ទំនុកតម្កើង 8

សិរីរុងរឿងរបស់ព្រះ និងកិត្តិយសរបស់មនុស្ស

បទតម្កើងរបស់ដាវីឌ សម្រាប់អ្នកដឹកនាំចម្រៀង ត្រូវលេងតាមទំនុកភ្លេងគីធីត#8:0 ទំនុកភ្លេងគីធីត―ឬ “ទំនុកភ្លេងកាថ” ឬ “គ្រឿងតន្ត្រីកាថ”។។

1ព្រះយេហូវ៉ាដ៏ជាព្រះអម្ចាស់នៃយើងខ្ញុំអើយ

ព្រះនាមរបស់ព្រះអង្គឧត្ដុង្គឧត្ដមយ៉ាងណាហ្ន៎នៅលើផែនដីទាំងមូល!

ព្រះអង្គបានតម្កល់សិរីរុងរឿងរបស់ព្រះអង្គឲ្យខ្ពស់ជាងបណ្ដាមេឃ។

2ដោយព្រោះពួកសត្រូវរបស់ព្រះអង្គ

ព្រះអង្គបានស្ថាបនាព្រះចេស្ដាចេញពីមាត់កូនក្មេង និងទារកនៅបៅ

ដើម្បីធ្វើឲ្យខ្មាំងសត្រូវ និងអ្នកសងសឹកគ្មានវាចាសោះ។

3កាលណាទូលបង្គំសង្កេតមើលផ្ទៃមេឃដែលជាស្នាព្រះហស្តរបស់ព្រះអង្គ

ព្រមទាំងព្រះចន្ទ និងផ្កាយដែលព្រះអង្គបានតាំងឡើង

4នោះតើមនុស្សជាអ្វី បានជាព្រះអង្គយកចិត្តទុកដាក់នឹងគេ?

តើកូនមនុស្សជាអ្វី បានជាព្រះអង្គមើលថែគេ?

5ព្រះអង្គបានធ្វើឲ្យគេទាបជាងព្រះ#8:5 ព្រះ―ឬ “ទូតសួគ៌”។តែបន្តិចទេ;

ព្រះអង្គបានយកសិរីរុងរឿង និងអានុភាព បំពាក់ជាមកុដលើគេ។

6ព្រះអង្គបានធ្វើឲ្យគេមានអំណាចលើស្នាព្រះហស្តរបស់ព្រះអង្គ

ព្រះអង្គបានដាក់របស់សព្វសារពើនៅក្រោមជើងគេ

7គឺអស់ទាំងចៀម និងគោ

ព្រមទាំងសត្វព្រៃនៃទីវាលផងដែរ

8ទាំងបក្សាបក្សីនៅលើអាកាស ត្រីនៅក្នុងសមុទ្រ

និងសត្វដែលឆ្លងកាត់តាមផ្លូវសមុទ្រ។

9ព្រះយេហូវ៉ាដ៏ជាព្រះអម្ចាស់នៃយើងខ្ញុំអើយ

ព្រះនាមរបស់ព្រះអង្គឧត្ដុង្គឧត្ដមយ៉ាងណាហ្ន៎ នៅលើផែនដីទាំងមូល!៕

ទើបបានជ្រើសរើសហើយ៖

ទំនុកតម្កើង 8: GKHB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ខគម្ពីរពេញនិយមពី
ទំនុកតម្កើង 8