Lucas 12

I Jesús klapan chrij i keb' kipalaj

1Che taq i ij le, lik k'iyal lajujwinaq kamo' (1,000) i winaq xemoltaj ru' i Jesús, rumali lik kkipitz' kib' chkiwach. Are uri i Jesús xujeq ch'a'atik ku' utijoxelab'.

—Chi'ana kwent iwib', moqxa kix-elik ix keje pacha aj fariseo, xa keb' kipalaj. 2Man ni'pa k'amaja k-aljinik k-aljinsax na, xaq ni'pa i uwam uwach k-etamax na man kel chisaq. 3Rumali, ronojel ni'pa ib'im yix pa equmal, ktataj ni utzijol chisaq; ni'pa ib'im ni pa ja ani'al are i tz'apim i uchija, o i ksik'in ni chub'ixkil chwi taq ja —xcha i Jesús.

Pachin che kqaxij wi qib'

4Yix chi ix wachi'il kinb'ij ni iri chiwe: Mixij iwib' chke i kkikamsaj i ch'akul, xwi ile ketiki chu'ankil. 5Yin kinb'ij ni uri chiwe pachin che chixija wi iwib': Chixija iwib' uri che i Dios; man Ire we xixkamsaxik o pu'ab' kixuya pa a' chi ktoqowik ronojel ij saq.

6Iweta'am chi kk'ayix ti jo'ob' tz'ikin chwach keb' pwaq mer. Xwiri i Dios lik kerilo; mijun chke ktzaq li pulew we Iqajaw yix chikaj kuya ti che. 7Xaq keje yix, i Dios lik kixuchajij. Ire is rajlam ni'pa iwi o che ijolom. Mixij iwib' uri; yix mas o ni i'ij chkiwach uk'iyal i tz'ikin —xcha i Jesús chke.

Uya'ik retamaxik i Cristo chkiwach i winaq

8Te'uri xub'ij chke:

—Kinb'ij iri chiwe: Ni'pa i kiya'om kiwach wu', we kkib'ij chkiwach i winaq chi je we yin, xaq yin kinb'ij ni chkiwach i ángel re i Dios chi ike je inwinaq yin. 9Xwiri je ni'pa i kkib'ij chkiwach i winaq chi ne te we yin, xaq yin kinb'ij ni chkiwach i ángel re i Dios chi ike je ne te we yin.

10I winaq, chi k'ax kech'aw chwij yin, chi Xinalaxoq chwach Ulew pacha Winaq, ile kkuytaj ni chke; xwiri i jub'an chi k'ax kech'aw chrij i Lo'laj Utewal i Dios, i mak le lik nti ukuytajik.

11K-on panoq i je ajch'oj chiwij, kixkik'am nu b'i chwach i nimaq taq winaq pa ja re i molb'al ib' ke i judío, chwach i atb'al tzij, o xaq chkiwach i atol tzij. Are kki'an ile, mixk'achir tan chuch'ob'ik wach i tob'al iwib' ki'ano, mixk'achir tan wach i kib'ij chkiwach, 12man i Lo'laj Utewal i Dios kuk'ut ni chiwe wach i kib'ij are kuriq i or le. Keje xcha i Jesús ile chke utijoxelab'.

Mojtzaq taq chupam i b'eyomal

13O jun achi chkixol i winaq xub'ij che i Jesús:

—Tijonel, chab'ij che i watz chi kujach ni nik'aj we re i ub'itaq re inqajaw, chi xkanaj kan pu'ab' ire are xkamik.

14Are uri i Jesús xula' uwach che:

—Achi, are ti inpatan yin ile, chi kin-an atb'al tzij che wib' chuyijb'axik ile chiwe —xcha che.

15Te'uri xub'ij chke konojel:

—Chi'ana kwent, moqxa ki'an che iwib' chi xa ix ajrayinel, xa ix molonel re ub'itaq iwe; man rumal ti uk'iyal ub'itaq iwe le o ik'aslemal saqil —xcha.

16Are uri xub'ij jun tijojb'al tzij chke:

—O jun achi lik b'eyom; i rulew lik k'i i molonik xuya'o. 17Ire xujeq uch'ob'ik uri: “¿Wach i kin-ano? Nti pa kink'ol wi inmolonik.” —Xcha. 18Te'uri xuch'ob' puk'ux: Weta'am chik wach i kin-ano; kinwulijsaj i k'olb'al re inmolonik, te'uri kin-an jub'an chik mas nimaq chwach ile. Kink'ol ni'pa inmolonik chupam, xaq i jub'an chik ub'itaq we. 19Te'uri kinb'ij che wib': Lik utz we yin, man o ni ronojel wu', wach i rajwaxik chwe k'iyal junab' uwach. Kinchakun ti chik, to' kinuxlanik, xwi chik kintij inwa, xaq kintu'unik i kinkikot na. Keje ile kinb'ij na; xcha i achi puk'ux. 20Xwiri i Dios xub'ij che: “Achi, ¡Laj at b'uy! Wo'or cha'ab' katkam na. I ni'pa i ub'itaq awe chi ak'olom ¿Pachin re uri?” Xcha i Dios che. 21Keje ile ke'el chke ni'pa i to' kkich'ob' umolik i kib'eyomal, xwiri xa je nib'a' chwach i Dios —xcha i Jesús chke.

I Dios keuchajij i rak'al

22Te'uri i Jesús xub'ij chke utijoxelab':

—Rumali mixk'achir che ik'aslemal, mixk'achir che wach i kitijo tzuqb'al iwib', xaq mixk'achir che i'u' chi kikojo ch'uqb'al iwij. 23I k'aslemal, lik mas rajwaxik chwach i wa, xaq i ch'akulaj lik mas rajwaxik chwach i k'ul chi kkojik. 24Chich'ob'o ut wach kki'an i joj: Ike, nti kkitiko xaq nti kkimolo, xaq nti k'ijib'al pa kik'ol wi ija. Tupu kki'an taj, i Dios keutzuqu. Xwiri yix lik mas ni nim i'ij chkiwach ike. 25We to' kik'achirsaj iwib' nti kuchakuj uri. Mijun chiwe ktiki chuk'iyarsaxik i ij re uk'aslemal tupu lik kk'achir che. 26We kixtiki ti chu'ankil ile chi nti qas uchak ¿B'uchak uri lik kixk'achir che wach i kitijo, xaq i ch'uqb'al iwij?

27Chich'ob'o ut wach kki'an i kotz'ij. Ike kek'achir ti chuch'akik ki'u', xaq mitene uyijb'axik. Tupu kki'an taj, lik chom ki'u'. Kinb'ij chiwe: Lik mas ne chom i ki'u' ike chwach i u'u' i nim laj ajawinel mam Salomón ujer chi lik b'eyom. 28Keje ku'an i Dios ile chke i kotz'ij pa taq es, chi xa keb' oxib' ij k'aslik: Wo'or k'aslik, xwiri chweq kk'atsax pa a'. Ire kuya i chom laj u'u' i ral kotz'ij le ¿Xatab'a kuya ti uri iwe yix? Kuya'o. ¡Xwiri yix lik o rajwaxik ukub'ib'al ik'ux che i Dios! 29We keje ku'an i Dios ile, mixk'achir uri chutzukuxik wach i kitijo xaq wach i kitu'u. 30Ni'pa taq ile are kkitzukuj i winaq chi to' aj chwach i jyub' ta'aj. Xwiri yix o jun Iqajaw chikaj chi lik reta'am wach i rajwaxik chiwe. 31Rumali, lik chitzukuj i ajawinik re i Dios, te'uri ire kuya ni chiwe wach taq rajwaxik chiwe. Keje xcha i Jesús ile chke utijoxelab'.

I b'eyomal chila chikaj

32Te'uri xub'ij chke:

—Mixij iwib', ix ral taq intzob'ajil, yix ix ti k'i. Xwiri i Ta chikaj kraj kuya chiwe chi kixok che i ajawinik re Ire. 33Chik'ayij ub'itaq iwe xaq chijacha i pwaq chke i o rajwaxik chke; man keje ile kik'ol i pwaq pa yab'al re, chi kjar taj; keje ile kik'ol i b'eyomal chila chikaj chi lik nti uk'isik, man chila kok ti ili'om xaq ke'ok ti i pok' ru'. 34Keje chi'ana ile, man ipa o wi ib'eyomal, chila uri o wi ukub'ib'al ik'ux. Keje xcha i Jesús ile chke utijoxelab'.

Lik chqayijb'a qib'

35-36Te'uri xub'ij chke:

—Lik ix yij chik are kk'un i iwajwal, xaq ru' i kantil itzijom chuk'ulaxik. Chi'ana yix ix pacha ajchajal ja chi koy-em uk'unik i rajaw kichak che jun k'ulankil. Ike je yij chik chutayik are kuponik, are uri juntir kkijaq la uchija che are kki'ijla. 37Utz ke i mokom chi k'a kek'ask'atik xaq kechajinik are kupon i rajaw kichak. Kinb'ij iri chiwe: Ire kub'ij ni chke chi kekub'i ni chi mexa, te'uri keutzuqu. 38Utz ke i rajchakib' le, are keuriqa k'a kek'ask'atik tupu kupon Ire tik'il a'ab' o xaq ya kpe usaqirik —xcha i Jesús chke. 39Xaq xub'ij i tziji chke:

—Chita iri: Jun rajaw ja, we reta'am wach u'onom or kupon jun ili'om ru', ire kk'ask'at ni uri; kuya ti che chi kok b'i prachoch re krel-aj b'i ub'itaq re, man ire yij ni chuk'ak'alixik. 40Xaq keje yix lik chiyijb'a ni iwib', man pacha Winaq chi Xolalaxoq chwach Ulew, kk'un na are nti kich'ob' che —xcha i Jesús chke.

I utz laj ajchak xaq i utz ti laj ajchak

41Are uri i ma Pedro xutz'onoj che:

—AJWAL, i tzij chi xab'ij le ¿xwi chqe yoj xab'ij wi o xaq chke konojel i winaq?

42I AJWAL xub'ij che:

—Iweta'am wach k-an ni che i jun ajchak lik utz i xaq lik o uno'oj. Ire kya' ni kan pkiwi i jub'an ajchak rumal rajaw uchak, chuqul ire o wi uya'ik i kiwa are kuriq i or. 43Utz re i achi le we ktijin chu'ankil wach i rajwaxik chke ajchakib' are kk'un chik rajaw uchak. 44Qatzij i kinb'ij chiwe, ire kkanax ni uri puwi ronojel ub'itaq re rajaw uchak. 45Xwiri we i umokom le, xa kuch'ob' na chi rajaw uchak we' taj ktzalij chaloq, moqxa kujeq kich'ayik i rach ajchakib', i to' kuch'ob' uwa'im xaq i wach kutu'u, xaq wach taq k-ab'ar ru'. 46Ire reta'am taj pachike ij xaq b'i chi oril kk'un i rajaw uchak; are nti kuch'ob' che, xaqte'et kk'un loq. I rajaw uchak le kuya ni uri pa nim laj tojpen. Xaqjun i tojpen kya' che pacha kya' chke i xa keb' kipalaj.

47Jun ajchak chi reta'am wach kraj i rajaw uchak, xwiri ire uyijb'am ti rib' chu'anik i xaq kkojon ti che, lik kya' ni uri k'iyal taq ulo'xik. 48Xwiri jun ajchak we reta'am taj ku'an i makunik chi kya' pa tojpen rumal, lik kmajaw ti uri che chi kya' k'iyal taq ulo'xik. I jun chi lik nim yatal chuqul, o chuqul uri nim kujach tan chik; xaq i jun chi nim kya' chuqul rumal o kub'ib'al k'uxij che, xaq lik mas ni nim ktz'onox che.

I Jesús kujach kixol i je utz ku' i je utz taj

49—Yin in k'unnaq chunak'ik a' chwach i jyub' ta'aj, ¡Chi lik kwaj te yin wetene kjuluw chik! 50Xwiri o jun nim laj pen nab'e chinwach; ¡Lik kink'achir rumal k'a kk'is ni ile! 51Mich'ob' yix chi in k'unnaq chuya'ik i utz laj olem chwach i jyub' ta'aj, rumal ti ile in k'unnaq; in k'unnaq xa kinjachb'ej kixol#12.51 Man rumal uk'utik i saq laj tzij, are kpaxsaxik kpe ni ch'oj chkixol i winaq.. 52K-on panoq we je o jo'ob' kachalal kib', kkijach ni kiwach; i je oxib' kkijunamsaj ni kino'oj chkiwach i keb'; xaq i keb' kkijunamsaj ni kino'oj chkiwach i oxib'. 53Je o ni qajawxelab' junam ti kino'oj ku' i kik'ojol; xaq keje ni i k'ojolxelab' ku' i kiqajaw. Xaq je o ni chuchxelab' junam ti kino'oj ku' i kalit; xaq keje i kki'an ni kalit ku' i kichuch. Xaq je o ni alib'xelab' junam ti kino'oj ku' i kichuch kalib'; xaq keje ni kki'an i kichuch kalib' chke i kalib'xelab'.

K'utb'al re i k'isb'al taq ij

54I Jesús xaq xub'ij chke i winaq:

—Yix, are kiwil i sutz' chi kel li pa ktzaq wi i ij, juntir kib'ij chi ya kpe i jab', xaq qatzij, keje ile ke'eloq. 55Xaq i tew, we kk'un pa wiqab', kib'ij uri yix chi lik tij ij na; xaq qatzij, keje ile ke'eloq. 56Yix, ¡xa keb' ipalaj! Lik kiwil ni ub'e wach ku'on uwakaj, xaq uwach i jyub' ta'aj. ¿B'uchak uri iweta'am taj wach usuk' iri chi kixtijin chrilik che taq i iji? —Xcha chke.

Chab'isoj uchomaxik awib' ru' i ajch'oj chawij

57Te'uri xub'ij chke i winaq:

—¿B'uchak kich'ob' ti ub'e yix wach kmajaw chiwe ki'ano? 58We o jun ukojom amak, xaq kimaj b'i i b'e pa atb'al tzij, cha'ana pen uyijb'axik uri ru' tz'aqat k'a ix o pa b'e, man katuk'am tu b'i chwach i atb'al tzij. Man i atb'al tzij katujach ni che i ajchajal re i tinimit, i ajchajal re i tinimit katutz'apij ni prexil. 59Saq laj tzij i kinb'ij, chi lik katel tali chila k'a katoj ni ronojel ak'as.#12.59 Keje i tijojb'al tzij ile xub'ij i Jesús, k'utb'al re chke chi o uchak we' kkisuk'b'a kik'aslemal chwach i Dios man keya' ti pa tojpen.

Attualmente Selezionati:

Lucas 12: ACHICUB

Evidenziazioni

Copia