Luka 12
12
1A’a aruru U ai kaupukiaka’ane, uku a’a aruru aruru oro are eunimakei’?-?inave, Una aivara U pinai erau voa kuruenave, Parisea a’a anu paruava veila ika noro oivirine, kurua voa anu miki, ewaea voa oivirine.
2Uku awku kavakava ruawkiakeina u ipawkiakeiakana; awku vauakavakeina u ipaliakeiakana.
3Voa kavakava noro muru ai kuruane euna, ou voa pamea ai viriakeiakana; voa awkuauakeia lalava laru ai noro kuruane euna, ou voa marea i’i ai are opakava?-?keiakana.
4Na a’a e Nai kurunaina, Kore pa liai oro eiai oro kape a’ana, mo liai oro iva eria mi’ina.
5A Nai nakima uku u eiai noro kore miakana: Kore mi’ine u eiai u a’ane euane, u iva mi’ina a’a Gehena ai kaiai; Nai kurunaina kapoi, Kore mi’ine u eiai.
6Naku mau’u 5 inaealiakeia peana peni monou eiai, naku mau’u monou lai aika?-?vakeiape Eloi inu paku ai?
7Nomo uku unu kimari uririra akoakeina. Ou uku eiai kore pa liai; uku inaealia kavani naku mau’u aila aila eiai mau’u keina, inaealia kavani noro eiai ovara keina.
8Nai kurunaina, A’a kavakava iki e’i’iakana a’a anu paku ai, A’a anu Mere iki e’eakana Eloi inu aivara avaea paku ai:
9A u inaka‐ikavakana a’a anu paku ai, u inaka‐awkavakeiakana Eloi inu aivara avaea anu paku ai.
10A’a ane A’a anu Mere u aviakana, u paue’awmia?-?keiakana: a u ane u mai‐voa kuruna Avaea Iaa eiai, u paue‐awmiakeiapea.
11Oro arenakavakeia’ane omoro marea ai, voa vevea a’a anu paku ai, amua a’a anu paku ai ane, lai kukupuna pa miai kavani voa eiai, uku voa noro kuruakana.
12Uku pani miki Avaea Iaa ipanakiakana voa eiai noro kuruai limakina.
13A’a aruru unu a’a monou erau voa kurunave, Amua e, na airavaki awkine enere omoro‐pei kokoravai na aua nai miane‐iai.
14Iesu erau voa kurunave, Koamakuru’i Nai ni voa vevea a’a, ni aru korava a’a keina?
15U erau voa kuruenave, Oivirine iawmia opara eiai: uku a’a anu aru evereverea una rokoa anu ikiau peo.
16Aipo voa U erau voa kuruenave, Amua a’a monou unu aura pei mo’onu la’anave:
17Una lai laru ai u erau voa veve’enave, Nai oiama?-?limau, nai mako eria mi’ina na aurapei roikiai?
18U erau voa kurunave, Ei awku nai liakana, na aura?-?pei roikia marea nai enakavakana, marea ovara la?-?ekavakana ane; aurapei uriria, na aru ane, laru ai nai i‐roikiakana.
19Na imunu nai erau voa kuruakana, Imunu e, pei mo’onu roikiakeina ni mi’ina, aumeia aila eiai; pa’ane, pei nane, kopaili’ine ane.
20A Eloi erau voa kurunave, Avuavu a’a e, ei kipere ni imunu ni mere iou‐miakeiakana: ei peipei ni roikiane euna koama‐mimau?
21A’a peipei roikina u eiai u orau keina, u amua a’a peo Eloi inu paku ai.
22Una aivara U erau voa kuruenave Ou uku eiai Nai kurunaina, Lai kukupuna pa miai nomo rokoa eiai, uku pei noro navakana; uku a’a kape ane noro luki’emiakana.
23Uku rokoa pinai keina, pei neko mere ai; kape awku pinai keina a’a kape neko mere ai keina.
24Naku inamu‐eine: oro voeape, oro roikiape; pei roikia marea oro miape; Eloi pei ekuna: noro naku paku ai peana?
25Nomo a’a koana u laikora’ane una rokoa u va’au eai li’ina?
26Awku mau’u miki liai noro liape liane, uku oiana noro laikorana uku awku e eiai?
27Aua inamu‐eine oro lala’ana: oro iaki liape, oro nouape ane; Nai kurunaina, Solomona anu vaupa a’a kape uriria u lukiaka’ane, una vapara ei aua anu vapara ipi’ipia‐a‐kei’inavea.
28Eloi pono vapara luki‐awmiane, pono eai lare rokona, namai lare iau laru ai ruawkavakeina; U luki?-?namiapeana, noro e, pirimaroakoa mau’u a’a e.
29Pei noro navakana noro pa voroai, lai rere awku noro pa miai.
30Uku ei awku uriria eiai pani va’au unu kaki a’a evorona: nomo Mai ipali’ina ei awku noro oea‐rokona.
31Eloi inu eiei noro vorone, ei peipei uriria awku nakuakeiakana.
32Kore pa liai, kaupu mau’u e; nomo Mai kopai mi’ina Eiei nakuai.
33Aru noro mi’ina noro inaeali’ine, la’aruku ekune ane; moni maua mi’ine oro umu evere’eapea, vaupa aru opai pani muku ai, iou ai avapu a’a aneape, ano awku navape.
34Uku iou ai nomo vaupa aru uakeina, nomo umu awku uakeina.
35Nomo muri epirina?-?meki, nomo lamepa iau ekunameki.
36Noro awku evere’enameki a’a orau omo amua aioiaka‐pokoina, u a’e‐mia purai mere vairuane; u anea’ane, kikau vakiane oro kikau emoki auane‐iai.
37Amua anea’ane aivara aioiaka‐pokoimakina u auieane, oro kopai‐ekavakeina: Nai kurunaina kapoi, una muri u eme piriakana, pei navai papa’avai u ekiakana, u pei au‐ekuakana ane.
38Kokora pinai viki pani naea, merea pani naea, u anea’ane, oro aioiaka‐pokoimakina u auieane, ei aivara kopai‐ekavakeina.
39Mikio, marea anu mai?-?vaki ipaliaka livilia pani avapu a’a anea’ane, u oiviriaka, evere’eakape avapu a’a una marea ikiriai.
40Noro awku orau aioiaka‐pokoine: uku kurua pani noro a‐laikoranakea A’a anu Mere anena.
41Petero erau voa veve’enave, Amua e, ei aipo voa Ni amakuru’a’i, a’a uriria eiai ana?
42Amua erau voa veve’enave, Aivara miki, lai evera ane, u koana, amua are’eakana una marea aivara eiviriai, omo pei pani miki ekuai?
43Kurua aivara orau limakina una amua auina u anea’ane u kopai‐awkavakeina.
44Nai kurunaina kapoi, Kurua aivara u are’eakana una aru uriria eiviriai.
45Kurua aivara una umu laru ai erau voa kuruane, Na amua pani va’au aneliviai anelia; aivara ukua, aivara paka ane, u vaki’emi’?-?ina, u pei na’ana, awpa nanina ane, u ailo keia’ane;
46Kurua aivara anu amua vairuakana ou pani ai aivara aioiaka‐pokoiapea, u aivara laoiakana u namea a’a kiripai pokoiane‐iai.
47Kurua aivara una amua anu lai ipali’inave, una amua anu anea eiai u evere’eakape, u vaki‐vaki’emia?-?keiakana.
48A kurua a’a u paua?-?paua kei’inave, u namea li’inave ane, u vaki ailapea vaki’awmiakeiakana. Uku a’a mo’onu awkuakeina, u mere mo’onu umuliakeia?-?kana: mo’onu a’a awkuane euna, u mere oro mo’onu miki nawki‐awkavakana.
49Iau awkuai pani va’au ai Nai anenave; Nai umu?-?oiama‐li’i, Iau awkuakeiaka livilia?
50Bapatiso uakeina Nai eiai, anea’anea kurua bapatiso evere’eakeia’ane, i lai kukupuna Nai ipiriakeiakana.
51Noro amalaikora’i Nai anenave pani va’au airu awkuai? Ai, Nai nakina, mani mi‐aneai Nai anenave.
52Uku ei pani mere a’a 5 marea monou laru ai pokoiakana, a’a rere kaiane i mani kokoravakeiakana a’a rere mere.
53Mekai i mani korava?-?keiakana uku mere eiai, orau mere uku mekai eiai; mei mani keiakana uku paka eiai, paka awku mani keiakana uku mei eiai; ono a’e mani keiakana uku ono paka eiai, ono paka awku mani keiakana uku ono a’e eiai.
54U a’a aruru erau voa kuruenave, Awporo inamakina maruru eiei ai noro inamu‐oiane, noro erau voa emoki kuruna, Lai anemakina, lai anena ane.
55Nara kavaea evukima?-?kina noro inamu‐oiane, noro erau voa kuruna, Lare iva keiakana; lare iva aneakana.
56Ewaea a’a e, pani va’au unu veia, kaia anu veia ane, oraiai noro ipali’ina; uku oiana ei pani inu veia noro ipape?
57Uku oiana noro verukua anana voa veve’eape?
58Ni mani a’a kiripai ni enava’ane voa vevea a’a paku ai, kapea ai ni voa evere’ene ni u mere ururua?-?keia’ane‐iai; voa vevea amua a’a anu paku ai u arenika?-?navaia; voa vevea amua a’a polikimani awkinavaia ni?-?piriai, kipura marea ai niravai.
59Nai nikina, ni kipura marea mere elemaneapea anea’anea kavani iki ni awkuane.
Attualmente Selezionati:
Luka 12: IAR1920
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Published by the British and Foreign Bible Society in 1920.
