Paka-so 25
25
KỊNỊNYANAḄỌ Ḅe Ori Atomi Aḅara Kẹ Akpụrụ-Warị Mẹ Nama Ḅẹ Aị Ḅiim
(Pks 35.4-9)
1KỊNỊNYANAḄỌ ḅe nwẹnị Mozizi ḅẹẹ, 2“Ḍuko Izirẹlịapụ ma pịrị mịnẹ ini ịn kẹ agba mịẹ ị̀ pịrị ḅẹ ye ọkị ị̀ pịrịị. Tomḅọ goyegoye tẹ mḅọ ḅioḅẹngbọ ḅụ mḅọ ye pịrị pọkọ-tarịarị ḅọ ḅara ḅụ mie ị́ agbamịẹye mẹ daa-ọkị ị̀ pịrị ḅarịye. 3Anịsakị miemẹ anie agbamịẹye mẹ tẹ ị́ daa-ọkị ị̀ pịrị ḅarịye: golu na, seleḅa na, ojo na; 4bulo tọrụ na, pọpụlụ nwẹn-sịn tọrụ na, awụ tọrụ na sụa ye-ḍori-aị na; lọkọ-ḅịtẹ na, oḅori oju ḅẹ isuke kẹ ḍori aḅịtẹ na: 5ejimina oju-apara tẹ ịn awụ tọrụ kẹ ḅaa aị na, tẹlẹmatẹ isuke nyana-a nama-apara na akasiya nwẹn-sịn ḍụḅọ na; 6kẹ tọnjọ tọnjị ḅẹ pulo na, fịafịa-pulo mịẹ ẹnyị na, kụnụ lamarị dọkịma ḅẹ ẹnyị na; 7ịn kẹ ọnịkịsị nwẹn-sịn aḍụḅarị na, yela ja aḍụḅarị tẹ ịn kẹ Sịḅịda-Agbamịẹḅọ ḅe ẹfọdị nwẹn-sịn kapa mẹ na ekpe-gbaịn-kapa mẹ na dẹẹ ḅarị aị na. 8Anịsakị yee ịn fịafịa-yọ nama ị̀ pịrị, mịẹtẹ àrị ịna ogbo ḅio anga ḅarị ḅara. 9Fịafịa-yọ mẹ wẹrịtẹ nama ḅarị ḅara mẹmgba na, kẹ anị ḅio ḅirima ḅarị aị mamgba na tẹ à kẹ í ḍie ḅara mie ị́ kẹ anị mịẹ ḅarị ḅara.”
Ọḅọkụ-Igbe Mẹ Ịkasị Ḅẹ Ḅara
(Pks 37.1-9)
10“Ini akasiya nwẹn-sịn ḍụḅọ kẹ gbọrụ igbe ịkasịị. Anị ḅẹ nangwọ, tẹra ḅụọ-kuḅu na ḅara esenia ẹnzụ na (110 cm); anị ḅẹ finjima, maa ḅụọ-kuḅu na ḅara tẹra ẹnzụ na (66 cm); anị ḅẹ pokolo pịkị, maa ḅụọ-kuḅu na ḅara tẹra ẹnzụ na (66 cm). 11Karakara jen gwa-a golu ị́ nwẹn sọ sara anị gbaịn ḅa ọḅụ-na-kuḅu-na ḅụ, tẹ anị ḅẹ ịkọlị mamgba ḅụ mgbọlị sọ ḅara kẹ golu sọ sara anị pono ikelema-koro ḅa. 12Ị́ golu kẹ inia nụnụma tẹmẹ anị pịrị ḅa, tẹ arị kẹ anị ḅẹ inia aḅụọ ma ḅụ oḅolo ḅa, maa nụnụma gbọrụ pakịrị, maa nụnụma pịkị osi pakịrị. 13Akasiya ḍụḅọ ḅụ maa nangwọtẹ sịn-ikiḅa kịra pakama-ḅo tẹ golu sọ sara arị gbaịn. 14Maa nangwọtẹ sịn-ikiḅa ma kẹ igbe mẹ dogi ḅẹ ḅara kẹ arị kẹ nụnụma ma ḅio suu, igbe mẹ akaka ma ḅụ. 15Nụnụma ma ḅio mie ịn kẹ anị dogiarị nangwọtẹ sịn-ikiḅa ma sime ḅarịye, anị ḅụ ini arị sin ḅịa. 16Oloko kẹẹ wararị maa ḍụḅarị-apakịrị ma tẹ à kẹ ị́ pịrị ḅarịye ma ị́ anị kẹ igbe mẹ ḅio sụa ḅa.”
17 #
Hib 9.5
“Ị́ gwa-a karakara golu kẹ golu-golu ḅịḅị-gbaịnye tẹmẹ ḅa, tẹra ḅụọ-kuḅu na ḅara esenia ẹnzụ na (110 cm) anị ḅẹ nangwọ sọ ḅa, anị ḅẹ finjima maa ḅụọ-kuḅu na ḅara tẹra ẹnzụ na (66 cm). 18Ị́ golu kẹ golu-golu maa opu enjẹlị, anie ịn kẹ Sẹrubimu sịn apụ tẹmẹ ḅa; ọmịnị amana kẹ ịn ḅakụ-ḅakụ kọrị ḅa, ḅịḅị-gbaịnye mẹ ọgọnọ maa sịḅị ma ḅụ. 19Ị́ gbọrụ Sẹrobu tẹmẹ gbọrụ kunoma ḅụ koroma, tẹ osi Sẹrobu kẹ osi kunoma ḅụ koromaa, ḅịḅị-gbaịnye mẹ na arị na gbọrụ ḅụụ ḅụ tẹmẹ ye sime-ḅara sime ḅa. 20Sẹrubimu ma ḅịḅị-gbaịnye mẹ ọgọnọ-jụ ḅụ ịna apamba finji ḅa ịna apamba kẹ ḅịḅị-gbaịnye mẹ gbaịn ḅara ḅụ; ịn tọrụ kẹ jụmọ-jụmọ da ḅa, tẹ ḅịḅị-gbaịnye mẹ na ịna tọrụ na dama-dama ḅa. 21Ị́ ḅịḅị-gbaịnye mẹ kẹ igbe mẹ ḅịḅị gbaịn ḅa; anịsakị igbe mẹ ḅio mie í oloko kẹẹ wararị maa ḍụḅarị-apakịrị ma tẹ à kẹ ị́ pịrị ḅarịye ma kẹ sụa ḅarịye. 22Anị yọ mie à ḅo ọmịnị na ẹrịya ḅarị anga, anịsakị ḅịḅị-gbaịnye mẹ ọgọnọ, maa Sẹrubimu ma tẹ Ọḅọkụ-Igbe mẹ ọgọnọ simearị aị ma ogboku mie àrị oloko mamgba tẹ à sụa Izirẹlịapụ ma pịrị ḅẹ aị kẹ ị́ na ẹkwẹn ḅarịye.”
Fịturu Gbana Dẹbịlẹ Mẹ Ịkasị Ḅẹ Ḅara
(Pks 37.10-16)
23“Ị́ akasiya nwẹn-sịn ḍụḅọ kẹ gbọrụ dẹbịlẹ ịkasị ḅa; anị ḅẹ nangwọ tẹra ḅụọ-kuḅu, anị ḅẹ finjima gbọrụ ḅụọ-kuḅu na ḅara maa ẹnzụ na (44 cm), anị ḅẹ gele maa ḅụọ-kuḅu na ḅara gbọrụ ẹnzụ na (66 cm). 24Ị́ karakara golu sọ sara anị gbaịn ḅa, tẹ mgbọlị sọ ḅara kẹ golu sọ sara anị pono ikelema-koro ḅa. 25Dẹbịlẹ tọrụ mẹ ḅẹ akaka ḅụ ọ́ ḅara gbọrụ ẹnzụ finjima kẹ ḅọrọ gelema anị ikelema-koro ḅa, tẹ mgbọlị sọ ḅara kẹ golu sọ sara ị́ kẹ gbana ikelema ye mẹ pono ikelema-koro ḅa. 26Golu-golu inia nụnụma tẹmẹ anị pịrịị, tẹ ma nụnụma ma kẹ inia ịkọlị ma ḅụ anị ḅẹ inia aḅụọ ma ḅụ oḅoloo. 27Nụnụma ma ị́ kẹ akaka ḅọrọ gelema ye mẹ kpeki ḅa, kẹ dẹbịlẹ mẹ dogi ḅẹ nangwọtẹ sịn-ikiḅa ma ọlọ ḅẹ aị ḅara ḅụ. 28Akasiya nwẹn-sịn ḍụḅọ mẹ kẹ maa nangwọtẹ asịn mịẹ pakama-ḅoo, tẹ golu sọ sara arị gbaịn, anịsakị mịna aị ma mie ịn kẹ dẹbịlẹ mẹ dogi ḅarị aị. 29Ị́ anị ḅẹ ye sụa ẹfẹrẹ na, kẹ kụnụaị sụa ḅẹ ẹfẹrẹ na, anị ḅẹ ọlọ ye nyana opu ẹfẹrẹ na, kẹ iru agba mịẹ ḅẹ iru-sụaye na tẹmẹ ḅa; gwa-a karakara golu mie ị́ kẹ arị tẹmẹ ḅarịye. 30#Lẹv 24.5-8Ọḅọkụ-Igbe mẹ tọrọkọ mie dẹbịlẹ mẹ sime ḅarị anga, anịsakị ịn kẹ agba mịẹ ị̀ pịrị fịafịa fịturu sakị mamgba anị ọgọnọ sime ḅa.”
Tọnjọ-Sịẹmaye Mẹ Ịkasị Ḅẹ Ḅara
(Pks 37.17-24)
31“Karakara golu kẹ tọnjọ-sịẹmaye mịẹẹ. Tọnjọ-sịẹmaye mẹ ḅụ tọnjọ mẹ sịẹma ḅẹ anga mẹ na, anị ḅẹ aḅụọ ma na amana kẹ ḅakụ kọrịnama sọ ḅa; anị ḅẹ kọpụ na, ejikila na, fịlawa amẹẹ na kẹ anị ḅirima ḅẹ aị anị na gbọrụ ḅụụ ḅụ sime aị sọ ḅa. 32Sonioa ịkpangị anị ḅẹ akaka ḅụ sụa-paka ḅa: gbọrụ akaka ḅụ tẹra ịkpangị sụa-paka ḅa, tẹra ịkpangị pịkị osi akaka ḅụ sụa-paka ḅa. 33Sonioa ịkpangị ma, gberie-gberie ḅụ tẹra akọpụ tẹ alịmọnịdị#25.33 Alịmọnịdị anie tokuru-mbi kịkama sịnmgbọlụ kịkama ye tẹ ejikila na, fịlawa na nyana wararị aị emi. Mị ḅara mie anị tọnjọ-sịẹmaye mẹ ḅụ sụa-paka sonioa ịkpangị ma ḅụ sime ḅarị ḅara. 34Tọnjọ-sịẹmaye mẹ ḅioju ḅụ inia akọpụ tẹ alịmọnịdị kịkama ye tẹ ejikila na fịlawa na nyana wararị aị emi. 35Tọnjọ-sịẹmaye mẹ ḅụ sụa-paka wararị sonioa ịkpangị ma ḅụ, gbọrụ ḅụ simearị maaịn suku-ḅio goyegoye ḅụ, gbọrụ ejikila gbọrụ ejikila arị na sime ḅa. 36Arịḅẹ ejikila ma na, arịḅẹ ịkpangị ma na anị na gbọrụ ḅụụ ḅụ tẹmẹ ḅa, tẹ bebe ye mẹ amana kẹ ḅakụ gwa-a karakara golu sọ ḅa. 37Ị́ sọnọma atọnjọ ma tẹmẹ anị pịrị ḅa; tẹ tọnjọ ma tọnjị tẹ kẹ sịẹma ḅa mịẹtẹ anị bele kẹ anị tọrọkọ ḅele wararị anga mẹ pịrị ḅarị ḅara. 38Karakara golu mie ị́ kẹ ye kịrị sịzịlị mẹ na pẹmpẹmtẹ kala apanị ma na tẹmẹ ḅarịye. 39Karakara golu mẹ ḅẹ kpo, sọnọma ẹndẹ na oyia asi finji (3,000) mie ọ́ kẹ tọnjọ-sịẹmaye mẹ na, anị ḅụ sime aị ma na, kẹ anị ḅụ ye mịẹ ḅarị aị mamgba tẹmẹ ḅarịye. 40#Fịr 7.44; Hib 8.5Ẹrị mịnẹ arị wẹrịtẹ sime tẹ tụndụ mẹ ọgọnọ ḅụ à kẹ í ḍie ḅara mẹ mie ị́ kẹ arị tẹmẹ ḅarị ḅara.”
Attualmente Selezionati:
Paka-so 25: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
