LUKAS 16

Kìɓeɓtàg ki m̀ɓèŋì-ìkum

1Yeesus à kpaatì ɓɛ̀yilàg lɛ: Guŋgum adɛŋ yɛɛ ɓaghà rì mum ànɛ àa m̀ɓègì nyi ìkum. Fɔɔnnɛ ɓɛ kpaaghà nyi lɛ, ŋwaànɛ̀n a yooyogsì nyi ìkum. 2Nni à reŋìghà ŋwaànɛ̀n, à tɔg nyi lɛ: Kìɓan ki ɓum ɓɛɛ̀ kpaakpaa ki ɓɛ raràɗ rì wɔ̀ ki ri la? Rèsi mɛ̀ yɛ̀ɛ u kɛ̀ɛkɛɛ̀sì ìkum wɛm̀ ɓisuulɛ, wàa ɓèŋdi ɓi wɔ. 3Fɔɔnnɛ m̀ɓèŋì-ìkum anɛ̀n à fèkà ɓi nɗem wii lɛ: M̀ɓiì ɓaà ɓà la yɛ̀ɛ masà wɛ̀m à kpaa lɛ mɛ̀ kɛ̀ɛ m̀ɓèŋdì ikum wii? Mɛ̀ kɛ̀ɛ̀ ìtèɗ wulɛ ǹsay dɛm, ǹki wowog ǹtoòrìɗ lɛ nlɔ̀ǹlɔn ɓum ɓyom ɓi kìɓàà. 4Ǹ-yii yɛ̀ɛ ǹɗì ɓiì kìi, lɛ ɓum ɓɛdɛŋ ɓɛɛ ghaɓ mɛ̀ lɛ syeesyee a mɛɛ maa di ɓɛ pisii mɛ̀ ɓi kìsay ki riɓèŋ ɗi ikum. 5Fɔɔnnɛ à reŋìghà ɓum ɓɛ̀cèm ɓɛ ɓɛ ɓaghà masà wìì ri ɓɛ̀pon lɛ bog bòg bog à tɔg roàntonto lɛ: Wɔ̀ɔ̀ rì masà wɛ̀m rì pon a cɛ? 6Roànɛ̀n à ɓàg lɛ: Pon wɛm̀ à rì ɓɛ̀kpɛm ɓɛ mɔɔgh mɛ̀tin mɛtaǹ. Nni à kpaaghà roànɛ̀n lɛ: Tera kaàtà à pon wɔɔ̀, u kɔri ɓi zi lɛ fyɛ̀ɗ, u kaǹ miì lɛ ɓɛ̀kpɛm ɓɛ mɔɔgh mɛ̀tin mɛɓɛɛ̀ rì ǹtɛ̀ɗ. 7Ajɛ̀m ìnɛn, à kpaa tì roàmbog lɛ: Ɓɛɛ tɔtɔg wɔ cɛ? Roànɛ̀n lɛ: Mɛ̀kùtì mɛ bààzì mɛ̀tin mɛtaǹ, nni m̀ɓèŋì-ìkum a kpaaghà nyi lɛ: Kàna ɓi kaàtà wɔ̀ɔ̀ a pon lɛ mɛ̀kùtì mɛ̀tin mɛnin. 8Masà à kìɓeɓtàg ki m̀ɓèŋì-ìkum anɛ̀n à sɛkà nyi lɛ, à kìghà kìɓan kiǹ rì ɗyomzɛ̀n lɛɛ̀gwey. Fɔlɔɔ a rèsii lɛ, ɓumɓɛ ɓi cɛɓ ki ziinɛ ɓɛ wom̀zaagh ɓi cɛɓ ki lɛ rì ɓɔ, rì ɓɛ̀ro ɓum à cee ɓumɓɛ ɓɛ ri ɓi kìtɛɛtɛn.

9Nni Yeesus à kpaatìghà lɛ: Ǹkalii mìni lɛ, kaana lɛ ɓi ɓa rì mɛ̀ghan rì ìkum wu kɛ̀ɛ̀ ǹkpaà, mɔ yɛɛ ri mìni ɓiì ghàɓi ɓi naa ì fìɗyàɓ fikɔ̀ɔ̀ di ìkum wiǹ wu yiìdi mìni ɓi càg. 10Ŋwaànɛ à ɓèŋi ɓɔɔ ɓyom ɓɛsàg lɛ syeesyee, rì ntyweeyi à ɓiì ɓèŋi ɓigwey lɛ syeesyee. Roànɛ à ɓèŋi ɓi ɓɔɔ ɓyom ɓɛsàg lɛ syeesyee, àa yi ɓi riɓèŋ ɗi gìn yi ɓyom lɛ syeesyee rì ntyweeyi. 11Nni i ɓì mɛ rɔ̀ɓ kɛ̀ ɓi yi riɓèŋ ɗi ikum wu kɛ̀ɛ̀ ǹkpaa fɛlɛ rì ǹtyweeyi, ghɛn yɛɛ ri mìni ɓiì faà kɔɔ̀kɔɔ̀ à ìkum lɛ ɓi ɓeŋ̀? 12Rì tì lɛ i ɓì rèsii lɛ ɓì yin ɓumɓɛ ɓɛ tyweeyì ɓi ɓyom ɓi ɓɛgan, ɓaa fa ɓi mini ɓiŋkin ɓi mìniì ɓɔmiɗ.

13Lɛ ǹkìì-kìsay bog à yin lɛ à say ɓɛ̀masà ɓɛɓɛɛ̀ ɓisuulɛ, à ɓiì ɓèèzɛɛ bog, à keesì roàmbog; nsoò lɛ à ràrɛ̀n rì masà bog, à naŋ àmbog. Ɓì yin ɗi ìtèɗ wulɛ ɓi say lɛ rì Bɛ̀ll rì mɔ̀ɔ̀ni cààmɛ̀n kìfog.

14Ɓɛ̀fàrìzyɛŋ ɓɛ ɓɛ ǹkeesàg mɔ̀ɔ̀ni ɓɛ wowòkà ɓìɓan ɓiǹ ɓìcèm di ɓɛɛ̀ wɔ̀wɛy Yeesus. 15Fɔɔnnɛ Yeesus à kpaaghà ɓɔ lɛ: Ɓì rì ɓumɓɛ ɓɛɛ kaakaa lɛ ɓum ɓɛdɛŋ ɓɛɛ ghɛǹ mìni lɛ ɓì rì ɓɛ̀saaɗ ɓɛ ɓum, wɔ̀lɛ Bɛ̀ll à yii mɛ̀rem min. Fɔɔnnɛ com kìcèm ki ki ri gìn i com ɓi nyìinyìm à ɓum, ki ri com ki Bɛ̀ll à ɓèèzɛɛ lɛɛ̀gwey.

16Rìrèsì ɗi ɓidɔ̀gsɛna ɓi Moyis rì ɗi ɓɛkpaŋzì-ɓìɓan ɗi kighà kìsay à kpaŋ yɛ̀ɛ Zyaŋ Bàɓtis à yùghà. Nni à tumɛ̀n ɓi cààmɛ̀n kiǹ, à kpaŋ ɓigomìnɛ, Syeesyee à Ɓɔlɛ à kìlɔ̀ŋ ki Bɛ̀ll a kaakalɛ̀n a ɓum ɓɛ̀cèm, fɔɔnnɛ mum bimiɗ a kaakaa lɛ a ɗiŋi ɓi kìlɔ̀ŋ kiǹ ɓi-tèɗ. 17Ki ri lɛ fyɛ̀ɗ lɛ, ɗyoo rì zi ɓyɛɛ silì à cee lɛ maa kìkàŋga àdɛŋ a pɛsɛn ɓi kaàtà à ɓìdɔ̀gsɛna.

18I mum à nàɓi giɓ wiì, à wɔɔtì àdɛŋ, di à kìi fìsɔ̀mɔ̀g. Nni fɔɔnnɛ ŋwaànɛ à wɔli giɓ anɛ yii à nàɓi à kìi girig fìsɔ̀mɔ̀g.

Dàɗkì ì Guŋgum a mum rì maa nyìinyìg à mum lɛ Lazaari

19Mum àdɛŋ yɛɛ ɓaghà guŋgum, à waatàg ɓìlàà ɓi syeesyee, ɓi ki ɓa ɓilàà ɓi mɔ̀ɔ̀ni; fɔɔnnɛ ŋwos anɛ aɗyoo bimiɗ, ŋwaànɛ̀n à ghɛghɛ̀ɓkà ɓi kìnyàà à ki kìki ɓyoo ɓisɛ̀nɛ̀. 20Nni maa nyìinyìg à mum lɛ Lazaari, ànɛ à ɓaghà ɓìɓɛɛ nyoo bimiɗ, àa ǹnɔ̀ŋɗàg asuunaa wu guŋgum anɛ̀n. 21À ɓaghà rì zày ìnɛ lɛ di àa ɗii nsoò bubùɓ yi yi raarààghà a teɓèrè à guŋgum anɛ̀n zi, àa lɔŋ rìɓa ɗìn ɗyɔ rì ɗyɔ, kìɓan kifog, bu yi m̀pɛ̀sàg tìì, yi yu kì lɛɛlɛɛ ɓiɓɛɛ̀ ɓii ɓiǹ. 22Nni maa nyìighnyìg à mum ànɛ̀n à wughà, ɓum ɓɛ titom ɓɛ teɗ nyi, ɓɛ kɛǹ nyi kì kɔ̀ɔ̀sii jàŋbog rì Abiraham. Yɛ̀ɛ guŋgum anɛ̀n à wughà girig, ɓɛ ɓom̀ nyi. 23Nni wɔɔ a nyɔ̀ɛ̀y nnɛ à ɓegsìghà mis, di rìkɛŋ ɗyɛɛ̀ pyènpyen nyi mis, à ghɛn yì lɔŋ Abiraham fìràɓ, ɓɛɛ̀ Lazaari ǹkɔ̀kɔriyɛn nyi ɓi ǹwɔŋì. 24Fɔɔnnɛ à nyàmgà jɛ̀ɛ̀ aɗyòò lɛ: Tààta Abiraham, wogha ɓà mɛ nyìghnyìg, u rom yì Lazaari, a nɔg yì manàcàg ɓi mɛ̀nig, a yɔɔ̀si mɛ̀ ɓi rìlemàg, di ɗyɛɛ ki yɛ̀ɛ ɗi fɔli, lɛ ǹwowog rikɛŋ lɛɛ̀gwey ɓi ɗuu ɗì. 25Nni Abiraham à ɓàkà nyi lɛ: Man wɛm̀, yiti cààmɛ̀n ki ù wowòkà gàɓ yɔ̀ɔ̀ i kìrɔɔ di ù kaka ɓi cɛɓ, Lazaari nyii wowòkà mɛ̀tɔɓ; nni ɓi cààmɛ̀n ki, nyii ti ɓiì fɔɔfɔɔ̀sɛ̀n fɛ, wɔ̀ɔ̀ wowòg rìkɛŋ. 26Ɓi kiŋcèm, coo bɛŋ ì rì ɓi nyìinyìm ànɛ lɛ, rì ɓìsi rì mìni, lɛ di ɓumɓɛ fɛ a lɔ̀ŋkis ɓɛ ɓɛ kɔni lɛ ɓɛɛ yu foo, nsoò ɓɛ foo a lɔ̀ŋkin ɓɛ ɓɛ kɔni lɛ ɓɛɛ yu fɛ a lɔ̀ŋkis, ɓɛ̀ kɛɛ̀ ɓa ri bee inɛ ɓɛɛ syaayì. 27Nni guŋgum anɛ̀n à kpaghà lɛ: Tààta Abiraham m̀ɓɔ̀ŋzaagh min wɔ lɛ, u rom̀ Lazaari ɓi naa yɛ̀m ì ɓum, lɛ ǹɗì rì ɓɛ̀geni ɓɛ ɓɛbaŋì ɓɛtaǹ. 28A kɛǹ ɓɔ kìwogsii ɓiɓan ɓi, di ɓɛ̀ kɛɛ̀ yù girig ɓi jàŋ i rìkɛŋ ìnɛ mɛ̀ ǹɗi miì ìnɛ. 29Abiraham à ɓàg lɛ: Ɓɛ̀goni ɓɛ ri lɛ, ɓɔ rì ɓìdɔ̀gsɛna ɓi Moyis, ɓɔ rì ɓɛ̀kaàtà ɓɛ ɓɛkpaŋzì-ɓiɓan, ɓɛ ghɛɛ̀sɛɛ kì woògh ɓìɓan ɓi ɓɛɛ̀ kpaakpàà. 30Fɔɔnnɛ guŋgum a kpaatìghà lɛ: Tààta Abiraham: Èe èe! Lɔŋ i mum à pɛ̀sɛɛ fɛ a nyɔ̀ɛ̀y à kɛ̀n a lɔ̀ŋkaa, fɔɔnnɛ ɓɛ ri ɓiì lɔ̀ɔ̀ghrɛɛ mɛrèm. 31Abiraham à ɓàgtì nyi lɛ: I ɓɛ̀goni ɓɛ yin lɛ ɓɛ wog rìrèsì ɗi Moyis rì ɗi ɓɛkpaŋzì-ɓìɓan, nsoò mum àa ghèmɓɛɛ yì fɛ a nyɔ̀ɛ̀y, à kɛ̀n ɓɔ kì kpaà kìɓan, ɓaa gherɛn ɓi.

Attualmente Selezionati:

LUKAS 16: BAFNT

Evidenziazioni

Copia