Lucas 13

Lik o uchak kqajalwachij qak'ux

1Che taq i ij le je o jujun chila xe'e chrilik i Jesús, xkilap che chi ma Pilato je ukamsam jub'an winaq aj Galilea, xaq xu'on xaqjun che i kikik'el ru' i kikik'el i chikop chi kisujum.

2I Jesús xula' uwach chke:

—¿Kib'ij yix chi i winaq aj Galilea xkik'ulmaj ile man lik mas je ajmakib' chkiwach i jub'an chik winaq re i tinimit. 3Xwiri kinb'ij chiwe chi keje taj. Xaq lik keje yix, we kijalwachij ti ino'oj, yix kixkam ni uri. 4¿Kich'ob' b'a wa yix chi i wajxaqlajuj chi xekam chuxe' i ja tak'tik chila Siloé chi xtzaq li pkiwi, lik mas o ni kimak ike chkiwach i jub'an chi je jeqel pa Jerusalén? 5Yin kinb'ij chiwe chi keje taj. Xaq yix, we kikoj ti i Dios, xaq kixkam na.

I tijojb'al tzij re i higuera chi kwachin taj

6 # 13.6 Cf. Isaías 5.1-7; Jeremías 2.21; 8.13. I Jesús xub'ij chik jun tijojb'al tzij chke. Xub'ij: “O jun achi utikom jun uche'lal higo prulew. X-e chrilik we o uwach; xwiri nti xuriq che. 7Are uri xub'ij che umokom chi kuchajij i tikb'al uva: Wila pe', oxib' junab' iri kintzukuj uwach, xwiri lik nti kinriq che. Chak'atzij, man to' k-on latz' waral”; xub'ij. 8I umokom xub'ij: “Nim laj winaq, chaya chik jun junab' che. Kintuk jub'i' uxe', xaq kinkoj awon che. 9Keje ile, moqxa kuya ni uwach; we ntaj, te'uri kk'atzixik” —xub'ij i mokom che.#13.9 Keje i tijojb'al tzij ile xub'ij i Jesús chke.

I Jesús xrutzirsaj jun ixoq che i ij sábado

10 # 13.10 Keje i tijojb'al tzij ile xub'ij i Jesús chke. Xuk'ulmaj julaj chi Jesús ktijin chuk'utik chke i winaq pa ja re molb'al ib' ke i Judío che jun ij sábado. 11Chila o wi jun ixoq iwab', wajxaqlajuj junab' o chik che chi to' iwab' rumal jun itzel tew i ixoq le to' luklik chik rij rumal, ktiki ti chik chusuk'b'axik rij. 12I Jesús, are xrilo, xusik'ij ru' xaq xub'ij che:

—Ixoq, ya at utzirnaq chik che ayob'il.

13Te'uri, xuya u'ab' puwi; are uri i ixoq juntir xsuk'i i rij, xaq xujeq ukojik u'ij i Dios. 14Are uri i aj-atzil re i ja re molb'al ib' ke i judío xpe roywal che i Jesús man xrutzirsaj i ixoq che i ij sábado. Xub'ij chke i winaq:

—O waqib' ij che i seman re i chak. Che i waqib' ij le, we kiwaj kixk'unik re kiwutzirsaj iwib'. Xwiri mi'an ile che i ij sábado —xub'ij chke.

15Are uri i Ajwal xula' uwach che:

—Yix ¡Xa keb' ipalaj! ¿Xatab'a iwonojel yix che i ij sábado kitor ti jun i chikop o jun i b'uru re kiyab'ej uya'? 16Xwiri i ixoq le, chi umuq uxikin i mam Abraham, o chik wajxaqlajuj junab' che, chi yut'tal uch'akul rumal Itzel. ¿Xatab'a utz taj kqesaj i yob'il che we sábado? —Xub'ij.

17Are xub'ij i Jesús ile, i je ajch'oj chrij lik xek'ix che. Xwiri konojel i winaq lik xekikotik rumal i nimaq taq anik xu'an i Jesús.

I tijojb'al tzij chrij ija re mostas

18Te'uri i Jesús xub'ij chke: “I ajawinik re i Dios ¿Wach nawi kmajawik? ¿Wach nawi ru' kinjunamsaj wi? 19Kinjunamsaj ru' jun ija re mostas chi jun achi kutik prulew, kk'iyik pacha unimal jun che', chi lik nim, te'uri i tz'ikin kki'an kisok chwi taq u'ab'.”#13.19 Keje i tijojb'al tzij ile xub'ij i Jesús chke, re kusaqij chke wach uk'iyarik i ajawinik re i Dios.

I tijojb'al tzij chrij i wa re trigo chi nti kunb'al ru'

20I Jesús xaq xub'ij:

—I ajawinik re i Dios ¿Wach nawi ru' kinjunamsaj wi? 21Keje pacha i kunb'al re i wa re i trigo chi jun ixoq kuyot' b'i oxib' pajb'al arin ru', re kuwalijsaj uwach ronojel i or.

Uchija chi pich' uwach

22I Jesús are ktijin che i b'e enam re pa Jerusalén, lik xujeq uk'utik chke i winaq pa taq tinimit xaq pa taq komon, ipa kik'aw wi. 23O jun xtz'onow che:

—Ajwal, ¿Ne te k'i ketotajik? —Xub'ij.

I Jesús xula' uwach che:

24Chikoch'ij iwach che i okik che uchija chi pich' uwach; qatzij kinb'ij chiwe k-on panoq je k'i kkaj ni okik, xwiri ke'ok ti chik. 25I rajaw ja we ya utz'apim chik i uchija, kujaq ti chik chiwe. Yix chi ix o kan chisaq kik'ojk'a na, xaq kib'ij ni che: “¡Nim laj winaq, chajaqa i uchija chqe!” Ire kub'ij ni chiwe: “¿Pa ix petnaq wi yix? Yin weta'am ti iwach”;

26Te'uri yix kib'ij na:

—Yoj qatijom i qawa awu', xaq qatu'um qaya' awu'; xaq at k'utunnaq pqatinimit; kixcha che. 27Xwiri Ire kub'ij ni chiwe: “Weta'am taj ipa taq ix petnaq wi yix. Chixel chinwach; ix aj-anol utz taj”. 28Te'uri lik kix-o' na, lik kiqach'ach'ej ni iware xaq kiwil na chi pa ja je o mam Abraham, mam Isaac, mam Jacob; xaq konojel i profeta is je o chila pa ajawinik re i Dios, xwiri yix lik xixkanaj kan chisaq. 29Xaq keupon ni ni'pa i je aj prelb'al ij, i je aj pqajb'al ij; ni'pa i je aj pa wiqab'im, i je aj pa moxim; kkitij ni wa pa ajawinik re i Dios. 30Are uri je o jujun chi wo'or je o pa k'isb'al re; k-on panoq kenab'ej na; xaq je o jujun chi wo'or je nab'e, xwiri k-on panoq kekanaj ni pa k'isb'al re.

I Jesús ko' che i tinimit Jerusalén

31Che i ij le, xeupon jujun aj fariseo ru' i Jesús, xaq xkib'ij che:

—Chat-el b'i chi man i ma Herodes kraj katukamsaj.

32Ire xula' uwach chke:

—Jix i chib'ij che i utz ti laj winaq le chi wo'or xaq i chweq kewutzirsaj i iwab'ib' xaq kwesaj b'i itzel tew chke. Keje ile kin-an na k'a kab'ij, te'uri kk'is inchak. 33Xwiri, yin, enam we pa Jerusalén, wo'or, chweq xaq i kab'ij. Kinmayij taj man jun profeta kmajaw ti che we pa Jerusalén taj kkamsax wi

34—¡To' iwach yix, ix aj Jerusalén! ¡Yet chi keakamsaj i profeta; yet chi kakoj ab'aj chke i ajtaqon re i Dios chi keutaq li awu'! ¡K'iyalmul lik inrayim kimolik i awak'al wu' pacha ku'an jun ati ak' chi keumol i rak'al chuxe' uxik'! Xwiri xawaj taj. 35Chita pe', iwachoch yix lik kiwo'taj ni kanoq xaq kinb'ij chiwe, chi lik kiwil ti chik inwach k'a kuriq ni ij chi kib'ij na. “¡Chuya ni utz i Ajwal Dios puwi i Jun chi kk'un pub'i!”

Attualmente Selezionati:

Lucas 13: ACHICUB

Evidenziazioni

Copia