Yohanna 12

Miryam təmanək tursan aka tel Yesu

(MAT 26:6-13; MAR 14:3-9)

1Əvoŋ sləre tak əzləra na Pak, Yesu mbat a Betani a təki Lazar məs asilgən səret ɗiy mimtit nak asani. 2Aɗɗaŋ sənənək əzəm adaka, Marta məzuɗakən, Lazar tam tay aret ɗiy en dəzəmaŋ dəndəni. 3#LUK 7:37,38Yaŋ Miryam təgəm tursan na nard məs əlbah nan tuwãh diyɗa də dədak litər, təmanək aka təl Yesu, yaŋ təkəlɓət tələn van də muhur kiyta. Gədəv gəla pak aknahək də məŋgənən. 4Yaŋ Yudas Iskariyot, taka naret gewleɗ nan, an məs nawzəm kiyən amna: 5Vimi məvəlni tursan vanəŋ koɓeɗ səkat hoku kapsit məssehẽŋɗe ɓa di? 6Anah vasna, sasahĩt məssehẽŋɗe awəl ɓa, vi məhãlayi. Mərəm gabal net deleɗi, tay əhãl deleɗ məziyit addəvən. 7Yaŋ Yesu anah kan na: məppata, təzaɓan na ammba pay an nawndəkwi. 8#ƏMS 15:11Vi Məssehẽŋɗe tahəŋ də munokum pay pakə, ya naw na, kərəhwən na pay pak ɓa.

Wən mətuvur aka Lazar

9Ɗiy diyɗa səret mə Yudeɗ aprəmənək na Yesu tay adaka, yaŋ addoŋ adak vi Yesu kaka'i ɓa, sap vi kawla Lazar məs asilgən səret ɗiy mimtitiŋki yi. 10Deyeɗe net məsdəlveŋge aziwgininik na nawbay Lazar'e. 11Vi aka wən nani mə Yudeɗ diyɗa appetini, atafən Yesu.

Yesu tay ətoŋ a Yerusalem

(MAT 21:1-11; MAR 11:1-11; LUK 19:28-40)

12Vit pumpum nani, vanday net ɗiy dəzzoŋ a wəzləra nak aprəmək na Yesu tay əzzan a Yerusalem. 13#GLƊ 118:25,26Akslohõnguk va gugozlo, agilyoŋ ələmsəni, tay ənzlaŋ vaŋvəl na: Hozana, əzaɓ aka məzəzzan də iya na Daya, məlĩ na Israyel. 14Yesu arahək wət koro ndən peŋ akan va məverin na:

15 # ZAK 9:9 Kəgeslne' ɓa waŋ na Siyon.

Məlĩ nok yaŋ əzzani,

tay akat bəlatək na koro.

16Aka ətəŋ nan na, gewleɗ nan dəprəmnən gabban ɓa. Ya adan Yesu atoŋ addəv gagdak nani, aɗɗumonənək na akan məver zəgeɗiski, anet zəgeɗ vetis məgəɗ səni.

17Vanday net ɗiy dəssoŋ dəndən gala aya Lazar səddəv magamasə, asilgən səret ɗiy mimtit nak apelinik məs awlaŋgə. 18Sən aski yi vanday net ɗiy diyɗa azzoŋ ələm səni, vi aprəmənək na, tay əɗɗa sekeneɗi. 19Yaŋ Farisaɗe, anahaŋ awalaŋ zit na: Kulanənka, tay məs kədawtəraŋ ɓa, mula, ɗiy pak tay əzbanəni.

Grekɗe meɓɓet tay əkayanən Yesu

20Grekɗe tahəŋ taka taka aret ɗiy en dəzzoŋ əgagdakan Maŋgəlva pay na wəzləra, 21azzoŋguk aza Filip ɗəf na Betsayda na Galile, assohõnən dawnah sən na: Daya, mam aka ula Yesu. 22Filip mbat, anah sən Andre yaŋ anah sənən Yesu ndəɗaŋ sulegit pakə. 23Yesu azlan sit dawnah na: Pay agapək kakaŋka, ka gagdak na Wətən Ɗəf dərbangən zəni. 24Gesiŋ gesiŋ nədawnah sukum: An zeŋve na haykəmari dəbət aka dəlvafuŋ dəmtə ɓa wasan takərgəni. Ya an amtəka, asna waɗi aran diyɗa. 25#MAT 10:39; 16:25; MAR 8:35; LUK 9:24; 17:33Ɗəf dəŋglu zeŋgilen pak wazani. Ya ɗəf dəzel zeŋgilen aka dəlvəŋka, wakõhgən faɗə. 26An ɗəf aŋgələk əgəɗ su wəza, dəzbawa, vi a təki naw nəsawa adaki məgəɗ wəza an naw adawsani. An ɗəf tay əgəɗ su wəza, Afən wagagdakani.

Yesu tay əpel aka əmta nani

27Yaŋkəŋ na makraw azlzlaɓka. Mi nədawnah di? Əbba akõhgu səddəv ənziyaŋka? Ya sən aski nəde aka pay vanəŋka. 28Əbba, agagdakan iya noko! Əpel kan pay sə disiŋ na: Nəgagdakanəka, wanəgagdakan əmpa.

29Səza vanday net ɗiy dəssoŋ adak aprəməni, aɓɗaŋ na: As əhãy na buni. Ɗiy meɓɓet aɓɗaŋ na: Maslay dəpel səni. 30Yesu aɓsit na: əpelis dəde viyu ɓa, vikumi. 31Kakaŋki pay nawtawwən aka dəlvəŋka. Kakaŋki adazganən məlĩ na dəlvəŋ appaka. 32Naw an məslawi səka dəlvafuŋ na, wanətiɗ ɗiy pak azawa. 33Də əpeliski arban zev əmta məs adamta. 34#GLƊ 110:4; ISA 9:6; EZE 37:25; DAN 7:14Vanday net ɗiy azlan sənənək na: Məprəmək səddəv mahenziŋ na, Kristu wasan hã faɗə. Ya mbari nok kədawnəh na kawslani Wətən Ɗəf a disiŋ tagay di? Naway Wətən Ɗəf vanəs di? 35Yesu azlan sitik na: Əkeɗeɗe tay a walaŋkum pay siɗikke tagay. Mədaw aka əkeɗeɗe tay də mənokum, vi guzli adawgulkum ɓa, vi məzudaw ara guzli awsən a təki məs adaddan ɓa. 36Aka mənokum tat də əkeɗeɗe'e, mətaf əkeɗeɗe'e, vi kəkkpaŋgaŋgən kirtin əkeɗeɗe'e.

Mə Yudeɗ tay ətafnən Yesu ɓa

Səza Yesu anah wənəska, ndən mbat haɗam faraɗa səzeti. 37Də agəɗ sekeneɗ ama heret gbaŋkəŋ pak dətafən ɓa. 38#ISA 53:1Vi əpel na məs kəleŋ na Isaya dəknahgəni, məs anah na:

Daya, naway dətaf an aprəm səmam di?

Sən naway Daya arban gbogboŋ na van di?

39Sən aski dəɓap ətafən ɓa, vi Isaya anahək əmpa na:

40 # ISA 6:10 Maŋgəlva atipik hereti,

aɓɓəlanək makreti,

vi adawlaŋ də heret ɓa, makret adawsən zəga ɓa,

vi adawmilyoŋ azaw in kawmbəlgit ɓa.

41Isaya aneh zəgeɗis na: Vi awlak gagdak nani, apelik akani.

42Ya də as pak diyɗa səret ɗiy gugriɗ atafənka. Ya sən wən net Farisaɗe, dərbanən zit ɓa, vi adawgilgitin səddəv gəla nakkal net mə Yudeɗ ɓa. 43Vi gagdak səzet ɗiy aŋglaŋ dayki an səza Maŋgəlva.

Ətawwəna də əpel na Yesu

44Yaŋ Yesu anah dayadaya na: Ɗəf an dətafwa, anaw ataf ɓa, ana məs dəslənwi yi. 45Ɗəf məs duluwa awlak məs dəslənwa. 46In əkeɗeɗe'e, nəde aka dələv na, vi ɗəf məs dətafu pak adawsan ara guzli ɓa. 47An ɗəf aprəmək əpel nawa, ya dəzban ɓa, intə nawtawwən akan ɓa, vi nəde kawtaw wən aka dələv ɓa, vi kawkõhgən dəlvi. 48Ɗəf məs dəzgaw pak, dətaf əpel naw ɓa, tay də ɗəf an nawtaw wən akan səkayə, əpel məs nəpeliŋki nawtaw wən akan pay əgrak dəlva. 49Vi naw nəpel na kiyu ɓa, ya Afən məs dəslənu dəvan dədawɗi su wən nani, dədapsu an nədawpele də an nədarba. 50Nəsənəka, məs aɗi su wən nan van zeŋgile an faɗi. An məs nədawpele, vaski Afən anah suwa, vas nədawpelin.

Attualmente Selezionati:

Yohanna 12: GB

Evidenziazioni

Copia