Logo YouVersion
Icona Cerca

Mark 14

14
1Isango ja ’kunduwa na ja pěmbě e ha ’bě na ilanda i hakudwěndi hwi ’bale tombango; prist ja meolo na Balěndi ba ka vahaka ugono muabu u ka nângâně Mâ, na bâ‐ba weya Mâ. 2Ndi ba vâki, na, Hanga o buhwa boa isango, banga etoko ya kwa o bato ba jadi.
3O Mâ‐a diyakid‘ o Bethane, o ndabo ya Saimân, e diyaki na ’gâlani, o Mâ‐a diyakidi a jaka, ka mwajo a viya omě na ’gala ya alabastěr ya mavulě ma kango ma spiknard ma tâ mětě, ka mâ‐a dubuwa ’gala, ka mâ‐a hovidě mâ molo muaju. 4Bâkâ ba diyakind‘ omě ba numbakindi bâ mětě na bâ mětě, na, mavulě tě ma kango ekama ma mbanakiya lě nandi? 5Ikabojana ma ma diyate ma hambakudwě wa na kama ja fura ilalo na jâ‐ja věwě mekuge. Ba ka hěnjěkě mâ. 6Ka Jisus a vâ, na, Dikaki mâ ni mbwe; e lě nd‘ eanyu e hakě mâ njuke? a hi ’Mba ehavu eyamu. 7Ikabojana mekuge me n‘ inyěni egombe yěhěpi, oningě o vahingěni o ka hati meâ ni bwam‘; nd‘ o ’běni n‘ Umba egombe yěhěpi. 8A handi nyang‘ ’aju e ka yâlě; a viyendi pâni ka hiya mavulě o nyol‘ ’amě opěla itongwě. 9Pâkwěpâkwě Mbi vâki n‘ inyěni, na, Iboko viěhěpi via sango t‘ eyam‘ ekaně vi ka hamanudwě o he těkaně yěhěpi, elombo tě eaju e di hango ekae, e ka langwěndi iyongidě jaju.
10Ka Judas Iskariot, umbâkâ ua jomu na bebale, a vala o prist ja meolo i jadi ka kândâ Mâ o bâ‐ba jadi. 11Ba yěněki mbya o bâ‐ba yokaki nonaně, ka bâ‐ba yohaně mâ na ba ka vi mâ dâlě. Ka mâ‐a vaha pěl‘ ’aju e ka kândâně Mâ hwě.
12Buhwa boa pěmbě e ha ’be na ilanda boa bohoboho, o bâ‐ba weyakiyedi ikunduwa, ka beyokwedi beaju bea vâ na Ju, na, O vahaka lě na ho kěke ka kenjě iboko ovaně nd‘ Âvě o ka jě isango ja Ikunduwa ove? 13Ka Mâ‐a loma beyokwedi beaju bebale, ka Mâ‐a vâ na bâ, na, Kěkěni o mboka, o ka latandini na moto ovoně bapěngo imâgi ja miba; vitaki mâ ni. 14Iboko viaju vi ka ngiyě o ka vâkâni na hangwě ndabo, na, Uyokwidi a ma vwi, na, Ikenga ja bangi i l‘ ove o ’Mba‐mbi ka jě isango ja bokundwaka na beyokwedi beamě? 15A ka leviděndi ’nyěni ilika iněně oba, bonguěngo kenwěngo: kenjakeni ovoně o pěl‘ ’ahu. 16Ka beyokwedi beaju bea vala ka bâ‐ba pâ o mboka, ka bâ‐ba kâbidě ka Mâ‐a vâki na bâ; ka bâ‐ba kenjě isango.
17O yâ e diyaki kolo ka Mâ‐a viya na jomu na bebale. 18O bâ‐ba diyakidi diya, ba jaka, ka Jisus a vâ, na, Pâkwěpâkwě, Mbi vâki n‘ inyěni, na, Umbâkâ ua njamb‘ ’anyu a jakě n‘ Umba a ka kândi ’Mba. 19Ka bâba yalě ngěbě, na vâ na Ju umbâkâ umbâkâ, na, A nd‘ umba? upâkwě mâ na, A i ’mba? 20Ka Mâ‐a timbwana na vâ na bâ, na, A ndi ua njamba ya jomu na bebale, a dubakě n‘ Umba o ’pělě bwalo. 21Mwana moto a ’landi, ka yâ e di lěndwěngo o pěl‘ ’aju, ndi maguga na moto tě ua Mwana moto a ka kândânwě, bwamu ndi na te moto těně a Jakwě.
22O bâ‐ba yalakidě ija, ka Jisus a nângâ pěmbě, ka Mâ‐a vambiya ibâtâ, ka Mâ‐a pěhě yâ, ka Mâ‐a vě bâ yâ, na, Nângâkâni, jakani, nyalo ’amě nd‘ ekaně. 23O Mâ‐a běkidi akeva věngo, ka Mâ‐a nângâ sěngě, ka Mâ‐a vě bâ yâ: ka bâ běhěpi ba mâtânidě. 24Ka Mâ‐a vâ na bâ, na, Makiya mamě nd‘ ekama ma panga ya kya ma hoviyedi o pělě ’a baitě. 25Mbambayě mětě, Mba mâte pě bebuma bea ukâdi epâkwě njo, kabo o buhwa boamě bo ka mâtě beâ bea kya o ipangiya j‘ Anyambě.
26O bâ‐ba běkidi viembo tumbuděngo, ka bâ‐ba puma nala o ’kodi mua Âlive.
27Ka Jisus a vâ na bâ, na, Inyěni běhěpi o ka kâbândini o nyang‘ ’amě na bulu těkabo, ’kabojana e lěndwěngo, na, Mbi ka bweyandi utati na medâmbě mea pajangana. 28Nd‘ o ’Mba‐mbi ka pumbuwě, Mbi ka ’land o Galili o bohoboho. 29Ka Pitě a vâ na Ju, na, Tombekete běhěpi ba kâbâte, ndi mba yâlě. 30Ka Jisus a vâ na Ju, na, Mbambaě, Mbi vâki na nâvě, na, O buhwa těkabo, mětě bulu těkabo, na kuba na kâkâlâkâ nj‘ ibale, o ka hâhiyi ’Mba nj‘ ilalo. 31Ka mâ‐a kala pě nangudi, na, Oningě mba wa na nâvě, mba hâhiy‘ Âvě na vilolombo. Yâ nyanga tě te ya běhěpi e vâkidi.
32Ka bâ‐ba pâ o mwanga u ma tubakwě na Gěthsěmane, ka Mâ‐a vâ na beyokwedi beaju, na, Diyakani okava ulingo muamě u kalakiyě. 33Ka Mâ‐a nângâ Pitě na Jems na Jân, ka Mâ‐a yalě imama nangudi, na nyolo vâhâ mětě. 34Ka Mâ‐a vâ na bâ, na Ilina jamě i yěněkěndi ngěbě eněně piěle na iwedo; vengakiděni, pepwakani. 35Ka Mâ‐a piya kwěi, ka Mâ‐a kwa o he, ka Mâ‐a kaliya nana iwěla i tombake Mâ, oningě na e te e hamakě. 36Ka Mâ‐a vâ, na, Abba, Paia, belombo beěhěpi be ka hamate Âvě o jadi; věngěkidě ’Mba sěngě tě ya kâpi ekaně; ndi hanga nyang‘ ’amě e vahakě, ndi ka ’vě o pangakě. 37Ka Mâ‐a viya, ka Mâ‐a kâbidě bâ‐ba yaka viyâ, ka Mâ‐a vâ na Pitě, na, Saimân, o yaka tepě? 38Wa yâlě o pepuwa iwěla jâkâ? Pepwakani, o ka kalakiyani, o banga wa ngiyani iyějudwě. Ilina mětě i kokěngo, ndi nyolo e ibě na ngudi. 39Ka Mâ‐a vala pě, ka Mâ‐a kaliya, A ka kalaka jâ ndaga tě te. 40O Mâ‐a timbakidi, ka Mâ‐a kâbidě pě bâ ba yaka viyâ (’kabojana mihâ mabu ma diyaki bodilo) na bâ‐bu yowakě tepě eabu e ka yavwaně Mâ. 41Ka Mâ‐a ’la pě njo ilalo, ka Mâ‐a vâ na bâ, na, Yakani nandi, yâjâkâni; ya bě ndi twětwě, iwěla i pândi; umbwakiyateni, Mwana moto a kândudwěndi o benâ bea bato babe. 42Umwakani, ho kekeni; umbwakiyani, a kândâkě ’Mba a bě ndi piělě.
43O Mâ‐a diyakidi a kalaka, elěngiaha tepě ka Judas a viya, ua njamba ya jomu na babale, ebumbu eněně e diyaki na ju na mekwala na metumbe, ba viya o prist ja meolo na balěndi na batodu. 44A kândâkiyi Mâ a věki bâ ndembo, na, Uamě a ka pyâpyě, Mâ ndi Mâně; bweyaki Mâ ni, o ka valanaki Mâ ni na bokeli. 45O mâ‐a pâkidi, ka mâ‐a paniya o vala bokěkě o Mâ‐a jadi, ka mâ‐a vâ, na, Paia‐o! Paia‐o! ka mâ‐a pyâpyě Mâ. 46Ka bâba nangidě makadu o Mâ‐a jadi, ka bâ‐ba bweya Mâ. 47Umbâkâ ua njamb‘ ’abu a diyakidi bakamango, ka mâ‐a hoduwa ukwala, ka mâ‐a koka uhayi mua prist eněně, ka mâ‐a leniya ditâ jaju. 48Ka Jisus a vâ na bâ, na, O ma viyandini o ’Mba‐mbi jadi, ona mwibi, na mekwala na beposa ka nângâ ’Mba? 49Mbi diyakindi buhwa boěhěpi n‘ inyěni o ndabo ya Anyambě Mbi yokwakidě, wu bweyaki ’Mba ni; ndi Malěndwě ma ka timandi. 50Ka bâ běhěpi ba dika Mâ, ka bâ‐ba kweya.
51Ka iwanja n‘ ihuhu ja vitaně Mâ, unamba mu‘ ivěla pugang‘ o nyolo; 52ka mawanja ma bweya mâ; ka mâ‐a dika unamba mu‘ ivěla, ka mâ‐a kweya na bâ uhamba.
53Ka bâ‐ba valana Jisus o prist eněně e jadi; prist eněně na batodu na balěndi ba yolanakiděndi o mâ‐a jadi. 54Ka Pitě a vitaně Mâ yaviděngo, kwanga nala ikenga ja prist eněně; ka mâ‐a diya na benami, a lâlâkâ veya. 55Ka prist eněně na ba ehoka běhěpi ba buta ndaga ja bovelaka opěla Jisus ijabu i ka weyaně Mâ; ndi bu duwaka. 56Ikabojana bato baitě ba pakwakindi bea bojowa o pěl‘ ’aju, ndi mepako meabu meu hohonganakě. 57Ka bato bâkâ ba těmě ka veliya o pěl‘ ’aju, 58na, Ho yokaki Mâ‐a vâkâ, na, Těmpěl tě e longakudwě na benâ ekaně, Mbi ka buludi yâ, ndi na hwi ’lalo vâkâna Mbi longi pě ’pâkwě e longwě na benâ. 59Ndi tombe kakana mepako meabu meu hohonganakě. 60Ka prist eněně ya těmě o hanganě, ka mâ‐a uwa Jisus, na, Wa timbwanaka elombo? E lě nde ya ekaba e pakwakě opěl‘ Âvě? 61Ka Mâ‐a diya dâ, A yavwanaka ’lombo. Ka prist eněně ya uwa pě Mâ, na ju, na, Âvě ndi Kraist mwana w‘ Ibâtâ? 62Ka Jisus a vâ, na, Umb‘ i Mâ; tepě, o ka yěněndini Mwana moto diyango o ’nâ eyomi ya ngudi, A vaka na bevindi bea oba. 63Jâ ndi ja prist eněně ja nya ngâi jaju, na, Ho lě pěni na nja mal‘ ě ma tali? 64O yokindini ikila jaju j‘ Anyambě; o yěněkě li na? Ka bâ běhěpi ba hubě Mâ na A lukango n‘ iwedo. 65Ka bâkâ ba yalě Mâ ituwa ja malě, na diba boho boaju, na bâ‐ba ka bweyaka Mâ bebode, na o vâ na Mâ, na, Sâkâkâ; bahayi tepě ba ka bweyaka Mâ mabanjo.
66O Pitě a diyakidi o ikenga o he, k‘ umbâkâ ua lotângâ la prist eněně a viya; 67ka mâ‐a yěně Pitě a lâlâkâ veya, ka mâ‐a tamuwa mâ, na, Âvě tepě o diyaki na Jisus ya Nazarěth. 68Ka mâ‐a hâhâ, na, Mba ’wě, n‘ umbamba bweyakidě tepě ka ’vě o vâkě. Ka mâ‐a vala o ’lěmbě; ka kuba ya kâkâlâ. 69Ka itângâ ja yěně pě mâ, ka jâ‐ja yalě o vâ na ba diyaki těmetěme, na, Ekaně nd‘ uabu. 70Ka mâ‐a hâhâ pě. Kwěi, ka ba diyaki těmetěme ba vâ pě na Pitě, na, Mbambayě, âvě nd‘ uabu; ’kabojana o ndi ua Galili, na mbâhi ’âvě tepě e kwanakandi. 71Ka mâ‐a yalě o kila na o kana, na, Mba ’wě moto t‘ uanyu a vâkě ně. 72Ka kuba ja kâkâlâ njo y‘ ibale. Ka Pitě a yongidě ndaga ya Jisus e vâki na ju na, Kuba na kâkâkâlâ njo y‘ ibale, o ka hâhiyi ’Mba njo y‘ ilalo. O mâ‐a běkidi nonaně pikiliyango, ka mâ‐a e ya.

Attualmente Selezionati:

Mark 14: BNG1895

Evidenziazioni

Condividi

Copia

None

Vuoi avere le tue evidenziazioni salvate su tutti i tuoi dispositivi?Iscriviti o accedi