JOŊRE 19
19
Pol giidə vil də Efesiŋa
1Bə minti Apolo giidə vil də Koreŋtəŋaŋ, Pol cakɗaŋ seŋka də minti aŋ falte pərkiŋ ada giidə Azi Cəncəŋa, wə ɗeŋ a tuli Efesi. A ko toŋa ta, wə fəlaŋ sərdə kaa kə doo-de ada. 2Wə əsəŋ bə lay kuya minti: «Bə minti aŋ doŋ wəra doŋ, Tiiru Cetcetaŋ bəŋ ne nuutu cəərəŋa mo?» Yə hərnu kel minti: «Paapa, are əskəŋ hõy minti Tiiru Cetcetaŋ kəman yaŋ kəna ba anə gadi ɗaw.» 3Pol haraŋ bə lay kuya pa minti: «Yə jəənəŋ haa batem muntu mo?» Kaŋ hərnu kel minti: «Yə jəŋ a are ha'aŋ, batem bə minti Zaŋ Batisi a bə wəətu səmu wəra a kaŋ.» 4Pol haraŋ bə hərəy kela pa minti: «Kə Zaŋ ha'aŋ, wə jəŋ batem haa a kaa gə minti a *koloŋ kirki a baymele neeteŋ təwa. Səma wə waataŋ kaanə *Israyel minti: ‹Aŋ doo la gud hulum bə minti bə bi yaŋ ador dənaŋ.› Hulum toŋ, haa Yeesu faɗi.» 5Adordə minti kaŋ əskəŋ kel teŋ kəyaŋ, yə jiiniy batem wəra də sam Barkaŋ Yeesu. 6Kəya Pol məlnəy kasi wəra ciiri, Tiiru Cetcetaŋ bəŋ ciiri faɗi gəm. Yə əsəŋ bə waate ku gidiirə kaa gə minti kaŋ iskiniy hõy baŋ, yə waataŋ haa kel gə minti bəŋ ku Pepeŋ daŋ gadi faɗi. 7Kaa gə minti bə ji kel teŋa ha'aŋ, yə aŋke wəra kampar hor ciiri ɓasi.
8Pol jəŋ kitir soope bə ɗeete giidə *kuli bə toose kə kaanə Ziwifiŋa. Wə waatətaŋ kel wəra ada anə kaŋkaŋ cəərə *Kumna bə minti Pepeŋ bə jəw yaŋ. Wə jəŋ wəra anə keɗe-keɗe kir minti kaŋ kolə ɗiki di la gud kel kə tóŋa, yə doo la guudi. 9Səma kaa ablaw ɗempa a de haa bə yaake ɗiki di bə kole ba, yə ŋeleŋ wəra də kel teŋ. Yə əsəŋ bə sarte kəkəy bə minti Pepeŋ a gəənu bə fele seereŋ; yə sərtunu tiinə kaa gə minti a təpaŋ ciiri gilaŋ keɗe. Gud teŋa ta, Pol haŋ giidu wəra siri. Wə jəmaŋ kaa kə doo-deŋ wəra dəra'i. Dər hitiŋa saksaki, wə bə hətəya giidə kuli bə minti Tiranosi a bə hate kaŋa adaŋ. 10Pol laataŋ bə hate a ko toŋa ɓasi. Bədoona ta, kaa gə minti də kuliŋ giidə seŋka də Aziŋa, kaanə Ziwifiŋ də kaa gə minti paapa gə Ziwifi baŋ keɗe, əskəŋ kel gə minti yə bə waate wəra cəərə Barkaŋaŋ.
11Pepeŋ jəŋ joŋre də Pol bə jəəti kar gə məɗ-miɗiŋa gə minti ŋəltəŋ kaŋ ablaw, 12hãã kaŋ koloŋ bə ɗeete a humti dəməəmə bə sete dər Pol, kumundu ba beɗbeɗi də dəməəmə də minti wə a ɗootonaŋ, bə ɗe a malta sar kaa kə ɗemeŋa. Kəya kaa teŋ seere wəra faɗi daana a jəəne kəwal moŋ, yə pi wəra cəərə hulum toŋa faɗi pa. 13Kəya sərdə gə Ziwifi gə minti bə gəryi koŋa bə pəəti kəwala wəra cəərə kaŋaŋ, gostoŋ bə ji joŋre neeteŋa də sam Barkaŋ Yeesu gəm. Yə fəlaŋ hulum ne də kəwal cuuruŋ, yə waate kəwal minti: «Ten waataŋ, də sam Yeesu bə minti Pol caw bə wəətu səmuŋ, aŋ pəə la wəra!»
14Hulum kəman, səmu minti Sekeva, wə kumna kə *kaa kə keere Pepeŋ kə kaanə Ziwifiŋ. Kərmuyu seeɗa əsəŋ bə jəəti kel teŋa bədoona gəm. 15Səma, jəŋ hõy məna, kəwal hərnəy kel minti: «Yeesu, ha'aŋ, toŋ də dərən. Ten asaŋ Pol nuutu gəm. Aŋ ha'aŋa, aŋ anə mindi gəm tə mo?» 16Kəya hulum bə minti kəwal cuuruŋ wəətənəy kel teŋ waata kəyaŋ, wə gədtənəy anə tip-tip faɗi, wə gəynəy wəra anə təkaɓi. Wə jiiniy wəra kaŋkaw hãã bə minti yə koloŋ bə gadte warda giidə kuliŋ da, dəməəmə də siriŋ wəra máŋ də caartə-caarte hẽẽt-hẽẽt, kusri wəra bə latə-lete tiliɓ-tiliɓ də toso. 17Kaanə Ziwifiŋ, də kaa gə minti paapa gə Ziwifi baŋ keɗe gə minti giidə vil də Efesiŋa, əskəŋ kel gə minti jəŋ kəmar teŋ wəraŋ. Kəya walka jəmnəy wəra ablaw, yə əsəŋ bə tokɗe sam Barkaŋ Yeesu, minti wə haa sam boblo ŋaanaanə mo. 18Sərdə kaa ablaw gə minti doŋ wəra gud Yeesuŋ, bəŋ a ke gud baymele neete bə minti yə a jəŋ bə jəwa wəra anə pəɗaki laki tiinə kaa kə Tapiŋa. 19Kaa ablaw gə minti a jəŋ bə jəəti zalaŋ humtuŋ kefter bə zal neeteŋ warda. Yə bəŋ a muulu wəra cəərə kumsu anə ɓiw gil, yə du'unu wəra dər kaŋ bə gole keɗe. Gusi bə kefter toŋ kir karmə soloy guɓ-guɓi hor wiiɗiw#19.19 Karmə soloy guɓ-guɓi hor wiiɗiw ha'aŋ, yə gəga də soloy 20,000,000 CFA.. 20Bədoona ana, kel kə Barkaŋ duusuŋ wəra pisi duusa, daana yə koloŋ də səɓaki gud səɓaki də minti Barkaŋ bə aya ada dər kel nuutuŋaŋ.
21Adordə kel teŋa, Tiiru Cetcetaŋ məlaŋ ɗiki də Pol minti wə ɗee la Zeruzalem, wə kalə la giidə seŋka də Masedəwana daana nayta də Akay na gəm. Pol minti: «Ten bə jəŋ də ne a ko toŋ da jəŋ, ten kir koore Rom gəm.» 22Kəya, wə vaŋ kaa ɓasi Masedəwan na, haa anə Timote daana Erasti gə minti bə kəyu a joŋreŋaŋ. Wə yaakaŋ kəm bə ji hiti ada maki giidə seŋka də Aziŋa.
Kaanə Efesiŋ kole waŋ cəərə kel kə Pepeŋa
23Dər ko tó bə minti Pol kəm giidə seŋka də Aziŋaŋ, kel kəmtəŋ əsəŋ bə awe gud hate bə cəərə kəkəy bə minti Pepeŋ a gəənu bə fele seereŋ. 24Gud maa mo, hulum kəman a jəŋ giidə vil taŋa, səmu minti Demetriyusi, wə haa hulum bə yoorte kooso bə soloy. Wə yoorte karmə kuli bə minti haŋ kuli kə pepe tooka Artemisi neeteŋ. Kaa kə hel gə ji joŋre bə karmə kuli toŋ, yə fele soloy duuru ablaw. 25Dəyaŋ hõy, wə mantaŋ kaa kə joŋre nuutuŋ, də kaa kaayaŋ gə ji sar joŋre toŋ warda keɗe. Yə taaraŋ wəra taaraŋ, wə wəətənəy minti: «Gədaarənti, aŋ wəra gə asə-ase minti áŋ fele haa də joŋre náŋ toŋ kəya faɗi. 26Ana hebkəna ha'aŋ, aŋ bə ase kel gə minti Pol toŋ bə jiyaŋ, aŋ bə iskiya gəm. Wə bə waate kaŋa wəra minti, karmə foto də pepe bə minti kaa ɗəmpuŋ, teŋ paapa Pep bə gəəzi ba. Hebkəna ha'aŋ, wə bə kole ɗiki də kaŋa wəra bə de haa guudu bədoona, paapa kəna Efesi təwa ba, səma wəra maŋ giidə seŋka də Aziŋa keɗe. 27Kel teŋ bə jəəne bə raawe na bədoona anə hoŋ, joŋre náŋ bə ɗe a ɓalke wəra. Səma yə ɓalke paapa joŋre náŋ təwa ba. Kuli boblo kə Artemisi də kusru pi kəfaŋ wəra dər kaŋa faɗi, kaŋ bə ɗiki minti Artemisiŋ paapa mooto pəda. Anaaŋa, giidə seŋka də Aziŋa wəra kəna, daana wəra a koŋa keɗeŋ, kaŋ ke awalna ha'aŋ a nəənə faɗi.»
28Bə minti kaŋ əskəŋ kel teŋ kəyaŋ, yə hoptoŋ wəra anə je'-je'i də waŋ. Yə əsəŋ bə naakte kuya, bə dogte kel teŋa anə hoŋ minti: «Artemisi də Efesiŋ saksaki mooto! Artemisi də Efesiŋ saksaki mooto!» 29Kəya kel teŋ caŋ warna sar kaa kə ablaw na giidə vil na faɗi. Kaa kə ablaw haŋ kəkəy anə dimbil-dimbil bə ɗe a ko bə minti yə tapte ciiri adaŋ. Yə fəlaŋ anə Gayusi də Aristarkə kəyaŋ, yə humnuy kəəsi anə tor bə ɗe warna diiri ada na. Kaa té ɓasiŋ haa kaanə Masedəwan gə minti bə gəryi daana Pol keɗe. 30Pol a ɗəkəŋ haa minti tó koore kəm bə ɗe a tope bəlam də kel a kaa kə ablaw, səma kaa kə doo-deŋ həənu ku wəra. 31Sərdə kəkamnaŋ gə giidə seŋka də Aziŋ, gədaarə Pol, əynu mini na minti té juunu kamkam, wə a ɗe sar kaŋ na a ko bə tepe cə neete toŋ na ba.
32Kaa kə ablaw gə minti a təpaŋ ciiri gilaŋ nuutu bə naakte kuya. Səma, mindi mindi mo naakte ku haa də kel gaalaŋ dəra gəm, kaŋ nuutu gə lentə-lente ba anə bəlnəy laki. Daŋge diŋ nuutu laki bay ase gud kel gə minti té təpaŋ ciiriŋ. 33Sərdə kaa adəwaldə kaa kə ablawa topoŋ gud kel gə minti bə jiŋ a Aleksandərə. Wə haa hulum bə minti kəsəənu gə Ziwifi a duunu tiini bə hərəy kel neeteŋ. Tó Aleksandərə faŋ kəyaŋ, wə haŋ kəəsu apəya, wə vilwiniy anəkayya bə zene kaŋ. Wə a bəlaŋ waate kaŋ minti kaanə Ziwifiŋ jəŋ kel teŋ paapa té ba. 34Səma kaŋ bə asaŋ kəya minti wə bə Ziwifiŋ, yə haraŋ bə naakte kuya neŋneŋ keɗe hãã kampar lera ɓasi də kel məna'iŋ minti: «Artemisi də Efesiŋ saksaki mooto!»
35Ɗeŋ a deye kəyaŋ, hulum bə jeerte kel gə giidə vil zeneŋ kaŋ nuutu ta. Wə wəətənəy minti: «Hayya, aŋ gə Efesiŋ! Aŋ wəra gə asə-ase minti vil náŋ ta'i kəna, a bə ame cəərə kuli kə pepe náŋ Artemisi mooto daana cəərə foto naata bə minti awaŋ apəy daŋ, də jəə-ji də pərki, kaŋ bə kaw awalna. Hulum yaŋ caw bay ase kel teŋ mo? Kaŋ wəra gə asə-ase kel teŋ keɗe. 36Hulum neke bə ce awəy də kel teŋ bə tə kəm, aŋ doo ku tarməyaŋ la, aŋ a ji kel anə faɗi bay ɗiki ba. 37Aŋ gosə gole la kəm mo. Aŋ humuŋ kaa teŋ laki daŋ, yə haŋ karman dəgaaya giidə kuli kə Artemisi náŋa bə gəm, yə sartəna sama bə gəm. Aŋ bə humnuy da ha'aŋ səm mo? 38Jəəne minti Demetriyusi də kaa kə joŋre nuutuŋ koloŋ gəbaŋ ne də hulum, yə kir ɗe duuru a kəətiŋ haa té. Hiti bə kəəti yaŋ, kaa kə jeme kəəti də kel teŋ yaŋ gəm. 39Jəəne minti kel gə minti ten waatənaŋ dəŋ seepeneŋ baŋ, kaa kəmtəŋ gə giidə vil, gə minti ku giliŋ də diriŋ tepe yaŋ ciiri bə guluy diri. 40Gud maa mo, kaanə Rom bə ŋe kel yaŋ dayna kəna a áŋ ta minti áŋ haa máŋ bə golde kumnaŋa gud bə minti áŋ bə ge gəbaŋa giidə vila. Yə bə bəŋ ne sar áŋa bə bi a le ku áŋ minti áŋ taaraŋ bədoona kír gilaŋ səm moŋ, áŋ bə hərəy kel minti harmə mo?» [ 41Adordə kel teŋa kəyaŋ, wə waataŋ kaa minti yə meerə la wəra.]
Currently Selected:
JOŊRE 19: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.