San Lucas 6
6
Te jnopojeletique la xjixic sbac' trigo ta sc'aalelal cux-o'tan
(Mt 12.1-8; Mr 2.23-28)
1Te Jesús soc te jnopojeletic yu'une yacalic ta beel ta sc'aalelal cux-o'tan. C'axic bael ta yolilal ts'unbil trigoetic. Te jnopojeletique caj xjixbeyic sbac' te trigoe. La sc'ut ta sc'abic, yu'un ya xc'uxbeyic te site.#Dt 23.25. 2Te fariseoetique jajch'ic ta c'op yu'un:
—¿Bistuc ya apasic te bila ma stac' ta pasel ta sc'aalelal cux-o'tane? —xiic.
3Jesús la yalbey yaiyic:
—¿Ma bal awilojic ta Sjun Dios te bila la spas te David te c'alal ay ta wi'nal soc te sjo'taque? 4Te c'alal och ta sna Dios, la stsac swe' te ch'ul waj te pachal ta stojol te Diose, te ja' nax ya xju' ya swe'ic te sacerdoteetique.#1 S 21.1-6. Soc la yac'bey spisil te sjo'taque#Lv 24.9. —xi'.
5Soc la yalbey xan:
—Te Nich'anile ja' ajwalil yu'un te sc'aalelal cux-o'tane —xi' te Jesuse.
Jtul winic sicuben xchial sc'abe
(Mt 12.9-14; Mr 3.1-6)
6Ta yan sc'aalelal cux-o'tan och Jesús ta sinagoga. Tey jajch' ta p'ijubteswanej a. Ay jtul winic tey a te sicuben xchial swa'el sc'abe. 7Jich yu'un te jts'ibojometic soc te fariseoetique la smaliy yilic teme ya yich' coltayel yu'un Jesús te winique, te bit'il sc'aalelal te cux-o'tan. Yu'un jich ya xju' ya stabeyic smul ta sc'opic a te Jesuse. 8Jich te Jesuse sna'oj stojol te bit'il jich ay te yo'tanique, jich yu'un la yalbey te winic te sicuben xchial sc'abe:
—Jajch'an, tec'lan ta olilal —xi'.
Jich jajch' te winique, tejc'aj tey a. 9Te Jesús la yalbey yaiyic:
—Ay bila ya jojc'obeyex caiy: ¿Ya bal stac' pasel ta sc'aalelal cux-o'tan te bila leque, o te bila amene? ¿Ja' bal lec te ayuc mach'a ya xcol cu'untic, o ja' bal lec te ayuc mach'a ya xlaj cu'untic ae? —xi'.
10Jesús la yilbey sitic te mach'atic stsoboj sbaique, jich la yalbey te winique:
—Toya jajch'el te ac'abe —xi'.
Te winique la spas te bila albote. Jich lecub te sc'abe. 11Te mach'atic stsoboj sbaique, bayal ilinic yu'un. Jajch' sjojc'obey sbaic te bila ya yutic te Jesuse.
Jesús la stsa lajchaytul jpuc-c'opetic
(Mt 10.1-4; Mr 3.13-19)
12Jich sc'aalelal te ba sc'opon Dios ta wits te Jesús. Sjunal ajc'ubal la sc'opon Dios tey a. 13C'alal sacub q'uinal, la yic' tel te jnopojeletic yu'une, la stsa lajchaytul. Jpuc-c'opetic c'ot sbiil yu'un. 14Jich ay te sbiilique: Ja' te Simón te Pedro ac'bot sbiil yu'un te Jesuse, soc te Andrés te yijts'in te Simone, Jacobo, Juan, Felipe, Bartolomé, 15Mateo, Tomás, soc te Jacobo te snich'an Alfeo, soc te Simone te Zelote, 16soc te Judas te yijts'in te Jacoboe, soc te Judas Iscariote te la yac' ta c'abal ta patil te Jesuse.
Te Jesús la sp'ijubtes tsobol ants-winiquetic
(Mt 4.23-25)
17Te Jesús coj tel ta wits soc te jnopojeletic yu'une. Tey jul stejc'an sba ta spamlej. Tey ay a te tsobol jnopojeletic yu'une soc te bayal ants-winiquetic te talemic ta sq'uinal Judea, ta muc'ul lum Jerusalén, ta lum Tiro soc ta lum Sidón te ayic ta ti'mare. Yu'un tal yaiybeyic stojol sc'op te Jesuse soc tal yac' ta lamantesel te xchamelique. 18Colic ta woclajel te mach'atic ay pucuj ta yo'tanique. 19Toyol yo'tanic spisilic te yacuc spiquic te Jesuse. Jich la scoltay ta yu'el spisil te jchameletique.
Mach'atic ya sbujts'naj yo'tanic soc mach'atic ya yilic woclajel
(Mt 5.1-12)
20Te Jesús la yilbey sit te jnopojeletic yu'une, jich la yal:
—Bin nax me awutsilic ja'ex te me'baexe, te melel ya me x'ochex tey a ta banti ay ta ajwalinel te Diose.
21“Bin nax me awutsilic ja'ex te ayex ta wi'nal ta ora to, te melel ya me xnoj ach'ujt'ic.
“Bin nax me awutsilic ja'ex te yacalex ta oq'uele, te melel ya me stse'en awo'tanic.
22“Bin nax me awutsilic ja'ex teme ayex ta ilayel yu'un te ants-winiquetique, soc teme ya stenex loq'uele, soc teme ya sbolc'optayexe, soc teme ya sp'ajex te bit'il amenex ta sc'opic ta scaj te Nich'anile.#1 P 4.14. 23Binuc nax me awo'tanic yu'un te c'alal ya xc'ot ta pasel ta atojolique. Bayaluc me sbujts' q'uinal ya awaiyic yu'un, melel ya me xc'o awich'ic bayal awutsilalic ta ch'ulchan yu'un. Melel te namey q'uinal me'il-tatiletic yu'un in ants-winiquetic to, jich nix la spasbeyic te j'alwanejetic yu'un te Diose.#2 Cr 36.16; Hch 7.52.
24“Yan te ja'ex te jc'ulejexe ¡ya me awil awocolic, melel muc'ubenix q'uinal ya awaiyic atuquelic!
25“¡Ya me awil awocolic ja'ex te nojel ach'ujt'ic ta ora to, melel ya me awaiyic wi'nal! ¡Ya me awil awocolic ja'ex te ya stse'en awo'tanic ta ora to, melel ya me x'oq'uex yu'un te mel-o'tane!
26“¡Ya me awil awocolic ja'ex te lec nax ac'oplalic yu'un spisil te ants-winiquetique, melel te namey q'uinal me'il-tatiletic awu'unique jich nix lec sc'oplal la yalbeyic te lotil j'alwanejetique!
Xc'uxul-o'tanil ta stojol contro
(Mt 5.38-48; 7.12)
27“Yan te ja'ex te ya awaiybonic stojol te jc'ope, ya calbeyex: C'ux me xawaiy te acontroe. Soc pasbeyaic bila lec te mach'atic ya yilayexe. 28C'anbeya bendición te mach'a ya sbolc'optayexe, soc c'oponbeyaic Dios te mach'a ya stoybac'optayexe. 29Teme ay mach'a ya smajbat te achoe, ac'beya smajbat xan te yan mejch'e. Soc teme ay mach'a ya spojbat te ac'u'e, ac'beya te anajt'il-c'u'e, ma me ayuc bila ya awal yu'un. 30Spisil mach'a ay bila ya sc'anbeyex, ac'beyaic. Soc teme ay mach'a ya spojbeyex te bila ay awu'unique, ma me x'ac'anbeyic sujt'el. 31Te bi ya sc'an awo'tanic te ya spasbotex yu'un te yane, jich me xapasbeyic uuc.#Mt 7.12.
32“Teme jip nax c'ux ya awaiyic te mach'atic c'ux ya yaiyexe, ¿mach'a ya yalbeyex lec ac'oplalic yu'un? Melel jich ya spasbey sbaic uuc te jyanlumetique. 33Teme ja' nax ay bila lec ya apasbeyic te mach'atic ay bila lec ya spasbeyexe, ¿mach'a ya yalbeyex lec ac'oplalic yu'un? Melel jich ya spasbey sbaic uuc te jyanlumetique. 34Soc teme ja' nax ay bila ya awac'beyic smajan te mach'atic ay bila ya yac'bat ta majanele, ¿mach'a ya yalbeyex lec ac'oplalic yu'un? Melel te jyanlumetique, jich ya yac'bey sbaic ta majanel uuc te bila ay yu'unique, yu'un ya sna' te ts'acal ya sujt'esbot sjelol yu'une. 35Yan te ja'exe, c'ux me xawaiy ta awo'tanic te mach'atic ya scontroninexe. Pasbeyaic bila lec soc ac'beya smajanbat te bila ay awu'unique. Ma me x'ac'anbey sjol. Jich me bayal awutsilal ya awich'ic yu'un, soc jich me yal-snich'an ya xc'oex te ch'ul Dios te ay ta ch'ulchane. Melel ya xc'uxtay te mach'atic ma sna'ic yalel wocole soc te mach'atic amen yo'tanique. 36Jich yu'un te ja'exe aiyaic me c'uxtaywanej uuc jich bit'il ya yaiy c'uxtaywanej te Atatique.
Ma me xalebey smul yan
(Mt 7.1-5)
37“Ma me xalebey smul te yane, swenta yu'un jich ma ba ya yich'beyex ac'opic te Diose. Ma me xawac'beyic castigo yu'un smul te yantique, jich ma ba ya yac'beyex castigo yu'un amulic uuc te Diose. Pasaic perdón, jich me ya spasbeyex perdón uuc te Diose. 38Ac'beyaic te bila ma'yuc yu'un te yantique, jich me ya yac'beyex uuc te Diose: Lec p'isbil, tenbil ta nojesel ta lec, yuq'uilbil, xt'oquet nax me te ya scojc'an coel ta yawile. Te jich yipal ya ap'isbeyic te yantique, jich nix yipal ya sp'isbeyex uuc te Diose —xi' te Jesuse.
39Te Jesús la yalbey yaiyic in sloc'ombail-c'op to:
—¿Ya bal xju' yu'un awaiy te ya snit ta beel ma'sit te mach'a pajal ma'sit soque? Ma xju'. Teme jiche, pajal me ya xch'ayic coel ta bay joc'bil coel te lume.#Mt 15.14. 40Soc ni jtuluc jnopojel te cajal ay yu'un te yajmaestroe.#Mt 10.24-25; Jn 13.16; 15.20. Ja' to pajal ya xc'ot soc teme ju' yu'un snopel ta lec te p'ijubtesele.
41“¿Bistuc ja' ya awil te ch'in ac te ochem ta sit te awermanoe? Yan te muc'ul ts'amte' te c'atal ta asite, ma ba ya awil stuquel. 42¿Bit'il ya xju' awu'un te ya awalbey te awermanoe: “Quermano, ac'bon jloq'uesbat te ch'in ac te ochem ta asite”, teme xaate? Melel ay muc'ul ts'amte' te c'atal ta asit atuquele. Te ja'ate cha'lam awo'tan. Loq'uesa neeluc te muc'ul ts'amte' te c'atal ta asite. Jich ya xju' awu'un sloq'uesel te ch'in ac te ochem ta sit te awermanoe.
Te te'e ya xna'bot sba ta swenta te site
(Mt 7.17-20; 12.34-35)
43“Ma'yuc lequil te' te amen sit ya yaq'ue; soc ma'yuc amen te' te lec sit ya yaq'ue. 44Melel te juju-jpejt' te'e ya jna'beytic sba ta swenta te site.#Mt 12.33. Jich bit'il ma ba ya sitin higo ta bay te ch'ixe, soc ma ba ya sitin ts'usub ta bay te chicch'ixe. 45Te mach'a lec te yo'tane, lec te bila ya yal loq'uel ta yee, yu'un nojel ta yo'tan te bila leque. Yan te mach'a amen te yo'tane, ma lecuc te bila ya yal loq'uel ta yee, yu'un nojel ta yo'tan te bila amene. Melel ta jc'optic#Mt 12.35. ya xchicnaj te bila nojel ta co'tantique.
Te cheb yiptajib nae
(Mt 7.24-27)
46“¿Bi yu'un te “Cajwal, Cajwal”, ya awutonic, te melel ma xapasic te bila ya calbeyexe? 47Ya calbeyex awaiyic te bi yilel c'oem te mach'a ya xtal yaiybon stojol jc'op soc te ya spas te bila ya cale. 48Jich c'oem te bit'il jtul winic te la spas sna. Najt' la sjoc'bey coel te yawile, ja' to la sta te p'ijom tone. Tey la yac' ipajuc jajch'el a te yiptajibe. C'alal tal snojel te ja'e, mal c'axel tey a ta bay loq'uem te snae, ja'uc me to, ma ju' yu'un sjinel. Melel ipajem ta bay p'ijom ton. 49Yan te mach'a ya yaiybon stojol te jc'ope, teme ma ba ya spas te bila ya cale, jich c'oem te bit'il jtul winic te sba lum nax la snajc'an te snae, te ma la yac'bey yiptajibe. C'alal tal snojel te ja'e, mal c'axel tey a ta bay loq'uem te snae. Bot'q'uej yu'un. Jc'axel jin te snae —xi' te Jesuse.
ទើបបានជ្រើសរើសហើយ៖
San Lucas 6: TZOXCH
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblia en Tzeltal de Oxchuc y Tenejapa © Sociedad Bíblica de México, A.C., 2001.
