Mark 13
13
1O Mâ‐a diyakidi a pumaka těmpěl, ka eyokwedi ’aju yâkâ ya vâ na Ju, na, Uyokwidi yěněkěte itingidi tě ja malale na ja ilongidi ekadi! 2Jisus a yavwanakindi, ka Mâ‐a vâ na mâ, na, O yěněkěte ndabo t‘ iněně ekadi? wa dikan‘ okava ilale kahaniděngo n‘ ipâkwě i ka měndě i sajwe. 3O Mâ‐a diyakidi diya o ukodi mua Âlive, hohonganěngo na těmpěl, Pitě na Jems na Jân na Andru ba uwaki Mâ ilimbo. 4Langwakiya hwě egombe ya belombo těkabe e ka diyě? na e ka diya lě nja ndembo ě belombo těkabe beěhěpi be ka timě? 5Ka Jisus a yavwana A ka yalakě o vâ na bâ, na, Bandamakiděni o banga moto a temidě inyěni. 6Ikabojana baitě ba ka viyi na dina jamě, na, Umba ndi Mâ, na bâ‐ba ka temakidě baitě. 7Ndi o inyěni o ka yokěni beduka na sango ja beduka, o papulanakeni, ’kabojana belombo bea jângâ tědině be ka hamandi, ndi ihuku i ha pâyete. 8Yeně ’tomba e ka yani na epâkwě, din‘ ipangiya na ipâkwě; he e ka ninganěndi o loboko lâkâ, mesalâku na njuke be ka diyandi; ekabe ndi bea jali ja ngěbě.
9Ndi kelevakani inyi mětě; ’kabojana ba ka kândândi ’nyěni o behoka; o ndabo ja Anyambě o ka bomwěndini; o ka vanwěndini o meoho mea bapangiyi na mepolo o nyang‘ ’amě, ilanguwa o pěl‘ ’abu. 10Sango eyam‘ e ka tand‘ o hamana o betomba beěhěpi. 11Nd‘ o bâ‐ba ka valakidě ’nyěni, na bâ‐ba kândâ tepě inyěni, o take o nakani eanyu e ka kalě, o pikilakiyeni tepě egombe e t‘ o pâ: ijanyu i ka věwě o iwěla tědině jâ ndi ’janyu i ka kalě, ndi Ilina Iyamu. 12Nandi vâkâna ba nyangwě pâkâ ba ka kândânâkândi o iwedo, na ua hangwě na mwana; na bana ba ka ’mwaniděndi, na bâ‐ba běkělěniyi ba jaki bâ, na bâ‐ba weyidě bâ. 13O ka binwěndini na bato běhěpi o nyanga ya dina jamě: nd‘ a ka lilimidě nal‘ ihuku, mâ t‘ a ka yongě.
14Nd‘ o ’nyěni o ka yěněni elombo e binakwě y‘ ujilo (ya Danyěl usâki e kalakidi) de o yâ e ha lukakidi o těmě (a langakě a bweyakidě) nandi ba jad‘ o Judia ba ka kweyaka o mekodi. 15A ka diyě o ndabo oba a hubake pě o ndabo tombe o ngiya ovoně ka nângâ elombo o ndabo ’aju. 16A ka diyě o mwanga a timbake o bea mbuhwa ka nângâ ngâi ’aju. 17Ndi majili na ba ka diyě na memi, na ba ka diyě ba nyangakě o hwi tědině! 18Ndi kalakiyani na ikweya janyu i diyake o ’gombe y‘ ivěvu. 19Ikabojana o hwi tědině o ka diyi na etuniya e ha diyete oviya jali j‘ ivela j‘ Anyambě i velakidi na pâ kya těkaně, na yâ ya diye pě. 20Tepě kabo Upangiyi a vuvidě hwi tědině, vâkâna o ’bě na moto a ka yongwě; nd‘ o nyanga ya ba pânwěngo, ibaju ba di pânângo, a vuvidi hwi. 21Nandi oningě moto ka moto a vâ n‘ inyěni, na, Yěněkěte, Kraist nd‘ ekaně; tombe, na, Yěněkěte, A nd‘ ovoně; o kamakidi mâ ni. 22Ikabojana Kraist ja ’vela na basâki ba bojowa i ka pândi, na j‘ i ka levidi ndembo na megoma be ka ’mbaki o kweyidě tombe na ba pânwěngo, e jaka na e ndi e hamaka. 23Ndi kelevakani; yěněkěte, Mbi tind‘ o languwa ’nyěni belombo beěhěpi.
24Oningě betuniya bea hwi tědině tombango, joba i ka vindandi, ngândě ya věye unanga muaju. 25Nyětěti ja oba i ka kwandi, na ngudi i jad‘ oba i ka ninganaka. 26Nandi vâkâna ba yěnindi Mwana moto a vaka o bevindi na ngudi eněně n‘ ivenda. 27Nandi vâkâna a lomindi enjěl jaju, na bâ‐ba ka yolakě ibaju ba pânwěngo oviya mahuku ma he manai, oviya pělě ya he ya bo na kwanga pělě ya bo ya oba.
28Nandi yokwakani ukanakâdi mua ’le ya itâla; Oningě mekilibanjo meaju me ngite mebâbu, na me ka pumakě bekai, o yowuděteni na bokâ boa běndi piěle. 29Yâ nyanga tě, te ’anyu o inyěni o ka yěněni belombo těkabe be hamaka, yowakěni na ya bě ndi piěle, o mebiyâ. 30Mbambayě, Mbi langwakiyandi ’nyěni, Igona těkadi ja tombe, belombo těkabe beěhěpi be t‘ o hama. 31He na oba be ka tombandi, ndi ndaga jamě ja tombe. 32Ndi buhwa těboně, n‘ iwěla tědině beâ ’wane na moto, tombe na enjěl i jad‘ o Hěvěn, tombe na Mwana, ndi kabo Hangwě.
33Kelevakani, pepwakani, kalakiyani tepě; ’kabojana wa ’wěni o egombe e ka pâyě. 34Ikabojana Mwana moto a ndi ona moto a vala o ’tomba ya yaviděngo, a dikakidi ndabo ’aju, ka mâ‐a vě bahayi baju ipangiya, moto uěhěpi eaju ’havu; ka mâ‐a vâ na utati mua ubiyâ na a pepwake. 35Nandi pepwakani; ’kabojana wa ’wěni egombe ya upangiyi mua ndabo e ka pâyě, ipě na ba kolo, ipě na ba bulutema, ipě na ba yakako, ipě n‘ ubwa: 36banga a pâ matota, na mâ‐a kâbidě ’nyěni o yakani. 37Nyang‘ ’amě e vâkě n‘ inyěni, yâ te ’amě e vâkě na běhěpi, na, Pepwakani.
Attualmente Selezionati:
Mark 13: BNG1895
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Published by the American Bible Society in 1895.
