San Lucas 4
4
Te pucuje tal yilbey yo'tan te Jesuse
(Mt 4.1-11; Mr 1.12-13)
1Te Jesús noj ta yo'tan te Ch'ul Espiritue. Jich la yijq'uitay jilel te muc'ja' Jordán, soc ic'ot bael yu'un te Espíritu ta bay jochol taquin q'uinal. 2Tey ain cha'winic c'aal a, soc tal ta ilel yo'tan yu'un te pucuje. Xujt' ma ba we' te jich yipal c'aal tey ae. Patil la yaiy wi'nal. 3Te pucuje jich albot yu'un:
—Teme ja'at Snich'anat te Diose, albeya te ya xc'atp'uj ta waj te ton in to —xi' te pucuje.
4La yal te Jesuse:
—Ts'ibubil ta Sjun Dios te “Ma ja'uc nax ta waj cuxulic a te ants-winiquetique. Ja' ya xcuxinic yu'un spisil te bila yaloj Dios ta sti'”,#Dt 8.3. te xie —xi' te Jesuse.
5Te pucuje ic'ot bael yu'un ta bay toyol wits. Ta ora nax ac'bot yil yu'un spisil ta jchajp lumetic te ayic ta balumilal. 6Te pucuje la yal:
—Ya cac'bat tulan awat'el ta swentainel spisil ta jchajp in lumetic to soc te yutsilale. Melel ochem ta jwenta spisilic, chican co'tan jtuquel te mach'a ya cac'beye. 7Jich yu'un teme ya aquejan aba soc teme ya awich'on ta muq'ue, awu'un ya xc'ot spisil —xi'.
8Te Jesús jich la yalbey:
—Loc'an ta jtojol, Satanás, melel jich ya yal te Sc'op Dios ts'ibubil jilele: “Ja' nax me ya aquejan aba ta stojol te Cajwaltic Diose, soc ja' nax me ya awac' aba ta abatinel ta stojol stuquel”,#Dt 6.13. te xie —xi'.
9Soc ic'ot xan bael yu'un te pucuje ta bay lum Jerusalén. Jich c'o tejc'anotuc yu'un ta bay jol templo te Jesuse. Jich la yal te pucuje:
—Teme ja'at Snich'anat te Diose, ch'oja aba coel li'to. 10Melel ts'ibubil ta Sjun te Diose:
“Te Dios ya yalbey mandal te ch'ul abatetic yu'un te ya me scanantayate.#Sal 91.11.
11Ya me xtal stsacat ta sc'abic
swenta yu'un ma ba ya alajin awacan ta ton”,#Sal 91.12. te xie —xi' te pucuje.
12Jesús la yalbey:
—Soc jich ya yal uuc te Sjun Diose: “Ma me x'awilbey yo'tan te Cajwaltic Diose”,#Dt 6.16. te xie —xi'.
13Te pucuje ma la sta te bila ya yilbey xan yo'tan a te Jesuse. Jich la yijq'uitay jilel jun chebuc c'aal.
Jajch' ta at'el Jesús ta sq'uinal Galilea
(Mt 4.12-17; Mr 1.14-15)
14Te Jesús sujt' bael ta Galilea ta swenta yu'el te Ch'ul Espiritue. Pujc' sc'oplal ta spamal te q'uinale. 15La yaiy p'ijubteswanej ta bay sinagogaetic ta juju-jpam lum. Spisilic bin nax yo'tanic yu'un ta bayuc.
C'ot ta lum Nazaret te Jesuse
(Mt 13.53-58; Mr 6.1-6)
16Te Jesús bajt' ta lum Nazaret te banti ch'ie. Ta sc'aalelal cux-o'tan bajt' ta sinagoga, jich te bit'il c'aem ta spasele. La stejc'an sba ta yilel te Sjun Diose. 17Ac'bot ta sc'ab te sjun Isaías te namey q'uinal j'alwanej yu'un te Diose. Ja' la sjam yil te bay ts'ibubil jilele:
18“Te Espíritu yu'un te Cajwaltique julix ta jtojol,
yu'un tsabilon yu'un ta yalel te lec yach'il c'op ta stojol te me'baetique.
Ticunbilon tel ta scoltayel te mach'atic ay swocolic ya yaiyic ta yo'tanique,
soc te ya calbey yaiyic te bit'il ya xcolic ta libre te mach'atic ayic ta chuquele,
soc te ya jambey sitic te ma'sitetique,
soc te ya jcoltay ta libre te mach'atic mosoinbilique,
19soc te ya jchol te bit'il yorailix coltayel yu'un te Cajwaltique”,#Is 61.1-2. te xie.
20La smac te jun te la yile, soc la yac'bey te mach'a swentainej te junetique. Jich la snajc'an sba ta p'ijubteswanej ta stojol spisilic. Spisil te mach'atic ayic ta sinagoga la yilbeyic sit te Jesuse. 21Jajch' yal te Jesuse:
—Ja' in c'aal to, ja' c'otix ta pasel ta atojolic te bi la ts'ibubil jilel ta Sjun Dios —xi'.
22Spisilic lec bajt' sc'oplal yu'unic te Jesuse, soc bayal ayan yo'tanic yu'un te bit'il buen t'ujbil la yaiybeyic te sc'ope. La sjojc'obey sbaic:
—¿Ma bal ja'uc snich'an José in winic to? —xiic.
23Te Jesús jajch' yalbey yaiyic:
—Ay wan jich ya awalic te bit'il ay ta alele: “Te bit'il jpoxtaywanejate, poxtaya aba atuquel”, xaex me. Soc jich ya awalic uuc: “Te bila la apas ta Capernaúm, jich nix me xapas li'to ta bay alumal”, ya niwan awutonic —xi' te Jesuse.
24Soc la yalbey yaiyic:
—Jamal ya calbeyex, ma x'ich'ot ta muc' ta bay slumal#Jn 4.44. te mach'a j'alwanej yu'un te Diose. 25Melel xcalbeyex, te c'alal ay ta j'alwanej ta namey te Eliase, ay tsobol me'ba antsetic ta bay smaquen-q'uinal Israel. Te c'alal ma ba la yac' ja'al olil xchaneb ja'wil, jich tal bayal wi'nal ta spamal q'uinal.#1 R 17.1. 26Ja'uc me to, te Elías ma teyuc ticunot bael a ta bay me'ba antsetic te ayic ta sq'uinal Israel. Tey ticunot bael yu'un Dios ta bay sna jtul me'ba ants te ay ta ch'in lum Sarepta ta bay sq'uinal Sidón.#1 R 17.8-16. 27Ja' nanix jich te c'alal ay ta j'alwanej te Eliseoe. Tsobol mach'atic ayic ta c'a'el-chamel ta sq'uinal Israel. Ja'uc me to, jtul ma'yuc mach'a la yich' lecubtesel, ja' nax te Naamán te talem ta sq'uinal Siria#2 R 5.1-14. —xi' te Jesuse.
28C'alal la yaiyic stojol te jich la yal te Cajwaltique, ilinic yu'un spisil te mach'atic ayic ta sinagogae. 29Caj stenic loq'uel ta ti'lum te Jesuse. La yiq'uic bael ta bay mero toyol coel te witse, yu'un ta ba wits ay te lume. Tey c'an scotp'inic coel a. 30Ja'uc me to, te Jesuse c'ax ta yolilic. Bajt'.
Jtul winic te ay pucuj ta yo'tan
(Mr 1.21-28)
31Te Jesús co bael ta Capernaúm te ay ta sq'uinal Galilea. Tey la yaiy p'ijubteswanej ta stojol te ants-winiquetic ta sc'aalelal cux-o'tan. 32Bayal la ayan yo'tanic yu'un te bila la yal ta p'ijubteswanej, melel jich c'opoj te bit'il mach'a yich'oj tulan yat'ele.#Mt 7.28-29.
33Ay talem ta sinagoga jtul winic te ochem pucuj ta yo'tan. Tulan awun:
34—Jesús te Nazarete, ¿bi awentaotic? ¿Yu'un bal tal ajinotic? Ya jna'bat aba te ja'at te Xch'ul-nich'anat te Diose —xi' ta aw.
35Jesús la scom ta c'op te pucuje:
—¡Ma xc'opojat! ¡Loc'an tel ta yo'tan te winique! —la yut.
Te winic jipot ta lum yu'un te pucuj ta bay yolilic. Jich a loc' ta yo'tan. Ma'yuc yejch'en jilel. 36Spisilic jchajp nax la yilic a. Jich la yalbey sbaic:
—¿Bit'il ay a te sc'ope? Yich'oj tulan yat'el soc ay yu'el yu'un sloq'uesel pucujetic, te melel ta smandal nax ya xloq'uic ta ora yu'un —xiic.
37Pujc' sc'oplal ta sjoylejal q'uinal te Jesuse.
Jesús la slamantesbey xchamel te snialme'el te Simón Pedroe
(Mt 8.14-15; Mr 1.29-31)
38Loc' tel ta sinagoga te Jesuse, bajt' ta sna Simón. Te snialme'el te Simone ay bayal swocol, ay ta tulan c'ajc'. La yalbeyic wocol te Jesús te yacuc slamantesbey te sc'aale. 39Te Jesús la stinan sba yil, la scombey te sc'aale. Ora nax a lamaj te xchamele. Tejc'aj jajch'el ta ora, och ta mac'linwanej.
Jesús la slamantes tsobol jchameletic
(Mt 8.16-17; Mr 1.32-34)
40Te c'alal ch'ayix bael c'aal a, spisil te mach'atic ay jchameletic yu'unique, chican te bila chameliluc te yich'ojique, la yiq'uic tel ta stojol te Jesuse. La scajanbey sc'ab ta sjol juju-jtul, jich lamaj xchamelic ta spisilic. 41Soc loc' pucujetic ta yo'tanic tsobol ta jtul te mach'atic ayic ta chamele. Awun te pucujetique:
—Ja'at Snich'anat te Diose —xiic ta aw.
Te Jesús la scom ta c'op te pucujetique, yu'un sna'ojic te ja'ix te Cristoe.
Jesús la xchol sc'op Dios ta sq'uinal Galilea
(Mr 1.35-39)
42C'alal yac ta sacubel q'uinal a, loc' bael ta lum te Jesuse. Bajt' ta bay jochol te q'uinale. Jajch' ta leel yu'un te ants-winiquetique. Te c'alal la staique, c'an scomic te manchuc ya x'ijq'uitayotic yu'une. 43Te Jesús la yalbey yaiyic:
—Puersa ya xba cal ta bay lumlumtic te lec yach'il c'op te ya xjajch'ix ta mandal te Diose, melel ja' swentail te ticunbilon tel yu'une —xi'.
44Jich been Jesús ta xcholel te lec yach'il c'op ta bay sinagogaetic te ayic ta spamal sq'uinal Galilea.
ទើបបានជ្រើសរើសហើយ៖
San Lucas 4: TZOXCH
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblia en Tzeltal de Oxchuc y Tenejapa © Sociedad Bíblica de México, A.C., 2001.
