Mark 12
12
1Ka Mâ‐a yalě na bâ na mekanakâdi. Momo n‘ uhuhu a liyaki mwanga, ka mâ‐a lungidě muâ ugomba, ka mâ‐a puduwa ibabo vi hovakě ivě, ka mâ‐a longa elongo, ka mâ‐a vě muâ baliyi, ka mâ‐a vala o ehe ya yaviděngo. 2O hongodi ka mâ‐a loma uhayi o baliyi ba jadi nana a pahakiye bebuma bea mwanga oviya baliyi ba jadi. 3Ka bâ‐ba bweya mâ, ka bâ‐ba boma mâ, ka bâ‐ba timbě mâ naně. 4Ka mâ‐a loma pě bâ uhayi upâkwě; ka bâ‐ba bweya mâ malale, ka bâ‐ba luma mâ o molo, ka bâ‐ba timbě mâ yokiděngo ihâni. 5Ka mâ‐a loma pě upâkwě, ka bâ‐ba weya mâ na bapâkwě baitě; ba bomaka bâkâ, ba weyaka bâkâ. 6A diyakite mwan‘ umbâkâ uaju a tândâkidi, ka mâ‐a loma mâ na mbuhwě mbuhwě tepě o bâ‐ba jadi, na, Ba ka dili mwan‘ ’amě. 7Ndi baliyi těbaně ba kalakindi bâ mětě na bâ mětě, na, Ekaně nd‘ ujigi; vakani, ho weyaki mâ ni, ovaně nd‘ ekuha e ka diyě ya bě ’ahu. 8Ka bâ‐ba bweya mâ, ka bâ‐ba weya mâ, ka bâ‐ba uhwa mâ o pěpěkě ya mwanga. 9Ndi, upangiyi mua mwanga a ka ha lě na? A ka viyi ka jilidě baliyi, na mâ‐a vě mwanga o bapâkwě. 10O ha langeteni Ilěndwě těkadi,
Ilale ja balongi i kiyakidi ja bě ndi molo mu‘ itududu:
11Ekae diyakindi ehadi ya Upangiyi; e mamanakwě tepě o mihâ mahu?
12Ba butakind‘ o bweya Mâ, ndi ba bangakindi ebimba; ’kabojana ba yěněkindi na, a kalakindi ukanakâdi těkamu o pěl‘ abu; ka bâ‐ba dika Mâ, ka bâ‐ba vala.
13Ka bâ‐ba loma Farisi na Hěrodian n‘ ihuhu o Mâ‐a jadi nana ba hilakě ndaga jaju. 14O bâ‐ba vakidi, ka bâba vâ na Ju, na, Uyokwidi, ho te yowěngo na O ndi pâkwěpâkwě, O bě tepě na moto n‘ isâlâ; na nâvě wa yěněkě tepě meoho mea bato pivi, nd‘ O yokwakidě njeya ya Anyambě na pâkwěpâkwě. E ndi hohonganěngo na ho věkě Sisar pago, ipě e ibě? 15Ho věke ipě ho věkě? Ka Mâ‐a yowě inoka jabu, ka Mâ‐a vâ na bâ, na, E lě nde ’anyu e yějěkiyě ’Mba? Vanaki ’Mba ni fura, Mbi yěne yâ. 16Ka bâ‐ba vana yâ. Ka Mâ‐a vâ na bâ, na, Ekamu uvela na dina be lě bea nja? Ka bâ‐ba vâ na Ju, na, Bea Sisar. 17Jisus a yavwanakindi ka Mâ‐a vâ na bâ, na, Věkěni Sisar belombo be jadi beaju, o Anyambě be jadi ibeaju tepě. Ka bâ‐ba mama na Ju.
18Ka Sajusi ja viya o Mâ‐a jadi i vâkâ na o ibě na ipumbuwa; ka bâba uwa Mâ, 19na, Uyokwidi, Mosěs a lěnděkiyi hwě, na, Oningě mwa nyangwě na moto a wa, na mâ‐a dika mwajo a dike bana, na mwana nyangwě a bakě mwad‘ ’aju, na mâ‐a ka těkidě mwana nyangwě ibângâ. 20Ba diyakindi nyangwě pâkâ hěmbwědi; ka ua bohoboho a ba mwajo, ka mâ‐a wa â dike ibângâ. 21Ka ua balalo a ba mâ, ka mâ‐a wa, au dikaka tepě ibângâ; ua balalo nyanga tě. 22Ka ua hěmbwědi a ba mâ, ba dike ibângâ; na mbuhwa ya běhěpi ka mwajo a wa tepě. 23Ndi o ipumbuwa, o bâ‐ba ka pumbuwa, a ka diya lě mwad‘ ’a nja o bâ‐ba jadi? ’kabojana bâ běhěpi hěmbwědi te ba baki mâ. 24Ndi Jisus a timbwa naki, ka Mâ‐a vâ na bâ, na, O lemakěndini, ’kabojana wa ’wěni Malěndwě tombe na ngudi ya Anyambě? 25Ikabojana o bâ‐ba ka pumbuwě oviya iwedo, ba baye, na bâba banudwě; ndi ba ka diyandi ona enjěl i jad‘ o Hěvěn. 26O pělě ’a bawewe, nana ba ka pumbuwandi, o ’běni langango o ’janganangobo ya Mosěs nyanga ya Anyambě e kalaki na ju o ele, na, Umba ndi Anyambě ya Ebraham, na Anyambě ya Aisak, na Anyambě ya Jekâb? 27A ’bě Anyambě ya bawewe, ndi ya ba di mihâ. O dimbakiyandini n ‘iněně.
28Ka ulěndi umbâkâ mâ‐a viya, ka mâ‐a yoka bâ‐ba kalaka, ka mâ‐a yěně na, A ma yavwani bâ bwamu, ka mâ‐a uwa Mâ, na, Elekanako ya bohoboho mět‘ e lě nde? 29Ka Jisus a yavwani mâ, na, Elekanako ya bohoboho e ndi, na, Israěl, yokakani; Jěhova, Anyambě ahu a ndi Upangiyi umbâkâ. 30Na, tândâkâ Jěhova Anyambě ’âvě n‘ ulema muâvě muěhěpi, n‘ ilina jâvě jěhěpi, n‘ ipikiliya jâvě jěhěpi, na ngud‘ ’âvě yěhěpi; elekanako ya bohoboho nd‘ ekae. 31Ya babale e tepě ona ’kae, Tândâkâ bato bapâkwě ka ’vě mětě. O ’bě na ’lekanako epâkwě eněně wa na ’kabe. 32Ka ulěndi mâ‐a vâ na Ju, na, Bwamu, Uyokwidě, o languwi pâkwěpâkwě; ’kabojana Anyambě e te yâkâ; o ’be pě na epâkwě kabo yâ dipâ; 33o tândâ Mâ n‘ ulema muěhěpi, n‘ ibweyidě jěhěpi, n‘ ilina jěhěpi, na ngudi yěhěpi, na o tândâ bato bapâkwě panika ’vě mětě, e ndi wa na bova bo ma tumbakwě na meambo meěhěpi. 34O Jisus a yěni na a ma yavwani n‘ iyowě, ka Mâ‐a vâ na ju, na, O ’be yaviděngo na ipangiya ja Anyambě. Oviya ’vaně o diye pě na moto a uwakě Mâ nyuwe.
35O Jisus a diyakidi a yokwakidě o těmpěl ka Mâ‐a yavwana bâ, na, Nd‘ e lě nde ya Balendi ba vâki na Kraist a ndi Mwana Devid? 36Devid mâ mětě a vâkindi k‘ Ilina Iyamu i vâki na ju, na,
Jěhova a vâkindi na Upangiyi muamě, na, Diyaka ’vě o ’nâ ’amě eyomi, kabo ’Mba ta panga baloni bâvě ebonga ’vě e pitakiyě.
37Devid mâ mětě a ma tubaki Mâ na Upangiyi, nd‘ a bě lě mwan‘ ’aju na? Ka ebimba yěhěpi ya yoka Mâ a kalaka, na mbya.
38Ka Mâ‐a vâ na bâ n‘ iyokwanidi viaju, na, Kelevakani na Balěndi ba vahakě o tamwaka na ngâi iyaba na bâ‐ba tândâkâ mahomwě o mahambanido, 39na bediya beněně o ndabo ja Anyambě, na loboko la betiyango o masango: 40ba pukulakě ndabo ja mealika, na bâ‐ba ka temakidě bato na makaliya mayaba; ekaba ndi ba ka duwě ivomudwě iněně wa.
41Ka Jisus a diya o pělě ya egala ya ungumba, a yěněkě ka bato ba kutwakidě hika o egala tě; ba diyakidi benami ba kutwakidi eitě. 42Ka mwalika n‘ uhuhu, mâ‐a viya omě u diyakidi sâmiyěngo, ka mâ‐a kutudě mait ibale i weyakě farthing. 43Ka Mâ‐a ndiya beyokwedi beaju, ka Mâ‐a vâ na bâ, na, Pâkwěpâkwě, Mbi vâki n‘ inyěni, na, Mwalika tě mua ukuge muně u ma vaměndi wa na bato běhěpi ba ma kutudě o ’gala ya ungumba. 44Ikabojana bâ běhěpi ba kutwakiděndi oviya bwinge boabu; ndi a kutudendi oviya bonyamo boaju eaju yěhěpi e diyanakidi, eaju e ma bikinaka.
Attualmente Selezionati:
Mark 12: BNG1895
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Published by the American Bible Society in 1895.
