Mwa 34
34
Sekemu Aivukya Ndina, mwĩĩtu wa Yakovo
1Mũthenya ũmwe Ndina, mwĩĩtu wa Yakovo ũla wasyaĩiwe nĩ Lea nĩwaendie kũkethya aka ma nthĩ ĩsu ya Kanaani. 2Yĩla Sekemu mwana wa Amolu ũla waĩ Mũivi na mũnene wa kĩsio kĩu woonie Ndina, nĩwamũkwatie na vinya na amũvukya. 3Sekemu nĩwendeeiw'e mũno nĩ Ndina mwĩĩtu wa Yakovo. Nĩwamwendie mwĩĩtu ũsu na nĩwaneenaa nake nesa. 4Kwoou Sekemu nĩwaneenie na ĩthe wake Amolu amwĩa, “Mbĩvaĩsye mwĩĩtu ũũ atw'ĩke kĩveti kyakwa.”
5Yakovo nĩwamanyie kana mwĩĩtu wake nũvukiw'e nĩ Sekemu. Ana make maĩ isesinĩ maiĩthya indo syake na kwoou ndaaĩka ũndũ o na ũmwe nginya yĩla mookie. 6Nĩvo ĩndĩ Amolu, ĩthe wa Sekemu waendie kũneena na Yakovo. 7Ana ma Yakovo nĩmookie kuma isesinĩ yĩla meewie kana mwĩĩtu-a-inyia nũvukiw'e. Nĩmeewie woo na mathata mũno nũndũ Sekemu nĩweekĩte ũndũ wĩ nthoni kwa andũ ma Ĩsilaeli na ũtaĩlĩte kwĩkwa kwa kũvukya Ndina, mwĩĩtu wa Yakovo. 8Ĩndĩ Amolu aneena namo amea atĩĩ, “Mwana wakwa Sekemu nũkwendeew'a nĩ mwĩĩtu wenyu. Mwa nengei we atw'ĩke mũka wa mwana wakwa. 9Twĩw'anei ana maitũ matwaae eĩtu menyu, namo ana menyu maitwaa eĩtu maitũ. 10Mũkeethĩwa mũtonya kwĩkala kũũ nthĩ yaitũ vamwe naitũ; mũkekalaa vala mũkwenda, mũtandĩthye ũndũ mũkwenda na kwĩmanthĩa ũthwii.” 11Sekemu nĩweeie Yakovo na ana make atĩĩ, “Nengei kwona ũseo kuma kwenyu na nĩngwĩka ũndũ w'onthe ũla mũũndavya. 12Ndavyei mĩthĩnzĩo ĩla mũkwenda na mũimbĩtya ngasya nene ya mwĩĩtu o ũndũ mũkwenda; nĩngũmũnenga kyonthe kĩla mũũmbĩtya ethĩwa nĩmũũndeka ndwae mwĩĩtu ũũ.”
13Ana ma Yakovo nĩmasũngĩie Sekemu na ĩthe wake Amolu kwa nzĩa ya kũmakenga, nũndũ Sekemu nĩwavukĩtye mwĩĩtu-a-inyia woo Ndina. 14Nĩmameie atĩĩ, “Tũitonya kũnengane mwĩĩtu-a-ia atwawe nĩ mũndũ ũte mwaĩke nũndũ ũndũ ũsu wĩthĩwa wĩ nthoni kwitũ. 15Nĩtũkwĩtĩkĩla ethĩwa aũme menyu onthe nĩmekwĩtĩkĩla kwaĩkwa mwĩkale taitũ. 16Nĩvo ĩndĩ twĩĩtĩkĩla eĩtu maitũ matwaawe nĩ ana menyu, namo ana maitũ maitwaa eĩtu menyu. Tũkaendeea kwĩkalany'a nenyu na kũtw'ĩka mbaĩ ĩmwe. 17Ĩndĩ mwalea kũtwĩthukĩĩsya na mũyaĩkwa nĩtũkwosa mwĩĩtu-a-ia waitũ na tũithi.”
18Amolu na mwana wake Sekemu nĩmendeeiw'e nĩ ũndũ ũsu ana ma Yakovo maneenie. 19Mwanake ũsu Sekemu, ũla nĩwe wanengetwe ndaĩa kwĩ onthe nyũmbanĩ ya ĩthe nĩweekie na mĩtũkĩ ũndũ ana ma Yakovo maisye nũndũ nĩwendeeaw'a nĩ Ndina mwĩĩtu wa Yakovo.
20Amolu na mwana wake Sekemu nĩmaendie mũvĩanĩ wa ndũa ĩsu vala andũ mombanĩaa na maneena na atumĩa ma ndũa ĩsu mamea atĩĩ, 21“Aũme aa nĩ anyanyae maitũ, ekanai namo matũe nthĩ ĩno yaitũ na maitandĩthĩasya vo; nthĩ ĩno yĩ na mwanya mũnene woo. Nĩtũtonya kũtwaa eĩtu moo namo maitwaa eĩtu maitũ. 22Ĩndĩ no nginya twĩke ũndũ ũũ ũmwe nĩ kana metĩkĩle kwĩkalany'a naitũ na tũitw'ĩka mbaĩ ĩmwe; naw'o nĩ kwaĩka aũme maitũ onthe nũndũ mo nĩ aĩke. 23Indo syoo syonthe na syĩndũ ila ingĩ syonthe menasyo ikatw'ĩka sitũ ethĩwa nĩtũkwĩtĩkĩla kwaĩkwa, namo makekalaa kũũ kwitũ.” 24Aũme onthe ala maumaalĩte makathi mũvĩanĩ wa ndũa vala voombanĩaa andũ nĩmeetĩkĩlanile na Amolu na mwana wake Sekemu. Kwoou aũme onthe ndũanĩ ĩsu nĩmaĩkiwe.
25Ĩtina wa mĩthenya ĩtatũ, yĩla aũme asu maĩ na kyalya nũndũ wa nzaĩko, ana elĩ ma Yakovo ala nĩ Simioni na Livai, ana-a-inyia ma Ndina, nĩmoosie mbyũ syoo mavithũkĩa andũ ma ndũa ĩsu matesĩ, na mooaa aũme onthe. 26Nĩmooaie Amolu na mwana wake Sekemu, na moosa Ndina kuma nyũmba kwa Sekemu na mathi. 27Ĩtina wa ũu, ana ala angĩ ma Yakovo nĩmookie matava syĩndũ sya ndũa ĩsu nĩ kana meyĩĩvanĩsye kwondũ wa kũvukw'a kwa mwĩĩtu-a-inyia. 28Nĩmoosie mbũi na malondu, ng'ombe na mang'oi, na syĩndũ ila ingĩ syonthe syaĩ ndũanĩ ĩsu na ila syaĩ mĩũndanĩ. 29Nĩmakuie ũthwii woo w'onthe, matava iveti syoo syonthe na syana, na o ta ũu makua syĩndũ syonthe ila syaĩ nyũmbanĩ syoo.
30Nĩvo ĩndĩ Yakovo weeie Simioni na Livai atĩĩ, “Yu nĩmwandetee thĩna nũndũ nĩmũũtuma nĩmenwa nĩ Akanaani, Avelisi, na andũ ala angĩ onthe ma nthĩ ĩno. Ndi na aũme aingĩ, na andũ aa makesa ũkwatana vamwe mambũkite, nĩminwa vamwe na andũ makwa onthe.”
31Ĩndĩ mamũsũngĩa mamwĩa, “Tũyĩtĩkĩla Sekemu atw'ĩkĩthye mwĩĩtu-a-ia Ndina ĩlwaya.”
Attualmente Selezionati:
Mwa 34: KAMBA
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
BIBLE SOCIETY OF KENYA © 2011
