Yohanna 8

1Yesu tam al aka mossorgo net heremeɗi. 2Də mompum pum amilik addəv Gəla na Maŋgəlva, ɗiy pak azzoŋguk azani. Ndən ɗew, ayegeti. 3Yaŋ mərbaŋ-mahenziŋ dit Farisaɗe akiyaŋ guluk mərmət dawku a gizbe. Aziwgətən addak təkiya, 4Aɓsənən na: Mərbəzəga, gulukəŋ dawku a gizbe mərəmta. 5#MƏS 20:10; ƏMS 22:22-24Addəv mahenziŋ na, Moyis aɗisəmək wən nan gil məs veŋkiŋki, məskegin dit gərmeŋge hã zamə. Nok kan na mbar kənah di? 6Anahəŋ vasna vi kawla an nazani, dərəhaŋgən an nawka dolgoy akani. Yaŋ Yesu aɓe'i, adawver aka dəlvafuŋ də pərəŋ vani. 7Adan adazbanən əssohoni, Yesu asilke, aɓsit na: Ɗəf məs mambray yi ɓa sərokum dətəŋ əskət də gərma. 8Yaŋ aɓe' əmpa, adawver aka dəlvafuŋ. 9Adan aprəmən wənəska, ambataŋgək taka taka pakə, təŋ səket mezzeɗi. Yesu dəpəl takərgəni, gəm guluk ziwe naddak təki nakə. 10Yesu le'i aɓsət na: Ɗakə, ŋgahəŋ ɗiy nek di? Ɗəf tay dəslbuk də wən ɓa sa? 11Yaŋ təɓsən na: Ɗəf tay ɓa Daya. Yesu amna: Naw pak, nətaw na wən akok ɓa. Doko, təŋ kakaŋka kədaɗɗa ɗah mambray ɓa.]

Yesu, əkeɗeɗe na dəlva

12 # MAT 5:14; YOH 9:5 Yesu apel sitik əmpa, amna: Naw intə əkeɗeɗe na dəlva. Ɗəf dəzbawa, sessel adawna arah guzli ɓa, ya warah əkeɗeɗe na zeŋgile. 13#YOH 5:31Farisaɗe aɓsənən kan na: Is tat əpel aka kizuko, əpel nok nawtafi ɓa. 14Yesu azlani aɓsit na: Də nədawpel aka kizu zlaŋ əpel naw nawtafi vi nəsənək sə təki nəde, nəsənək təki məs nədaddawa, ya nokum kəsənək səŋga nəde di ɓa, aŋga nədaddaw di ɓa. 15Nokum va aza gəɓa zə ɗəf kədatawaŋ wəna, naw nawtaw wən aka ɗəf ɓa. 16Ya an nətawək wəna, ətaw wən naw gesiŋgi vi takərgu nan ɓa, in tat də Əbba məs dəslənwa. 17#ƏMS 19:15Addəv mahenziŋ nokum məverni na: Əpel net ɗiy sula na gesiŋgi. 18Naw in tat əpel aka zu tusso, Əbba məs dəslənu tay əpel akawa'e. 19Aɓsənən kan na: Aŋgay Afuk van di? Yesu azlan na: Kəsənwən ɓa kəsənən Əbba ɓa'a. Va kəsənwənək kəta na, wakəsənən Əbba' kəta'e.

20Wən apelis na a təki nawzaɓ zəga addəv Gəla na Maŋgəlva dawyeget ɗiyi. Ɗəf tay dərma ɓa, vi pay nan dəɓəl əgap tagay ɓa.

Kəɓapən na əmbat a təki nədaddaw ɓa

21Yaŋ Yesu anah sit əmpa na: Naw in tat əddawa, wakəkayawəni, ya wakəmtaŋ addəv mambray nokum. A təki məs nədaddawa, nokum kəɓapaŋ na əgap ɓa. 22Mə Yudeɗ aɓɗaŋ kan na: Wambat əbay zən adan adawnəh na: A təki naw nədaddawa, nokum kəɓapaŋ əgap ɓaŋ sa? 23Yaŋ Yesu aɓsit na: Nokum səfuŋ kənanaŋgə, naw sə disiŋ nəde. Nokum aka dəlvəŋ kənanaŋgə, ya naw, naka dəlvəŋ nan ɓa. 24Vini nənah sukum na: Wakəmtaŋ addəv mambray nokum. Ya an kətafnən na Intə Iyna ɓa wakəmtaŋ addəv mambray nokum. 25Aɓsənən kan na: Nok nawa kənan di? Yesu aɓsit na: Far səka ətəŋ in tat ənah sukum. 26Tay an məs nədawnah akokum diyɗa gəm na ətawwəna. Ya ɗəf məs dəslənu gesiŋgi, naw an nəprəm səman nədawpel aka dəlva.

27Dəprəmən na wən na Afən adawpel siti ɓa. 28Yaŋ Yesu aɓsit na: An kəlawənək Wətən Ɗəfa, asna wakəsənnən na Intə Iyna, tay məs nədaɗɗa na kiyu ɓa, vaski Əbba ayeget su zəget məs nədawpeliŋki. 29Ɗəf məs dəslənu tay də iyna, appaw na takərgu ɓa, vi pay pak in tat əɗɗa an məs aŋgələ. 30Adan adawpel vaska ɗiy diyɗa atafənka.

Ɗiy na kiyti gəm balamɗe

31Yaŋ Yesu anah sit mə Yudeɗ məs dətafən na: An munokum tat addəv əpel nawa asna gewleɗ naw kənanaŋ gesiŋ. 32Wakəsənnən gegesiŋ, gegesiŋ tam wapəlkum. 33#MAT 3:9; LUK 3:8Azlan sənənək na: Nam zev Abraham mənani, məsam ɗah belemɗe na ɗəf ɓa. Mbari nok kədawnəh na. Waməkkpaŋ na kiymə di? 34Yesu azlan sit na: Gesiŋ gesiŋ nədawnah sukum. Məgəɗ mambray pak balam na mambray yi. 35Balam asan na eŋgil faɗ ɓa, wətən na, wasan faɗə. 36An Wətən dəpəlkum kana, asna wakəssoŋ gesiŋ. 37Nəsənka zev Abraham kənanaŋgə. Ya munokum tat əkayaw kawbaywa. Vi əpel naw dərəh gəlan addəvkum ɓa. 38Naw an məs nuwəl səza Əbba nədawnəha, ya nokum tamə, məɗɗa an kəprəmaŋ səza afukum.

39Azlanənka, aɓsənən na: Afəm na Abraham yi. Yesu aɓsit na: Va zev Abraham kənanaŋgə, wəzeɗe na Abraham kədaɗɗaŋgə. 40Ya kakaŋ na mənokum tat əkayaw kawbaywa in ɗəf məs dəpel sukum gegesiŋ məs nəprəm səza Maŋgəlva. Aska Abraham dəɗɗa ɓa. 41Nokum, wəza na afukum kədaɗɗaŋgə. Yaŋ aɓsənən kan na: Nam uwa na sulom mənan ɓa, afəm taka yi, ndəni Maŋgəlva. 42Yesu azlan sitik na: Va Maŋgəlva yi Afukum na, wakəŋgluwəni, vi naw səza Maŋgəlva nəgili, nəde, nəde na kiyu ɓa, ndən dəslənwa. 43Vimi kawsənnən maw ɓa di? Vi kəɓapən na əprəm əpel naw ɓa. 44Na afukum diyabəl kənanaŋgə, əŋgla na afukum kədaŋgla əɗɗaŋgə, far səka ətəŋ na, nan məbay kiya iyi. Awziw addəv gegesiŋ ɓa, vi gegesiŋ tay addəvən ɓa, an tay uwa wəna zəgeɗ na kiyən tusso adawpele, vi məwə wəni, afən uwa wəni. 45Ya naw, vi nədawpel gesiŋ, vini kawtafwən ɓa. 46Naway səmmbokum dədawɓap ənəh na nəgəɗək mambray di? An gesiŋ nədawpele, sən mi nokum kawtafwən ɓa di? 47Ɗəf dəde səza Maŋgəlva waprəm əpel na Maŋgəlva. Sən aski nokum kaprəmnən ɓa, vi kəzzoŋ səza Maŋgəlva ɓa.

Yesu gəm Abraham

48Mə Yudeɗ azlanənka, aɓsənən Yesu na: Gesiŋ mənah na: Mə Samari kənani, ətem tay akoko ɓa sa? 49Yesu azlanəka: Naw ətem tay akaw ɓa. Ya ki Əbba nədawɗiya, nokum mənokum tat ərbə su wili. 50Naw nəkay gagdak sən kiyu ɓa. Ɗəf tay dədawkayan suwa, ndəni mətawwəna. 51Gesiŋ gesiŋ nədawnah sukum: An ɗəf armak əpel nawa, awla na əmta ɗah ɓa. 52Mə Yudeɗ aɓsənən na: Kakaŋ məsənək kana ətem tay akoko. Abraham amtəka dit məskəleŋɗe'e, yaŋ nok kədawnəh na: An ɗəf armak əpel nawa, sessel anenna əmta ɓa hã faɗə, 53Hara wakəsok dayki afəm Abraham məs dəmtə sa? Məskəleŋɗe pak amtaŋka. Ya nok ka nawa kədawɗi zu di? 54Yesu azlanka: An in tat əgagdakan zuwa gagdak naw ɗari, Əbba yi dədawgagdakawa, ndən məs kədawnahaŋ na ndəni Maŋgəlva nokum. 55Ya nokum kəsənən ɓa, naw nəsənka. An nənahək na nəsən ɓa, wanəsaw məwə wən va munokum. Ya nəsənka, in tat ərma əpel nani. 56Abraham afukum zən nan annekik nawla pay nawa, awlaka annekenək zəni. 57Mə Yudeɗ aɓsənən kan na: Kəgap əzva kaklaw sle' tagay ɓa, yaŋ kəmna kulak Abraham? 58Yesu azlan sitik na: Gesiŋ gesiŋ nədawnah sukum: Tak muwani Abraham ɓa, in tatə. 59Yaŋ andaŋ gərmeŋge vi kaskani. Yesu aɗamka, ndən vit səddəv Gəla na Maŋgəlva.

Attualmente Selezionati:

Yohanna 8: GB

Evidenziazioni

Copia