នៅជាប់នឹងអង្គព្រះគ្រីស្ទ - គ្រាស្មឹងស្មាធិ៍ រយៈពេល ៤ ថ្ងៃ មុនបុណ្យណូអែលគំរូ

ទោះបីជាគ្រានេះជាពេលវេលាដ៏ល្អអស្ចារ្យបំផុតក្នុងមួយឆ្នាំៗ ដូចបទចម្រៀងជាច្រើនបានលើកឡើង នោះយើងនៅតែត្រូវការអធិស្ឋានផងដែរ - មិនគ្រាន់ថាត្រូវអធិស្ឋាន ដើម្បីអរព្រះគុណព្រះ សម្រាប់រាល់គ្រប់ព្រះពរ ឬគ្រាន់តែទូលសុំជំនួយពីព្រះអង្គ ដើម្បីឱ្យយើងចេះតទល់នឹងភាពតានតឹង ឬទុក្ខលំបាក ដែលអាចកើតមានឡើងនៅក្នុងរដូវកាលនេះប៉ុណ្ណោះនោះទេ។ សេចក្ដីអធិស្ឋានដាស់ព្រលឹងយើងឱ្យភ្ញាក់ទៅរកព្រះវត្តមាន សេចក្ដីស្មោះត្រង់ ហើយនិងទីជម្រកដែលព្រះទ្រង់ផ្គត់ផ្គង់ ដល់យើង។

ប៉ុន្តែ តើអ្នកដែលធ្លាប់មានអារម្មណ៍ថាមិនដឹងថាត្រូវអធិស្ឋានអំពីអ្វីដែរឬទេ? ប្រហែលជាសេចក្ដីអធិស្ឋានរបស់អ្នកបែរប្រែក្លាយទៅជាអត់ជាតិ ឬច្រំដែលៗ ហើយអ្នកអាចមានអារម្មណ៍ថាអ្នកកំពុងតែអធិស្ឋានមិនត្រឹមត្រូវ? ការអធិស្ឋានពេញដោយទំនុកចិត្ត នោះនឹងបានពង្រឹងឡើង នៅពេលណាដែលអ្នកអធិស្ឋានតាមព្រះបន្ទូលរបស់ព្រះ។

ព្រះគម្ពីរមានពោរពេញដោយសេចក្ដីអធិស្ឋាន! ចាប់តាំងពី លោកុប្បត្តិ រហូតដល់ វិវរណៈ យើងអាចរកឃើញសេចក្ដីអធិស្ឋាន ទាំងយើងអាចយកសេចក្ដីអធិស្ឋានទាំងនោះ មកអធិស្ឋានតាមបាន ដើម្បីឱ្យជីវិតខាងវិញ្ញាណរបស់យើងរស់ឡើង។ សេចក្ដីទូលអង្វរទាំងនោះ ស្ដែងចេញពីអារម្មណ៍និងបទពិសោធន៍ជាច្រើន - មិនបាច់រកមើលឯណាឆ្ងាយទេ មើលតែទំនុកតម្កើង នោះមានច្រើនអនេក!

ក្នុងខណៈពេលយើងអានរឿងព្រះគម្ពីរ ប្រវត្តិព្រឹត្តិការណ៍ កំណាព្យ និងប្រស្នា ដែលមានចែងក្នុងព្រះគម្ពីរ ដោយអានក្នុងព្រះវត្តមាននៃព្រះ និងផ្ដោតចិត្តទៅលើព្រះវិញ្ញាណ នោះយើងនឹងសម្គាល់ឃើញថាអត្ថបទព្រះគម្ពីរទាំងនោះ មានន័យចំៗចំពោះជីវិត ពិភពលោក និងមនុស្សដែលយើងស្គាល់ផងដែរ។ យូរៗទៅ យើងនឹងងាយសម្របគំនិតអស់ទាំងនោះទៅជាសេចក្ដីអធិស្ឋានភ្លាមៗ។ 

ចូរអាន លូកា ២៖៨-១៨។ តើអ្នកបានឮ និងទទួលបទពិសោធន៍ពីដំណឹងល្អរបស់ព្រះគ្រីស្ទ ដោយរបៀបណា? នៅក្នុងសាច់រឿងនេះ ទេវតាបានទៅបង្ហាញខ្លួនឱ្យក្រុមពួកអ្នកគង្វាលហត់នឿយ រួចហើយបានប្រកាសពីរឿងដ៏សំខាន់មួយដែលកំពុងកើតមានឡើងនៅឯភូមិបេថ្លេហិម (ខទី ១១)។ ដូច្នេះហើយ ពួកអ្នកគង្វាលចៀមបានធ្វើដំណើរទៅទីក្រុងរបស់ព្រះបាទដាវីឌ ដែលនៅទីនោះ ពួកគេបានរកឃើញព្រះគ្រីស្ទ ម៉ារី និង យ៉ូសែប។ ពេលដែលពួកគេបានឃើញបុត្រតូចហើយ ពួកគេបានបន្តទៅប្រាប់ដល់មនុស្សគ្រប់គ្នាដែលពួកគេស្គាល់អំពីកំណើតរបស់ព្រះគ្រីស្ទ និងអំពីអ្វីដែលទេវតាបានថ្លែងអំពីព្រះអង្គ (ខទី ១៧-១៨)។ 

តើអ្នកអាចប្រព្រឹត្តឱ្យបានដូចពួកអ្នកគង្វាល ដោយហ៊ានទៅប្រាប់មនុស្សគ្រប់រូបអំពីព្រះគ្រីស្ទ ជាពិសេស នារដូវកាលនេះ ដោយរបៀបណាខ្លះ? ចូរអធិស្ឋាន សូមឱ្យព្រះធ្វើការនៅក្នុងដួងចិត្តរបស់អស់មនុស្សដែលអ្នកស្គាល់។ ចូរធ្វើជាម្នាក់ដែលពូកែស្ដាប់ និងជាមិត្តម្នាក់ ដែលគ្មានចិត្តចោទប្រកាន់ទោស។ ចូរបង្ហាញពីសារនៃដំណឹងល្អតាមរយៈសកម្មភាពបម្រើ មិនមែនគ្រាន់តែពាក្យសម្ដី នារដូវបុណ្យណូអែលនេះ។ សូមអធិស្ឋានថាគុណភាពនៃជីវិតនិងទំនាក់ទំនងរបស់អ្នកនឹងជួយទាក់ទាញឱ្យមនុស្សបានចូលជិតស្និទ្ធនឹងព្រះគ្រីស្ទជាងមុន។ 

ប្រសិនបើអ្នកចង់រៀនបន្ថែមទៀតអំពីការអនុវត្តខាងវិញ្ញាណចំពោះការអធិស្ឋានដោយប្រើអត្ថបទព្រះគម្ពីរ ក៏ដូចជាការអនុវត្តដទៃផ្សេងទៀត ដែលបានលើកឡើងនៅក្នុងគម្រោងអាននេះ សូមចូលទៅកាន់ កំណត់ហេតុដិតជាប់នឹងព្រះគម្ពីរពីព័ន្ធកិច្ចថូម៉ាស់ណែលសិន (Abide Bible Journals from Thomas Nelson) ។