Mark 16
16
1O Iyâjâ i běkidi tombango, Meri Magdaline, na Meri nyangwě ya Jems, na Salome, ba diyakindi ba hamba belombo bea kango beyamu, ovaně nd‘ o bâ‐ba ka viyě ka hiya Mâ beâ. 2O buhwa boa wiki boa bohoboho, n‘ ubwa n‘ ubwa mětě, ba pâkind‘ o malonga, o ’gombe ya joba e pumakě. 3Ka bâ‐ba vâ bâ mětě na bâ mětě, na, Nja ka vungulidě hwě ilale oviya ubiyâ mua malonga? 4O bâ‐ba tamuwedi ka bâ‐ba yěně na ilale i diyaki vunguludwěngo (’kabojana i diyakindi ’něně). 5Ka bâ‐ba ngiya o malonga, ka bâ‐ba yěně iwanja diyango o pělě eyomi pugango na ngâi ’tano eyaba; ka bâ‐ba nyânyâviyě. 6Ka mâ‐a vâ na bâ, na, O nyânyâvâkiyeni: o butakandini Jisus ya Nazarěth, e weyakudwě o krâs: A pumbuwendi: A ’bě pě okava; yěněkěteni, iboko viabu vi nangakidě Mâ. 7Ndi valakani, ka langwakiyeni beyokwedi beaju na Pitě, na, A valind‘ o boho n‘ inyěni o Galili, ovoně nd‘ o inyěni o ka yěni Mâ ni, ka Mâ‐a vâki n‘ inyěni. 8Ka bâ‐ba puma bokweyaka oviya, malonga ’kabojana ba mamakindi, na bâ‐ba ka likimaka; na bâ‐bu kalaka na moto te moto elombo; ’kabojana ba bangakindi.
9Ndi o Jisus a pumbwakidi n‘ ubwa mua buhwa boa wiki boa bohoboho, A pumakiyendi o Meri Magdaline uaju a diyakite a pumě děvil hěmbwědi. 10Ka mâ‐a vala ka languwa ba diyakidi na ju, o bâ‐ba diyaki ba yěněkě ngěbě na bâ‐ba e yaka. 11O bâ‐ba yoki na A bi mihâ, na na a yěněki Mâ, bu kamakidě.
12Yeně tombango, ka Mâ‐a pumiya pě itingidi ipâkwě o babale ibabu, o bâ‐ba diyakidi ba tamwaka, ba kěkě o ’hiki. 13Ka bâ‐ba ’la ka languwa yâ ba ma dikana; ndi bâ‐bu kamakidě tepě bâ.
14Kwěyi, ka Mâ‐a pumiya o jom‘ n‘ umbâkâ o bâ‐ba diyaki ba jaka, A ka hěnjěkě bâ o nyang‘ ’abu e ha ’bě na ikamidě, na melema bokolo, ’kabojana bu kamakidě ba yěněki Mâ o Mâ‐a diyaki pumbuwango. 15Ka Mâ‐a vâ na bâ, na, Kěkěni o he yěhěpi, o ka pakwakiyani ekeha yěhěpi sango tě ’yam‘ ekaně. 16A kamakidě, na mâ‐a baptaiswě a ka yongwěndi; ndi a ha kamakidě a ka kwehwěndi. 17Ndembo těkadi i ka vitaněndi ba kamakidě; ba ka pumakěndi děvil na dina jamě; ba ka kali beemi bea kya; 18ba ka bweyi mbamba; oningě ba mâtâ elombo e weyanakě, ya kokidě bâ; ba ka nangidi mebědi makadu, na meâ mea diya upeha.
19Nandi, o Upangiyi a běki na bâ nonaně kalango, ka Mâ‐a nângwě o Hěvěn, ka Mâ‐a diya o ’nâ y‘ Anyambě eyomi. 20Ba kěkě, ka bâ‐ba pakuwa o iboko viěhěpi, Upangiyi a haka na bâ, na Mâ‐a sulakě ndaga na ndembo i benganakě. Aměn.
Attualmente Selezionati:
Mark 16: BNG1895
Evidenziazioni
Condividi
Copia

Vuoi avere le tue evidenziazioni salvate su tutti i tuoi dispositivi?Iscriviti o accedi
Published by the American Bible Society in 1895.