LUKAS 15

Dàɗkì yi ɓyom ɓi ɓi ɗimgà ɓɛ ki ghɛɛ̀di ɓyɔ

(Mt. 18:12-14)

1Ɓɛ̀terì-làmpoŋ̀ rì ɓɛ̀kìì-kìɓe ɓɛm̀bog ɓɛ ǹ-yùlàg ɓɛ̀sɛ̀ɛ̀ ɓɛ̀cèm yɛ̀ɛ Yeesus, lɛ ɓɛɛ wowog ɓìtòkì ɓii. 2Fɔɔnnɛ Ɓɛ̀fàrìzyɛŋ rì ɓɛ̀rèsàg-ɓìdɔ̀gsɛna ɓɛ ŋwɔŋwɔ̀ŋìghà di ɓɛɛ̀ kpaakpaa lɛ: Ŋwaànɛ a ghàghaɓ ɓiɓeɓtàg ɓi ɓum lɛ syeesyee, à ki ɗiɗi nɗaŋ ɗi ɓɔ.

3Fɔɔnnɛ Yeesus à tekà ɓɔ dàɗkì ìnɛ. 4Ghɛn anɛ ɓi mìni yɛɛ ri lɛ à kì lɛ, i à rì rì jɔ̀ɔ̀ yii mɛtin mɛtaǹ, nni bog ì ɗimi, kɛ̀ɛ càɗ yi yi rɔɓi mɛ̀tin mɛnin rì ǹtɛ̀ɗ rì taànìn ɓi-reɓ à kɛ̀n kì kaà kìbog ki kaa ɗimi à kpaŋ yɛ̀ɛ à rì kɔ ɓiì ghɛɛ̀? 5I à mɛ tanɛn yɔ̀, à saàgh yɔ̀ ɓi ɓìlaŋ rì coo kinyàà, 6i à kpaŋi a mɛɛ mii, à taŋzɛ̀n lɛ rì ɓɛ̀reŋkàŋ ɓii, rì ɓɛ̀ba-gòŋzɛn ɓii à kpaa ɓɔ lɛ: Ti nyààrɛɛna ǹɗaŋ ɓisuulɛ màa ghɛɛ̀dii tì jɔ̀ɔ̀ yɛ̀m ìnɛ ìi nɗimi. 7Ǹkalii mìni lɛ, kìnyàà ki ɓiì ɓaà girig fɔlɔɔ aɗyòò, di ǹkìì-kìɓe bogtɛ̀n à lɔ̀ɔ̀ghrɛɛ ǹɗem, ki cee ki ki ri ɓisuu ɓum mɛ̀tin mɛnin rì ǹtɛ̀ɗ rì taànìn, ɓɛ ɓɛ ri lɛ saaɗ, ɓɛ ki ghɛɓsii ɓi com lɛ ɓɛɛ lɔɔ̀ghrɛn tì mɛ̀rem.

8Nsoò lɛ i giɓ adɛŋ à rì rì dolà ǹtɛ̀ɗ, nni dolà bog ì ɗimi, àa ròòsi ɓi nya lamɓà à fyɛn naa, à konàg kì kaà dolà ìnɛn à kpaŋ yɛ̀ɛ à rì yɔ̀ ɓiì ghɛɛ̀? 9I à mɛ ghɛn yɔ̀, à reŋì lɛ, rì ɓɛ̀reŋkàŋ ɓii, rì ɓɛ̀yiɓ ɓɛ à rì jàŋbog rì ɓɔ, à kpaa ɓɔ lɛ: Ti nyààrɛɛna ǹɗaŋ lɛ maa ghɛɛdii mɔ̀ɔ̀ni mɛ̀m mɛ mɛ nɗimi. 10Ǹkalii mìni lɛ, kìnyàà ki ri girig fɔlɔɔ ɓi nyìinyìm à ɓumɓɛ titom ɓɛ Bɛ̀ll, ɓisuu ǹkìì-kìɓe bog ànɛ à lɔ̀ɔ̀ghrɛɛ ǹɗem.

Man ànɛ à kɛ̀ngà kì yogsaagh ikum

11Yeesus à teetì ɓɔ dàɗkì lɛ: Ŋwaàdɛŋ yɛɛ ɓaghà ɓɔn ɓɛ ɓɛbaŋì ɓɛɓɛɛ̀. 12Nni roàsiitòn à kpaaghà seŋi lɛ: Tààta, faa mɛ̀ gàɓ yɛ̀m ì ìkum. Fɔɔnnɛ Seŋi à kàɓsìghà ɓɔ ìkum wii. 13Yɛ̀ɛ ɓɔɔ mɛru ɓɛ ghaghìghà, roàsiitòn anɛ̀n à ɓadɛ̀n ɓyom ɓii ɓìcèm, à kwèɗ ɓi kìlɔ̀ŋ ki fìràɓ, à yogsàg ìkum wii wɔɔ ɓi cɛɓ ki kòòkoo. 14Yɛ̀ɛ à lègsìghà kì yogsaagh ikum wii, fɔɔnnɛ coo zày ki kpighà ɓi kìlɔ̀ŋ kiǹ, kɛ̀ɛ ɓa ti ri com ki lɛ à ghɛɓ miì. 15Nni à kɛ̀ngà kì ɗiŋii kisày yɛ̀ɛ ŋwaàdɛŋ ànɛ ɓi kìlɔ̀ŋ kiǹ; roànɛ̀n à rom nyi lɛ a kɛǹ nyi kì ɓèŋi jèè a dɛm. 16À ɓaghà rì zày ìnɛ lɛ di àa ɗii ɓyom ɓi jèè yi ǹti yi ɗilàg, wɔ̀lɛ ŋwaànɛ lɛ a fa nyi ɓyɔ kɛ̀ɛ ɓa. 17Nni yɛ̀ɛ à sugtìghà ɓi nyimiɗ, fɔɔnnɛ à kpaaghà lɛ: Ɓum ɓɛ̀cèm ɓɛ ɓɛɛ̀ sasay seŋi wɛ̀m ɓɛ ri rì ɓìɗilàg lɛɛ̀gwey, mɛ̀ ǹ-yù kì wuwii zày fɛ. 18M̀ɓiì pɛ̀sɛɛ, ǹsugtì yɛ̀ɛ Tààta wɛ̀m, ǹkpaa nyi lɛ: Tààta! Ǹkìghà kìɓe ɓi san ànɛ yɛ̀ɛ Bɛ̀ll rì ɓi san ànɛ à lɔ̀ŋkɔɔ, 19fɔɔnnɛ ki ghɛɛ̀sɛɛ tì ɓi lɛ, ɓɛɛ reŋi tì mɛ̀ lɛ man wɔɔ̀, tera mɛ̀ lɔŋ yɛ̀ɛ kìbog ki ɓi ɓɛ̀kìì-ɓìsay ɓɔɔ. 20Fɔɔnnɛ à pɛ̀sɛ̀ngà à kɛ̀n yɛ̀ɛ seŋi. Yɛ̀ɛ à ɓaghà di à kakay fìràɓ, nni seŋi à ghɛngày nyi, à tuɓì rì mɛ̀ree, à kɛ̀n nyi kì siighrɛɛ ɓi nyoo, à lɔ̀ɛ̀ɗ nyi. 21Man à kpaa nyi lɛ: Tààta, ǹkìghà kìɓe ɓi san ànɛ yɛ̀ɛ Bɛ̀ll rì ɓi san ànɛ a lɔ̀ŋkɔɔ, nni ki ghɛɛ̀sɛɛ tì ɓi lɛ ɓɛɛ reŋi tì mɛ̀ lɛ man wɔɔ̀. 22Nsoò fɔlɔɔ seŋi à kpaaghà ɓɛ̀kìì-ɓìsay ɓii lɛ: Terinas̀ mɛ̀ kìlàà ki ki ɓiisɛɛ kì rɔɔtɛɛ lɛ fyɛ̀ɗ, ɓi fa nyi a waàtɛn; à kpaa tì ɓɔ lɛ. Waasiina nyi bɔŋ ɓi manàcàg, ɓì waasì tì nyi ɓɛ̀siripàs ɓi mɛ̀kòò. 23Ɓi yuiy rì kìɓwɛɗ ki sanìnya ki ki ri kìfɔmɛn, ɓi wey kɔ, ti ɗi di ti nyàànyàà. 24Ɓisuulɛ man wɛm̀ ànɛ à wughà nni à ghèmɓɛɛ, man ànɛ à ɗimgà nni tì ghɛɛdii nyi. 25Fɔlɔɔ a ɓaa, di dɛlì ì ŋwaànɛ̀n ì ǹtonto ì kakas̀ a dɛm. Nni yɛ̀ɛ ì susùkày di ì ti ɓiì kpaŋì a mɛɛ, nni ì wokày lɛ rì gom ì ɓyom ɓi ɓoɓoghɛn, rì mɛ̀dɛlì. 26Fɔɔnnɛ à reŋìghà ǹkìì-kìsay a seŋi àdɛŋ, à tɔg nyi ɓisuucɛ nnɛ gom ìrì a mɛɛ mɛ seŋi? 27Ǹkìì-kìsay a ɓàg dɛlì ìnɛn lɛ: Goni à sughii, nni Soŋi à woli man à sanìnya à ǹfɔmɛn ɓisuu man, lɛ à kpaŋdii nyi ɓi ɓyàg di à rì lɛ syeesyee ɓi nyòò. 28Nni dɛlì ìnɛ̀n ì wokà bim, ì ɓèn kì ɗiŋii ɓi naa, seŋi à kpaŋ yì nyi kì ɓɔ̀ŋzaagh lɛ a ɗiŋi ɓi naa. 29Man ànɛ̀n à kpaa min seŋi lɛ: Ghɛna! Bèg gɛɛ̀nɛ kɛ̀ɛ bàlì yɛ̀ɛ maà sasày wɔ̀, kɛ̀ɛ nsɛɛti wɔ nsoò ŋwos bog, nni ù ka faghà ɓi mɛ nsoò bwiy lɛ ǹɗi rì ɓɛ̀reŋkàŋ ɓɛm, di ti nyàànyàà. 30Kìɓan kifog, yɛ̀ɛ man wɔɔ̀ ànɛ̀n àa sughii nyaànɛ à yogsaghiì ìkum wɔɔ ri ɓɛ̀yiɓ, ɓɛ riɓàmɓà, ù teɗ man à sanìnya ànɛ à rì ǹfɔmɛn, ù wey nyi. 31Seŋi à kpaa nyi lɛ: Man wɛm̀, wɔ̀ɔ̀ rì mɛ̀ jàŋbog ɓyààmɛ̀n ɓìcèm fɔɔnnɛ com kìcèm ki wooghrɛɛ rì wɔ̀. 32Kìɓan kifog, kaa ghɛ̀ɛ̀sɛɛ lɔŋ lɛ, ti nyaàrɛn, ɓisuulɛ goni ànɛ̀n à wughà nni à sugtii yì ɓi cɛɓ, à ɗimgà, nni tì ghɛɛdii nyi.

Attualmente Selezionati:

LUKAS 15: BAFNT

Evidenziazioni

Copia