JOŊRE 21
21
Pol koore Zeruzalem
1Are meereŋ də kaa kəmtəŋ gə tiinə kaa kə Tapi gə Efesiŋ haa waŋ-waŋ. Adoro, are haŋ turtiŋ bə jeme warna anə catat ajomga də Kosiŋ na. Ɗeŋ a deye dibiinim, are raawaŋ warna ajomga də Rodiŋ na. A ko toŋa are raawaŋ giidə turtiŋa bə koore giidə vil də Patara. 2Bə minti are tuluŋ anəkay adaŋ, are fəlaŋ turti bə li bə koore giidə seŋka də Fenisi. Are luŋ giidə, are kooroŋ faɗi. 3Are ɗeŋ a tuli wəra anə maŋŋa sar ajomga də Sipərəŋa, səma are məlaŋ ada ba. Are yaakəna wəra kasi are gula, are raawaŋ agal də seŋka də Siriŋ na. Are ɗeŋ a ve wəra giidə vil də Tira gud bə minti turtiŋ a bəŋ də kar giidə da ha'aŋ, bə bi a vay a ko toŋa. 4Kaa kə doo-de a ko toŋa ada. Bə minti are fəlnəy falə, are jəŋ hiti seeɗa də kumsə are. Tiiru Cetcetaŋ kaŋ gud kel wəra a kaa kə doo-deŋ cəərə Pola səm moŋ, yə bəŋ a lúɓú minti wə a ɗe Zeruzalem pəda#21.4 Tiiru Cetcetaŋ gəənəy gud kel wəra minti lasiŋ daana daŋgay bə mi Pol na Zeruzalem na.. 5Də teŋ keɗe, hiti naareŋ təwaŋ diiri kəyaŋ, are haraŋ bə raawe a gəryi naareŋ faɗi. Yə kooroŋ də kəram neeteŋ, də kərməyiŋ neŋneŋ keɗe, bə ɗe a mele are warna ku kan bə minti sar vila maŋ. Kəya are vaŋ də gəgəərə are bə toose Pepeŋa diiri keɗe. 6Adordə minti are topoŋ kasi kumsə are topə-topeŋ, are luŋ a turtiŋa, kaa kə doo-deŋ haraŋ akera faɗi gəm. 7Gəryi naareŋ də turtiŋ təwaŋ haa də nayto bə minti are giidə vil də Tiraŋ, are luŋ bə koore giidə vil də Potoləmay. Are tuluŋ wəra ada, kəya are vaŋ bə mirki kaa kə doo-deŋa, are jaŋ məna diiri.
8A dibiinimaŋ, are haraŋ bə koore bə ɗe Sezare. Are kooroŋ ger Filipi, hulum bə minti waate *Kel pəsaŋ kəmarwaŋ wəra a kaŋ. Wə haa hulum bə gud kaa kaayaŋ seeɗa'i gə minti yə a ŋəmtənəy Zeruzalemaŋ#21.8 Aŋkə la giidə Joŋ.6.1-6.. Are həətəŋ haa girdu. 9Kərmuyu kerew tew yaŋ waaɗe lam girdu, Pepeŋ əynəy jogte bə ku mini nuutuŋ wəra a kaŋ. 10Bə minti are wəra gə hətə-hiti ada makiŋ, hulum kəman, səmu minti Agabusi, bəŋ Zude da. Pepeŋ əynu haa jogte bə ku mini nuutuŋ wəra gəm. 11Wə bəŋ sar are kəyaŋ, wə humuŋ santir kə Pol, wə əsəŋ bə ənti kuurə kəmpuru də kəəsu duuru. Wə minti: «Waate kel teŋ haa kənaŋ Tiiru Cetcetaŋ minti: hulum bə minti santir nuutuŋ kay kənaŋ, kaanə Ziwifi gə Zeruzalem ɗe a untu bədoona ana gəm. Adoro yə əyu kasi kaa gə minti teŋ paapa gə Ziwifi baŋ.» 12Bə minti are əskəŋ kel teŋ kəya, are, də kaa gə doo-de gə Sezareŋ keɗe, əsəŋ bə ji kamkama a Pol bə hage guudu minti wə a ɗe Zeruzalem pəda. 13Səma wə haraŋ kel a are minti: «Aŋ a haran ɗiki dən adoro də hage nəəti toŋ ba. Ten toŋ ha'aŋ, ten wəra bə ɗampə-ɗampe cəərə ənti tó bə Zeruzalema. Səma, yə bəlaŋ ne nuutu minti té awan gud kel kə sam Barkaŋ Yeesuŋaŋ, ten hay kuy bə gəm.» 14Tiwki naareŋ paapa bə neke suru ba, are zeneŋ maŋ bə waate minti: «Barkaŋ jəə la gud giidu gə beleŋa!»
15Adordə bə minti are jəŋ hiti maki Sezareŋ, are ɗampaŋ kar naareŋ wəra, are haŋ kəkəy bə koore Zeruzalem faɗi. 16Sərdə kaa kə doo-de gə Sezareŋ kooroŋ gud are gəm. Yə ɗeŋ də are ger hulum kəmana minti are həətə la girdu. Sam hulum toŋ minti Manasoŋ, wə haa hulum bə Sipərə, wə wəra hulum bə doo-de hãã dər ko bə dayday da.
Pol ɗe a helɗe Zaki
17Bə minti are tuluŋ Zeruzalemaŋ, kaa kə doo-deŋ doŋ irku də are də waale faɗi. 18Ɗeŋ a deye dibiinim, Pol kooroŋ də are ger Zaki. Kaa kəmtəŋ gə tiinə kaa kə Tapiŋ keɗe təpaŋ ciiri wəra ada gəm. 19Pol mirkiniy wəra mirka-mirka, kəya wə əsəŋ bə tupuy bəlam də kel gə minti Pepeŋ a jiiniy də joŋre kə toŋ adəwaldə kaa gə minti teŋ paapa gə Ziwifiŋ baŋ, wəra məna-məna keɗe. 20Kaŋ jeɓreŋ ku Pol jeɓraŋ, kəya yə əsəŋ bə tokɗe Pepeŋa. Yə waataŋ Pol minti: «Pol, tam bə ase, kaanə Ziwifiŋ hebkəna guɓ-guɓi aniinə mo koloŋ wəra kaa kə doo-de daana yə keɗe bə ɗe də ku tərməyi soki məna gud *ku gili kə *Moyisiŋa. 21Bə hebkənaŋ, yə əskənəm səmam wəra minti tam bə hate kaanə Ziwifi gə minti giidə seŋka kə kaa gaalaŋ-gaalaŋ na warna minti yə yaakə ku gili kə Moyisiŋ la wəra. Tam bə wəətiya minti yə a ceme tantar kəmar koncoŋ neeteŋ pəda, yə yaakə to'osi neeteŋ la wəra gəm. 22Kel teŋ yə wəra bədoona ɗaw tə kəm, áŋ jəə la naanaanə mo? Gud maa mo, yə bə əski wəra me'i minti tam tuukuŋ ne wəra kəna.
23Bədoona ta, kel gə minti tam kir jəy haa kel kayiŋ: kaa yaŋ kəna waaɗe gə minti a kaltaŋ kuy a Pepeŋ#21.23 Aŋkə la giidə Joŋ.18.18.. 24Tapə la siri, ɗee la a poore kusrum wəra siri də ko bə minti yə bə ji kel kə puuriyaŋ#21.24 Kaa té waaɗe'iŋ yaŋ nuutu bə jəə-ji kel kə ɓalkə-ɓalke tiinə Pepeŋa, yə kir poore kusri wəra kəm haa sə teŋ. Bə de ku kel gə minti yə a kaltaŋ kuy a Pepeŋ wəra tə pə moŋ, yə kir ji keere baalaŋ hal də nayto bə minti yə bə jəw bə poore kusri.. Gusiy kar gə minti yə sə a ɗe a keere diiriŋ la a niini, kir minti yə nakə la bə ce ciiri wəra gəm. Bədoona ta, kaŋ keɗe hare yaŋ bə ase minti, kel gə minti té a iskiniy cəərəmaŋ, yə paapa kel kə gəəzi ba; yə kəna kel kə boobo. Tam doloy bə humi kosoŋa cəərə ku gili kə Moyisiŋa gəm. 25Kə kaa kə doo-de gə minti teŋ paapa gə Ziwifi baŋ, are jiiriniy kefter na minti, ku gili bə minti yə sə a ɗe guuduŋ, wə haa lam kənaŋ: yə a hame kusuki bə minti yə keerte duuru anə pepe kəman pəda, yə a hame kor ba, yə a hame kar gə minti yə murɗuy kuuri murɗiŋ ba, daana yə yaakə piwpiw la wəra gəm.» 26Ɗeŋ a deye dibiinim kəyaŋ, Pol humuŋ kaa té waaɗe'iŋ guudu, yə kooroŋ bə ɗe a ji kel kə pooreŋ keɗe. Adoro, wə kooroŋ bə ɗe a kele giidə *Kuli kə Pepeŋ na bə ɗe a waate sam hi bə minti poore kə teŋ ɗe a tewe duruŋ. Də hi toŋ ta, yə neke yaŋ bə ji keere wəra ciiri məna-məna keɗe.
Kaanə Ziwifiŋ de Pol
27Hiti seeɗa'iŋ bə pooreŋ a maŋ bə tewe wəra tewe ɗaw, sərdə kaanə Ziwifi gə giidə seŋka də Aziŋ asaŋ Pol giidə *Kuli kə Pepeŋa. Kəya, yə duunu, 28yə pətəŋ tarmə kaŋ apəya də kuy neete bə naakte minti: «Kaanə *Israyel, aŋ jamə tulul də are la! Hulum bə minti bə waataŋ saməŋa baymele a kaŋ keɗe daana a koŋa wəra keɗe'iŋ, bə waate kel kə bayməlaŋa cəərə *ku gili kə *Moyisiŋa, daana Kuli kə Pepeŋ gəm, wə dayna kəna ta! Wə kəlaŋ máŋ gadi giidə Kuli kə Pepeŋa də kaa gə minti teŋ paapa gə Ziwifi baŋ. Yə zodoŋ ko tó *cetcetiŋ ne wəra!» 29Yə waataŋ bədoona haa gud bə minti yə a asaŋ Pol daana Torofim bə Efesiŋ gud kumsi giidə vil daŋ. Yə ɗəkəŋ haa minti Pol kəlnu giidə Kuli kə Pepeŋa.
30Kel teŋ ɗootoŋ vil warna keɗe. Kaŋ həŋ da də taraŋ anə com a koŋ da lam daŋ keɗe'i. Yə bəŋ a de Pol anə cõõt, yə təɗtunu warda giidə Kuli kə Pepeŋ da, yə haraŋ bə gisti ku kuliŋa anə cəlam-cəlam faɗi. 31Bə minti kaŋ golde bə awe Pol wəraŋ, sərdə kaŋ kooroŋ a waate hulum boblo bə cəərə sooto kə kaanə Rom minti vil də Zeruzalem wəra keɗe paapa ɗeketi pəda. 32Wə ləwaŋ cəərə sootoŋ, də sooto gə saamaŋ hebkən-hebkəna faɗi, yə kooroŋ anə cəlam duuru sar kaŋ. Bə minti yə asaŋ hulum bobloŋ daana sootoŋ anəkay, yə yaakaŋ Pol leteŋ faɗi. 33Hulum bobloŋ zeŋ siriy na, wə vaŋ sootoŋ bə ɗe a de Pol. Wə wəətənəy minti yə dogə dər gaalay la ɓasi, yə bəŋu la duuru. Yə bəŋnu wəra baŋŋa, adoro wə əsəŋ bə mante gud Pola daana gud kel gə minti wə a jiiniy gəm. 34Səma kaa kə ablaw əsəŋ bə hare kela anə dəra'-dəra'i keɗe. Sirdi adəwaldi naakte kuy də kel neete gaalaŋ hal gəm, kaayaŋ naakte kuy də kel neeteŋ dəra gəm. Kəya hulum bobloŋ paapa bə əski gud kela wəra kaŋkaŋ kas kel té hayam-hayamiŋ bə səm moŋ, wə minti yə ɗee la a gaw giidə kuli boblo bə hərsə-hərsi də pərki kəmtəŋ bə minti paapa kir ve wəra kasi huluma baŋ na#21.34 Kumna boblo Erodi a hərsəŋ kuli tó bobloŋ anə maŋ sar Kuli kə Pepeŋa. Karmə sooto gə Rom a jəŋ bə həəti haa ada.. 35Bə minti Pol ɗeŋ a tuli cəərə ko bə malte kampaŋa bə li bə kele giidə kuliŋaŋ, sootoŋ həənu máŋ he apəya, kas kaa gə minti golde bə bi a daw kəəsi də waŋ. 36Gud maa mo kaa kə ablaw kooroŋ guudi na lam faɗi bə naakte kuy na minti: «Əwu la wəra awe! Əwu la wəra awe!»
Pol waate kel gə cəərə kusruŋ wəra
37Bə minti yə bə kele duuru aləwaŋ, Pol waataŋ hulum boblo bə cəərə sootoŋ minti: «Tam yaakan yaŋ nuutu bə waatam kela mo?» Hulum bobloŋ hərnu kel minti: «Ha! Ku Gerekiŋ doloy də dərəm? 38Hulum bə Eziptə bə minti vaŋ kaŋ deegŋ-deegŋ kəna cəərə kumsiŋ daana wə kooroŋ də bandi guudu anə guɓ-guɓi waaɗe giidə ful, doloy paapa tam bə mo?» 39Pol hərnu kel minti: «Paapa. Ten ha'aŋ, ten hulum bə Ziwifi, ten bəŋ Tarsə da giidə seŋka də Silisiŋ da. Vil taŋ a paapa də lentə-lente ba; a wəra də sama bəy gəm. Ten jəənəm kamkam, tam yaakan yaŋ bə waate kela a kaŋ mo?» 40Hulum bobloŋ yəəkunu nuutu ta. Pol apəya gil a ko bə malte kampaŋa, wə haŋ kəəsu apəya minti kaŋ zenə la kəm mo. Kəya kaŋ zeneŋ seɗem-ɗem faɗi. Wə əsəŋ bə wəətəy kela də ku Hebere.
Currently Selected:
JOŊRE 21: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.