Yohanna 9

Yesu tay əmbəlgən ɗəf məwan daŋgar

1Dawtoŋ na, Yesu awəl ɗəf muwan daŋgarə. 2Gewleɗ nan assohõnənək dawnəh na: Mərbəzəga, naway dəgəɗ mambray di, ndən sa awaniɓa migilin ka muwan daŋgarəŋka? 3Yesu azlanəka: Ndən dəgəɗ mambray ɓa, migilin ɓa, ya vi wəzeɗe na Maŋgəlva dərbaŋgən azani yi. 4Adan kapay yi tagay, adahək məɗɗegin wəzeɗe na ɗəf dəslənwa. Dəfəɗ tay əzzani, ɗəf tay dədawɓap əɗɗa wəza ɓa. 5#MAT 5:14; YOH 8:12Adan In tat aka dəlva, əkeɗeɗe na dələv nənani. 6Dərɓaga Yesu apel wənəska, ndən mefɗe afuŋ tufu, alaɓ dələv də mefɗe veti, yaŋ akip aka hara daŋgar naka. 7Yaŋ anah sən na: Dok əɗɗa horok a bobok na Silowe, va əboton na maslən. Ndən mbat aɗa haran kana, amil na tay ula.

8Adan meggeŋgiɗin dit ɗiy məzulanən lahəŋ daŋgla zəga aba tive awlanəni, aɓɗaŋ na: Ɗəfəŋki dədawsan aba tive əŋgla zəga nak ɓa sa? 9Ɗiy meɓɓet aɓɗaŋ na: Ndəni. Ɗiy meɓɓet aɓɗaŋ na: Awwo, ndəni ɓa, əgil agil va ndəni. Yaŋ anah dəvan na: Intə. 10Anah sənən kan na: Ya mbarmbari horok akol di? 11Azlanəka: Ɗəf məs adawyaŋ na Yesu dəlaɓ dələv akip aka harawa, yaŋ anah su na: Dok əɗɗa horok a Silowe. Səza nəmbat adak nəɗa, haraw akol kana. 12Yaŋ aɓsənən na: Aŋgay ɗəf van asan di? Amna: Nəsən ɓa.

Farisaɗe assohõnənək ma daŋgar məs məkol harani

13Akanənək ɗəf dəsan daŋgar lahəŋ nak azet Farisaɗe. 14Vi pay naffeti Yesu allaɓ dəlva, akol sən harani. 15Yaŋ Farisaɗe tam assohõnən ma daŋgar kan na Mbarmbar amsak ula di. Nan aɓsit na: dələv məllaɓən akip aka harawa, nəɗa, yaŋ nədawla. 16Ɗiy meɓɓet səret Farisaɗe aɓɗaŋ kan na: Ɗəfəs səza Maŋgəlva ade ɓa, adan dərma wən na pay naffet ɓa. Meɓɓet aɓɗaŋ na: Mbarmbar ɗəf məs mambray adawɓap əɗɗa sekeneɗ vas di? Uɗak agəɗək a waleŋti.

17Anahaŋ sənən daŋgar nak əmpa na: nok mbar kədawnəh akan adan akol suk horokuŋ di? Yaŋ nan amna: Məskəleŋgi yi. 18Mə Yudeɗ dətafnən na daŋgari lahəŋka yaŋ haran akolu ɓa hã ndəɗaŋ dah iyenin migil ɗəf məs haran dəkol naka. 19Assohẽtin dawnəh na: Ɗəfəŋ na, wətukumi, nokum kədawnahaŋ na muwan daŋgari, ya mbari adawla kakaŋ kan di? 20Migilin azlanən kana aɓɗaŋ na: Məsənək na aŋ wətəmi, daŋgar məwani. 21Ya mbar kakaŋ adawla di na, məsən ɓa, awaniɓa naway dəkol sən haran di na, nam məsən ɓa. Metiŋgini məssohõn mani, dəpel aka zən ndən dəvani. 22Migilin anahaŋ vasna vi tay əgeslne'eŋ sit mə Yudeɗi. Vi mə Yudeɗ vet aslereŋgək na, an ɗəf anahək na Yesu yi Kristu na, kawgilgəni səddəv gəla nakkal net Yudeɗi. 23Vini migilin anahaŋ na: Metiŋgini məssohõn mani.

24Farisaɗe ayanənək daŋgar təl ma sula'ən, aɓsənən na, agagdakan Maŋgəlva. Nam məsənka, ɗəfəŋka məs mambrayi. 25Azlanəka: An məs mambrayi, naw nəsən ɓa, zəga təttaka nəsənə, daŋgar nan lahəŋka, kakaŋ in tat ula. 26Aɓsənən na: Mi agəɗ suk di? Mbarmbari akol suk horok di? 27Azlan sitike: Nənah sukumuk səkay ya kəprəmnən ɓa. Vimi kəŋglaŋ əprəmən əmpa'a di? Nokum pak mokum aka əkkpaŋ gewleɗ nan sa? 28Aranənka: Aɓɗaŋ na: Istə gawla nani, nam gewleɗ na Moyis mənani. 29Nam məsənək na Maŋgəlva apel sənək Moyis, ya ɗəfəŋka, məsən sə təki ade ɓa. 30Azlani aɓsit na: As vani nassa sən gərəŋgə, nokum, kəsənən sə təki ade ɓa, ya akol suwək harawa. 31Məsənka Maŋgəlva aprim məs mambrayɗe ɓa, ya an ɗəf tay əgagdakan Maŋgəlva gəm əɗɗa əŋgla nani, waprəm sən ɗəfəska. 32Məprəmni ɗah na, ɗəf akoluk hara ɗəf məwan daŋgar ɓa. 33Va ɗəfəŋ səza Maŋgəlva yi ɓa, kəta zəga tay adawɓap əɗɗa ɓa. 34Azlanənka, aɓsənən na: Addəv mambray muwuk boku, yaŋ nok kədarbə səm zəga sa? Ndəɗaŋ firik əzgan appaka.

Daŋgar na makra ɗəfa

35Adan Yesu aprəm na arɓahanək appaka na, ndən pay ərəhəŋ aɓsən na: Nok, kətafək Wətən Ɗəf sa? 36Azlanəka, amna: Naway di Daya? Vi nətafgəni. 37Yesu aɓsən na: Kulaka, məzupel də isəŋ na, ndəni yi. 38Amna: Nətafəka Daya. Yaŋ Appu' abani.

39Yaŋ Yesu amna: Nəde aka dəlvəŋ na, vi kawtawwəni, vi məs awlaŋ ɓa dulaŋgəni, məzulaŋ tam dətipeŋgini. 40Yaŋ Farisaɗe səret en dəssoŋ dəndən aprəmən wənəska, aɓsənən na: Nam pak daŋgarɗe mənan kan sa? 41Yesu aɓsit na: Va daŋgarɗe kənanaŋ na, kəta a kəssoŋ də mambray ɓa, ya kakaŋ na mənokum tat ənəh na: Mənam tat ula. Vini mambray nokum asan slippe.

Attualmente Selezionati:

Yohanna 9: GB

Evidenziazioni

Copia