LUKAS 14

Yeesus à wɔ̀ɔ̀zii mum ŋwosi Saɓàt

1Ŋwosi Saɓàt, Yeesus à ɗiŋìghà ɓi naa ì rìfòm ɗi Ɓɛ̀fàrìzyɛŋ, ɗidɛŋ, lɛ a ɗi ɓìɗilàg. 2Fɔɔnnɛ ɓumɓɛ ɓɛ ɓaghà wɔɔ ɓɛ fifìɓìghà Yeesus lɛ syeesyee; ŋwaàdɛŋ ànɛ à roròɓkà fìroɓ fi mìkakɛn mɛkòò, à rɛrɛ̀lìghà nyi asu. 3Nni Yeesus à tumɛ̀ngà ɓìtòkì, à tɔg ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ lɛ: Ɓìdɔ̀gsɛna ɓi kpaa nya lɛ, ɓɛ ri lɛ ɓɛ wɔɔ̀zì mum ŋwosi Saɓàt gìn ɓɛ yin lɛ ɓɛ wɔɔ̀zì? 4Ɓumɓɛ̀n ɓɛ minɛ̀n nyi. Fɔɔnnɛ à tekà roròɓ ànɛ̀n, à wɔ̀ɔ̀zì nyi à kpaa nyi lɛ a sug. 5Nni à kpaaghà min ɓumɓɛ̀n lɛ: Ghɛn anɛ ɓi mìni yɛɛ ri lɛ à kì lɛ, i man wiì nsoò lɛ sanìnya wìì a kpìi ɓi rìɓee ŋwosi Saɓàt, à rɔ̀ɓ kɛ̀ɛ rùnɛn lɛ a sɔŋi nyi lɔŋ wɔɔ foo? 6Ɓumɓɛ̀n ɓɛ ghɛngà ɓi ŋwɔm wu ɓàghɛn nyi ǹtɔɔ̀tɔɔgh wiǹ.

Kɛ̀ ɓi ɓɔ̀ngi mɛkɔ̀ɔ̀ mɛ asu a ɓìsɛ̀nɛ̀

7Yɛ̀ɛ Yeesus à seesèèghà di ɓum ɓɛɛ̀ ɓɔ̀nɓɔn mɛkɔ̀ɔ̀ mɛ syeesyee, nni à tekà ɓɔ dàɗkì ìdɛŋ à kpaa lɛ: 8I mum à reŋii wɔ̀ a kìsɛ̀nɛ̀ ki riwɛy, kɔ̀ɔ kɛ̀n ki kɔ̀rii ɓi-kɔ̀ɔ̀ wu asu, lɛ ŋwaàdɛŋ ànɛ à cee wɔ̀ ɓi nkoŋ a rì lɛ à ɓa girig ǹɗeŋiyɛn a kìsɛ̀nɛ̀ kiǹ; 9ɓi lèg ànɛ lɛ, ŋwaànɛ à reŋii mìniìcèm à rì lɛ à yù wɔ̀ kì kpaà lɛ, u nɛm ŋwaàmbog ànɛ̀n ìkɔ̀ɔ̀, fɔɔnnɛ ǹto wu ri wɔ̀ ɓiì rìri ɓi rìkɛ̀n ɗi ù rì ɓiì kɛ̀ɛ ki kɔ̀rii ɓi-kɔ̀ɔ̀ wu ajɛ̀m. 10Nni kìlag lɛ i mum à reŋii wɔ̀ ɓi kìsɛ̀nɛ̀ ù kɛ̀n kì kɔ̀rii ɓi-kɔ̀ɔ̀ wu ajɛ̀m di fɔlɔɔ nnɛ ŋwaànɛ à reŋii wɔ̀ a ki lɛ, i à yùu yì, à kpaa wɔ̀ lɛ, Ceeya kì kɔ̀rii fɛlɛnii asu. Rìkì ɗiǹ ɗi ri wɔ̀ ɓiì faà rìmum ɓi mis mɛ ɓum ɓɛ̀cèm ɓɛ ɓɛ ri a kìsɛ̀nɛ̀ kiǹ. 11Mum ǹcèm ànɛ à ɓiì ɓɔgsii nyimiɗ innɛ ɓɛɛ ɓiì sɛɛ̀dii, wɔ̀lɛ roànɛ à rì ɓiì sɛɛ̀dii nyimiɗ ɓi zi, innɛ ɓɛ ri ɓiì ɓɔgsii.

12Fɔɔnnɛ Yeesus à kpaaghà girig ŋwaànɛ à reŋìghà nyi a mɛɛ mii lɛ: I ù rì ɓi kìsɛ̀nɛ nsoò rì ŋwos, nsoò cɛŋkò, kɔ̀ɔ reŋɗɛn lɛ rì ɓɛ̀reŋkàŋ ɓɔɔ rì ɓɛ̀geni ɓɔɔ, nsoò boo yɔ̀ɔ̀ i ɓum, nsoò ɓɛ̀ba-gòŋzɛn ɓɔɔ, ɓɛ ɓɛ ri rì ìkum ɓisuulɛ ɓɔ girig ɓɛ ri lɛ ɓɛ reŋì wɔ̀ a lɔ̀ŋkaa, ɓɛ leɓ wɔ̀ ɓìɗilàg ɓi ù faghà ɓɔ. 13Kìlag lɔŋ lɛ, i ù rì ɓi kìsɛ̀nɛ̀, ù reŋɗɛ̀n lɛ rì ɓɛ̀soghàsogha rì ɓìwɔ̀g rì ɓɛ̀lɛnlɛm, rì ɓɛ̀ɗyaŋɗyàŋ. 14Fɔɔnnɛ ù rì ɓiì ɓaà rì ɓɛ̀mààgh ɓisuulɛ ɓumɓɛ̀n ɓɛ yin ɗi ìtèɗ wulɛ ɓɛ leɓ wɔ̀ rìkì ɗiǹ, fɔɔnnɛ ù teri gɛ mɛ̀lèɓ ŋwosi righèmɓɛ̀n ɗi ɓilòŋ ɗi ɓumɓɛ ɓɛ ri lɛ saaɗ.

Dàɗkì ì ɓumɓɛ ɓɛ ɓaghà ɓɛ̀reŋiyɛn a kìsɛ̀nɛ̀ kidɛŋ

(Mt. 22:1-10)

15Yɛ̀ɛ kìbog ki ɓi ɓumɓɛ ɓɛ ɗiɗìghà ɓɛǹ rì Yeesus ki wokà ɓìtòkì ɓiǹ, ki kpaa nyi lɛ: Mààgh rì roànɛ à ɗii gɛ ɓìɗilàg a kìsɛ̀nɛ̀ ki ɓi kìlɔ̀ŋ ki Bɛ̀ll. 16Nni Yeesus à ɓàkà nyi lɛ: Ŋwaàdɛŋ yɛɛ ɓaghà ɓi coo kisɛ̀nɛ̀, à ki regi ɓum lɛɛ̀gwey a kìsɛ̀nɛ̀ kiǹ. 17Yɛ̀ɛ cààmɛ̀n ki kìsɛ̀nɛ̀ ki ghɛ̀ɛ̀sɛ̀ngà kì tumɛɛ ki kpagà, nni à romgà ǹkìì-kìsay wiì lɛ a kɛǹ kì reŋii ɓumɓɛ à reŋɗɛ̀ngà, à kpaa ɓɔ lɛ: Yùunay, ɓyom ɓìcèm ɓi ti ɓì pègsɛn. 18Wɔ̀lɛ ɓumɓɛ̀n ɓɛ̀cèm ɓɛ ɓakày ǹkìì-kìsay anɛ̀n lɛ, bee inɛ ɓɔɔ yu ìnɛ̀n ì yin, roàntonto à kpaa nyi lɛ: Mɛ̀ɛ nlàagh dɛm, nni ǹghɛ̀ɛ̀sɛɛ yɔ̀ kì kɛ̀ɛ ki ghɛɛ̀, kùrùg cenɛn mɛ̀. 19Roàdɛŋ lɛ: Mɛ̀ɛ nlàagh ɓɛ̀sanìnya ǹtɛ̀ɗ, nni ǹkɛ̀ɛ lɛ nghɛǹ yɛ̀ɛ ɓɛ ri lɛ ɓɛ say, kùrùg cenɛn mɛ̀. 20Roàmbog lɛ: Mɛ̀ɛ ǹwɔlɛɛ lɔŋ ɓigomìnɛ, fɔɔnnɛ ǹ-yin ɗi bee inɛ ǹ-yù.

21Fɔlɔɔ nnɛ ǹkìì-kìsay a sugtìghà kì kpaà masà wìì ɓìɓan ɓiǹ ɓìcèm. Nni ŋwaàmɛɛ a wokà bim, à ki kpaa ǹkìì-kìsay anɛ̀n lɛ, kɛ̀na lɛ fyɛ̀ɗ, ɓi ɓìyan ɓi tyèè, rì ɓi ɓìɓàà ɓi ɓi bàn, u regiì mɛ̀ lɛ, rì ɓɛ̀soghàsogha, rì ɓìwɔ̀g, rì ɓɛ̀ɗyaŋɗyàŋ, rì ɓɛ̀lɛnlɛm, 22yɛ̀ɛ maa cààmɛ̀n à ghaghìghà, ǹkìì-kìsay anɛ̀n à sugtìì nyi kì kpaà lɛ: Tààta, ǹkìi yì fìtom fi wàa romi mɛ̀ lɛ ǹki, nni wɔ̀lɛ, mɛ̀kɔ̀ɔ̀ mɛdɛŋ mɛ kaka zɛy. 23Nni à kpaatìghà min ǹkìì-kìsay wiì lɛ: Nɔ̀ɔ̀ti lɛ rì bee yi ɓi dɛm, rì bèn yi gari yi ɓi ɓɛ̀dɛm, u tiniì ɓum ɓi-tèɗ lɛ ɓɛɛ yu kì ɗiŋii ɓi naa yɛ̀m, di fɔɔnnɛ yɛ̀ɛ roǹ. 24Fɔɔnnɛ à kpaaghà ɓɔ lɛ: Nsoò kìbog ki mum ki ɓi ɓɛ̀roɓɛ ǹlokà kì reŋii kaa ɗi ɓi com ki a kìsɛ̀nɛ̀ kɛm̀.

Ɓìɓan ɓi mum à ghɛ̀ɛ̀sɛɛ kì kìi lɛ a ɓa ǹ-yilàg à Yeesus

(Mt. 10:37-38)

25Yɛ̀ɛ ɓìtuu ɓi ɓum ɓi nɔɔ̀nɔ̀ɔ̀tìghà Yeesus, nni à lɔ̀ɔ̀ghrɛ̀ngày à kpaa ɓɔ lɛ: 26I mum à yùu a lɔ̀ŋkɛm̀, à yin lɛ à ɓa ǹ-yilàg wɛ̀m di à keesii ɓi mɛ, à cee lèg ànɛ à keesii lɛ, rì seŋì, rì jɛɛ, rì giy, rì ɓɔn ɓii, rì ɓɛ̀geni ɓii ɓɛ ɓɛ̀yiɓ rì ɓɛ ɓɛbaŋì, nsoò cɛɓ kii kɔmiɗ. 27Fɔɔnnɛ mum ǹcèm ànɛ à tɛ̀ɛgh ɓi kɔrɔs wìì, à ki nɔ̀ɔ̀ti mɛ à yin lɛ à ɓa ǹ-yilàg wɛ̀m. 28Ghɛn anɛ ɓi mìni yɛɛ ri lɛ à kì lɛ, i à ɓeegh kìtoŋ, kɛ̀ɛ ka kɔ̀ri ɓi zi lɛ a ghɛǹ bàlì ì mɔ̀ɔ̀ni ìnɛ yɛ̀ɛ kɔ̀ɔkɔnɛ̀n ɓi kìtoŋ kicèm, à ki fiɓi ǹkoò mɔ̀ɔ̀ni mɛ à rì rì mɔ mɛ ri lɛ mɛ legsì kɔ; 29ɓisuulɛ, i à ghɛ̀lɛɛ kɔ, à càɗ bee ri bee, ɓum ɓɛ̀cèm ɓɛ ɓɛ ghɛɛ kɔ fɔlɔɔ, ɓɛ ri nyi ɓiì wɔ̀wɔli, 30di ɓɛɛ̀ kpaakpaa lɛ: Ŋwaànɛ àa ǹtumɛɛ kìtoŋ, ki yag nyi rìlègsì.

31Com kìfog yɛ̀ɛ rìfòm ɗidɛŋ ɗi yin lɛ ɗi ki lɛ, i ɗyɛɛ̀ kɛ̀nkɛn ki ɗùu wɛ̀y ri ɗimbog, ɗyɛ̀ kɛɛ̀ ka kɔ̀ri ɓi zi lɛ ɗyɛɛ̀ ghɛn, ǹkòo ɗi ri lɛ ɗi kɛǹ rì ɓɛ̀sujàà ɓɛ̀tɔɔsìm ǹtɛ̀ɗ, lɛ ɗyɛɛ ɗuù rì rìfòm ɗimbog ɗi ɗi riì rì ɓɛ̀sujàà ɓɛ̀tɔɔsìm rìtin. 32I ɗi ghɛɛ lɛ ɗyaa cenɛn ɓi wɛ̀y wiǹ innɛ rìfòm ɗimbog ɗi kakas̀ fìràɓ, ɗi ɓiì romì ɓum lɛ ɓɛɛ kɛǹ kì tɔɔ̀gh rìfòm ɗiǹ com ki ɗyɛɛ̀ kɔ̀nkɔ̀n, ɓi ɗi lɛ ɓɛɛ pɛgsɛn paàzì ànɛn lɛ tɛ̀tɛ̀rɛ̀ɛ̀.

33Nni fɔɔnnɛ mum ǹcèm ànɛ ɓi mìni ànɛ à roòzɛɛ ɓi ɓyom ɓìcèm ɓi à rì rì ɓyɔ, à yin lɛ à ɓa ǹ-yilàg wɛ̀m.

34Kìkòn ki ri syeesyee à com, wɔ̀lɛ i ki soò, cɛ kidɛŋ kɛɛ̀ki ɓɛ ri lɛ ɓɛ foŋdì miì lɛ kɛɛ yɛɛ̀ti? 35Ki yiìdi ri gɛɓsɛ̀n nsoò ɓisuu zi, nsoò ɓisuu kikùnkùn; ɓɛɛ ɓiì màagh kɔ ɓi dan. Ŋwaànɛ à rì rì mɛ̀ree, mɛ lɛ à wog à ghɛ̀ɛ̀sɛɛ kì woògh.

Attualmente Selezionati:

LUKAS 14: BAFNT

Evidenziazioni

Copia