौ आला, तोलो का इदै जादा निशान खै दिखांदा जू ऐणै दिखाए राए?”
यीशु कै थामणो कै कौचिश
32फरीसी लोगै भीड़ कै लोगौ खै तैसकै बारै मुंजी ऐजी बातौ चुप्पी-चुप्पी कौरदै बैई शुणी औरौ मुख्य यहूदी पुरोहित औरौ फरीसीए तैसी थामणो कै मन्दिर कै रोखवाल़ै छाड़ै। 33इथपांदी यीशुए बौल़ौ, “हांव दैणिक देर तौड़ी औरौ तोंवारै साथै औसौ तिथकै बाद हांव आपणै भैजणैवाल़ै पौरमेशवर कै धोरे पाछु हौटै जांदा। 34तुऐं मुखै जौले पौरौ ना पांदै औरौ जिथै हांव रोऊं तिथै तुऐं ना आए सौकौ।” 35इथपांदी यहूदी नेताए आपी मुंजी चौर्चा कौरेयौ बौल़ौ, “ऐजा कुकै जांदा कै आमै ऐसी जौए ना सौकदै? शायद सै तिनु यहूदी लोगौ कै धोरे जाला जू यूनानी शहरो दै इस्राएल देश शै बायरै बिखरेयोंदे रौंव, औरौ तिनुकै शिक्षा दैणा चांव। 36इयौं बात का का मतलब औसौ, जू तैणै बुली कै ‘तुऐं मुखै जौले पौरौ ना पांदै, जिथुकै जिथै हांव जांदा लागै रौवा: तिथै तुऐं ना आए सौकौ?’”
जीवन-पाणी कै नोंदी
37हौजौ तैयारो कै आखरी दूस, जू मुख्य दूस औसौ यीशु खौड़ा हौआ औरौ जोर शै बौल़ौ, “जै कुणिए तिशा औसौ तौ मैरै धोरे आव औरौ पियौ। 38जू मुं पांदी बिशवाश कौरला जैशैकै पवित्र शास्त्रो दो लैखै राए, ‘तैसकै दिल शै पाणी की नोंदी बोहली, जू जीवन दैंव।’” 39यीशुए ऐजै बात बौल़ै, तौ सै पवित्र आत्मा कै बारै मुंजी बौल़ै लोए थी, जू तैसी पांदी बिशवाश कौरौ सै पवित्र आत्मा कै पाणौ वाल़ै थिए; पवित्र आत्मा इबी तौड़ी ना उतरे रैई थी। जिथुखै पौरमेशवरे इबी तौड़ी यीशु कै महिमा कै प्रकट ना कौरे रैई थी।
40तोबै भीड़ कै लोगौ मुंजीदै कुणिए ऐजी बातौ शोणेयो बौल़ौ, “सौथी कै ऐजा पौरमेशवर कै बातौ बौताणौवाल़ा औसौ, जैसकै आणौ का आमुए इंतजार कौरे लौआ थिया।” 41ओकी लोगै बौल़ौ, “ऐजा मसीह औसौ।” पौरौ कुणिए ओकी लोगै बौल़ौ, “का मसीह गलील जिले शै आन्दा? 42पवित्र शास्त्र दो लैखै राए कै मसीह राजा दाऊद कै वंशो पौरैशा औरौ बैतलहम गांव शै आन्दा, जिथै दाऊद रौंव थिया।” 43ऐशैखैई यीशु की बौजैह शै लोगौ मुंजी फूट पौड़ै। 44तिनुमुंजी किछै लोग तैसीखै थामणा चांव थिए, पौरौ कुणिए बै तैसी गिरफ्तार ना कौरी। 45तोबै मन्दिर कै रोखवाल़ै मुख्य यहूदी पुरोहितो औरौ फरीसी लोगौ कै धोरे आए, औरौ तिनुऐ तिनुखै पूछै, “तुऐं तैसी गिरफ्तार कौरेयौ काए ना लैई?”
यहूदी नेताओं का बिशवाश ना कौरणा
46मन्दिर कै रोखवाल़ै जोवाब दिया, “कोसी आदमीए कौलोंई ऐशणी बातौ ना कौरी।” 47फरीसी लोगै तिनु जवाब दिया, “का तुऔं बै बैहकाए राए? 48ना तौ अमारै औधिकारियो मुंजीदै कोसीए बै औरौ ना ही फरीसी लोगै तैसी पांदी बिशवाश कौरा। 49पौरौ ऐजै लोग जू मूसा कै कानून ना जाणौ, पौरमेशवर का शराप तिनु पांदी औसौ।”
50नीकुदेमुसे, (जू औगौड़ियौ ही राती मुंजी यीशु कै धोरे भैटिंदा आए रौआ थिया, औरौ यहूदी नेता मुंजीदा ऐक थिया) तिनुखै बौल़ौ, 51“का अमारै मूसा कै कानून कोसी आदमी कै जांव तौड़ी आगै तैसकै बात शोणेयो जाणै ना पांव, कै सै का कौरौ, सौजा दैंव?” 52तिनुऐ तैसी कैईंदु मजाक मुंजी पूछु, “तू बै गलील जिले पौरैशा औसौ? पवित्र शास्त्र दो जू औरौ पौता कौरा, कै गलील जिले शै कुणजाई पौरमेशवर कै बातौ बौताणौवाल़ा प्रगट ना हौंदा।” 53इथकै बाद सौबै आपणै-आपणै घोरो कै हौटै गौवै।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
यूहन्ना 7: SRXNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
