Suku-saakị 39
39
Josẹfụ Pọtifa Ta Na Gboloma Ḍụkụ-a
1Mịọkụ Isimẹlị furo-ḅẹ-apụ ma Josẹfụ kẹ so Ijiputi mum, tẹ Pọtifa, Fero opu fịrịmẹnjịḅọ, ye-yọ ḍikiḍiki ọmụapụ ma ḅẹ sịḅịdaḅọ ḅe, Ijiputi-ḅẹ-ḅọ Isimẹlị furo-ḅẹ-apụ ma tẹ ori ọkị anịjụ mu apụ ma ḅara ḅụ ọ̀ fẹẹ ọkịm. 2#Fịr 7.9KỊNỊNYANAḄỌ ḅe Josẹfụ na emi tẹ ò ḅo mịẹ ye, mịẹ ye ḅara ḅẹ sọ ḅọ sọm; anịsakị ori ọ̀ sịḅịdaḅọ Ijiputi-ḅẹ-ḅọ ḅe warị emi, 3tẹ ọ̀ sịḅịdaḅọ ḅe nwẹnị ẹrị mịnẹ KỊNỊNYANAḄỌ ḅe ori na emi, anie ḅụ KỊNỊNYANAḄỌ ḅe mịẹtẹ ọ̀ mịẹ aị mamgba ori aḅara ḅụ lolom. 4Mie ḅụ Josẹfụ, Pọtifa ḍiki-tọrụ ḅụ ọ̀ fụḅara fị tẹ fịrịmẹnjị ọ̀ pịrịm, tẹ ọ̀ nwẹnị ọ̀ kẹ ò soku-ḅẹ warị ḍikiḍikiḅọ sọma, tẹ ọ̀ nyana aị mamgba kẹ ọ̀ ḅara sụa. 5Ori ọ̀ kẹ ọ̀ warị ḍikiḍikiḅọ sọma tẹ ọ̀ nyana aị mamgba kẹ ọ̀ ḅara sụa sakị mẹ ḅụ ọkị tọrọkọ mu ḅụ KỊNỊNYANAḄỌ ḅe Ijiputi-ḅẹ-ḅọ ḅe warị bomam Josẹfụ sịḅị gotẹ; KỊNỊNYANAḄỌ ḅe boma mẹ ye tẹ ori nyana aị mamgba ọgọnọ gbanam warị ḅio-o, ḍụọ ḅio-o. 6Mị-ḅara ḅụ ye tẹ ọ̀ nyana aị mamgba ọ̀ wẹrịso Josẹfụ pịrịm; ori emi nwẹn ḅẹẹ sakị, fịye tẹ ọ̀ fịarị ye sikima ori ọ̀ ḅụụ kẹ gberie-sọ gboloma-a. Mị sakị mẹ Josẹfụ owiḅọ iḅi kọn tẹ ḍiki-tọrụ ḅụ ḅụụ-ḅẹlẹma wararị. 7Sakị kẹlẹ ḅọrọ tẹso, ọ̀ sịḅịdaḅọ ta nwẹnị á tọrụ kolokolo Josẹfụ ọgọnọ gbana, tẹ ḅẹẹ, “Ị̀ na ḅọlọlọọ.” 8Kụma ọ̀ ḍụkụ-a tẹ nwẹnị ọ̀ sịḅịdaḅọ ta ma ḅẹẹ, “Ḍikii, àrị emi mẹ gotẹ ị̀ sịḅịdaḅọ ḅarị ḅụụ-ḅaa warị ḅio gberie-sọ pịrị-a, tẹ ye tẹ ori nyana ye goyegoye kẹ ị̀ ḅara sụa tẹ. 9Mị warị mẹ ḅio ọ̀ ḅarị ḍụḅa ị̀ nẹngị-a, ị́yẹrị ọ̀ ta gotẹ í sikima ọ̀ kẹ ì kikima gberie-sọ ofori; anịtẹrẹmẹ à tọ-ḅara kẹ mu Tamụnọ ḅụụ ḅụ nwẹn sime opu si-sịḅịḅio-sụa ḅẹ?” 10Karakaraye ene-ḅaaene-ḅaaene arị anị kẹ ẹkwẹn Josẹfụ pịrịm ḅẹsọ, ori árị na gbọrụ anga ḅụ sime-a, anịanịa árị na ḅọlọlọ.
11Kụma gbọrụ ene ḅụ, gbọrụḅọ-sọ warị ḅio ofori, tẹ ọ̀ warị ḅio sọ ọ̀ kọrịnama kọrị ḅẹ mu tẹso, 12á nwẹnị ọ̀ sụa opu kapa ḅụ ori ọlọ-sịẹma, tẹ ḅẹẹm, “Ị̀ na ḅọlọlọọ.” Kụma ọ̀ nwẹnị ori opu kapa mẹ sin á ḅara-ḅio sụa tẹ ḍumo-mangị kọn warị mẹ ḅio paka. 13Tẹ ori ọ̀ kapa sin á ḅara-ḅio sụa tẹ ḍumo-mangị kọn warị mẹ ḅio paka ye ẹrị tẹso, 14á nwẹnị oloku á warị mẹ ḅio simearị owiapụ ma sịn tẹ ịn ḅẹẹ, “Ọmịnị ẹrịị, ò mu Hiburu ḅẹ ḅọ ọkị-ḅo wamịna ogbo-ḅio su tẹ wa wọlọ ḅẹ ḅo tẹ ị̀ na gboloma ḅẹ ḅara kẹ ọ̀ sọ ị̀ dama-ḅom, tẹ à gele pọkọ kẹ oloku pakamam; 15tẹ ori à gele pọkọ kẹ oloku pakama ye mẹ maa tẹso, ori ọ̀ kapa sin ị̀ pịrị tẹ warị mẹ ḅio mangị paka-som.”
16Anịtẹso árị ọ̀ kapa mẹ kẹ árị akaka koroma wẹrị nwenii á di warị ḅom. 17Anịtẹso á nwẹnị gbọrụ ịlụkụ mẹ gbaa ọ̀ pịrị, tẹ ḅẹẹm, “Hiburu ḅẹ fịrịmẹnjịḅọ, oriḅe tẹ ị́ ọkị-ḅo wamịna ogbo-ḅio su ḅọ ḅe ị̀ wọlọ ḅẹ sọ-ḅom, 18Kụma arị ị̀ pọkọ saakị tẹ oloku gbọrụ sakị, ori ọ̀ kapa sin koroma ị̀ pịrị tẹ warị mẹ ḅio mangị pakam.”
19Josẹfụ sịḅịdaḅọ ẹkwẹn-aḅịḅị ma tẹ ọ̀ ta ḍuko ọ̀ pịrị aị ma naa fama tẹso, arị mẹẹ. “Mị-ḅara mie í omoniḅọ ḅe kẹ ị̀ mịẹ ḅara” mie ọ̀ gbọrsịḅị ịganị fama ye. 20Josẹfụ sịḅịdaḅọ nwẹnị ori ọkị tẹ kẹ ini amadaḅọ ḅe ikoliapụ kẹ wẹrịarị anga ḅụ ọ̀ kẹ ikoli ḅio su, tẹ ori ikoli ḅio simem. 21#Fịr 7.9Kụma KỊNỊNYANAḄỌ ḅe Josẹfụ na simem, tẹ ò jike-a ḅelema mẹ kẹ ò ḍiem ikoli-warị mẹ ḍikiḍikiarị ḅọ ḅe tọrụ ḅụ. 22Tẹ ikoli-warị mẹ ḍikiḍikiarị ḅọ ḅe nwẹnị ikoliapụ ma tẹ ikoli mẹ ḅio simearị apụ mamgba saakị kẹ Josẹfụ ḅara sụa; anịsakị anịjụ mịẹ ye goyegoye ori mie anị mịẹ ye; 23ḅẹẹye-ḅẹẹye tẹ Josẹfụ ḍikiḍikiarị ye goyegoye ḅụ ikoli-warị mẹ ḍikiḍikiarị ḅọ ḅe anị ḅụ gberie-sọ ḍiki-a, gbala KỊNỊNYANAḄỌ ḅe ori na emi ẹrẹsị, anịsakị ye tẹ ọ̀ mịẹ ye goyegoye KỊNỊNYANAḄỌ ḅe mịẹtẹ anị Lolom.
Attualmente Selezionati:
Suku-saakị 39: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
