Lucas 15

I tijojb'al tzij chrij i ajyu'ul chij chi xuriq i chij sachnaq

1Konojel ni'pa i je ajtz'onol alkawal re i tinimit Roma xaq jub'an chik winaq chi utz ti kik'aslemal xetejeb' ru' i Jesús kkitab'ej re utzij. 2Rumali, i aj fariseo, xaq i je tijonelab' re ujer atb'al tzij xe'ok chuch'ach'axik i Jesús, ru' i tziji.

—I achi le keuk'ulaj ajmakib' ru', xaq kutij uwa ku' —xecha.

3Are uri i Jesús xub'ij jun tijojb'al tzij chke:

4—Wach ku'an jun achi, kib'ij yix, we je o jo'winaq (100) uchij, we xsach jun chke? ¿Wach ku'an ni ire uri? ¿Xatab'a keukanaj ti kan i b'elejlajuj kajwinaq (99) che i jyub' pa kewa wi, man k-e chutzukuxik i jun chi sachnaq kanoq? Lik k'a kuriq na. 5Are kuriqo, lik kkikotik kuya b'i xol uteleb'. 6Are kupon ru' ja, keusik'ij i ramiy, xaq i je ub'esin. Kub'ij chke: “Lik kinkikotik man xinriq inchij chi sachnaq te'eq; ¡Chixkikot yix wu'!”. 7Kinb'ij uri chiwe, chi xaq keje ile; lik o kikotemal chila chikaj we o jun ajmak kujalwachij uno'oj chi utz taj. Mas kekikot uri rumal ire, chkiwach i je b'elejlajuj kajwinaq (99) chi je utz, chi rajwaxik taj kkijalwachij i kino'oj —xcha i Jesús chke.

I tijojb'al tzij chrij i ixoq chi xuriq upwaq tzaqnaq

8Te'uri i Jesús xub'ij chik jun tijojb'al tzij chke.

—We o jun ixoq o lajuj saqpwaq ru', we xutzaq jun chke i lajuj, ¿Wach ku'an uri ire? Kutzij jun kantil, xaq kujeq umesik upaja. Na'al kutzukb'ej re k'a kuriq na. 9Are kuriqo, keusik'ij ixoqib' ru' chi je ramiy xaq i jub'an chik lok'anij chi je o naqaj che. Kub'ij chke: “Lik chixkikot yix wu' man xinriq inpwaq chi intzaqom te'eq. 10Kinb'ij chiwe chi xaq keje i kikotemal ile kkina i ángel re i Dios; rumal jun ajmak are kujalwachij uno'oj chi utz taj.” —Xub'ij i Jesús chke.

I tijojb'al tzij chrij jun qajawxel chi xukuy umak uk'ojol

11Te'uri, i Jesús xub'ij chik chke:

—O jun achi, je o keb' uk'ojol. 12I cha'xel xub'ij che uqajaw: “Ta, chaya ni ub'itaq we wo'or pacha ach'ob'om chi kaya ni chwe k-on panoq.” Rumali i uqajaw xujach ub'itaq ke i uk'ojol. 13X-on pan jub'i' i cha'xel is xuk'ayij ronojel ub'itaq re chi xjach che. Ru' i mer le lik x-e che jun tinimit k'a naj. Chila xok chuk'isik umer, to' xaqmanal xu'an che, uk'aslemal lik utz ti xu'ano. 14Xwiri are xuk'is ronojel umer, xpe jun nim laj wa'jal che i tinimit le; rumali chi lik xutij numik 15Are uri x-e chutzukuxik uchak ru' jun achi aj chila. I uchak xya'ik, are xtaq b'i chkichajixik jub'an aq prulew i rajaw i chak. 16Ire lik knumik; rumali lik kurayij uwach i kkitij i aq; re kunojsaj upam, xwiri lik mijun xtzuquwik. 17Te'uri xk'un uno'oj; xub'ij puk'ux: Chila ru' inqajaw, i umokom lik kuriq rib' wach kkitijo. Xwiri yin waral, lik kinkam ni rumal numik. 18Kintzalij chik chi rachoch inqajaw xaq kinb'ij che: Ta, in-anom inmak chwach i Dios, xaq chawach yet. 19Kmajaw ti chik kab'ij awak'al chwe, cha'ana ni chwe pacha ka'an che jun amokom. Keje ile xub'ij puk'ux. 20Juntir xumaj b'i ub'e, x-e chik chi rachoch uqajaw.

Are k'a naj panoq o wi che i ja, xaqte'et x-iltaj rumal uqajaw. Lik k'ax xuna uk'ojol, rumali x-e pa'anem chuk'ulaxik. Are xuk'ulaj, xutz'ulej xaq xutz'ub'aj. 21Te'uri i uk'ojol xub'ij che: “Ta, in-anom inmak chwach i Dios, xaq chawach yet. Kmajaw ti chik kab'ij awak'al chwe.” Xcha. 22I uqajaw xub'ij chke umokom: ¡Chib'isoj! Chik'ama li jumolaj u'u' chi lik paqal rajil chikojo che, chikojo jun b'aq che uwi u'ab', xaq chikojo uxajab'. 23Chik'ama li i me' chi lik ti'oj xaq chikamsaj. ¡Man kqa'an jun nima'ij ru' jun wa'im! 24Man i wak'ali kamnaq te'eq, xwiri wo'or k'as tan chik, sachnaq te'eq, xwiri wo'or ya xqariqo; keje ile lik xjeqan i nima'ij.

25I rak'al atz nti ru' ja are xkijeq i nima'ij man enaq pa taq tikon. Are ktijin upetik chi rachoch xuta i son xaq xuta o i kexajawik. 26Rumali xusik'ij jun mokom ru', xaq xutz'onoj che wach i ketijin chu'anik ru' ja. 27I mokom xub'ij che: “I acha' ya xk'un chik ru' ja, rumali i aqajaw xutaq ukamsaxik i me' chi lik ti'oj, man utz uwach acha' xk'unik.” 28Xwiri i k'ojol atz le lik xpe roywal, xaq xok ti chub'i ru' ja. Rumali xel b'i i uqajaw xaq xuyu'uj i uk'ojol. 29Ire le xula' uwach che uqajaw: Ta pe', lik k'iyal junab' in chakunnaq awu' pacha jun mokom, mijulaj inqelom atzij. Xaq yet, mitjulaj aya'om jun ral chab'at chwe, kin-anb'ej jun nima'ij ku' i wamiy. 30Xwiri are xk'un i awak'ali chi to' xusach uwach ub'itaq awe ku' ixoqib' chi kkich'ak i kimer chwach i kich'akul, yet xa taq ukamsaxik i me' chi lik ti'oj, xa rumal ire.

31Te'uri xub'ij i uqajaw: Wak'al, yet arewi at o wu'. Rumali ronojel ni'pa i o wu', is awe yet. 32Xwiri, o uchak kqa'an jun qanima'ij, xaq chojkikotoq rumal acha', man ire kamnaq te'eq, xwiri wo'or k'as tan chik, ire sachnaq te'eq, xaq wo'or qariqom tan chik.#15.32 Keje ile xub'ij i mam che uk'ojol. Are i tijojb'al tzij ile xub'ij i Jesús chke i winaq.

Attualmente Selezionati:

Lucas 15: ACHICUB

Evidenziazioni

Copia