Yohanna 11

Əmta na Lazar

1 # LUK 10:38,39 Ɗəf maɓɓan tay gbəgba'a, Lazar na Betani yi, walaŋgəla nat Miryam dət Marta məlməta. 2#YOH 12:3Miryam na, ndətə akən təman tursan aka təl Daya, təɓəlkət tələn də muhur kiyət nakə. Məlmət Lazar yi gbəgba'a. 3Milmiŋgiɗin məguluŋgit nek slən azan ənah sən na: Awle Daya, ɗəf məs kəŋgəl nak gbəgba'i. 4Adan Yesu aprəma, amna: Gbəgba' əs namtay ɓa, nawgagdakan Maŋgəlva yi, vi Wətən Maŋgəlva dərahgən gagdak dəndəni.

5Yesu aŋglutək Marta dət məlməta gəm Lazar. 6Adan aprəm na Lazar gbəgba'i, avoŋguk sula əmpa a təki asani. 7Yaŋ səɓɓan anah sit gewleɗ nan na: Məmil səm a Yude. 8Yaŋ gewleɗ nan azlan sənən na: Mərbəzəga Fari mə Yudeɗ adawkoyokun naskuk dit gərmeŋge ɓa, yaŋ kədaŋgla əmilye adaka? 9Yesu azlan na: Təbəz kəlaw kiyən sula yi addəv əsɓəta ɓa sa? An dəf tay ədaw kapaya, aŋgbay ɓa, vi tay ula əkeɗeɗe naka dəlvəŋka. 10Ya an ɗəf tay ədaw dəfɗa, waŋgbayə vi əkeɗeɗe tay azan ɓa. 11Səza apel wənəska, aɓsit na: Baynam Lazar aleŋke, wanəmbat vi kafɗahani. 12Gewleɗ aɓsənən kan na: Daya an əleŋ aleŋ wambələ. 13Yesu aka wən na əmta na Lazar apeli, ya net əɗɗumoŋ na aka wən net sin adawpele. 14Yaŋ Yesu anah sit kotak kan na: Lazar amtəka. 15Ya zu neki ammbokum adan in tat adak ɓa, vi kətafaŋgəni. Asna, məndam azani. 16Tomas məs adawyaŋ na meseŋge aɓsit gewleɗ meɓɓet na: Nam pak məndamə, məmtəgən dəndəni.

Yesu yi əsilye səka əmta gəm zeŋgile

17Adan Yesu agapə, arəhək agəɗək əvoŋ poɗo addəv magamas səkay. 18Ya Betani van go'oy də Yerusalem, zəga na kilometər hoku. 19Səret mə Yudeɗ ɗiyɗa dəzzoŋ azat Marta dət Miryam vi kazgətet aka wən na məlmit vani.

20Adan Marta təprəm na Yesu adeke, təmbatək ələmsəni, ya nat Miryam təsatək eŋgili. 21Yaŋ Marta təɓsən Yesu na: Daya va is tat aŋ na, kəta məlmu amtə na ɓa. 22Ya nəsənək na, kakaŋ zlaŋ, Maŋgəlva wapsuk məs kəssõhon pakə. 23Yesu aɓsət na: Məlmuk wasili. 24Marta təzlan sən na: Nəsənka wasil pay əsilye səka əmta, pay əgrak dəlva.

25Yesu aɓsət na: Intə əsilye səka əmta gəm zeŋgile. Ɗəf an dətafwa, an amtək dayday na, wasan madarani. 26Ɗəf madaran dətafu pak amtə na kpak ɓa hã faɗə. Kətafək sa? 27Təzlan sən na: Ha'aw Daya, naw nətafək na, istə Kristu, Wətən Maŋgəlva, məs dədazzan aka dəlva.

Yesu ahəmka

28Səza tənah vaska, ndət mbat təyət Miryam məlmət də mahaɗama dawnəh na: Mərbəzəga adeke, tay əyuko. 29Adan Miryam təprəma, ndət ləŋ le' mbat azani. 30Yesu dətoŋ a walaŋgəla tagay ɓa, tay a təki məs Marta tələm səni. 31Adan mə Yudeɗ məs dəssoŋ dəndət eŋgil vi kazgətat nak awlətən Miryam təsil fol təgili, azbatənka, azet na, a magamas təmbat kawhəm adaka.

32Adan Miryam təgap a təki məs Yesu asani, tulaka, ndət guduk ammba tələn dawnah sən na: Daya, va is tat far aŋ na, kəta məlmu amtə na ɓa. 33Səza Yesu awlət əhəma, mə Yudeɗ məs dəzzoŋ dəndət əhəmaŋgə. Makran sazlak mbagən gərəŋ. 34Yaŋ amna: Aŋga kəɗinən di? Azlan sənənka: Daya, ade awla. 35Yesu ahəmka. 36Yaŋ mə Yudeɗ anahaŋ ka na: Mula va aŋgluwa. 37Ya ɗiy meɓɓet səret aɓɗaŋ na: Ndən məs dəkol hara daŋgar na, aɓap na əɗɗa ka Lazar van adamta ɓa ɓa sa?

Məhhurgəni Lazar

38Makra Yesu agəɗək sazlak əmpa, ndən mbat a magamasə. Bətəŋ məmpan man də kalaɓi. 39Yesu amna: Məkol kalaɓə. Marta məlmən gəbay nak təɓsən na: Daya, waffoku, vi agəɗək əvoŋ poɗo səkayə. 40Yesu aɓsət na: Nənah suk na, an kətafka, a kula gagdak na Maŋgəlva ɓa sa? 41Azargənənək kalaɓ naka. Yesu aslanək haran a disiŋ, amna: Əbba, nəgəɗ sukuk soko vi kəprəmək mawa. 42Nəsənka is tat əprəm maw pay pakə, ya nənah vasna vi ɗiy məs ziwziw tərwəsləŋ dətafəngən na istə kəslənwa. 43Adan apel wənəska, anahək də wəlan dayadaya: Lazar agili. 44Gəbay agilke, tələn də van məveɗit də gabaga, haran tam mətərən də lukutu. Yesu aɓsit na: Məpəla, məppan dələ.

Ətuvur wən aka Yesu

(MAT 26:1-5; MAR 14:1-2; LUK 22:1-2)

45Diyɗa səret mə Yudeɗ məs dəzzoŋ azat Miryam awlanən məs Yesu agəɗə, atafənka. 46Ya ɗiy meɓɓet səret ambataŋgək azet Farisaɗe, anah sitinik zəgeɗ məs Yesu agəɗə. 47Deyeɗe net məsdəlveŋge dit Farisaɗe akkalaŋ kawsler meti, aɓɗaŋ na: Mbar mədaɗɗa di? Vi ɗəfəŋ tay əɗɗa sekeneɗ diyɗa. 48An məppanək tay əɗɗa vaska, ɗiy pak watafəni. Asna mə Romeɗ wazzoŋ kawmõh təki salala nam gəm ɗiy namə. 49Ɗəf taka səreti, Kayafas daya net məsdəlveŋge əzva daska, aɓsit na: Nokum zəga tay kəsənaŋ ɓa. 50Ya kawlanən na, ərəhi azokum an ɗəf taka amtək viyit ɗiyi, ki ɗiy pak əzaŋgə ɓa sa? 51Sən kini apel vas ɓa, ya daya net məsdəlveŋge aka əzva nani, kəleŋ agəɗ na: Yesu wamtə viyit mə Yudeɗi. 52Viyit mə Yudeɗi kaka' ɓa, vi kawsepet kirtin Maŋgəlva məs dətərayaŋ aka dələv gboŋgi.

53Təŋ dəpaski armanən wən nawbayən kana. 54Vi vaski Yesu abbal birre a walaŋgit mə Yudeɗ ɓa. Yaŋ ambat sədak aka kivadələv go'o də kapta-muyã a walaŋgəla-metiŋ məs adawyaŋ na: Efrayim, asanək dit gewleɗ nan adaka.

55Pak əzləra net mə Yudeɗi go'oy, ɗiy naka vadələv van azzoŋguk Yerusalem tak Pak dəɓəl ɓa, vi kabbur ziti. 56Akayanənək Yesu, anahaŋgək a walaŋ zit addəv Gəla na Maŋgəlva na, mbar kədaɗɗumoŋ di? Hara ade na a wəzləra ɓa faɗ sa? 57Deyeɗe net məsdəlveŋge gəm Farisaɗe aɗiyənək wen nan na, an ɗef asənək a teki asani, dəssakə, dərmanəngəni.

Attualmente Selezionati:

Yohanna 11: GB

Evidenziazioni

Copia