Suku-saakị 38
38
Juda Na Tama Na
1Paa anị sakị mẹ ḅụ mie Juda ori owiapụ-amịnapụ ma koroma ideri-so Adulamụ ḅẹ gbọrụḅọ Hira nwẹn-sịn ẹrẹ fị ḅọ ḍọkụma-mu ye. 2Anịanga Juda Kenanị ḅẹ gbọrụ owiḅọ iyi gbọrụ ẹrẹḅọtụḅọ ẹrịm; owiḅọ ḅe ẹrẹ Suha; ori á sime tẹ arị na gbolomam; 3tẹ á nwẹnị fura tẹ gbọrụ owiḅọtụḅọ iyi ọ̀ pịrị, tẹ ori ẹrẹ kẹ ọ̀ sịnm Ẹrị. 4Á pịkị fura tẹ gbọrụ owiḅọtụḅọ iyim tẹ arị nwẹnị ẹrẹ kẹ ọ̀ sịn Ọnanị. 5Anịsọ á pịkị sin gbọrụ owiḅọtụḅọ iyim tẹ arị ẹrẹ kẹ ọ̀ sịnm Sẹla. Kẹzibu ḅụ mie á sime ye arị ori iyi sakị.
6Juda nwẹnị gbọrụ ẹrẹḅọ sime ọ̀ tarị tụḅọ Ẹrị̀ pịrị, árị ẹrẹ Tama. 7Kụma Ẹrị, Juda tarị tụḅọ ḅe KỊNỊNYANAḄỌ ḅe ḍiki-tọrụ ḅụ si-sịḅịḅio-sụam, tẹ KỊNỊNYANAḄỌ ḅe ọ̀ ḅaam. 8Anịtẹso Juda nwẹnị Ọnanị ḅẹẹ, “So í iyimbere ta ḍọkụma-mu tẹ fụanḅọ kọrịnama kọrị á pịrị tẹ awọ iyi í iyimbere pịrịị.” 9Kụma Ọnanị nimim mịnẹ awọmẹ ma ori awọmẹ sọ ḅịa, anie ḅụ ọ̀ sọ ori iyimbere koroma fịị ẹrẹḅọ ma ḍọkụma-mu sakị, mu sakị, ọ̀ saraye mẹ kẹ kiri-ḅio saram, ò ḅofa awọ iyi ori iyimbere pịrị gotẹ. 10Ọ̀ mịẹarị ye mẹ ḍiki-tọrụ ḅụ KỊNỊNYANAḄỌ ḅe ḅụụ-ḅẹlẹ-a, tẹ ọ̀ nwẹnị pịkị ori sọ ḅaa. 11Anịtẹso Juda nwẹnị ori owiḅọtụḅọ koroma fịị ẹrẹḅọ ma ḅẹẹ, “Diḅọ-fịtẹ-ẹrẹḅọ ḅara ḅụ pịkịma-so ị́ ḍa warị muu, nwenii ì owiḅọtụḅọ Sẹla ḍụḅa sakị la” gbala ọ̀ ḅala faam mịnẹ ori sọ ori amịnapụ owiapụ fịị ḅara fịị ḅa. Mie ḅụ Tama so mu á ḍa warị angam.
12Sakị kẹlẹ mu tẹso, Juda ta, Suha ẹrẹḅọtụḅọ ma nwẹnị fịị; ori á ḍuu fama tẹso, ori na, ori ikiaḅọ Hira, Adulamụ ḅẹ ḅọ ḅe na nwẹnị so Timuna ḅụ ori anana oju ḅẹ isuke-kịrịapụ dama-mu. 13Ịn nwẹnị ịba-fị á pịrị, “Í di ḍa Timuna ḅụ ori anana oju ḅẹ isuke kịrị ḅẹ muarị” tẹso, 14á nwẹnị arị oju diapụ-fịtẹ-eremịna opu akapa ma siin-koroma, tẹ tọrụ-gbaịn ḅịtẹ ọkị arị oju gbaịn, tẹ mẹnjị Ẹneyimu sọarị anga mẹ tẹ so Timuna muarị etela mẹ akaka ḅụ lẹgị-sime; gbala arị ẹrịm mịnẹ Sẹla ḍụḅa ḅo owiḅọ la tẹ, tẹ amụ ịn paa á kẹ ọ̀ pịrị sime-a ẹrẹsị.
15Juda arị ẹrị tẹso, ọ̀ nwẹnị á kẹ sẹfị-ẹrẹḅọ sịn, á gbala ḅịtẹ kẹ á tọrụ gbaịn wararị ẹrẹsị. 16Ọ̀ nwẹnị mẹnjị etela mẹ saḅa osi akaka pịrị tẹ ere kẹ á sin, tẹ ḅẹẹ, “Ḅoo, àrị ị́ na gboloma” gbala ori á lekiri-a mịnẹ árị anie ori owiḅọtụḅọ tẹ fịtẹ ḅọ ḅe ta ẹrẹsị. Á nwẹnị ò gbela, “Í tiye kẹ ị̀ pịrị ḅẹ mịẹtẹ í inetẹ ị̀nịna gboloma ḅẹ ḅara?”
17Ọ̀ nwẹnị pakịrị, “Nama ogbo mẹ ḅụ à gbọrụ asambịrịma oḅori kẹ ị́ fịrịma ḅa.”
Á nwẹnị ḅẹẹ, “Í ye kẹ ị̀ ḅara sụa tẹ anị simearị ogbo ị́ anị kẹ ị̀ fịrịma ḅịa?”
18Ọ̀ nwẹnị á gbela, “À tiye kẹ ị́ ḅara sụa ḅẹ?”
Á nwẹnị pakịrị “Ị́ ẹrẹ sụa elekima mẹ na anị ḅẹ ḍigi na pịkị ị́ mkpara tẹ ị́ ḅara ḅụ simearị ye mẹ na.” Mie ḅụ ori àrị kẹ á pịrịm, tẹ arị na gbolomam, tẹ ọ̀ ḅụụ ḅụ á sime kọnm. 19Anịtẹso mie á mẹnjị-so ye, tẹ nwẹnị tọrụ-gbaịn ḅịtẹ mẹ sin koroma tẹ diapụ-fịtẹ-eremịna opu akapa ma ọkị sụa.
20Juda ọ̀ kẹ ẹrẹḅọ ma ḅara pakịrị ye mẹ pakịrị ḅẹ asambịrịma oḅori ḅe kẹ ori ikiaḅọ Adulamụ ḅẹ Hira ḅara fịrịma sakị, ori inetẹ á ḍọkị-ẹrịa. 21Ọ̀ nwẹnị ye yọ mẹ ḅụ sime owiapụ ma gbela, “Sẹfị ẹrẹḅọ ma tẹ Ẹneyimu ḅụ etela mẹ akaka sime ḅọ ma á tọ-anga emi?”
Ịn nwẹnị pakịrị, “Sẹfị gbọrụ ẹrẹḅọ sọ amụ mịanga sime-a.”
22Mie ḅụ ọ̀ nwẹnị pịkịma-so Juda ḍọkụma-mu tẹ ḅẹẹ, “Amụ àrị á ḍọkị-ẹrịa; anịsakị ye-yọ mẹ ḅụ sime owiapụ ma pịkị ḅẹẹm, ‘Sẹfị gbọrụ ẹrẹḅọ sọ amụ mịanga sime-a.’ ”
23Tẹ Juda nwẹnị pakịrị, “Yee arị á soku-ḅẹ aị koko ḅara kẹ arị koko, anieofori tomi ḅofa wa ḍẹrị; ị́ kọkọ ẹrị, à ḅị asambịrịma oḅori ḅe kẹ á gbẹẹ ḅẹ fịrịmam, tẹ ị́ inetẹ á ḍọkị-ẹrịa.”
24Tẹra akalụ pembe sakị ḅọrọ tẹso, kịnị nwẹnị ḅo ḍuko Juda pịrị, “Tama í owiḅọtụḅọ ḅe ta ma á saakị sẹfị tẹ, anie sikima á pịkị sẹfị ḅara kẹ sime kọn tẹ.” Tẹ Juda nwẹnị ḅẹẹ, “Ọmịnị á pakama-ḅoo tẹ yee ini á dọkịma.”
25Ini á pakama-ḅo ḅara ḅụ, mie arị oku kẹ á di ḍa ḅe fịrịma ye, “Anị owiḅọ ḅe tẹ mịna aị ma nyanaḅọ ḅe, mie ì furama ḅọọ.” Á nwẹnị pịkị ḅẹẹ, “Àrị ọ́ tẹkẹm, ọ́ mịna aị ma nyanaḅọ kẹ elekima sụa, ẹrẹ sụa elekima na anị ḅẹ ḍigi na, anị ḅẹ mkpara na.”
26Anịtẹso Juda nwẹnị arị lekiri tẹ ḅẹẹ, “Amụ àrị á kẹ ì owiḅọtụḅọ Sẹla pịrị-a nwẹn ḅẹẹ sakị árị karakara ị̀ nẹngịm.” Tẹ ọ̀ ḅarị jen-maaịn kẹ árị na gboloma-a.
27Árị iyi ḅarị sakị ḅo laa sakị, ịn ḍọkị-ẹrịm maa apụ awọmẹ á furo ḅio emi. 28Iyi ḅo á la tẹso, gbọrụḅọ nwẹnị amịna gbọrụ ḅara pakama-ḅo, ere-iyimaḅọ ma nwẹnị ḅara mẹ ọlọ tẹ awụ iri kẹ anị kpọ tẹ ḅẹẹ, “Ḅieḅe tarị paka-ḅom.” 29Kụma ori amịna ḅara nụnụ ọkịm, tẹ ori iyimbere paka-ḅom, tẹ ere-iyimaḅọ ma nwẹnị ḅẹẹ, “Pururu-paka ḅara mie ị́ kẹ etela pakama tẹ kaan-tolu ye!” Anịẹrẹsị ini ẹrẹ kẹ ọ̀ sịnm Pẹrẹzi#38.29 Pẹrẹzi fiearị ye, Kaan-tolu. 30Anịtẹrẹmẹ ori iyimbere ọ̀ ḅara ḅụ kpọọ wararị awụ iri mẹ na paka-ḅom; tẹ ini ẹrẹ kẹ ọ̀ sịnm Zera#38.30 Zera fiearị ye, Awụ.
Attualmente Selezionati:
Suku-saakị 38: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
