Lucas 14

I Jesús xukunaj jun achi sipol pa uxlanb'al ij

1Xuk'ulmaj che jun ij sábado, i Jesús x-e pa wa'im chi rachoch jun chke i kaj-atzil aj fariseo, xaq je o jub'an chik aj fariseo ketijin chuk'ak'alixik i Jesús. 2Xaq chila o jun achi chwach i Jesús, chi sipojnaq uch'akul. 3Are uri i Jesús o jun tzij xutz'onoj chke i je tijonelab' re i ujer atb'al tzij xaq chke i aj fariseo. Xub'ij chke:

—I atb'al tzij tz'ib'tal kan rumal i mam Moisés ¿Kuya nawi chqe kqakunaj jun iwab' che i ij sábado, o kuya taj? —Xcha.

4Ike xech'aw taj. Are uri i Jesús xuchap i achi, xaq xrutzirsaj, xaq xutaq b'i chi rachoch. 5Te'uri xub'ij chke i aj fariseo:

—Pachin taq wa chiwe yix, we i rak'al o we ub'oyex ktzaq b'i pa jun jul. ¿Xatab'a kresaj ta loq? Rumal sábado. 6Ike xkiriq ti chik ula'ik uwach che.

I je sik'im che jun nim laj wa'im

7Te'uri i Jesús xrilo chi o jujun chke i je sik'im chwa'im, xa kkitzukuj i kub'ib'al chi o u'ij are kekub'i chi mexa. Rumali xub'ij i jun pixb'aniki chke:

8—Yet, we o jun winaq katusik'ij che jun nima'ij re k'ulankil, matkub'i che i kub'ib'al mas o u'ij. Man moq o jun kk'un na chi mas o u'ij chawach yet. 9Te'uri kk'un i rajaw ja, chi ix usik'im chixkeb'; moq kub'ij chawe: “Chaya akub'ib'al che i jun le”; te'uri yet to' katk'ix che, xaq kat-e chutzukuxik jun ak'ijib'al chi nti u'ij. 10Rumali, we o jun katusik'ij che jun nima'ij, yet chatkul che i k'ijib'al chi nti u'ij. Man we keje k-an ile, i rajaw ja kk'un uri awu' xaq kub'ij chawe: “Wachalal, sa'aj ni jewa ri che jun k'ijib'ali chi mas o u'ij.” Keje ile koksax ni a'ij chkiwach konojel i je kul awu' chi mexa. 11Man pachin jun ku'an nim che rib', xa kqajsax ni u'ij; xwiri pachin k-on ch'utin che rib', knimarsax ni uri u'ij —xcha i Jesús chke.

12Te'uri xub'ij che i achi chi sik'iwnaq che i wa'im:

—Yet, are k-an jun nima'ij, o xaq we kaya jun wa'im re uqajb'al ij, measik'ij i je awamiy man ike at kisik'im yet, xaq mitene awatz acha'; xaq mitene i je awachalal, xaq mitene alok'anij chi je b'eyom, man ike xa katkisik'ij tan chik ku' chwa'im, rumali xa ke'eloq chi kitojom ni chawe wach i xkitij awu'. 13Are i ka'ano, are ka'an jun nim laj nima'ij, cheasik'ij i nib'a'ib', cheasik'ij i je sik, i je klis, xaq i je mawach. 14Keje ile katkikot na. Ike ketiki ti chutojik chawe, xwiri i Dios kutoj ni chawe are kuriq i ij chi kewalij ni'pa i je utz chi je kamnaq. Keje ile xub'ij i Jesús chke.

Tijojb'al tzij chrij i nim laj wa'im

15Jun chke i je kul chi mexa, are xuta i tzij le, xub'ij che i Jesús:

—¡Utz ke ike chi ke'ok che i nim laj wa'im che i ajawinik re i Dios!

16I Jesús xub'ij che:

—O jun achi xuyijb'a jun nim laj wa'im re uqajb'al ij, xaq xeusik'ij uk'iyal taq winaq ru'. 17Are xuriq i or, xutaq umokom chub'ixkil chke chi is yij chik wach i kkitijo. “Chixpetoq, man ronojel is yij chik”; xub'ij chke. 18Are uri, konojel is xe'ok chutz'onoxik kuyb'al mak che. I nab'e xub'ij: “Yin k'a te inlo'om jub'an wulew, xaq o uchak kin-e chrilik; kintz'onoj chawe chi kakuy ni inmak” —xub'ij. 19I jun chik xub'ij: “Yin k'a te inlo'om jo'ob' yunt inb'oyexab', xaq ke'ewila we je utz che i chak. Kintz'onoj chawe, chakuyu inmak.” Xcha. 20I jun chik xub'ij: “Yin k'a te in k'ulinaq, rumali kin-e taj”; xub'ij. 21I mokom, are xtzalij ru' i rajaw uchak, is xub'ij ronojel ile che. Are uri i rajaw uchak xpe roywal, xaq xub'ij che umokom: “Chab'isoj, jat pa taq b'e re i tinimit, xaq pa taq ch'ut b'e; cheak'ama li i nib'a'ib', xaq ni'pa i je sik, xaq i je klis, xaq i je mawach” 22Are xtzalij li mokom, xk'un chik ru' i rajaw uchak xaq xub'ij che: “Nim laj winaq, ya xin-ano pacha i xab'ij chwe, xaq k'a o i k'ijib'al nti rajaw.” Xcha. 23Are uri i rajaw uchak xub'ij chik che umokom: Jat tzam taq ja, chatzukuj pa taq b'e chila, xaq pa taq ch'ut b'e, xaq cha'ana li pen kik'amik i je o chila, man keje ile kinnojsaj ni wachoch. 24Man saq laj tzij kinb'ij ni chiwe chi ni'pa i xeintaq kisik'ixik nab'e, mijun chke kutij i nim laj wa'im chi inyijb'am.

K'ax i terejik chrij i Cristo

25Lik je k'i i winaq je teren chrij i Jesús. Ire xupiskilij rib' xaq xub'ij chke: 26—Jun, we kk'un wu' yin, xwiri we mas k'ax ti kinuna yin chwach uqajaw xaq chwach uchuch, chwach i rixoqil, chwach i ralk'uwal o chwach uxib'al xaq chwach i ranab', ktiki ti che i terejik chwij we mas k'ax kuna rib' ire chinwach yin. 27Jun we yin, o uchak kterej chwij, tupu kkam ni wumal. Pachin kraj ti u'anik ile, kmajaw ti uri che chi intijoxel yin.

28—We o jun chiwe kraj kuyak jun ja tak'tik, ¿Ire xatab'a kkub'i ti chuch'ob'ik ni'pa i pwaq rajwaxik che, krilb'ej re we k-ono re kuk'isb'ej re? 29Keje ile ku'an na, man moqxa xwi i ukub'ib'al kuyijb'a, xwiri kuk'is taj, ni'pa i keilawik ke'ok chuyo'yaxik, 30Kkib'ij na “I achi le xujeq u'anik i ja xwiri xtiki ti chuk'isik”; kecha. 31We o jun ajawinel k-e pa ch'oj chrij jun chik ajawinel, ¿Xatab'a kkub'i ti nab'e chuch'ob'ik we ktiki che i ch'oj ru' jo'mo' juchiy (10,000) uwinaq chi je yij che i ch'oj; man i jun chi kolu'ana ch'oj, je rok'am li lajujmo' kachiy (20,000) uwinaq chi je yij che i ch'oj? 32Xwiri we kuna ub'e chi ktiki ti che i ch'oj ru', keutaq b'i jub'an utaqon ru' i ajawinel chi ya kk'unik. Man tz'aqat k'a naj o wi loq kutz'onoj utzil che chi kkichomaj kib' chkiwach.#14.32 Keje i tijojb'al tzij ile xub'ij i Jesús chke i winaq, man o uchak kkich'ob' na we kkich'ij i terejik chrij. 33Xaq keje uri:

—Yix ile; man jun we kukanaj ti kan ronojel ni'pa i o ru', ktiki ti uri che i terejik chwij.

Are ksach utzayil atz'am

34I atz'am lik kuriq uchak chqe, xwiri we xsach i utzayil, ¿Wach u'ankil uri re ku'an tan chik tza? 35Lik nti chik uchak uri. Mitene re kuriq taq uchak pulew re xo'ol re orno, xaq mitene re kuya ucho'ab' uwach ulew. Lik nti chik uchak uri. Pachin o uxikin chutayik, lik chuta ub'e; xcha i Jesús chke.

Attualmente Selezionati:

Lucas 14: ACHICUB

Evidenziazioni

Copia