JOŊRE 20
20
Pol gəryi giidə seŋka də Masedəwana, də Geresiŋ daana də Torwasiŋ
1Bə minti gəbaŋ arsaŋ wəra giidə vila arsaŋ, Pol mantaŋ kaa kə doo-deŋ da, wə bəŋ a tiŋiy diri. Adoro wə wəətənəy minti: «Aŋ yaakaŋ ne», wə haŋ kəkəy bə koore Masedəwan faɗi. 2Bə minti wə bə cakɗe seŋka taŋa wəra ha'aŋ, wə faltaŋ duru ablaw bə ŋafte də kaa kə doo-deŋ, bə wəətəy kel kə tiŋiy diriŋa. Wə cakɗaŋ seŋka taŋ wəra kəyaŋ, wə tuukuŋ giidə seŋka də Geresiŋa, 3wə jəŋ kitir ada soope. A ko toŋa wə a ɗəlaŋ he turti bə cakɗe wəra giidə seŋka də Siriŋa. Wə ɗeŋ a əski minti kaanə Ziwifiŋ bə jəmu guudu minti té əwu la wəraŋ, wə yaakaŋ ɗiki toŋ máŋ eŋ, wə haraŋ bə cakɗe da warda Masedəwan da. 4Kaa gə minti a bə gəryi duuru ha'aŋ, anə Sopater, kormə Pirusi bə Bereŋ; Aristarkə daana Sekondosi gə Tesalonikiŋ; Gayusi bə Derbeŋ; Timote; Tisiki daana Torofim gə giidə seŋka də Aziŋ ada gəm. 5Kaa teŋ kooroŋ ajew də are na bə ɗe a mi are warna Torwasi na. 6Naareŋ ha'aŋ, *kəɗwəy gə Mappa bə bay siipəŋ jəŋ wəra anəkay, are haŋ turti ku kan gə Filipiŋa bə koore siri na faɗi gəm. Are hətəŋ wiiɗiw bə cakɗe kan teŋa wəra. Are tuluŋ wəra Torwasi, are hətəŋ ada seeɗa.
7Dəəgŋ də hi bə ajew bə dər alumaŋ, are təpaŋ bə hame soŋa də kaa kə doo-deŋ, are jəŋ ɓarse bə soŋ ada gəm. Pol koore haa dibiinim faɗi gəm səm moŋ, wə waataŋ kel a kaŋ anə taata, hãã koŋ koloŋ wəra duugŋ leŋ. 8Kuli bə minti are təpaŋ cəərə are adaŋ bə hərsə-hərsi cəərə kumsu apəy na kampa ɓasi. Lampaŋ də maltə-malte ada na anə ta'-ta'i bə wele koŋa wəra. 9Kəya puranul kəman, səmu minti Etisi, əsəŋ a feneeter də kuliŋa je'i. Pol a kel kə waateŋa gil saksaki, kin doŋ pur toŋ ablaw cin sə guudu. Kin kəlnu cuuru səm moŋ, wə zəəməŋ, wə awaŋ warda a feneeter da muf faɗi! Yə bəŋ kay da minti té bi a haw apəyaŋ, yə ɗeŋ a ase ha'aŋ, wə wəra bə mee-me. 10Pol luŋ warda anə cəlam-cəlam, wə bəŋ a kuɓi də ku tərmuyu cuuru faɗi. Wə həənu kəəsu, wə waataŋ kaŋ minti: «Tarməyaŋ a celeŋ ba! Wə kəm dədərgə!»
11Wə wəətənəy bədoona waata kəya, wə haraŋ bə li na apəy na faɗi. Wə ɗeŋ a he mappaŋ, wə ɗuklunu duru wəra ɗoklə-ɗokla, wə ɓərsunu a kaŋ, wə əsəŋ bə həmu diiri keɗe. Adoro, wə haraŋ bə wəətəy kela hãã koŋ jəmaŋ warda hər-hər-hər. Kəya wə kooroŋ faɗi. 12Kə pur gəm taŋ, yə haraŋ bə ɗe a məlu akera, wə wəra sə kampa kaŋkaŋ caw. Kaŋ keɗe, tərməyi jəŋ waale gud kel teŋa.
Pol tewe cəərə kel nuutu wəra də kaa kəmtəŋ gə tiinə kaa kə Tapi gə Efesiŋ
13Naareŋ ha'aŋ, are kooroŋ ajew də Pol na. Are haŋ turti bə ɗe a ve agal naytaŋ na giidə vil də Asosi na. Kə Pol ha'aŋ, wə kəlaŋ wəra kar də kampa bə ɗe a ŋefe də are. Wə a ɗəkəŋ nuutuŋ haa minti tó ɗe a li sar are na giidə turtiŋ na a ko toŋ na kəm. 14Bə minti wə ŋəfaŋ də are Asosiŋ, wə bəŋ a li sar are giidə turtiŋa. Kəya are kooroŋ, are ɗeŋ a tuli warna Mitileŋ na. 15Bə minti are Mitileŋ, are haraŋ bə li giidə turtiŋa. Are kooroŋ, are ɗeŋ a tuli a dibiinima tiinə ajomga də Kiyoŋa. A dibiinim aynaŋaŋ, are ɗeŋ a tuli warna ajomga də Samosiŋ na. Dər hi bə waaɗeŋaŋ, are tuluŋ warna giidə vil də Miletiŋ na. 16Ana ha'aŋ, Pol a məlaŋ ɗiki du warda minti are a mele də turtiŋ Efesi bə raawe cəwaŋ wəra giidə seŋka də Aziŋa ba. Wə bandaŋ da bande bə bi a tuli wəra Zeruzalema anə pal-pal ha'aŋ, gud bə minti wə a bəlaŋ minti hi bə Pantəkotiŋ bəə la a fele tó máŋ wəra ada.
17Bə minti are tuukuŋ Miletiŋ, Pol vaŋ kaa bə ɗe a waate kaa kəmtəŋ gə tiinə kaa kə Tapi gə Efesiŋ minti yə bəəda a ŋefe də tó. 18Yə tuluŋ wəra tulə suru kəyaŋ, wə wəətənəy minti: «Hãã bə minti ten tuluŋ giidə seŋka də Aziŋa, daana hiti bə minti ten juunu aduubə dəŋa keɗeŋ, ten jəŋ maa kəna mo, wəra də dərəŋ. 19Ten jəŋ joŋreŋ a Barkaŋ bay he cəərə kusrən apəya. Ten juunu haa bə hage caw, dər gəəli bə minti kaanə Ziwifi a taptaŋ kuy bə kan dən cəərənaŋ. 20Aŋ asaŋ gəm minti, kel gə minti kəyaŋ, ten ŋoyoŋ wəra guudi anə weseka ba. Ten hatnaŋ daana ten waatənaŋ kel cəərə Yeesu wəra aduubə də kaŋa keɗe, ɗalba akera gəm. 21Ten saksaki bə waate gə Ziwifiŋa daana kaayaŋ gə minti paapa gə Ziwifi baŋ minti yə kolə kirki la a baymele neeteŋ bə hare diri cəərə Pepeŋa, bə de gud Barkaŋ náŋ Yeesuŋa gəm.
22Bə hebkənaŋ, ten koore cawa haa Zeruzalem. Tiiru Cetcetaŋ bə waatəna haa minti ten ɗee la pəraki. Səma, karman bə minti ɗe a tuli cəərəna ada naŋ, paapa də dərən ba. 23Karman bə minti toŋ də dərən, haa bə minti lasiŋ mo, daŋgay mo, bə mənaŋ. Gud maa mo a gəryi katəna giidə vila cawa keɗeŋ, Tiiru Cetcetaŋ bə waatəna bədoona. 24Katən ha'aŋ, ten jəŋ ne caw, ten jəŋ nuutu caw ba, ɗamnan ba. Kel gə ɗəman, haa gə minti ten jəə la bə əsə-isi ŋəŋ a ɗe katəna hãã a me dəna, joŋre bə minti Barkaŋ aynan dən kaasəna, ten ɗe duuru hãã bə ɗe a məlu wəra a kuɗuŋa gəm. Joŋre toŋ haa waate bə *Kel pəsaŋ kəmarwaŋ wəra cəərə pisi bə minti Pepeŋ bə jəwa sar kaŋaŋ.
25Bə hebkənaŋ, aŋ asə la wəra minti: hulum anə məna guudəŋa fele duru hõy bə ŋefe dəərən pəda, aŋ neŋneŋ keɗe laka gə minti ten a jəŋ adəwaldəŋa bə waataŋ sam *Kumna kə Pepeŋa wəraŋ. 26Gud teŋa ta, ten dayna bə waataŋ teŋa wəra gila minti, hulum bəsaŋ ne wəra guudəŋa bay fele dədərgə də bay teweŋ, paapa kel katən pəda. 27Gud maa mo, ten a waatənaŋ kel gə minti Pepeŋ a ɗəmpənəy wəra cəərə *kaa kəsarkaŋaŋ wəra keɗe; ten gəɗaŋ kumundu wəra anə məna bay waate ba. 28Aŋ amə ɗe dəŋ la, kaa gə minti Tiiru Cetcetaŋ a aynaŋ dəŋ kaasəŋa bə goleŋ keɗe, aŋ əməy la gəm. Kaa kə Tapi kə Pep gə minti wə kulnuy wəra kaa nuutu də kor də Kurmuyuŋ, aŋ jəy guudi la pisi.
29Ten wəra bə asə-ase minti ten bə kooroŋ neŋ, kaa kə sərkə gə minti akas kaaya gə pəəri ana bə ve yaŋ nuutu aduubə dəŋ da. Yə bə bi a ji kaa kə Pepeŋ haa baymele faɗi. 30Kaa aduubə dəŋa toki bə piti yaŋ də kel kə ŋetə-ŋeteŋ bə ke ku kaa kə doo-deŋ wəra guudi. 31Bədoona ta, aŋ kaa dərəŋ la wəra ke. Cəərəŋ jəə la bə ɗəkti minti dər laate soope'iŋa, duugŋ də daaway, ten kaanaŋ kosnoŋ wəra ajewa məna-məna keɗe cəərə kel kə bayməlaŋ teŋa ɗalba ten kole hage wəra ada anə kolə gəm. 32Yaakaŋ máŋ hebkəna haa minti ten ayaŋ kasi Pepeŋa. Kel gə minti bə waate sam pisi bə minti wə bə jəwa sar kaŋa, yə gə nakə-neke bə amaŋ. Wə bə nakə-neke bə suŋ dər de nəətiŋa, daana bə ayaŋ kar pəsaŋ gə minti wə bə ɗukuy na a nəənəŋ, a kaayaŋ gə minti nuutu keɗeŋ.
33Ɗiki dən məlaŋ hõy cəərə soloya bə gəm, cəərə maaway bə gəm, daana cəərə dəməəmə kə huluma bə gəm. 34Aŋ golon kaasən la, wəra də dərəŋ minti ten jəŋ joŋre haa diiri bə keye kusrən daana kaa gə minti are gəryəŋ də kumsə areŋ gəm. 35Də joŋre bə minti ten juunu a koŋa keɗeŋ, ten gaanaŋ dərəŋ haa minti, bə kole bə keye kaa kə caacaŋaŋ, aŋ kir ji joŋre də səɓaki bədoona gəm. Kel gə minti Barkaŋ Yeesu wəətənəy jəə la cəərəŋa ɗəkə gəm minti: ‹Tam ayaŋ karman ne a hulum, tam də waale dəŋaŋ bə minti yə ayam karman ayeŋ.›»
36Pol waataŋ kel teŋ waata kəyaŋ, yə vaŋ də gəgiiri adawra duuru keɗe bə toose Pepeŋa. 37Kan kə diri accaŋ nuutu da anə faɗ-faɗi, yə əsəŋ bə hage ablaw. Kəya yə əsəŋ bə gaɓte Pola kuuru, yə ŋaftaŋ kuy də kumsi duuru bə mirkuŋ. 38Laaweŋ duuniy daŋgeŋ haa gud kel nuutu gə minti wə wəətənəy minti dər té bə ŋefe hõy pədaŋ. Kəya yə kooroŋ bə ɗe a məlu ku turtiŋ faɗi.
Currently Selected:
JOŊRE 20: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.