Mwa 35

Yakovo Aisyoka Mbethi-eli

1 # Mwa 28.11-17 Ngai nĩwaneenie na Yakovo amwĩa atĩĩ, “Uma vaa ũthi Mbethi-eli na ũitũa kw'o. Enda ũkambakĩe kĩthembeo vo, nyie Ngai ũla nakumĩlĩĩle yĩla wasembete ũkĩĩte mwana-a-inyia waku Esaũ.”

2Kwoou Yakovo nĩweeie andũ make na andũ ala angĩ onthe waĩ namo atĩĩ, “Vetangai ngai sya mĩvw'anano ila mwĩnasyo na mũyĩthesya na kwĩkĩa ngũa ntheu. 3Tumei vaa tũthi Mbethi-eli nĩ kana ngake kĩthembeo kwondũ wa Ngai ũla wandethisye ĩvindanĩ yĩla naĩ thĩnanĩ na ũla wĩthĩĩtwe vamwe nakwa kũndũ kw'onthe kũla nĩthĩĩtwe ngĩthi.” 4Nĩmanengie Yakovo ngai sya mĩvw'anano syonthe ila maĩ nasyo na mĩnaĩ ĩla mekĩĩte matũ. Nĩwavithie syĩndũ isu ungu wa mũtĩ wa mwalonĩ ũla wĩ vakuvĩ na Sekemu. 5Yĩla Yakovo na andũ make maĩ kyalonĩ maendete, Ngai nĩweekĩie andũ ma ndũa ila syaĩ vakuvĩ w'ĩa mwingĩ mũno na kwoou mayaamaatĩĩa. 6Yakovo nĩwaendie avika Lusu ĩla kwa ĩsyĩtwa yĩngĩ yĩtawa Mbethi-eli na yĩ nthĩ ya Kanaani. Nĩwavikie vo e na andũ onthe ala waĩ namo. 7Nĩwaakie kĩthembeo vau na aveta Eli-mbethi-eli nĩkwĩthĩwa vau nĩvo Ngai weevuanisye kwake yĩla wasembete akĩĩte mwana-a-inyia. 8Ndevola ũla wasũvĩaa Laveka nĩwakwie na athikwa ungu wa mũtĩ wa mwalonĩ ũla waĩ ngalĩko ya ĩtheo ya Mbethi-eli. Kwoou mũtĩ ũsu nĩweetiwe, “Mwalonĩ wa Kĩĩo.”

9Yĩla Yakovo waumie Mesovotamia, Ngai nĩwamumĩlĩĩle ĩngĩ na amũathima. 10#Mwa 32.28 Ngai nĩwamwĩie atĩĩ, “We wĩtawa Yakovo, ĩndĩ ndũkambĩla kwĩtwa Yakovo ĩngĩ; ũkeetawa Ĩsilaeli.” Kwoou Ngai nĩweetie Yakovo Ĩsilaeli. 11#Mwa 17.4-8 Na Ngai amwĩa, “Ninyie Ngai Mwene Ũtonyi W'onthe. Syaa wingĩvye andũ mausũe ĩũlũ wa nthĩ. Mbaĩ mbingĩ sya andũ ikauma vala ũĩ na andũ amwe katĩ wa nzyawa syaku makatw'ĩka asumbĩ. 12Nĩngũũnenga nthĩ ĩla nanengie Avalaamu, na Isaka, na o ta ũu ngasyoka nĩmĩnenge nzyawa syaku.” 13Ngai nĩwaendie auma vau waneeneaa na Yakovo. 14#Mwa 28.18-19 Yakovo nĩwoosie ĩvia ayĩnzĩla vau Ngai waneeneaa nake yĩthĩwe ta ũlilikany'o. Nĩwayĩtĩkĩisye ndivai na mauta nĩ kana ayĩvathe kwondũ wa Ngai. 15Nĩweetie vandũ vau Mbethi-eli.

Kĩkw'ũ kya Laeli

16Yakovo na andũ make nĩmaumie Mbethi-eli na matanamba kũvika Evilathi, ĩvinda ya Laeli ya kũsyaa nĩyavikie na eethĩwa na thĩna mũnene kũsyaanĩ kwake. 17Yĩla woo wa kũsyaa waingĩvie mũno, mwisikya nĩwamwĩie atĩĩ, “Ndũkakĩe Laeli; nĩwakwata kavĩsĩ kangĩ.” 18Ĩndĩ Laeli atanamba kũkw'a nĩwanengie kana kau ĩsyĩtwa aketa Mbenioni, ĩndĩ ĩthe wako aketa Mbengyameni.

19Kwoou Laeli nĩwakwie na athikwa ũtee wa nzĩa ĩla ĩendete Evilathi, ĩla noyo yĩtawa Mbetheleemu. 20Yakovo nĩwenzĩlile ĩvia ya ũlilikany'o ĩũlũ wa mbũa ya Laeli yĩla yonanasya vala ve mbũa ya Laeli o na kũvika ũmũnthĩ. 21Ĩsilaeli nĩwaendeeie na kyalo kyake na amba ĩeema yake avĩtũka mwako mũtũlu wa Eteli.

Ana ma Yakovo

(1Mav 2.1-2)

22 # Mwa 49.4 Ĩvindanĩ yĩu Ĩsilaeli watũaa nthĩ ĩsu, Lũveni nĩwamanyanie kĩ-mwĩĩ na Mbila mũthũkũmi mũndũ mũka wa ĩthe. Ĩsilaeli nĩwamanyie ũndũ ũsu na eew'a woo.

Yakovo aĩ na ana ĩkũmi na elĩ. 23Ana ma Lea maĩ Lũveni, ũla nĩwe mwana wa Yakovo ũla mũkũũ, Simioni, Livai, Yuta, Isakali na Nzevuluni. 24Ana ma Laeli maĩ Yosevu na Mbengyameni. 25Ana ma Mbila mũthũkũmi mũndũ mũka wa Laeli maĩ Ndani na Navutalĩ. 26Ana ma Nziliva mũthũkũmi mũndũ mũka wa Lea maĩ Ngandi na Aseli. Asu nĩmo ana ma Yakovo ala masyaĩwe Mesovotamia.

Kĩkw'ũ kya Isaka

27 # Mwa 13.18 Yakovo nĩwaendie avika Mamile mũsyĩ kwa ĩthe wake Isaka vakuvĩ na Eviloni vala Avalaamu na Isaka matwĩe. 28Isaka ekalile thayũ vandũ va myaka ĩana na mĩongo nyanya, 29na akw'a e mũkũũ mũno na e na myaka mingĩ, na athi kũla andũ make ala makwie tene maendie. Ana make Esaũ na Yakovo nĩmamũthikie.

Attualmente Selezionati:

Mwa 35: KAMBA

Evidenziazioni

Copia