San Lucas 5
5
La stsaquic chay ta swenta jchajp at'elil
(Mt 4.18-22; Mr 1.16-20)
1Ay jun buelta te ay ta bay ti'mar Genesaret sbiil te Jesuse. Tey c'o stsob sbaic a te bayal ants-winiquetique. C'an stenic te Jesuse, yu'un toyol yo'tan ya yaiyic stojol te sc'op Diose. 2Te Jesús la yil te ay cheb jochol barcoetic ta ti'ja', yu'un loq'uemic ta barco te yajwale. Yacalic ta sapel te stsacjibal-xchayique. 3Jich och tey a te Jesuse. Ja' sbarco te Simone. La yalbey te yacuc ochuc bael jtebuc ta ja'. Jich najc'aj ta yutil barco te Jesuse. Jajch' sp'ijubtes te ants-winiquetique.#Mt 13.1-2; Mr 3.9-10; 4.1. 4C'alal laj yo'tan ta c'op, jich la yalbey te Simone:
—Conic soc abarco ta bay najt' te ja'e. Tey me ya awac' ochel a te stsacjibal-achayique —xi'.
5La yal te Simone:
—Maestro, ma niwan, yu'un at'ejotiquix sjunal ajc'ubal. Ni cojt'uc chay la jtsactic.#Jn 21.3. Yan te bit'il ja'at la awalixe, ya me cac' ochel jiche —xi'.
6Te c'alal la yaq'uic ochele, bayal chay la stsaquic.#Jn 21.6. C'an tuch'uc yu'un te stsacjibal-xchayique. 7Jich yu'un la sbechc'abtay tel te sjo'tac te ayic ta yan barco te yacuc xtal ta coltayel yu'unique. Jich talic. Noj xchebal te barcoetic yu'un te chaye. C'an muluc coel ta ja' yu'un te yalale. 8C'alal la yil te Simón Pedro te jich c'ot ta pasele, la squejan sba ta stojol te Jesuse:
—Cajwal, ma spas te ya joinate yu'un jmulawilon#Job 7.19-20; Sal 39.13. —xi'.
9Yu'un xiwen yo'tan te Simone soc spisil te sjo'taque ta scaj te bayal chay la stsaquique. 10Ja' nanix jich te Jacobo soc Juan te snich'nab Zebedeo te sjoy sbaic ta at'el soc te Simone. Ja'uc me to, te Jesús la yalbey te Simone:
—Ma me xiwat. Ta ora to ja' awat'elix ya xc'ot te ya atsob tel ants-winiquetic ta jtojol —xi'.
11C'alal loq'uic tel ta ti'ja' soc te sbarcoique, la yijq'uitayic jilel spisil te bila ay yu'unique. La sts'aclinic bael te Jesuse.
Jesús la scoltay jtul jc'a'el-chamel
(Mt 8.1-4; Mr 1.40-45)
12Te c'alal c'otix ta bay jpam lum a te Jesuse, tal jtul winic ta stojol. Scojt'ol sbaq'uetal yich'oj c'a'el-chamel. C'alal la yil te Jesuse, jul stinan sba coel ta lum ta stojol. Caj yalbey wocol:
—Cajwal, te yacuc ac'ane, ya xju' awu'un te ya alecubtesone —xi'.
13Te Jesuse, la scajanbey sc'ab ta sjol. Jich la yalbey:
—Jichuc. Ya xcolat ta chamel —xi'.
Te c'alal jich la yal te Jesuse, ch'ay sc'a'el-chamel ta ora te winique. 14Jesús la spas ta mandal te ma me mach'a ya yalbey yaiy. Soc albot xan te winique:
—Ja'uc me to, baan, ac'a aba ta ilel ta stojol te sacerdoteetic te bit'il lecubatixe. Soc ac'beya smajt'an te Diose, jich te bit'il yaloj mandal te Moisese.#Lv 14.1-32. Jich me ya sna'ic stojol te bit'il ch'ayemix te achamele —xi' te Jesuse.
15Jich c'axem to xan pujc' sc'oplal te Jesuse. Tsobol ants-winiquetic tal yaiybeyic te sc'ope soc la yaq'uic ta lamantesel te xchamelique. 16Ja'uc me to, te Jesús q'uejel bajt' ta sc'oponel Dios ta bay jochol te q'uinale.
Jesús la scoltay jtul winic te chamen xchial yoc-sc'ab
(Mt 9.1-8; Mr 2.1-12)
17Jun c'aal te c'alal yac ta p'ijubteswanej te Jesuse, ay fariseoetic soc jts'ibojometic te nacalic tey a te talemic ta lumlumtic ta sq'uinal Galilea soc ta sq'uinal Judea soc ta lum Jerusalén. Chican ta ilel te bit'il ta swenta yu'el Dios te yac ta slamantesel jchameletic te Jesuse. 18Ay winiquetic te sq'uechojic tel ta cajcante' jtul winic te chamen xchial yoc-sc'abe. C'an yiq'uic ochel ta yutil na ta banti ay te Jesuse. 19Ja'uc me to, ma la staic te bay ya x'ochic baele, yu'un bayal te ants-winiquetique. Jich yu'un moic bael ta yamac'ul sba te nae. La sjambeyic te smajq'uile. Tey la yaq'uic coel soc scajcante'al a te jchamel ta bay yolil te ants-winiquetique. Jich c'ot ta stojol te Jesuse. 20C'alal la yil te Jesús te bit'il ay xch'uunjel yo'tanique, jich la yalbey te jchamele:
—Tatic, pasbilatix perdón yu'un te amule —xi'.
21Jich te jts'ibojometique soc te fariseoetique jajch' yal ta yo'tanic: “¿Mach'a winiquil in to te yac ta stoybac'optayel te Diose, melel ja' nax stuquel te Dios te ya xju' yu'un xch'ayel te mulile”, xiic.
22Te Jesús la sna' stojol te bila yacalic ta yalel ta yo'tanique. Jich la yalbey yaiyic:
—¿Bi yu'un te jich ya awal ta awo'tanique? 23¿Bila wocol ta alel? ¿Ja' bal wocol te “Pasbilatix perdón yu'un te amule”, te ya cute? O ja' bal wocol ya awaiy te “Jajch'an, beenan”, teme ya cute? 24Ja'uc me to, ya me cac'beyex awilic te bit'il tulan yat'el yich'oj ta xch'ayel mulil ta balumilal te Nich'anile —xi'.
Soc la yalbey te winic te xujt' ma stij sba te yoc-sc'abe:
—Ya calbat te ja'ate, jajch'an, q'uecha bael acajcante'. Baan ta ana —xi'.
25Tejc'aj jajch'el ta yolilic ta ora te mach'a xujt' ma stij sba te sbaq'uetal ta neelale. La stsac jajch'el te scacante' te q'uechbil tel ae. Bajt' ta sna. Yac ta yalel bael yutsilal te Diose. 26Ta spisilic jchajp nax la yilic. La yalbeyic wocol Dios yu'un, soc xiw yo'tanic yu'un. Jich la yalic:
—Yan sba ya quiltic ta ora to te bila c'ot ta pasele —xiic.
Jesús la yic' sjoin te Leví
(Mt 9.9-13; Mr 2.13-17)
27Patil loc' bael te Jesuse. La yil jtul jc'an-patan te Leví sbiile, nacal ta banti ya yich' tojel spatanul te biluque. Jich la yalbey:
—La' ts'aclinawon —la yut.
28Jich yu'un la stejc'an sba jajch'el. La yijq'uitay jilel spisil, soc la sjoin bael te Jesuse.
29Patil te Leví la spas q'uin ta swenta Jesús. Jich la yic' tel ta we'el ta sna tsobol jc'an-patanetic soc yantic te pajal nacal ta mesa soc te Jesuse. 30Jich yu'un te fariseoetique soc te jts'ibojometique jajch' ayanbeyic sc'oplal te jnopojeletic yu'un te Jesuse. Jich ba yalbeyic:
—¿Bistuc ya ajoinic ta we'el-uch'ajel te jc'an-patanetic soc te jmulawiletique?#Lc 15.1-2. —xiic.
31Jesús la yalbey yaiyic:
—Te mach'atic bujts'an q'uinal ya yaiyique, ma xtuun yu'unic te jpoxtaywaneje. Ja' nax ya xtuun yu'unic jpoxtaywanej te mach'atic ayic ta chamele. 32Melel ma ja'uc tal quic' te mach'atic tojique. Ja' tal quic' te jmulawiletic te ya sujt'es yo'tanic ta stojol te Diose —xi'.
Sjojc'oyel sc'oplal ayuno
(Mt 9.14-17; Mr 2.18-22)
33La sjojc'obeyic te Jesuse:
—Te jnopojeletic yu'un te Juane, bayal buelta la spasic ayuno ta sc'oponel te Diose. Soc ja' nanix jich uuc te jnopojeletic yu'un te fariseoetique. Yan te jnopojeletic awu'une, ¿bi yu'un te ma spasic ayuno stuquelic? —xiic.
34Te Jesús jich la yalbey yaiyic:
—¿Ya bal xju' ya awac'bey spasic ayuno te mach'a ic'bil ta il-nujbinele, teme sjoinej to sba soc te winic ya xnujbine? 35Ja'uc me to, ya nax sta yorail ya x'ic'ot loq'uel ta yolilic te winic te nujbinixe. Ja' to me ya xjajch' spasulayic ayuno abi —xi'.
36Soc jajch' yalbey seña-c'op:
—Ma'yuc mach'a ya set' loq'uel xejt'uc ach' c'u'ul te ya spac'antay te pocol c'u'ule. Teme jich ya spase ya yac' ch'ayuc te ach' c'u'ule. Ja' nanix jich te xejt'elul ach' paq'ue, ma snujp'in sba soc te pocol c'u'ule. 37Soc ja' nanix jich ma xju' ya yich' pulel ach' vino ta pocol snujc'ulel chambalam te ts'isbile. Teme jich ya yich' pasele, te ach' vinoe ya xt'om yu'un te pocol nujc'ule. Jich ma xtuunix ta xchebalic. 38Jich yu'un te yach'il vinoe ya sc'an ya yich' pulel ta ach' nujc'ul. Jich me ya xtuun ta xchebalic. 39Soc te mach'a c'aem ta yuch'el te pocol vinoe, ma smulan yuch'el te yach'ile. Yu'un ya yal te ja' lec stuquel te pocol vinoe —xi' te Jesuse.
ទើបបានជ្រើសរើសហើយ៖
San Lucas 5: TZOXCH
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblia en Tzeltal de Oxchuc y Tenejapa © Sociedad Bíblica de México, A.C., 2001.
