Mark 15
15
1N‘ ubwa, elěngiaha, ka prist iněně ja ha ehoka na batodu na balěndi na njamba yěhěpi, ka bâ‐ba kata Jisus, ka bâ‐ba ’la ka vě Mâ o Pailat a jadi. 2Ka Pailat a uwa Mâ, na, Âvě nd‘ Upolo mua Jiu‐e? Ka mâ‐a yavwana ka Mâ‐a vâ, na, O vâki yâ. 3Ka prist ěněně ba bakidě Mâ belombo beitě; ndi A timbwanaka elombo. 4Ka Pailat a uwa pě Mâ, na, Wa yavwanaka ’lombo? yěněkěte, belombo beitě ibeabu be pakwakě opěl‘ âvě. 5Ndi Jisus a timbwanaka pě elombo, ovaně nd‘ o Pailat a mamakidi.
6Nandi o isango tědině a ma hulakidi bâ mbwedi pâkâ eabu e jombaka yěhěpi. 7Nd‘ omě o diyakindi n‘ umbâkâ a ma tubakwě na Barabas, a diyakidi katwěngo na ba logwakidi na ju, ba diyakidi ba weyana n‘ ulogo. 8Ka ebumbu ya yama nangudi, e ka yalakě o jomba mâ na a hake ka mâ‐a hakě bâ mběmbě. 9Ka Pailat a yavwana na bâ, na, O vahakandi ’mba ni mbi hulakidi ’nyěni Upolo mua Jiu‐e? 10Ikabojana a diyakite yowěngo na prist iněně ba věki Mâ n‘ ivina. 11Ndi ka prist iněně ja hâkâ ebimba na a tepě o huludě bâ Barabas. 12Pailat a timbwanaki pě, ka mâ‐a vâ na bâ; na, Nandi, o vahaka lě ni mbi haka uanyu a tubakě na Upolo mua Jiu na? 13Ka bâba yama pě, na, Kâmâkidě Mâ o krâs. 14Jâ ndi ja Pailat ja vâ na bâ, na, Na nja ’lombo ě, a ma ha lě nja bobě? Ka bâ‐ba yama pě nangudi, na, Kâmâkidě Mâ o krâs. 15Ndi Pailat a vahaka o tândidě ebimba A hulwakidi bâ Barabas, o mâ‐a běki Jisus bomiděngo ka mâ‐a vě Mâ ka kâmudwě o krâs.
16Ka sâjě ba valana Mâ o ikenga i tubakwě na Pritorium; ka bâ‐ba ndiya njamba ’abu yěhěpi ta. 17Ka bâ‐ba bâtidě Mâ ibâtâ iveyu, ka bâ‐ba longa korowa ya mayâ, ka bâ‐ba bâtidě Mâ yâ, 18ka bâ‐ba yalě Mâ ihoma, na, Mbolo, Upolo mua Jiu. 19Ka bâ‐ba bweya Mâ o molo n‘ utumbe, ka bâ‐ba tuwa Mâ malě, ba kalakiya Mâ mabângâ humehume. 20O bâ‐ba běki Mâ věhěngo, ka bâ‐ba věngidě Mâ ibâtâ iveyu, ka bâ‐ba bâtidě Mâ ngâi jaju mětě, ka bâ‐ba valana Mâ ka kamudwě o krâs.
21Ka bâ‐ba panga Saimân ua Sairini a tombakidi baka, a viya o ’hiki, hangwě ya Alěxander na Rufus, na a bapakě krâs ’aju.
22Ka bâ‐ba valana Mâ o iboko via Golgotha vi jadi, na, oningě via ’ludwě, Iboko via Mbombo. 23Ka bâ‐ba vě Mâ ivě, hâbwěngo na myrrh: nd‘ au nângâkâ jâ. 24O bâ‐ba běki Mâ kâmiděngo o krâs, ka bâ‐ba kabaniya ngâi jaju, ba nângâkiyě jâ kwai, ya moto uěhěpi e ka nângě. 25E diyakindi egombe ya mawěla ibuwa, ka bâ‐ba kâmidě Mâ o krâs. 26Ilěndwě ja ebuke ’aju i diyakindi lěndwěngo oba, na, UPOLO MUA JIU. 27Ba kâmâkidi na Ju meibi mebale; ’mbâkâ o ’nâ ’aju eyomi, ’mbâkâ o ’nâ ya ’mengwě. 28Kâ Ilěndwě ja hohonganě i vâkě, na, A langakudwi na baweyi ba belekanako. 29Ba ma tombaka baka ba ma kilaki Mâ, ba vugumakidě meolo meabu, na, Ěhě! Âvě o bulwakidě těmpěl na nâvě wa longa yâ na hwi ’lalo, 30yongakě nyolo ’âvě, na nâvě wa huba oviya krâs. 31Yâ nyanga tě te ya prist iněně e vâkidi na balěndi bâ mětě na bâ mětě bověhěkě, na, A ma yongaki bapâkwě; ndi A ’bě na ngudi e yongakě Mâ mětě. 32Nandi, Kraist, Upolo mua Israěl, a hubake oviya krâs, ovaně ndi o hwě ho ka yěně na hwě hwa kamidě. Ba kâmâkudwě na Ju, ba timbakidi Mâ ndaga tě.
33O jâ i diyaki joba meolo ka ivititi ja diya o he yěhěpi kwanga nala mawěla malalo. 34O mawěla malalo ka Jisus a yama na joyi oba, na, Ěloi, Ěloi, l‘ ma sabakthenai? Yeně ndi, oningě ya ’ludwě, na, Anyambě ’amě, Anyambě ’amě, e lě nde ’âvě e senji ’Mba? 35Bâkâ ba diyaki těmetěme, o bâ‐ba yoki nonaně, ka bâ‐ba vâ, na, Umbwakiyate, A ndakiyandi Elaias. 36K‘ umbâkâ a val‘ umbila, ka mâ‐a londa nyândâ na vinigar, a ka kahakidě yâ o utumbe, ka mâ‐a mâtidě Mâ, na Dikaki Mâ ni mbwe; ho t‘ o yěně ipě Elaias a ka viyi ka hubě Mâ. 37O Jisus a diyaki yamango joyi oba, ka Mâ‐a diba. 38Ka unamba uněně mua těmpěl mua pěhěniyě bepěhi bebale oviya oba kwanga nala he. 39O Sěnturiân e diyaki těměngo hohonganěngo na Ju e yěněki Mâ‐a yamaka a dibaka, a vâki, na, Mbambayě, moto těkaně a diyakindi Mwana Anyambě. 40Bajo ba diyaki tepě ba hilakě na masěyi, ibabu bâkâ ndi Meri Magdaline, na Meri nyangwě ya Jems ehâlě na Josěs, na Salome; 41(ba vitakidi Mâ o Mâ‐a diyakidi o Galili, na haya Mâ) na bajo bapâkwě baitě ba betaki na Ju o Jěrusalěm.
42O kolo pâdi, ’kabojana bo diyakindi buhwa boa ikenjě, boně ndi, buhwa bo takě na Iyâjâ, 43Josěf ya Arimathia, umbâkâ ua ’hoka na moto ua kuma eyam‘, a ma vengakidě tepě ipangiya ja Anyambě, ka mâ‐a viya, ka mâ‐a ngiya na evemba o Pailat a jadi, ka mâ‐a jomba ekengo ya Jisus. 44Ka Pailat a mama n‘ ipě A wi pâni; ka mâ‐a ndiya ua sěnturiân ka mâ‐a uwa mâ, na, ipě A bi na wa n‘ ukili. 45O mâ‐a yowudě na ua sěnturiân, ka mâ‐a vě Josěf ekengo. 46Ka mâ‐a hamba mavěla mayamu, ka mâ‐a hubě Mâ, ka mâ‐a dinga Mâ na mavěla tě, ka mâ‐a nangidě Mâ o malonga ma pudwakudwě o malale, ka mâ‐a vungulidě ilale o ubiyâ mua malonga. 47Meri Magdaline, na Meri nyangwě ya Josěs, ba yěněkindi o Mâ‐a nangakudwě.
Attualmente Selezionati:
Mark 15: BNG1895
Evidenziazioni
Condividi
Copia

Vuoi avere le tue evidenziazioni salvate su tutti i tuoi dispositivi?Iscriviti o accedi
Published by the American Bible Society in 1895.