Suku-saakị 37
37
Josẹfụ Na Ori Owiapụ-amịnapụ Na
1Jekọbụ ọ̀ ḍa igoni kẹ mẹnjị ma-mu bịan ama mẹ, anie Kenanị ama mẹ ḅio angam. 2Miemẹ anie Jekọbụ furo mẹ ḅụ ye paka ḅara.
Josẹfụ sịḅị tẹra kụra fa si ḅọrọ tẹso, ori ori owiapụ-amịnapụ ḅụụ sọ tẹ anana na, oḅori ma na ḍikiḍikim; ori anie ịrụtẹ kalatụḅọ Biliya na, Zilipa na ọ̀ ḍa ereme ma owiapụ-awọmẹ ma ḅụ; tẹ Josẹfụ ịn mịẹarị si amịẹaị gbolomaye ọkị-ḅo ḍuko ịna ḍaḅọ pịrịm.
3Mịọkụ Izirẹlị Josẹfụ ḅẹlẹma ori awọmẹ osi apụ ma ḅụ ḅẹḅọ-ḅẹḅọ nẹngịm, ori anie ori omongi sakị ḅẹ owiḅọtụḅọ ẹrẹsị, tẹ ḅirima wararị ḅara nangwọtẹ vọrọrọ-kapa gbin ọ̀ pịrịm. 4Kụma ori amịnapụ owiapụ ḅo ẹrịm mịnẹ ịna ḍaḅọ ọ̀ ḅẹlẹma ori amịnapụ owiapụ mamgba nẹngịm tẹso, ini ò ḍiki-ḅioḅum, tẹ ḅarị inetẹ dein ḅara kẹ ẹkwẹn ọ̀ pịrị-a.
5Gbọrụ ḍin, Josẹfụ gbọrụ ḍawọ kọnm, tẹ ori anị ḍuko ori owiapụ-amịnapụ pịrị ye mẹ, ịn kẹ ò ḍiki-ḅioḅuarị ḅara nẹngị ḅara mie ịn kẹ ò ḍiki-ḅioḅu ye. 6Ori ịn ḅẹẹm, “Ọ́ mị ḍawọ mẹ tẹ à kọn ye mẹ pokii, 7Wamịnị-mgba ḍụọ ḅio emi tẹ mgbọlị-fịye kẹ puku-puku fịnarị, tẹ ḍikiarị kụma ị̀ mgbọlị-fịye puku mẹ nwẹnị saakị tụkụ tẹ sịẹsime. Ọmịna mgbọlị-fịye apuku ma nwẹnị sịẹ anị ikelema-koro tẹ sịḅị-tuu ì nye mẹ pịrị.”
8Ori amịnapụ ma nwẹnị ò gbela, Karakara-ḅara-ḅụ ị́ amadaḅọ sọ wa pịrị ḅẹ? Anịanịa, karakara-ḅara-ḅụ ị́ wamịna ḅụụ kụrọ nyana tẹ ḅẹrẹtọn wa pịrị ḅẹ? Mie ḅụ ori aḍawọ ma na, ori ẹkwẹn-aḅịḅị na gotẹ ịn nwẹnị ò ḍiki-ḅioḅu tarị ḅara nẹngị lama.
9Anịtẹso ọ̀ pịkị jen ḍawọ kọnm, tẹ anị ḍuko ori owiapụ-amịnapụ pịrị tẹ ḅẹẹm, “Ḍikii à jen ḍawọ kọnm, tẹ ẹrịm ịrụa mẹ na akalụ mẹ na oyi gbọrụ lolia finji na sịḅị-tuu iderima ị̀ pịrịarị.”
10Kụma ọ̀ miemẹ ḍuko ọ̀ ḍa na, ori owiapụ-amịnapụ na pịrị tẹso, ọ̀ ḍa nwẹnị ò ḍiki-ịganị, tẹ ọ̀ ḅẹẹ, “Mie ị́ nwẹn kọn ḍawọ ḅọrọ tọ ḍawọ? Yẹrị na, í iyingi na, ị́ owiapụ-amịnapụ na karakara-ḅara-ḅụ ḅo ị́ tọrọkọ sịḅị-tuu kiri lama ị́ pịrị ḅẹ?” 11#Fịr 7.9Ori owiapụ-amịnapụ ma nwẹnị miemẹ kẹ ori afana, kụma ọ̀ ḍa anị kẹ ò ḅioḅẹngbọ kokom.
In Josẹfụ Dẹrị Tẹ In Ọ̀ Kẹ So Ijiputi Mum
12Ori owiapụ-amịnapụ mị sakị mẹ ḅụ osuka kẹ ịna ḍaḅọ anana ogbo pịrị fị ḅẹ mum Sịkẹmụ ḅụ. 13Izirẹlị nwẹnị Josẹfụ ḅẹẹ, “Sịkẹmụ ḅụ mie í amịnapụ owiapụ osuka kẹ anana ogbo mẹ pịrị fịarị ye anị-a? Ḅoo, àrị ị́ kẹ ịn fịrịma ḅa.”
Josẹfụ nwẹnị ọ̀ ḍa pakịrị, “Mie yẹrịị mịanga.”
14Mie ḅụ ọ̀ ḍa nwẹnị ọ̀ ḅẹẹ, “Mịọkụ mu í owiapụ-amịnapụ ma ye ini na sime-ḅara ḍikii, anana ogbo mẹ kpaịn wararị ḅoto, tẹ pịkị ḅịḅị da ḅo ị̀ pịrị.” Mie ḅụ ori Hẹbụrọnị tụndụ ogboku mẹ ḅụ ọ̀ fịrịma tẹ ò ḅo Sịkẹmụ lam. 15Ò piri mẹ ḅio mẹnjị ikelekelearị ogbo gbọrụ owiḅọ nwẹnị ori ẹrị; tẹ owiḅọ ḅe nwẹnị ò gbela, “Í tiye ḍọkịarị?”
16Ọ̀ nwẹnị pakịrị, “Àrị ì owiapụ-amịnapụ ḍọkịarị, àrị ị́ tẹkẹm, ịn sime tẹ osuka kẹ anana ogbo mẹ pịrị fịarị anga ḍuko ị̀ pịrịị.”
17Owiḅọ ḅe nwẹnị ḅẹẹ, “Ịn so tẹ, gbala ịn ḍukaarị tẹ à naam, ‘Ó yee wa so Dotanị mu’ ” Mie ḅụ Josẹfụ ori amịnapụ owiapụ ma ḍọkịma-mu Dotanị ḅụ ịn ḍọkị-ẹrịm.
18Ịn nwẹnị sụma-jụ ḅụ ori ẹrị tẹ ḅaa-ḅẹrẹ-ḅiya ọ̀ pịrị tẹrẹmẹ ò ḅo ịn kpekim. 19Ịn nwẹnị jụmọ-jụmọ ḅẹẹ, “Ḅie ḍawọ kọn-kọn ḅọ ḅe mịanga ḅoarị. 20Mịọkụ ó ḅoo, yee wa ọ̀ ḅaa tẹ kẹ mịna olulu ma ḅe gberie ḅio gbin su; anị sakị wa ḅẹẹ ḅa mịnẹ piri-ḅio-ḅẹ nama ọ̀ ḅaa guluguluma tẹ, anịsakị wa ọ̀ kọn aḍawọ ma paka ḅẹ ḅara ḍiki ḅa.”
21Kụma Rubẹnị anị naa tẹso, ọ̀ nwẹnị ịna ḅara ḅụ ọ̀ ḍụa pakama-ḅo, tẹ ḅẹẹm, “Ó yee wa ò ḍumo mẹ wẹrịso.” 22Tẹ Rubẹnị nwẹnị ịn ḅẹẹ, “Ọmịnị ọmbie ọsụma ma; ọmịnị ọ̀ kẹ wakị mị olulu mẹ ḅio suu, mị ịkpa mẹ ḅio, kụma ọ́ ḅara kẹ ọ̀ lama ma,” mịẹtẹ ori inetẹ ịna ḅara ḅụ ọ̀ ḍụa pakama-ḅo tẹ ọ̀ pịkịma mu ọ̀ ḍa pịrị ḅẹ ḅara. 23Mie ḅụ Josẹfụ ḅo ori owiapụ-amịnapụ ma la tẹso, ịn nwẹnị ori oju ḅirima wararị ḅara nangwọtẹ vọrọrọ-kapa mẹ tẹ ọ̀ sụa ye mẹ sin, 24tẹ ịn nwẹnị ori ọkị tẹ ọ̀ kẹ gbọrụ olulu ḅio wakị su. Olulu mẹ ḅio gbọrụ ye so ofori, minji anị ḅio ofori.
25Anịtẹso ịn nwẹnị ḅo fịye fị ḅẹ tẹ lẹgị-sime. Ịn tọrụ saakị ḍiki sakị, ini Isimẹlị furo ḅẹ tuḅokọn-apụ ẹrịm, ịn Gilẹdị ḅụ sime tẹ ḅoarị, ịna ike-sụa-anama ḅẹlẹma sịn ḅụ paka-ḅoarị ye-oḅolo-aị na, fụka-ye deinma olo na, ḍụẹịn tẹlẹma kụnụaị na dogi tẹ ịna etela ḅụ so Ijiputi muarị.
26Anịtẹso Juda nwẹnị ori owiapụ-amịnapụ ma ḅẹẹ, “Anị tọ sọye mịẹ wa pịrị wa nwẹnị wamịna iyimbere ḅe ḅaa tẹ ori ọmbie ḅọị kụma? 27Ó ḅoo, yee wa ọ̀ kẹ Isimẹlị furo-ḅẹ-apụ ma dẹrị tẹ yee wamịna ḅara ori ọgọnọ gbana apụ sọma, kẹ gotẹ ọkọ ḅẹẹarị, ori anie wamịna iyimbere, wamịna oju meni.” Tẹ ori owiapụ-amịnapụ ma ọ̀ ḅịḅị pokim. 28#Fịr 7.9Anịtẹso Midiyanị ḅẹ tuḅokọn-apụ ḅo anịanga ḅọrọm, tẹ ịn nwẹnị olulu mẹ ḅio Josẹfụ pakama-ḅo tẹ ọ̀ kẹ seleḅa si apakịrị kẹ Isimẹlị furo-ḅẹ-apụ ma dẹrị; tẹ ịn Josẹfụ ọkị so Ijiputi mum.
29Rubẹnị pịkịma olulu mẹ mum tẹ ẹrịm mịnẹ Josẹfụ ḅarị olulu mẹ ḅio ofori tẹso, ọ̀ nwẹnị ori akapa nụnụ kan, 30tẹ pịkịma ori owiapụ-amịnapụ ḍọkụma-mu, tẹ ḅẹẹ, “Tụḅọ ḅe anịjụ ọ̀ ḅarị ofori, anịsakị yẹrị, à nwẹnị tọ-anga da ḅẹ?”
31Anịtẹso ịn nwẹnị Josẹfụ kapa mẹ ọkị, tẹ gbọrụ oḅori ḅaa, tẹ nwẹnị kapa mẹ kẹ ọmbie mẹ kpeleki, 32tẹ ḅirima wararị ḅara nangwọtẹ vọrọrọ-kapa mẹ kẹ fịrịma, tẹ anị ọkị-ḅo ịna ḍaḅọ pịrị tẹ ḅẹẹ, “Mie wa ḍọkị-ẹrị ye, mịọkụ ḍikii, í owiḅọtụḅọ ḅe kapa ḅọrọ anị-o, anịanịa anị-a ḅoto.”
33Ọ̀ nwẹnị anị lekiri tẹ ḅẹẹ, “Ì owiḅọtụḅọ ḅe kapa mẹ anịị, piri-ḅio-ḅẹ nama ọ̀ ḅaa guluguluma tẹ; ḅio-maaịn-tọn-a ḅara ḅụ, Josẹfụ ini ọ̀ kanị-kọsịma tẹ.” 34Anịtẹso Jekọbụ ori opu akapa nụnụ kan, tẹ akpa kẹ ò ḅiri ḅụ ịnwaịn, tẹ tọnwa ḅẹ aḍin kẹ ori owiḅọtụḅọ ḅe kururum.
35Ori owiapụ-awọmẹ mamgba na, ori eremịna-awọmẹ mamgba na saakị ḅo ò dedemam, kụma ò dedema naa ḍụkụ-a, tẹ ḅẹẹm, “Ẹn-ẹn, à kururu ḅụ fị tẹ ini ì owiḅọtụḅọ ḅe na ị̀nịna ḍiḅi ḅa.” Mị-ḅara mie ọ̀ ḍa kẹ tẹmẹ-la ḅara kẹ ori owu ḅara.
36Mịọkụ Midiyanị ḅẹ apụ ma ọ̀ kẹ mu Ijiputi ḅụ Fero opu fịrịmẹnjịḅọ Pọtifa ye-yọ ḍikiḍiki ọmụapụ ma sịḅịdaḅọ ḅe dẹrị tẹ.
Attualmente Selezionati:
Suku-saakị 37: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
