Yohanna 10

Wənməkkpaŋga na məzutaɗa dit timiŋgiɗi

1Yaŋ Yesu amna: Gesiŋ gesiŋ nədawnah sukum: Ɗəf an dəpeŋ də təki maɓɓani, atoŋ a gazlaŋ net timiŋgiɗ məza kəla maddamba ɓa, nan mahãlay, məvoŋtive yi. 2Ya məs dətoŋ də maddamba na, məzutaɗa net timiŋgiɗi. 3Məgə maddamba wakol səni, timiŋgiɗ tay əprəmən wəlani. Waye timiŋgiɗ nan pak də iya neti, vi kawket awra. 4An agilgitik pak na, wadaw abeti, timiŋgiɗ wazbanəni vi asənnənək wəlani. 5Sessel azbanən na malaka ɓa, wanzoŋ sənən dərəŋgə vi dəsənnən wəla malaka van ɓa.

6Yesu asla sitik ki van vaska, ya net dəsənnən na aka mi apel sit di ɓa.

Yesu, məzutaɗa moggoni

7Yesu anah sit əmpa na: Gesiŋ gesiŋ nədawnah sukum: Intə maddamba na gazlaŋ net timeŋgiɗi. 8Ɗiy məs dəzzoŋ daabəŋ kiyu pak məhẽlɗeŋ gəm məvoŋgoŋ tive, ya timiŋgiɗ dəprəmin ɓa. 9Naw, intə maddamba, an ɗəf atoŋguk dəkawa, wakõhu. Watoŋgu, wagili gəm warah ətaɗa. 10Məhãla nan əzzan na kawhãli, kawtaw wəlani gəm kawzani. Naw nəde na vi ɗiy dərəhaŋgən zeŋgile, dərahaŋgə məza man awsla ɓa.

11Naw, intə məzutaɗa moggoni. Məzutaɗa moggoni tay əppan zeŋgilen viyit timiŋgiɗ nani. 12Ya məzutaɗ vi kawrəha, məzutaɗa məs timeŋgiɗ vet nawray vanəŋ ɓa, an awlak kəramuyã əzzani, wappet timeŋgiɗ wanzani. Asna kəramuyã warme watraygiti. 13Vi məzutaɗ vi kawrəhi, tay dəssan dit timeŋgiɗ ɓa. 14#MAT 11:27; LUK 10:22Naw intə məzutaɗa an moggoni, nəsənik timeŋgiɗ nawa, timeŋgiɗ naw asənwənka 15Va Afən asənwa, vaski nəsən Afəni. Nəppanək zeŋgilew vi timiŋgiɗ nawa. 16In tat dit timeŋgiɗ meɓɓeti, məs na gazlaŋgəŋkəŋ ɓa. Net pak adahək nəkigini, waprəmən wəlawa, wakkpaŋgaŋ gazlaŋ taka, məzutaɗa taka.

17Sən aski Afən aŋgluwa, vi naw, nəppanək zeŋgilewa, vi nəmsakgən əgəmən. 18Ɗəf tay nawɓap əgəm su ɓa, in nədappan də vawa. In tat də gbogboŋ nappani, in tat də gbogboŋ namsak əgəmən. Aski mahenziŋ nərah səza Əbba.

19Uɗak agəɗək a walaŋgit mə Yudeɗ aka wən na əpelis əmpa. 20Ɗiy diyɗa səret aɓɗaŋ na: Tuya tay akani, atemke, vimi kədaprəmnən di? 21Ɗiy meɓɓet aɓɗaŋ na: As əpel na ɗəf mətemni ɓa. Tuya waɓap əkol heret daŋgarɗe sa?

Məzgani Yesu

22Dəpas na, əzləra naɗɗumon əkol ma Gəla na Maŋgəlva a Yerusalem mi, pay na təlapay yi. 23Yesu abbalək addəv Gəla na Maŋgəlva ammba genzek na Salmoŋ. 24Mə Yudeɗ akaraŋgək kini, aɓsənən na: Dewɗe kədawpələm səddəv gəgrəŋ nam di? An istə Kristu na anah səm kotak ɗa. 25Yesu azlan sitike: Nənah sukumək farə, ya kətafwən ɓa. Wəzaɗe məs nədaɗɗa də iya na Əbba əŋ dədawpeleŋ akawa. 26Ya nokum, mənokum tat də ətaf ɓa, vi naret timeŋgiɗ naw kənanaŋ ɓa. 27Timeŋgiɗ naw aprəmən wəlawa, naw nəsinike, azbawəni. 28In tat əpsit zeŋgile an faɗə, azaŋ na kpak ɓa hã faɗə. Ɗəf tay nawmõhit səvaw ɓa. 29Əbba məs dipsiwe adayək ki zəga pakə, ɗəf tay nawɓap əmõh zəga səva Afən ɓa. 30In də Afəni taka mənani.

31Yaŋ mə Yudeɗ allamaŋ gərmeŋge əmpa kaskani. 32Yaŋ Yesu aɓsit na: Nərbə sukumək wəzeɗe mogget diyɗa dəzzoŋ səza Afəni. Aka wəza mawan səretis kədaŋgla əskuwən di? 33#MƏS 24:16Mə Yudeɗ azlan sənənək na: Aka wən na wəza moggon mədaskuk ɓa, vi əpel mbərayən aka Maŋgəlva yi. Vi ɗəf kənani, is əɗɗa zuk va Maŋgəlva. 34#GLƊ 82:6Yesu azlan sitike: Məverni addəv mahenziŋ nokum na: Naw nənahək na meŋgilveɗ kənanaŋgə ɓa sa? 35Mahenziŋ ayek ɗiy məs əpel na Maŋgəlva agap azet na meŋgilveɗi, ya tay an nawɓap əzan Əpel na Maŋgəlva ɓa. 36Ɗəf an Maŋgəlva aweli, aslən aka dəlva. Nokum, mənokum tat ənahaŋ na, is tat əpel mbərayən aka Maŋgəlva, vi nənah na Wətən Maŋgəlva nənani sa? 37Ya an wəzeɗe na Əbba nədaɗɗa ɓa, asna kətafnən wən naw ɓa. 38Ya an in tat əɗɗeti, an kətafən na wən naw ɓa zlaŋ, mətaf wəzeɗe veti, vi kəprəmnəgəni gəm kəsənnəgən na Afən tay addəvwa, in tat addəv Afəni!

39Yaŋ akayaŋ tive narman əmpa, ya ndən kõh səveti.

40 # YOH 1:28 Yaŋ Yesu amndan əmpa dəgar ki Yurdeŋ, a təki məs Yohanna atəŋ əɗɗa baptem, asanək adaka. 41Ɗiy diyɗa azzoŋguk azani. Aɓɗaŋ na: Yohanna dəgəɗ sekene təttaka ɓa, ya an apel aka ɗəfəŋ pak gesiŋgi. 42Ɗiy nadak diyɗa atafənka.

Attualmente Selezionati:

Yohanna 10: GB

Evidenziazioni

Copia