Suku-saakị 40
40
Josẹfụ Maa Ikoliapụ Aḍawọ Puum
1Miemẹ mịẹ tẹ sakị kẹlẹ ḅọrọ tẹso, Ijiputi ḅẹ amadaḅọ ḅe iru-sụaḅọ na, ọ̀ fịturu-mịẹḅọ na nwẹnị ịn nyanaḅọ, Ijiputi ḅẹ amadaḅọ ḅe ịganịma. 2Fero nwẹnị ịganị nyana ori maa fịrịmẹnjịapụ sịḅịda iru-sụaḅọ ḅe na, sịḅịda fịturu-mịẹḅọ ḅe na pịrị, 3tẹ ori ịn kẹ ye-yọ ḍikiḍiki ọmụapụ ma ḅẹ sịḅịdaḅọ ḅe warị mẹ ḅụ ikoli ḅio suum, ikoli-warị mẹ tẹ Josẹfụ sime-sime anga mẹ ḅụ, 4Ye-yọ ḍikiḍiki ọmụapụ ma sịḅịdaḅọ ḅe tọn Josẹfụ pịrịm ọ̀ fịrịmẹnjịḅọ sọ ịn pịrịị, tẹ ori ịn koru tẹ fịrịmẹnjị ịn pịrịm, anịsakị ikoli-warị mẹ ḅio ịn kẹlẹ simem.
5Gbọrụ ḍin ḅụ ini maa apụ ma, Ijiputi ḅẹ amadaḅọ ḅe iru-sụaḅọ ḅe na, fịturu-mịẹḅọ ḅe na tẹ ikoli-warị ḅio simearị apụ ma nwẹnị ḍawọ kọn, ọrụḅọ-ọrụḅọ amịna ḍawọ kọnm, anịsakị ọrụ ḍawọ-ḍawọ anị fiearị ye nyanam. 6Dede-ḅio Josẹfụ ịn ḍọkụma-ḅo sakị ọ̀ nwẹnị ini ẹrị ye ịna aḅụụ fụkamarị. 7Mie ḅụ ọ̀ nwẹnị Fero afịrịmẹnjịapụ ma tẹ ọ̀ sịḅịdaḅọ warị ori na ikoli mẹ ḅio simearị apụ ma gbela, “Tiegotẹ mịmgba ọmịna atọrụ ḅẹlẹ-a?”
8Ịn nwẹnị ọ̀ pakịrị, “Wa ḍawọ kọnm, anịsakị arị puu wa pịrị ḅẹ gbọrụḅọ-sọ ofori.”
Josẹfụ nwẹnị ịn ḅẹẹ, “Ye-puufinji aka mẹ anị sime Tamụnọ pịrị-a? Àrị Ọ́ tẹkẹm, ọmịnị arị ḍuko ị̀ pịrịị.”
9Mie ḅụ sịḅịda iru-sụaḅọ ḅe ọ̀ kọn ḍawọ ḍuko Josẹfụ pịrị, tẹ ọ̀ ḅẹẹm, “À kọn ḍawọ ḅụ, girepu nwẹn-sịn sịnmgbọlụ ḅẹ ḍụọ ị̀ tọrọkọ simem, 10tẹ anị ọgọnọ tẹra aḅara sụa paka wararị. Ịnyịnya ma paka-ḅo gbọrụ sakị anị panga-ḅaa, tẹ lịkalị ma mgbọlụ sụa, tẹ mgbọlụ ma ḅịya saram. 11Fero iru-sụaye mẹ ị̀ ḅara-ḅio emi, tẹ à nwẹnị mgbọlụ ọkị-ọkị pọnjị-pọnji Fero iru-sụaye mẹ ḅio sụa, tẹ anị kẹ Fero ḅara-ḅio sụam.”
12Anịtẹso Josẹfụ nwẹnị ọ̀ ḅẹẹ, “Mie anị fiearị ye; tẹra sịn aḅara ma anie tẹra aḍin. 13Tẹra aḍin sakị ḅụ Fero ị́ saakị pakama-ḅo tẹ ị́ kẹ mu sin ị́ kọrịnama kiri ḅụ koroma ḅa, tẹ í tarị iru sụa ọ̀ pịrị sime sakị ḅụ ị́ iru sụa ọ̀ pịrị-pịrị ḅara kẹ iru kẹ Fero iru-sụaye ḅio sụa tẹ kẹ ọ̀ ḅara-ḅio ḅụ ọ̀ pịrị ḅa. 14Kụma ye ḅo ị́ na iḅi sakị ị̀ kẹ ḅiokoroma, tẹ iḅi-anga mẹ kẹ ị̀ na kọọn; arị ị́ tẹkẹm, ị́ ẹrẹ go Fero pịrịị, tẹ mị-ḅara ḅụ mị warị mẹ ḅio ori ị̀ pakama-ḅo ḅarị ḅara. 15Kẹ gotẹ ọkọ ḅẹẹarị, Hiburu ama mẹ ḅio furu mie ini ị̀ furu pakama-ḅo ye; anịsakị mịanga amụ à gbọrụ si sọ mịẹ-a ịn gotẹ ị́ kẹ ḅo nwẹn sime ikoli ḅio suu na-iḅi ye.”
16Fịturu-mịẹḅọ ḅe ẹrịm mịnẹ ọ̀ ḍawọ mẹ puu tẹ anị fieye mẹ iḅi sakị, ò Josẹfụ ḅẹẹm, “Yẹrị sọ gbọrụ ḍawọ kọnm. Fịturu sụa tẹra akana ị̀ sịḅị-ogbo simem, 17tẹ ọgọnọ ḅẹ kana mẹ ḅio, Fero fị ḅarị pulo kẹ fọịtẹ afịaị kịrị-kịrị mamgba anị ḅio emi, kụma ị̀ sịḅị ọgọnọ ḅụ feni amẹẹ ḅo anị gbọn-gbọn fịarị kana mẹ ḅio.”
18Josẹfụ nwẹnị pakịrị, “Mie anị fiearị ye, tẹra akana ma anie tẹra aḍin. 19Tẹra aḍin sakị ḅụ, Fero ị́ ḅụụ ḅụ ị́ sịḅị pẹlẹ-siin ḅa, tẹ í oju akpakpa mẹ kẹ gbọrụ opu sịn ọgọnọ kpọọ sololo ḅa, tẹ feni amẹẹ ma ḅo í oju meni mẹ gbọn-gbọn pẹị ḅa.”
20Tẹra aḍin karama ene mẹ anie Fero iyi ene; ọ̀ nwẹnị kopini afịaị sọ ori opu afịrịmẹnjịapụ mamgba pịrị, tẹ nwẹnị sịḅịda iru-sụaḅọ ḅe na, sịḅịda fịturu-mịẹḅọ ḅe na saakị pakama-ḅo ori opu afịrịmẹnjịapụ ma sime anga ḅụ. 21Ọ̀ nwẹnị sịḅịda iru-sụaḅọ ḅe kẹ ori iru sụa kiri mẹ ḅụ koroma, tẹ ori iru sụa Fero pịrị; 22kụma ọ̀ sịḅịda fịturu mịẹḅọ ḅe kpọọ ḅaam Josẹfụ wẹrịtẹ puu ịn pịrị ḅara ḅụ. 23Anịsọ sịḅịda iru-sụaḅọ ḅe Josẹfụ kẹ ḅiokoroma-a, kụma ori ọ̀ kẹ ḅioḅọrọmam.
Attualmente Selezionati:
Suku-saakị 40: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
